FSS ZIRLAI 6: DAN THLENGNAK

ZIRLAI 6                                   MAY 5-11 

DAN THLENGNAK

SABAT TLAI LAM:                                                        May 5

TUZARH SIAR DING: Rom 8:1; Rom 7:15-25; Rom 7:114; John 20:19-23; Acts. 20:6,7; Dan. 7:23-25; Rev. 13:1-17.

BIBLE CANG KEN: “Cungnungbik Pathian a relsia dingih Pathian minungpawl a hrem ding. Pathian an biaknak can le Thukhaampawl thleng a tum ding. Pathian minungpawl cu kum thum le hrek sung a uk ding” (Dan. 7:25).

PATHIAN thukhaam elawknak hi ni neta bik thil thleng dingpawl theih thei nak  hrampi a si. A hlei in thukhaam a palinak  nisarih ni sabat thu kha mi tampi elawknak a si. Rundamnak hi zumnak thawngin Pathian thu ah a ummi vekin Sabat ni zarhih hmannak tiangin a tel theh. Ni neta minungpawl in Pathian thu lungih nunpitnak in rundamnak thlenpi theitu a si lo ti kan thei fiang. Himi hi dodaltu kan si maw, si lo timi a langfiangnak le hminsinnak pawl a si.

Hihi acozah  le sakhuanak komih thuneihnak in leitlun mi hmuahhmuah a tuahter ding tiah Rev. 13,14 in a simmi kha mipi parah an thuneihnak zatei a lang tikah cun can netnak ih thil thleng a si dingih oltei theih thei a si ding. Hipawl hi Rev. 14:7 thu zoh sehla Pathian in a mipawl kha van le leilung tifinriat le cerhtiput hmuahhmuah tuahtu kha biak uh tiah a ti (NKJV). Biak dingmi cu sersiam-tu a si ih, amah lo biak dingmi a dang a um lo.

Tuzarh ahcun Pathian thukhaam thu kan zir dingih Sabat thu kha zohfiang kan tum ding. Kan kiangkap ih Pathian thukhaam thleng an tumnak thu zirhnak kha kan hrangah ziangso san a neih? Zotei parah so can netnak zamrang in a thleng ding?

THAWHSAL NI                                                            May 6

THUTIAMKAM (The Promise)

Rom 8:1 hi Bible sungih thukam ropibik pakhat a si. “Minung sinak dan thlun loin, thlarau dan thluntu cu Khrih Jesuh thawn an pehzomaw ih sual thuthennak in an luat zo (NKJV). Hihi lung lukhuhnak vek a si. Himi ihsin a tha sawn mi ruahsannak kan hmu thei.

Rom 7:15-25 siar aw. Rom 8:1 ih thu kha Rom 7:15-25 in ziangvek in so hmual a neither?

Khrihfa khawvel ah a dik siseh, dik loin siseh elawknak nasa zet a um ih Paul in zumtu pakhat dinhmun ihsin fiang zetih a simmi cu : Sual sinak ngaingai kha a sim.  Khrihfa pakhat in  hitawk ah ziangvek phun khal in a buai theinak Paul in a sim. An sungih a ummi sualih kaih tangmi ah an thei aw lo. An tuah dingmi an tuah loih, an tuah lo dingmi an tuah. Paul ih a buaipitmi cu daan thu a si loih tisa sinak a si.

Sualnak siseh, thatnak siseh tuah hiarnak nei lo ngaingai an um maw? Hrin thar zo mi Khrihfa nunah hrial thei lo ding mi sual a um thu a sim lo. Zawnlung in Pathian thu thlun tumtu cu a ton dingmi harsatnak a um ringring timi a sim sawn. Curuangah tongkam lar zet a hmangih “thinlung rethei mi kava si so, thihnak lam I panpitu hi ka taksa pum ihsin zoin so I runsuak ding?” (Rom 7:24) tiah a tong. Himi thubuai cinfelnak cu Jesuh rinsan in zangfahnak sungih luttui hrangah “na sual” tiih mawhthluknak a um nawn lo” timi thu sunglawi a sarsuak. Sual a um rori ih zumtupawl tukforhnak an tongih an buai theu. Jesuh rinsan in Pathian thu vekih nun nei zumtu hrangah cun thukham in a mawhsiat thein awn lo. Annih cu tisa duhnak in an feh loih thlarau hruainak an thlun tu an  si.

