FSS ZIRLAI 8: SERSIAMTU BIAKNAk

ZIRLAI 8                                  May 19-28 

SERSIAMTU BIAKNAK

---

SABAT TLAILAM:                                      May 19

TUZARH SIAR DING: Reve. 14:6,7; Matt. 24:14; Gal. 3:22; Luke 23:32-43; Gen. 22:12; Rev. 14:8-12.

BIBLE CANG KEN: “Van ah a zam rero mi vancungmi pakhat ka hmu. Amah cu leitlun miphun kip, tong kip, hrin kip le ram kip hnenah kumkhua ih a hmunmi thuthangtha thantu a si” (Thup. 14:6).

SEVENTH-DAY Adventist kawhhran kan si vekin Bible pomdan  tlaitluan thutak kan pom (2 Pet. 1:12). Pathian in minung hnenah a thutak kha sankhat hnu sankhat, a tleunak a tul canah tleu sinsin in phuan lang a si tiah kan pom. A hmaisabik thuthangtha thukam kha Seemtirnak 3:15 ah a lang ih, nunau nui cithlah a tluk mi nupa tei hnenah ruahsannak a pek. Abraham hnenih thukam kha a tesinfapawl miphun tum le cak ah an cang ding tiah thlawsuahnak a pek mi vek thlawsuah kha leilung tlun miphun hmuahhmuah in thlawsuah in dil ding (Gen. 18:18 NKJV) ti ah a ti. Hihi thuthangtha thukam phuannak a si. Jesui a phuanmi cu, “Milai fapa hi ren mi si loin riantu ah le mi tampi tlen dingah a nun pe dingin a ra” (Mark 10:45 NKJV). Hi mi hi thuthangtha thutak ropi sawnih phuannak a si.

Tui ni ah vancung mi pathum thucah (Rev. 14:6-12) kha Jesuh rat zik zawngih khawsa mi Khrihfapawl ih a famkim mi ruahsannak kan zummi kha tlaitluan thutak kan ti.

Vancung mi pakhatnak thucah ih a tumtah mi hmuhdan tuzarh ah kan zir ding. Can netnak ih tihnung lak khalah thutak ah rinum zetih um a tumtupawl hrangah a thupi zet.

THAWHSAL NI                                           May 20

LEITLUN KHUAZAKIP AH THUTHANGTHA SIM

Rev 14:6; Matt 24:14; Matt 28:19 siar aw. Tumtah mi bangaw ziangso kan hmuh thei? Kawhhran ih kan tumtah mi vekin midang hnenih thuthangtha sim a thupitnak theithiam dingah ziangtin so in bawm?

Mi in vancungmi pakhatnak thucah kha (Matt. 28:19)  kawhnak ropi a si ih, tui sanah in pekmi a si, tlaitluan thutak kan timi a si ko tiah kan pom.

Bible cangpawl in leitlun khuazakip ah thlenpi ding timi an langter. Ramkip phunkip, hnam kip, tong tin le mi hmuahhmuah hnenah thlenpi ding a si. Himi thucah hi leitlun khuazakip ih an ngah dingmi covo a si.

Gal. 3:22 siar aw. Thuthangtha hi leitlun khuazakip in an theih a tul timi theithiam dingah a simmi in ziangtin so in bawm?

Leitlun sualnak ih in simfiangmi cu leitlun khuazakip ah feh dingih kawhmi le thlahmi kan si. Minung hmuahhmuah in sualnak kan tuah theh. Pathian daan buar sual thu neihnak tangih kharhkhum mi kan si. Eden ah Adam a tluknak in mi hmuahhmuah a kai-awk theh ih, a luatmi zohman kan um lo. Sualnak ih rahsuah mi kan tuar cio ih thatter sal theih a si lo. Cuih tha man kumkhua hloralnak hmabak kan si.

Himi remthat salnak dingah khua in khan sakmi kha Jesui nunnak, thihnak, thawhsalnak le van hmun thianghlim ih a rawngbawlnak  a si. Sual thubuai cingfel theitu cu amah a si. Jesui ruangah Pathian pekmi ruahsannak sunglawi kha mi hmuahhmuah in an theih a tul. Curuangah Seventh-day Adventist pawlin leitlun hmuntin ah rawngbawl ih kan fehnak a si. Jesui thucah pekmi kha a thei lo mipawl theihter dingah kan feh.

Midang hnenah thuthangtha simin thucah phuannak ah thlarau lam hlawknak a um thei. Midang hnenih thuthangtha phuannak kha Jesui ratsalnak hrangih timtuahawknak a si .

