Upna Hanga Diktanna

Thupatna:

Zomi Christian pawlpite lakah buailuatnapi ahihloh hangin, Adventist sungah kikupna omsialin, diktanna ngahzia tawh kisai mimal pomdan kibangkimzolo ahihna ong dawkgeihgeih theizel hi. Ahangpen Sabbath, thukham thu, le Adventist bek Pasian pawlpi man hi, cih thute in alungsim sunguh ah zungkha lua ahihmanin, thu dangteng tua in kaipan sak gawpkha uh hi. Tua bang lungsim tawh lungmuangkha uha, upna hangbekin dikna kingah hi cihthu pomhaksa thei uh hi.

Upna hangbek tawh diktanna kingah hi, acite, thukham deihlo evangelical pawlpite upna hi, ci-in, a nialthuk lian dingin khuaitangdep (wasp) abu-a galpang banga a om mitampi om hi. Tuamanin, gupna thu telsiang theih nadingin, kahlei adawlkhatna ahidingin, Romans 1-4 sunga Paul gen lungdamnathu pan diktanna koici kingah cih atomin ih en ding hi.

Paul gen Diktanna

Diktanna icih pen Pasian in mawhnei mikhat a mawhnate maisakin, midika a pomna ahi hi.  Pasian le mihing kikala kizopna nasep namkhat ahi hi. Tuamanin Pasian in tuabangin apom ciangin bang  dinmun le bangthu bulphuhin pom hiam?

Roman 1-2: Gupna pen Pasian sep Vangliatna hi-

Gupna pen alamdang Pasian nasep ahi hi: mimawh kimlai midikin a pomna ahi hi. Tua pen Paul in lungdamna thu ci hi. Tua manin Pasian midik ahidingte in upna tawh nungta ding hi, ci hi (Rom 1:1-18). Paul in Rome-te alaikhakna ah Habbakuk kammal a siksankik ahi hi (Habakuk 2:4). Habbakuk in bang dinmun le bangthu bulphuhin “Midik in upna tawh anungta ding hi” ci hiam cih theihnop huai hi. Tua hileh eite gup nadingin hih, “upna tawh nungta ding,” cih kammal in bang hangin thubulpi ahihna akhiatna ong dawkpan ding hi: Habbakuk hunlai-in Pasian teltuam Israel gam phel nih (Israel le Juda)in kikhenkhin uh hi.

Pasian pahtak diak Judah gam zong Pasian adingin, hakai pahtak lungheng, tanu pahtak zawlgai acih bang zel hi. Chaldeante lah milim tawh kidim, gilo ngongtat sawnsawn uha, thuaklahin om uh hi. Gitlohna tamlua, dikna omnawnlo, thuman kilehzat, gitlona in dikna zawhthawh hi. Tua manin Pasian in, midikte huloin, bangtanvei hicikoih ding hiam ci’n Habakkuk in Pasian kozelzel hi. Thamloin akithuaklah den gamlian Chaldeante Ama liatsak bangin gena, Judahte susia dingin azatin gensawnsawn laimawk hi. Pasian in gitlohna apung a awlmawhlo bangin ngaihsun hi. Pasian in, asawltak ci-a aminvawh-Babylon -te molhtumin zanga Judah gam dan piasak ding cisawnsawn hi. Judate danpiak nadinga azat amolhtum Babylon zong Pasian mahin ka susia ding cih genkhola, BC 530 gualin Persia-te in susia sak leuleu hi.

Pasian in ateltuam Judahte danpia, akhutzat Babylon zonglah susia veve, cih dinmun ah Pasian gamtatzia pen Habbakuk adingin telhamsa ahihmanin, lungsim buaina lian mahmah khat suak hi. Tua bang laitakin, akim ah bangbang apiang zongin Pasian tungah a upna, amuanna, le akingakna pen khahsuah tuanlo-a anuntakpih cinten ding athupi pen ahi hi. Tua hunlaitaka ong gingkhia kammal pen “Sawtlo in hong tangtung ding ahihmanin, azia ol hangin ngak in,. . . . midik in upna tawh anungta

ding hi” cih ahi hi. Kim le pam ah bangbang piangin tuakkha phial talehang Pasian tungah, mimal upna le muanna hoisak le khahsuah tuan peuhmah lo-a nuntak ding, Paul in Romans alian 1 sunga agen midikte nuntakzia ding upna acihpen ahi hi.Diktang cihciangin mimawhpa pen a upna hang tawh Pasian in midikin pompah hi cihna hi. Tua dinmun ngah nadingin upna simloh Pasian in kalh masak bangmah neilo hi. Jesus in ei mawhna teng Ama tungah kisuan-a, Ama dikna teng eitungah ong pia hi.

“Being justified” is literally “having been justified.”