Tui ni kan zirmi Bible cang siarsal aw. Paul ih thusimmi thawn ziangvek in so na kaihkuahawkter thei? Rom 8:1 ih a simmi hi ziangah so a sunglawi mi thukam a si thei?

TLAWNGKAI NIKHAT                                                  May 7

SUAL LE THUKHAAM (The Law and Sin)

Khrihfa nun ih a um rori mi sualnak (Rom 7:15-25) thu mizan ah kan rel zo. Himi thu a sim hlanah Paul in thukhaam thu a sim ih, ziangtin so minung in sual an tuah ih, ziangtin so thihnak a suahter timi thu a sim.

Rom 7:1-14 siar aw. Sual le thukhaam pehzomnak ziangtin so a um? Thukhaam ih in runsuak thei lodan ziangvek in so a sim?

Hitawk ah Paul ih thuzirhmi  a thupi zet mi pahnih a um. (1) Thukhaam hi buaithlak ah a ruat lo. Ziangahtile a thianghlim ih a tha. A buaithlak mi cu sual a si ih, thihnak thlenpitu a si. (2) Thukhaam in sualnak le thihnak ihsin in runsuak theinak thuneihnak a nei lo. Thukhaam in sual le thihnak ih buainak kha a phorhsuak. Thihnak  a thlenter tu sualnak lawng a langter ih a dang tuah theimi a nei lo. Sual thubuai a cingfel thei lo.

Ruat lem loin himi cang an siar tikah (thildang ruat loin) thukhaam dokalhnak ah an hmang theu. Cu tikah thukhaam 10 hlon hlonak a suak. Hivek hi Paul ih thusimmi thawn an kalhaw. Paul in thukhaam a tul nawn lo tinak pakhat hman a ngan lo. Thudik a suahpi mi cu thukhaam in sual a langter ih, thuthangtha a tulnak a suahpi. Sual langtertu thukhaam hlon theih a si lo tiah a sim. Thukhaam hlon hlonak in sim sehla ziangtin so kan ti ding? Thukhaam hi sual a si kan ti kem? Ti lamlam hlah. Sualnak hi a tha lo ti langtertu kha thukhaam a si. Daan in “mi thil daw hlah” ti hlah sehla midang thil dawt cu sual a si kan ti thei lo ding (Rom 7:7 NKJV).

Rom 7:13 fimkhurten siar aw. Paul in thukhaam a tul ringringnak thu ziangah so a sim?

Thukhaam in thihnak a thlenpi lo, sual in thihnak a thlenpi. Ziangtluk in so sual in thihnak a thlenpi timi thukhaam in a sim. Thukhaam hi a tha mi a si ruangah sual a that lonak a phorhsuak. Himi thu ah a cinfelnak a um lo, himi thu cinfelnak cu thuthangtha a si. Paul ih a simmi cu Khrih rundamnak a ngah zotu cun thlarau ih pekmi nun ziaza vekih um dingah a sim (Rom 7:6 NKJV). Cuih nun cu Jesuh rinsan nun a si ih, a ziaza thatnak, dingfelnak ruangih rundamnak  in pekmi zumih rinsannak a langter mi a si.

Thukhaam vekih na nunnak ih tonnun ihsin Pathian zangfahnak na tulnak ziangvek in so a langter?