TLAWNGKAI NIKHAT         May 21 CROSS PARIH FIFIR PA LE KUMKHAW HMUNMI THUTHANGTHA

Rev. 14:6 sungah “Kumkhua a hmun mi thuthangtha” kha leitlun mi hmuahhmuah hrangah ruahsannak thucah phuan ding mi a si. Himi hi mi hmuahhmuah hnenah ruahsannak a pe theitu thucah a si.

Luke 23:32-43 siar aw.Hi mi thuanthu in misualpawl hrangah kumkhua hmunmi thuthangtha sunglawi ziangtin so a langter?

E.G White in mifir pai thu hitin a ngan: Sual lutuk ih dan pahbaltu a si lo. A sualnak khuh hlosak dingah Jesui thuhla zingzoitu a si. Amah kha sual khur thuk ah a pil vivo , an tuahmi sualnak cemter dingah kaih an tongih Cross ah thi dingin thuthen cat mi a si. E.G White, The Desire of Ages, pp. 749.

Fifir pai parah ziangso a thleng? Cross parah khai a si ih, Jesuh a vun hmu ih zo a si ti a theithiam. Cule a au suakih “Bawipa na ram uk dingih na rat tikah I hngilh hlah aw” (Luke 23:42) tiah a ti.

Jesuh ih a sawnnak cu, “A tha ka rual, nangmah lo bom ka hiar tuk, daan na buarnak nasa deuhdeuh in na tuah ih, sual khur thukah na lut deuhdeuh ko lo maw? Jesuh in mipi hnenih thu a rak simmi a laksal ih, Dan thiampawl le Farasipawl hnakih nan fel sawn lo  ahcun vancung uknak sungah nan lut thei lo ding” (Matt. 5:20). Jesuh in a liamcia mi fifir pai sualnak a phorhsuak a si maw?

Si lamlam lo, Jesui a simmi cu hlanih a sualnak ruangah camsiatnak a parih a thlengmi le amai dingfelnak in thiamconak a ngah thei lonak thu a sim (Matt. 27:44). Cule sual a sirawknak le a hrintharnak a hmuhsak ih a tu ah na hnenah ka lo sim. A tu rori ah thu ka lo kam, na sualnak, daan na buarnak, na palhnak pawl ngaithiam na si theh zo. Paradise ah keimah thawn kan um tlang leh ding (Luke 23:43) ti ah ati.

Hihi vancung mi pakhatnak ih thucah a hrampi kumkhua a hmunmi thuthangtha a si. Himi thutak tel loin thukhaam thu, Sabat thu, thihnak umdan thu, sim theih a si lo. Himi thuthangtha tel lo thuzirhnak hi ziangtin so an thinlung sungah a lut thei ding?

Himi thuanthu ihsin ruahsannak ziangso na ngah?

TLAWNGKAI NIHNIH                                 May 22

PATHIAN TIHZAH UH, A SUNLAWINAK PEK UH

Leitlun hmuahhmuah ah kumkhua hmunmi thuthangtha simnak vancungmi pakhatnak ih thucah a fiak, a kauhnak a tawi, sau kan rel theh zo. Kumkhua ih a hmunmi thuthangtha kan phuanmi sungah tui can hrangih thucah thuthangtha thutak tla kan sim tel a tul. Rev. 14:7 thu hi can cemnak hrangih “tlaitluan thutak” khal ka ti thei.

Rev 14:7 siar aw. Pathian tihzah ih sunloih pek timi ziangso a si? Thuthangtha pomdan thawn an remawknak ziangvek so a si?

Pathian tihzah le sunloihnak pek hi pehzomawknak a um lo. Bible simdan ahcun Pathian tihzahnak kan nei ahcun sunlawinak kan pe thei ding. Cumi cu midang hnenah pek thei mi a si.

A tangih Bible cangpawl siar aw. Pathian tihzah timi le sunloih peknak an zomawknak theithiam dingin ziangvek in so in bawm thei ding? (Gen. 22:12; Ex. 20:20; Job 1:9; Eccle. 12:13; Matt. 5:16).

A tlunih Bible cangpawl ah Pathian tihzahnak timi hi zawnlung ih thu thlunnak thawn a zomaw. Pathian thuthu ih nun cun a dik mi kan tuah theu. Cule a sunloihnak kan thlenter theu. Pathian tihzah hi Pathian sinak ah mak tiih upat tihzahnak sunglam nun a si. Pathian tihzah ding kan sim ih sual cithlah misual thihnak hmabak kan si. Zokhal in kan tuahmi sualnak ruangah a tu le tu ih thinphan thla lau nak kan tong ringring. Ziangahtile an tuahmi sualnak hrangah Pathian dingfelnak le thatnak in cohlan tlakah a cangter si lo sawm? Himi ihsin Pathian tihzahnak a suak. Cuih Pathian tihzahnak in sual thlahnak dingih Cross lamah in fehpi hmaisa. Pathian thiltitheinak thawngin kan sual thianfai sak kan sinak  a phuangsuak. Cross um lo sehla kan thlarau hloralnak ah a thleng ding (Matt. 10:28).