The Greek verb represents the action as being completed.

We have been declared righteous, or regarded as

righteous, not through any deeds of law but through our

having accepted Jesus Christ. The perfect life that Jesus

lived on this earth, His perfect law-keeping, has been

credited to us. (Zoplai ding)

Rom 2: Mi khempeuh Kibang

Lawmta thum Kawlpau siam kituh:  Khatnapa in alawmpa kiangah, “Mendoh zua gah sar-zaa laidaa” (မင်း တို ့ရွာ က ဆာ ယာ လိုက် တာ) acih leh alawmpa in, “He, phi le maphi beneh” ( ဟေ၊ ဖီ လဲ မ ဖီ ဘဲ နဲ ့) cihsan vial nong. Athumnapa in alawmtegel awllolua, khutzekeei , “Mendoh na-zauh kah a thuu-thuu ve, kwaa” ( မင်းတို ့ ၂ ယောက် က အ ထူ ထူ ဗဲ) cihsan pian lainong  hiven.

Pasian in mihingte tungah amah theihtheihna lungsim pia hi. Tua theihtheihna lungsim tawh Pasian azongkik dingin deih hi. Piansaknate le nuntakziate tungtawnin mite in piangsakpa  pasian om hi, cih theihin, asul azuih theih nadingin  Pasian in, akhutma le khekhap tampi nusiat hi. Tuate tung panin sia le pha khenteltheih nading  zong Pasian in mihingte pia hi.  Gentehna-in, mithahna pen hoihlo hi cih mikhempeuh in thei-in, deihlo uh hi. Tuapen Pasian piak sia-lepha theihna khuak pan atheih uh ahi hi. Tuaban-ah, mawhna lutkhitciangin, Pasian in ama deihna leh gupkhiat nading mite in atheih nadingin,  Israelte tung ah, torah pia-in azaizawa atheih nadingun hilhbeh hi.

Ahi hangin Israel-te in torah in ahilh Pasian deihna zuituanlo uh hi. Vun a at uhhangin  Pasian deihna bangin nungta tuanlo uh hi—pumpi citunga vun a at uh hangin a lungsim uh vun ki-atlo hi--milim biakei in cin midangte ahilh hangun, amau biakinn nate gu uh hi. Pualam Judah hihna bek nei uha, Pasian deih Israel hihna lungsim neilo uh hi—Adventist pawlpimi khatin a om uh hangin  khalam Adventist lungsim nei tuanlo uh hi ici ding hi.

Tuamanin, torah neite le aneilote akibang leluh ahi hi. Ahangpen Pasian in thu akhen ciangin, torah neilote pen aneilohna zui-in, atheihna uh bulphuh in khen ding hi. Torah neilote aneilo cin pengtuanlo ding uha, aneite zong aneihna uh zui-in peng tuanlo ding hi. Torah neihleh neihloin amau diktansakna hilo hi. Judah hihna pen Pasian mi hihna hipahlo hi.

Christian hihna zong diktanna ngahna hipah tuanlo hi. Torah neilote in Pasian tungah a upna uhtawh anungta hiam? Torah neite in zong Pasian tungah upna tawh anungta uh hiam, cih pen Pasian mai ah diktanna adinga thubulpi ahi hi. Thukham zuihna lel(letter of the law) le sabbath tanna lel pen dikna ngahna hiloa, thukham deihna le sabbath deihna banga (spirit of the law) nuntakna pen diktanna ngahkhit cianga khanuntakna ahi hi. Ettehding: Pasian in Abraham pen kamidik ci hi. Abraham in sawlna torah zuiin, vunata, Pasian tawh thuciamna bawl hi. Anungciangin upnapupi cih min ngah hi. Abraham pen midik hi cihna ngahpa hia, Pasian ciapteh ahihi.

Tua ahihleh, Pasian in tuabanga aciaptehna pen, avun-at le thuciamna Pasian tawh abawlman hiam? (Gen 17). Pasian thukhun, ngeina, le thukhamte azuih man hiam? (Gen 12:5) Khat bek hilo hi: Abraham in vunatna, thuciamna abawlma, thukhun le thupiakte azuihma pekin Pasian um ahihmanin, tua a upna hang bekin,  Pasian in amah diktanna pia hi. Diktanna angahsak khit ciangin Pasian in Abraham tawh thuciam abawl panbek ahi hi.

Tuamanin diktanna pen, Pasian in amah a um mite tungah, a upna uh hangbeka, apomna ahi hi. Judah-te zong teltuam hihna le Sabbath le thukhamte azuihmana Pasian in diktanna angahsak hizenzenlo hi. Diktanna angah khempeuh pen a upna uh hangbek ahi hi (Heb 11 limtak sim in). Adventists-te adingin zong sabbath le thukham zuih man, pawlpi man tawh kizopmana diktanna kingah ding hizenzenlo-a, mimal in Pasian tunga ih neih upna hang bektawh kingah ding hizaw hi.