TLAWNGKAI NIHNIH                                                  May 8

SABAT IHSIN SUNDAY AH

Seventh-day Adventist kan si vekin kawhhran dangpawl in Daan thupawl a cemih zangfahnak tangah kan um. Thukhaam ih ukmi kan si lo tiih an simmi na thei theu ding. Cemter an duh ngaingai mi cu thukhaam a palinak kha a si. Himi thu an sim duhmi san ngaingai ziangso a si? Mi tampipawl cun kha mi kha an sim duh taktak mi a si lo. An sim duhmi cu thawhsal ni sunloihnak dingah zarh khat sungih a ni khatnak Sunday ni zarh kha sabat ai-awh ih kan ulh mi a si tiah an ti.

Cutin an zumnak Bible sirhsan mi an tuah ve. A tangih Bible cangpawl hi thlung hlun sungih nisarih sabat kha thlung thar sanah zarh khat sungih ni hmaisabik ni Sunday ni ah a thawnnak thu a si tiah Khrihfa tampi in an ruat theu. Kha mipawl siar tikah mahte ih kan ruah dingmi cu zarh ni thawn a sinak thu a sim ngaingai maw? timi a si. Thil thlengmi ni le can thu an sim mi men a si maw timi kha ruat aw. Bible umdan ahcun zarh ni thawn a sinak thu pakhat hman a lang lo.

John 20:19-23 siar aw. Tirhthlah-pawl inn tlunta khan sungah an umkhawm lai thu a simih ziangruangah khatawk ah an um timi a sim. Thawhsalnak upatnak ih Pathian an biakkhawmnak thu a si maw?

Acts 20:6,7 siar aw. Hitawk ah Sabat kha zarh khat sungih ni hmaisa bik ni Sunday ah zarh ni a thawnnak thu a um maw? (Acts. 2:46).

I Corin 16:1-4 siar aw. Midang bomnak thawhhlawm pek dingmi kha zarh khat sungih ni hmaisabik ni Sunday ni ah nan inn ciarah ralringten rak ret ciar uh ti thu a sim ih, Sabat ihsin Sunday ah zarh ni thawn a sinak thu a simmi a um maw?

Himi Bible cangpawl ah Sabat luahlan thei dingah zarh khat sungih ni hmaisabik thu kha thu rin ih laktlak in a thupitnak laktlak a um lo. Bible lenglam ahcun a thu umdan ih zirin ziangmaw canah zumtupawl Sunday ni ih an tonawknak a um ko. Cuvek ih tonawknak ah biakkhawmnak ruangah Sabat zarh ni ai ah Sunday ah thawn a sinak Bible cangah hmuh ding a um lo. Himi thu a hung suaknak hi Sunday ulh hi nunphung ih a rak neitu Khrihfa ih ra luttharpawl ih thusuak a si ih, Khrihfapawl in kum za tampi a siar lawngih an siar theu mi men a si. Sunday ulh hramthoknak Bible cangah hmuh ding a um lo.

TLAWNGKAI NITHUM                                                 May 9

THLUNG THAR AH NI SARIH NI

Mizan ih kan zirmi vekin Sabatai-awh ah Sunday hman theinak ding Bible ah a um lo. Ni sarih ni Sabat Pathian thukhaam 10 sungah a tel mi ulhnak thu hi Thlung Thar sungah kan hmuh thei mi a um tam sawn.

Luke 4:14-16; Luke 23:55,56 siar aw. Jesui thih hnu le thih hlanah ni sarih Sabat ni an ulhnak thu ziangso in sim?

Jesuh thawn a um tlangmi nunaupawl kha thukhaam ih a ummi vekin Sabat ni ah an colhnak thu kan hmu (Luke 23:56). Hihi Sinai tlangah Pathian in lungtlap parih a nganmi thukhaam pahra lakih a palinak a si. Pathian ih thukhaam a dangpawl le a palinak Sabat ni ulhdan ding le thlundan dingpawl kha zarh ni dang thlengih ulhdan ding Jesuh thawn an um lai ah an zir mi zianghman a um lo. Cuhnak in a dungthluntupawl hnenah Jesui a simmi cu, “Keimah in duhdawttu cun ka thukhaam an thlun ding” tiah a ti (John 14:15). Thukhaam thlun nun amah in a nei ih ni sarih Sabat ni khal a ulh dan kelin a ul. Sunday ni hi Sabatai ah hman ding thu hi nunaupawl in an theih mi zianghman an nei lo.