Pathian tihzahnak tonnun na neih zo mi ziangso a um? Pathian tihzahnak ruangah thil tha tuahnak hi kan thlarau lam hrangah le kan zumnak ruangah Pathian fialmi vekin upat zetih umnak ah ziangtin so in bawm?

TLAWNGKAI NITHUM                                May 23

THU A THEN CAN A THLENG ZO

Vancung mi pakhatnak thucah sungah Pathian tihzah pomdan le sunlawinak pek timi kha thuthennak thawn an pehzomaw (Rev. 14:7). Bible in fiangte ih in zirhmi cu Pathian hi a dikmi thuthentu a si. Ni khat ni ah leitlun ih thuthentu Bawi pawl an palhnak le an tlaksam zia a langter leh ding.

Pathian tihzah timi mangbang ding a um lo.

Kumkhua a hmunmi thuthangtha ah thuthennak a tel. Hitei pahnih an pehawknak ziangso a si? Thuthangtha hi lungawiza thuthannak a si. Pathian daan buar mi sual kan si ih, Cross parih mifirpa vekin thuthen ni ah sual man dantatnak ih hrem phu kan si. Asinan, cuih thuthennak dantatnak kan tuar nawn lo ding, kan luat zo.

A tangih Bible cangpawl siar aw. Mai dingfel thatnak in ziangvek in ka ding thei timi ruataw aw (Matt. 12:36; Eccle. 12:14; Rom. 2:6; I Cor. 4:5).

Kan lu ih sam a siar thei thehtu Pathian kha lei le van thuthentu a si. Curuangah kumkhua a hmunmi thuthangtha hi lungawinak thuthannak a si tiah dik ciah in kan ti thei. Jesui dungthluntu mi rinum hrangah cun thuthennak a thlen tik khalah sual puhnak in a luat. Jesui thiamcoter ih kholhfai thianhlimter zo mi an si (I Cor. 6:11). Thuthennak fehtlang in dingfel thianghlimnak an ngah ruangah Jesuh kha an dingfel thianghlimnak a si.

Tlapih ei mi thir vekin sualih ei siatmi an si nan, an sirawk ahcun Pathian hmaiah soisel ding a um lo mi ah a cang. Sualnak tha man thihnak an tuar lo ding. Kan palai Jesuh in a tu rori sualsirtu, zumnak nei in nun pekawtui hrangah famkimten kan ai-awh in dilsak zo. Calvary ih thucuhawknak ruangah camsiat an sinak ihsin Jesuh in thu suahsalhnak a tuahsak zo ih, a nehsak zo. Pathian thu kha Cross parih thihnak tiangin a thlun ih, van le lei ih thuneihnak hmuahhmuah a hnenah pek theh a si zo. Pathian zangfah lainatnak ruangah misual hrangih hremnak tuahmi cu a famkim in theh a si zo tiah a phuang. E.G White, Testimonies for the Church Vol. 5. Pp. 471.

A thuthennak thu in sual ngaihdamnak famkim kan tulnak thu, ziangso in zirh? Jesui thawngin sual ngaidamnak Pathian in a lo pek vekin na parih sualnak a tuahtu parah zangfahnak nei dingah ziangtin so na zir ding?

TLAWNGKAI NILI                                      May 24

VAN LE LEI SERSIAMTU BIAKNAK

Rev. 14:6,7 siar aw. Vancungmi pakhatnak ih thucah phuanmi a hrampi ziangso a si? Ziangvekih pehzomawknak so an neih theh?

Thuthangtha in Pathian tihzah ih sunlawi upat peknak ding le sersiamtu a si vekih Pathian biak dingah thuthangtha sim dingih kawhmi kan si. Hipawl hi kumkhaw thuthangtha tlaitluan thutak ih langdan phunkhat a si. Thuthangtha sim dingih kawhnak thuthennak timipawl hi sersiamtu Pathian a sinak thawn pehawknak ziangso a neh? Himi hi thutak a suahnak hrampi ziangkim sersiamtu Bawipa a si. Bawipa kha sersiamtu tiih kan biak tikah thil semsuahnak hrampi kan hmusuak ding. Cu tikah minung le a nunnak hrampi ziang a si ti kan thei ngah ding. Minung hi sersiam mi thilnungpawl thawn an danglamawknak cu Pathian hmel bangin milai a tuah. Sersiamtu tiah Bawipa kan biaknak in a tu le a ralai dingmi thil ummi ah amah rinsan ding ti theihthiamnak kan nei. Himi ruangah nisarihnak ni zarh ih hmangin Pathian biak hi a poimawhnak a si. Pathian hi sersiamtu tiin amah lawng kan biak theinak dingah a hleice ih theihter mi kan si. Cumi cu thuthangtha le thuthennak timi a si ih, Pathian kha sersiamtu tiih biak dingih langhngan zetin in pek.