Etteh ding: Singlamteh tunga Jesus tawh kikhai khawm nihte lakah akhatpa in, Jesus pen mawhneilo, Mesiah hi cih a upmanin, muangtakin “Na gam ah ong mangngilh kei in” cingam hi. Tua kammal apulak lungsim dinmun in amah midikin Pasian ciaptehna ngahsak hi.  Tua adingin ama sabbath tanna le thukhamzuihna amasuan theihding le alah ding khatbek omlo hi.

 Pasian in dik atansaknopte atangsak hizawa—kuamah  vakham theih, va kuppih theih, le vahazat theih a omthei nam hilo hi. Paul in Pasian vangliatna acih pen ahihi. (Zop lading)

Abraham le David: Upna tawh Diktanna Ngah: Romans 3-4

Leitung ah midik omlo hi. Agawl uh, kamsia pau dingin, akihongsa hankhuk tawh kibang hi (Rom  3:9- 10) —gamtat sia akigamta khempeuh lungsim ngaihsut pan ong kipan hi. Pumpi tawh agamtakhia naikei zongin alungsim ah gamtatsia zo hi. Tua manin lungsim le pumpi tawh mawhna bawlden uh ahihmanin Pasian mai ah adik apeng kuamah omlo hi. Mawhna ong luta kipan mihingte lungsim pan Pasian limlemeel sutna khangzawloin, kiamsuk-suk hi. Ahoih gamtat ding sangin asia gamtat ding olzaw hi—mimal kidal nadingin izat lungsim in asia vive suak hi. Etteh ding:

Pawlpi sungah mikhat in zu netheizel hi. Pawlpi in zunek kidam dingin avahilh ciangin, “kei nong cih tuan uh, . . . .pa inzong leengahzu dawndawn hilomaw, namkinkensa-in biakinn ong kikhop natheih uh hilo maw? Keibek, nongcihse uh, maitang khenlua uhteh?” Amah akidal nadingin midangkhat paulapin logic neitakin lawtpah hi—Adam in Eve, Eve in gul angawhdan, atawpna ah Pasian ngawhto-a temsawnte tangthu in zomzel hi.

Hihbang lungsim tawh thukham zui, sabbath zang, pawlpi dikah om sam napi, lungsim pan akipan ding dikna omlo hi. Sabbathni tawlnga mah napi, sabbath ni tawh kipawl sianthona in zuilo, thukham kammal bangin mithatlo napi, alungsim ah mihuatna, hazatna, elna, thangpaihna, muhdahna pen hik le namsia pung bang hi. Gahleteh bek nekding, Adventist lifestyle cidep in hamciam napi alungsim ah hehpihna, maisakna hamsa samahmah zel hi. Hihbang thukhamzuihna in DIKNA piangsak theilo hi—ahangpen thukham le Sabbath cihte in mihingte dikna apia dinga Pasian geelna lampi hilo hi.

Lungsim akheeltaktak pen ei hanciamna le zuihna in kheel zolo hi—kamkei in ama gial pen amathuin akheltheihloh bang mah hi, cin laisiangtho in mihingte kikheel theilohzia gen hi. Tua dinmun mah ah Pasian in mihingte adikin pom hi. Dikna taktak pen amau le amau akikheel theilo mawhnei mite Pasianin midikin a pomna, hamphatna lianpi, ngahna ahi hi.

Abraham: Pasian in amah diktanna ngahsak hi— midik ci in pom hi. Tua banga midik cihpomna angah nadingin athalawh hileh, athaman angah cihlel ding ahi hi. Tua bangtawh kingah hileh Buddhish lampi in zong dikna ong ngahsak theiding suaka, nial ding omlo hi.  Ahizongin Laisiangtho in, “Abraham in Pasian um ahihmanin, tua a upna pen diktanna in kisimsak hi” ci hi (Rom 4:1-5). Pasian in Abraham vahopihzela, neihsa tampi kongpia ding ci hi. Tualaia aneihsateng zong akemding tapa neilo ahihmanin, agamluah dingin Damascus khuami Eliezer sehkholzo ing ci hi. Nitak khuaphat khatin Pasian in Abraham samkhia in vana aksite simsak hi. Nasim zawh leh nasuan le khak tuazah phading hi, ci ponghelphot hi. Abraham in um mah ing cipahlian lel hi—asuan le khak aksizah pha ding hun om takpi ding cih um takpi hi (Piancil 15:1-6). Hih pen Pasianin Abraham midikin aciaptehna thu bulpi ahi hi.