Acts 13:14,42-44; Acts 16:12,13 siar aw. Ni sarih Sabat ulhnak ding thu hitawk ih thil thlengmi in ziangso in sim? Zarh khat sungih ni hmaisabik ni Sunday ni ulnak thu in simmi teh a um maw?

Hipawl ah Sabat ni zarh ulhdan kha Sunday ni zarh ulhdan ah a thawnnak tla a um lo. Jesuh zumih a dingfelnak rinsan mi zumtu hmaisapawl in Sabat ni an ulhnak kan hmu sawn.

Tirhthlah 16:13 ah a mak zetmi thu a um ih tirhthlahpawl kha  zum tu mi dangpawl thawn Sabat ni ah biakinn um lonak hmunah an tongaw. Zumtupawl cu tiva ralah thlacam khawmnak an tuah theunak hmunah an tongaw. Kha mi kha Jesui thih hnu kum tapi a liam zo hnuah a si ih, hi thu hi Sunday ulhnak ih ni zarh thawnnak sisehla a thawnnak thuhla lang loin a um lo ding.

Sunday ni ultu Zentail-pawl hnenah an ni zarh upat loin le soisel loin ziangtin so Sabat ulh dan ding thu na sim ding?

TLAWNGKAI NILI                                                       May 10

SABAT NI ZARH THAWN TUMNAK

Pathian thukhaam (10) hi a hmun ringring (Jame

2:10-12). Cumi sungah Sabat a tel. Khrihfa tampi in Sunday zarh ni ih ulh theinak thu um lo cingin ziangah so an ul a si ding?

Leitlun rampi uknak pali a hung suahnak thu Dan. 7  sungah a um. Babulon, Medopersia, Grik le Rome pawl an si. A palinak hi lei can cem tiangin uktu a si ding. A netabik ah thuneihnak nasa zet aneimi  Kifate hi Rome ram sung hmuahhmuah ah a athu neih nak karh vivo ding. Cuih thuneihnak cu Pope thuneihnak a si ih, Rome khua ihsin a hungsuak. An thuneihnak kha tui ni khalah ziang mawzat cu a tanglai. AD 1600 hrawngah Thomas Hobbes in hitin a ngan, “Sakhua thuneihnak ropi a suahnak thu ruat ahcun Pope thuneihnak olte ih theih thei ding a si. Rome cozah uknak a tlaksiat hnu ahcun a thi cia mi par khalah thuthen theinak neitu kha lal lukhum khumin lal tohkham ah a to. Thomas Hobbes Levia than, (Oxford: Oxford University Press 1996). Pp. 463.

Dan 7:23-25 siar aw. Sunday ni zarh ulh hramthoknak theithiam dingah ziangtin so in bawm?

Himi  tongfang a hmanmi kha a hramthok ahcun Aramic tongih ngan mi a si. Cang 25 ih Kifate thuneihnak in Daan thukhaam thleng a tum ding tiin a um. Lei thuneihnak in van thuneihnak ih tuahmi Pathian thukhaam a thleng thei kem?

Asinan, thuanthu cabu sungah cipciar zet le fiangten ngan mi a um lo. Kan hmuhmi cu Sunday ulhnak nunphung a neitupawl in ni sarih Sabat ni aiah an thleng mi nunphung cu Sunday ul Protestant remthatupawl in an ulh ruangah tui san AD 21 tiangin a nung ringring mi a si. Tui ni Protestant mi tam sawn cun Sunday ni zarh ulhnak kha Bible sung thukhaam (10) ih a ummi Sabat ulhnak hnakin a thluntu an tam sawn.