Thuphuan 14:8-11 siar aw. Pathian kha sersiamtu tiah biak a thupitnak theithiam dingah ziangtin so in bawm?

Leitlun hmuahhmuah ah sersiamtu hnakin sahrang le a lem biak dingin hnek a si ding tiah ni neta thilcang dingmi ah phuan a si. Sahrang le a lem betupawl parih thil thleng ding mi ralrin peknak ah Pathian kha sersiamtu tiih biaknak le amah lawng hi biaktlak a si timi theithiam sinsin dingin a langter. Ni neta ih do-awknak ah himi biaknak thu hi a thupibik mi thutak a si ringring ding.

Mangbangza leitlun thil sersiam mipawl ruat aw. Pathian kha biaktlak Pathian umsun, ziangkim tuahtu a si thu theithiam dingah ziangtin so in zirh.

TLAWNGKAI NINGA                                   May 25

RUAH BET DING: Bible tlawngtapawl cun Rev 14:7 ih van le lei tifinriat le cerhti put tuahtu biak timi (RSV) le Ex. 20:11 sungih Thukhaam a palinak Sabat ni a sawh duhmi kha niruk sungah Pathian in van le lei tifinriat le a sungih a ummi hmuahhmuah a tuah theh (NKJV) timi an pehzomawknak kha an hmuhfiangnak a rei zo. Tongkam ih pehzomawknak um hman sehla Thuphuan ih a langter mi Bawipa kha cerhti put sersiamtu a sinak a langter mi ah danglamnak a um zo.

Author John Baldwin ih thusuahpi mi ah “Cerhti put” timi ih phenah Pathian ih ruahnak a tumtah mi a um. Jesuh in Ex. 20:11 ih thuthawn bangaw mi kha a palai hnenah a phuannak kha ziangah so a si ding? Vancung mi in ziangah so cerhti put timi ngelcel a sal? Sersiam mi thildang mual le tlang, thingkung hrampi le vatepawl tla a um lo maw?

Pathian in cerhti put timi a langter duhsan mi cu ca siartui thinlung sungah Pathian thuthennak umdan kha hlanlai ih a rak um zo mi Pathian ih thuthennak umdan kha oltei theithiam dingah a si. Himi ah hlanlai tilik a rak tlung lai ih “Cerhti put” timi Pathian in a hmang tiih ruah a si. Pathian amah hi thuthentu a si vekin rinum zet, rinsantlak le ngil nei zangfah thiamtu timi fumfe zetin a sim ih, hlanlai ih tilik a ummi kha tawi famkim in a langter. Cuti a si ahcun cerhti put timi kha casiartupawl in thupi zetih an lak theinak dingah thlarau lam le minung lam, kungkaihawknak kha tiliknak thu ihsin a hramthok in uar deuhin a sim. Thuphuan 14 ih vancungmi pakhatnak ih thucah, a than mi vekin can netnak ah a thupi zetmi bulpak thuthennak a thleng dingmi kha a feh kelih fehpi theinak dingah a si (John Baldwin ed. Creation, Catastrophe and Calvary: Why a Global Flood is Vital to He Doctrin of Atonement, Hager Stown, Mdi Review and Herald @ Publishing Association 2000. Pp. 27).

RELTLANG DING:

1.  Isaiah 53:6 siar aw. “Tuu hlo vekin kan zaten a hlomi kan si”. Kan zaten timi kha Hebru tongah “Cullanu” timi a si. Himi ah Pathian in kan zatei sualnak kha Jesui parah Pathian in a suan theh tiah Isaiah in a sim. Isaiah 53 sungah kan zaten timi hi Hebru tongin “Cullanu” timi a hmang thotho. Himi in sualnak ih thubuai a natsat ai ih nasa in a cingfel a tulnak ziangvek in so a sim?

2.    Cross parih fifir pai thuanthu ihsin zirlai dang ziangsokan lak thei? Fifir pa kha sual ngaidam a si ruangah Cross ihsin thumthlak in luatter sehla kan ti mai thei. Cu vekin nung sehla ziangvek in so nun a hmang ding tiah na ruat? Bawi Khrih in danglam zetih kan nun in thleng theinak huham a phi na ngah mi in ziangso a sim?