Tuakhit ciangin Pasian in ama Pasian ahi tawntung dingin kizopna kamciam, leitang luah nading, le thuciamna letkip ding vaikhak hi.—Upna bek bulphuha midiklote midikin apom Sian-Braham kizopna pen akip suak dingin Pasian in Abraham vaikhak hi (Pian 15: 7- 21).

David: David in zong, diktanna pen gamtat le zuihna tawh kithalawh thei hikei in, upna hang bek tawh kingah hi cih kipsak hi (Rom 4:6; Late 32:1-5,7, 10). Alaphuahna sungah, David in;

1)“Akhialhnateng maisakna angah mi hampha nalawmlawm ee,

2) Topa in a mawhpaihloh mi, lungsim thelthang lomi thupha ngah hi.

3) Ka mawhna imleng, sun nilohin, ka pumpi in thuaklel lua ee.

4) Sun le zan in, Topa aw, na khut ka tungah giklua-a, nattunin khaal nisa bangin ka tha le ngal in zong thuakzo nawn kei.

5) Nang tungah kamawhna pulaak vetin, ka gitlohnate ong im nawnkeng Topa. Ka palsatna teng ong thum ing Topa, Nang ka mawhna nong maisak hi.

7) Nangmah bek ka belh nahia, gentheihna pan ong humin, hotkhiatna la tawh huang bangin nong um hi.

10) Topa a muangte itna le khualna in tuambit ding uh hi” (KKP).

Hiteng aphuah nadingin David in haksatna, lehbawlna, le mi zisa tungah palngulna nawkto khin hi. Tuateng in amah khaal nisathuak bangin thazaw sak hi. Tua ciangin Pasian tungah kiko hi. Tuapi mah Pasian abelh ciangin, Pasianin a gamtatnasa teng le gamtatpha ding kalphotlo-in, Ama tunga a upna bek bulphuh in David pen midikin pom hi—teltuam Judah hihna le kumpi hihnate in bangmah huh theilo hi. Ahihhang Pasian in amah midikin pom hi, ci’n Paul in alimgen phapha ahi hi.

Abrahma dikna ngahna tawh kisai-in zong, thukham le Kamciam saikak hi. Kamciam kici Jesus tungah upna tawh pomcip bikbekna hangbekin Abraham in dikna angah

bangmahin, diktansakna angah ding khempeuh in zong Abraham bangin upna masuan ding bek hia, zuihzawhna le pawlpimi hihna tawh kisailo hi, acinuam ahi hi (Rom 4:7-22). Tua mah bangin khangthak Juda abang abeibang pawlpi hi-ung cia a angtang Adventist-te zong ong kumkik dinghi ci-a alam-et uh Jesus tungah upna tawh apomcip bikbekna uh in Pasian diktansakna angahsak bek ding ahi hi, cih ong hilh ahihi (Rom 4:23-25). 

Thukhupna:

Atunga ih gen Rome pawlpite tunga Paul laikhakna panin Diktanna ong kipiakdan pen:

1.Diktanna pen, mawhnei mikhat mawhneilo midik banga Pasian in a pomna ahi hi.

2. Tua bangin a pom nadingin, mawhnei mi kiang pan, upna simloh Pasian in nget le kalh masak nadang bangmah nei kilkello hi.

3. Tuabang lianga mi ginalo khat apom ngamna le apom zawh nadingin hangsanna le hihzawhna pen mihingte gupkhiatna nadinga Pasian nasep avangliatna ahi hi.

4. Tua Pasian vangliatna in na asepkhiatna, Abraham le David tungah ong kilangkhia hi. Abraham le David in zong Pasian pomcip bikbek tuak uh hi.

5. Pasian kiangpan diktanna angah mi khempeuh zong, Abraham le David mah bangin Pasian a upman un, midikin pomna ngah uh hi-a, Upna tawh Pasian pomcip bikbekna

simloh adang in diktanna ong ngahsak theilo hi.

6. Torah nei-a athei Judahte le, aneilo gentile mite avekin Pasian muhna ah akibang uh hia, midik khat beek omlo uh hi. A torah zuihna uhleh abiakna ngeina hanga diktanna

kipia hileh, diktanna lungdamna thupen, hehpihna hinawnloin, sepna thaman angahkik uh hilel ding hi. Tuazah dingin lah kuamahin apicinzo omtuanlo uh hi.

7. Tua manin Pasian hehpihna tungah Upna bekin mawhmaina ong ngahsaka, tua pen Paul in diktanna, acih pen hia, midik banga Pasian in ongpomna ahi hi. Tua thu apomcip bikbek lote adingin apaulap nop le amasuan nop uh (pawlpi man hihna, sabbath, thukham, cihte akipan) tampi om ding ahi hi. A Gelh: Pr Kham Khen Pau