Rev. 13:1-17 kha Dan. 7:1-8,21,24,25 thawn zohthim aw. Ni neta thuhla thei thei dingah a bangaw mi ziangso an langter.

Daniel ahcun langhngan in a langter ih, Rome ah Pope thuneihnak rasuak ding thu a lang. Thuphuan ahcun uktu Bawi pawl thuneihnak ih fialmi “Biaknak” duh loih dodaltupawl suupawknak um loih hremnak kha ni neta lamah a um ding mi a lang.

Rev. 14:6,7 ah cang 7 nak ih tongfang in ziangvek in so thukhaam a palinak thu a langter. Exo. 20:11 hi ni netnak ih biaknak thubuai ah Sabat hi a thupibik a si ding tiah ziangvek in so a langter?

TLAWNGKAI NINGA                                                   May 11

RUAH BET DING: Setan kan timi rulhreng cu van ah Pathian thawn an doaw (Rev. 12:7). Amah kha lei ah Pathian zumtu le thukhaam a thluntupawl dotu ralpa a si. Rev 12:17; Rev. 13:2,4 khalah a um. Setan amah rori kha an biakmi ah a cang (Rev. 13:4). Van ah Setan in Pathian a do ih, ral a tho. Cuih doawknak cu leitlun tiangin a pehzomaw vivo. Pathian a donak bik  cu thukhaam 10 a daan thu ah  a si.

Thukhaam a palinak in lei le van tuahtu Pathian sinak a langter. Cumi in Pathian dang hmuahhmuah

Pathian lem an sinak a langter. Ni sarih ni kha thianhlimter mi ni minungpawl ih colh umnak ni ah pekmi a si. Cucu sersiamnak hngilh lonak dingah a si. Cumi cu minung thinlung sungah a nungmi Pathian kha hmaisabik ah retih tihzah ding le biak ding a si timi hminsinnak dingah a si. Setan in rinum zetih Pathian thukhaam thlunnak ihsin rinum loih um dingah le zinpeng zawh pi dingah a zuam rero. Curuangah sersiamtu Pathian a sinak langtertu, thukhaam kha do a tum mi a si (E.G White, The GreatControversy. Pp. 53.54).

Pathian kan biaknak a sanbik cu van le lei sersiamtu a si ruangah a si. Cuih ni sarih sabat cu sersiamnak lungphum hngouh san ih sersiamtu ih hminsinnak a si. Cun, zarh khat sungah lei le van sersiam a sinak in theihter saltu hminsinnak a si (Gen. 2:1-3). Ni sarih sabat hi Pathian thuneihnak hrampi a si ih, thuneihnak sangbik a neitu ih amah dottu Setan in Pathian thuneihnak a dodalnak hi mangbang ding a um lo.

Ni netabik ah Pathian in a lamtang mirin um leitlun ah a nei. Cu mipawl in Pathian thukhaam a zaten a thlunih sersiamtu langtertu umsun Sabat ni ah biaktlak Pathian kha an biak.

RELTLANG DING:

1.        Pathian thukhaam a tul lo tiih an hnon hnu ah, suala um rori timi thu an simnak ah thubuai ziangso a um? Kha mi ah nasa zetin an pehzomawk thei lonak kawhhmuh thei mi ziangso na neih?

2.        Sabatai ah Sunday ulh a si tiih thu elnak ah tonnunna neih mi ziang a um? Ziangtin so an thu na el theu, ziangvek ih hlawhtlinnak so na neih? Ni sarih Sabat ulhnak hi tuahnak ih rundam tumnak a si tiih thu elnak suahpitupawl kha ziangtin so na phi theu?

3.        Ni neta ih thil thleng dingmi hrang timtuahawknakah le Sabat thu midang thawn reltlangnak ah a ra thleng cing dingmi sahrang hminsinnak thu kha fiang zetih sim thei ding ziangah so a thupit?