Sinna 22: Khrist Leh Sabbath Ni

Khrist Leh Sabbath Ni

        Thupatna:    Khat veivei mihing in Pasian' thugente uanggenin, a khiatna lehkaihin, Pasian' deihna lumlet hi. Sabbath tanna tawh kisai-in Judah mite' lakah tua bang lian a hihi. Pasian vangliatna leh hong itna phawkna mualsuang a hih lam mangngilhin, Pasian' thupiaksa tungah thukham tampi behlap uha, mite' a dingin a vangik ni khat suak sak uh hi. Jesu in mihing' bawl tawm thukhamte hem khia a hih manin, mi kimkhatte in, Jesu in Sabbath phiat hi, ci uh hi. Jesu in Sabbath ni bangci ngaihsut hiam cih tu-in ih sin ding hi.

1.        Leitung a piang sak kua hiam? Ephesians 3:9.
            Theih ding:    Pasian in leitung piang sak hi, ih cih ciangin, a taktakin Jesu a hihi. Pa leh Kha Siangtho mah bangin Jesu in Pasian a hihi (Colosians 1:16; Hebrews 1:3). Tua a hih manin, piansakna phawkna mualsuang a hi Sabbath ni pen Jesu in thupi ngaihsut ding hi.

2.        Sinai mual panin Sabbath thupiak a kihel, Thupiak Sawmte kua'n pia hiam? Nehemiah 9:12-14.
            Theih ding:    Sabbath tan ding thu a pia Pa in, meiipi leh meikuang tawh Isreal mite a makaih Pa mah a hihi.

3.        Meiipi leh meikuang lakah Isreal mite a tonpih kua hiam? 1 Corinthians 10:1-4.
            Theih ding:    Meiipi leh meikuang lakah Isreal mite makaiha, Suangtum pana tui a pia Jesu mah in, Sabbath tan ding a hong sawl a hihi.

4.        Jesu in, bangci Topa hi'ng kici hiam? Mark 2:28.
            Theih ding:    Sabbath a phut, thupha a pia, tan dinga a hong sawl Jesu hi-a, Ama'n "Ka Sabbath" ci pah hi (Ezekiel 20:20).

5.        Jesu leitung ah a om lai-in Sabbath a tang hiam? Luke 4:16.
            Theih ding:    Jesu in khatvei nihvei bek Sabbath a tang hi lo-in, "ngeina" a a neih a hihi.

6.        Sabbath tanna a kihel Pasian' thukham, Jesu in bangci gen hiam? Matthew 5:17,18.
            Theih ding:    Jesu lah kikhel lo, thukham lah kikhel lo hi (Hebrews 13:8). Piansakna phawkna dinga Sabbath tan ding mihing a sawl masa Pa in, a tawntung a ta dinga a ngaihsut a hihi.

7.        Ama sih khit cianga A nungzuite'n a zuih dingin Sabbath tawh kisai-in Jesu in bang hilh hiam? Matthew 24:20.
            Theih ding:    Rome galkapte in Jerusalem khua susia ding a hihna thu Jesu in gen hi. Amah a sih zawh kum 40 dektak ciangin hong piang hi. Tua hun ciang nangawn zong A nungzuite in hoih taka Sabbath a tan ding lamen hi.

8.        Jesu a kikhailup khit ciangin, Jesu ita a nung a zui numeite in bang ni tang uh hiam? Luke 23:56.
            Theih ding:    Jesu' sihna hangin thupiak lina-a kipan thupiak dangte zuih ding a kikhelna bangmah om lo hi.

9.        Sabbath ni tawh kisai-a Paul' ngeina bang hiam? Acts 13:14, 16:13; 17:2; 19:4.
            Theih ding:    Paul zong, a biak Jesu mah bangin Sabbath tan ding ama ngeina a hihi.

10.        Sabbath tanna ah Paul in, Judah mi a hi lote a hel hiam? Acts 13:42-44.
            Theih ding:    Hotkhiatna ding kamciam leh hamphatnate mi hon khat a hih kei  leh nam khat' a ding beka kiciangtan hi lo hi. Jesu in , Sabbath ni mihing' a dinga kibawl hi, ci hi (Mark 2:27). Minam khempeuh' kianga Pasian' hotkhiatna thupha a puak kawikawi pen Paul hi, kici ciat hi. Sabbath ni zong tua thupha-i seh khat hi-a, Piang sakpa Pasian phawkna mualsuang a hihi.

11.        Lei Thak ah Sabbath a om ding hiam? Isaiah 66:22,23.
            Theih ding:    Mawhna a om mapekin Sabbath a om khit mah bangin, mawhna khempeuh a kiphiatmang khit ciangin zong Sabbath kitang ding hi. Tua ni in Pasian' piansakna phawkna hi-a, a tawntunga a om ding a hihi.

12.        Jesu in Amah a it mite' thu bang gen hiam? John 14:15.

            Thukhupna:    Ama thupiakte ih zuih ciangin Amah ih itna kilang hi. Jesu in zong A Pa' thupiakte a zuihna tawh A thu a manna kilang sak hi. Thukham a susia ding, a neubawl dinga hong pai hi keng, ci hi. A taktakin Jesu in, thukham lian sakin zahtak kai sak hi. Jesu in zuihna tawh thukham kicing sak hi. Eite zong ih lungsim a maan a hih leh tua bangmaha ih zuih ding a hihi.