HSS ZIRLAI 8-NA: SIAMTU CHU CHIBAI BÛK RAWH U

ZIRLAI 8-NA                                                              MAY 19-25, 2018

SIAMTU CHU CHIBAI BÛK RAWH U

---

CHÂNGVAWN: “Tin, leia awmte hnênah leh hnam tin rêng te, chi tin rêng te, tawng tin rêng te, mi tin rêngte hnêna tlângâupui tûra chatuana chanchin tha nei vântirhkoh dang vânlaizâwla thlâwk ka hmû a” (Thupuan 14:6).

SABBATH CHAWHNÛ                                                                            MAY 19

CHHIAR TÛRTE: Genesis 22:12; Matt 24:14; Luke 23:32–43; Galati 3:22; Rev 14:6, 7; 14:8–12.

KEINI Seventh-day Adventist Kristiante hi chuan Bible-in “tûnlâi hun atâna thudik” (2 Pet 1:12) a sawi hi kan ring a. “Tûnlâi hun atâna thudik” tih awmzia chu Pathian hian mihringte hnênah an hun lâi atâna pawimawh bîk thutak a hriattîr thîn tihna a ni ber a; hun liam ta zawng zawngahte khân LALPA chuan an mamawh ang tâwk zêlin êng a lo pe tam tial tial thîn a ni. Chanchin tha thutiam, Genesis 3:15-a kan hmuh hian suala tlu ta Adama-te nupa chu hmeichhe thlah hmangin beiseina a lo la thleng dâwn tih a hrilh a. Abrahama hnêna thutiam—chi ropui leh thiltithei tak a lo la nih ngei ang a, amahah chuan khawvêla chi tinte an la thawven tûr thu (Genesis 18:18) hi chanchin tha thutiam a famkim zâwka rawn puan chhuahna a ni. “Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni,” (Mark 10:45) tih thu puangtu Isua lo kalna kha chanchin tha thutak puan chhuahna la ropui lehzual zâwk chu a ni bawk.

Rev. 14:6–12-a kan hmuh vântirhkoh pathumte thuchah hi Krista lo kal leh hmâ ni hnuhnunga chêngte tân “tûnlâi thudik” a ni tih leh, Kristian kan nihna anga kan beisei zawng zawngte a famkimna niin kan ring.

Tûn kârah hian vântirhkoh pakhatna thuchah hi kan thlûr bing deuh bîk ang a, a chhan pawh tâwpna huna buaina hrang hrang lo chhuak kâra rinawm taka awm tum tlat te tân thu pawimawh tak tak a pâi vâng a ni.

SUNDAY                                                                                              MAY  20

CHANCHIN THA-IN A HUAP ZAU-ZIA

Rev. 14:6; Matt 24:14; 28:1-te hi chhiar la. Hêng chângten thil thuhmun an sawi theuh chu eng nge ni? Hêng chângte hian eng tiangin nge kohhran kan nihna anga chêt chhuah leh thuhretu nih hna kan thawh a pawimawhzia hrethiam thei tûrin min puih le?

Vântirhkoh pakhatna thuchah hi ni hnuhnung atâna Thupêk Ropui (Matt. 28:19) a ni e tih theihna chin pawh a awm âwm a. “Tûnlâi thudik” chu a ni ngei e. Hêng châng pathumte hian khawvêl zawng zawnga chanchin tha puan darh a ngaih thû uar takin an sawi vek a: “‘Hnam tin rêng te, chi tin rêng te, tawng tin rêng te, mi tin rêng te hnênah’ tih a ni. Tawngkam danga sawi chuan, hê thuchah hi mi zawng zawng huap thuchah a ni a. Mi tin rêngin an hriat theuh a tûl.

Galati 3:22 chhiar la. Hê chângin a sawi hian khawvêl zawng zawngin chanchin tha chu an lo hriat vek a tûlzia kan hriatthiam theih nâna min puih dân chu eng nge ni?

Sualna chuan mi zawng zawng a fan chhuah vek tawh avângin, mi zawng zawng hnêna chanchian tha hril hi thil tih ngei ngâi a ni a. “Hnam tin rêng te, chi tin rêng te, tawng tin rêng te leh mi tin rêngte” hian thil sual tiin Pathian dân an lo bawh chhe tawh vek a, “sual thuneihna hnuaiah” chuan an awm vek tawh bawk. Eden Huana Adama tlûkna khân mihring zawng zawng hi a nghawng vek a; eng hnam emaw, chî emaw, mi emaw mah a nghawng tel vê loh an awm lo. Chawplehchilha sualin a nghawng chhuahte chu kan tuar theuh a, a tihdamna tûr pêk kan ni loh vaih chuan a nghawng tâwpkhâwk: chatuana thihna pawh kan la hmachhawn leh vek bawk dâwn a ni.

A tihdamna tûr: Isua nun, thihna, thawhlehna leh vân biak bûka rawng a bâwlna chu pêk kan ni tawh ngei a, ani chu sual avânga harsatna awmte ching fel thei awm chhun a ni bawk.  Mi tin hian Pathianin beiseina ropui tak Isua Kristaa a pêk chu an hriat theuh a tûl a. Chuvâng tak chuan keini Seventh-day Adventist-te pawh khawvêl ram hrang hrangah kan inzâr pharh a, Isua thuchah chu a la hre lote hnênah hrilh dân kan zâwng rêng a nih hi.

Eng vângin nge mi dangte hnêna chanchin tha hril hi a hriltu tân pawh thlarau lama hlâwkna ropui tak a nih? Eng vângin nge mi dangte hnêna rawngbâwl hi Isua lo kal lehna atâna lo inbuatsaih dân kawng tha ber pakhat a nih le?

THAWHTANNΠ                                                                                       MAY 21

RÛKRU AN KHENBEHA LEH “CHATUANA CHANCHIN TH”

Rev. 14:6-ah hian khawvêl hnêna puan darh tûr thuchah chu “chatuana chanchin thâ” tia sawi a ni a.

Amahah ngau ngau chuan beiseina pakhat mah pe lo khawvêla chêng mihringte tâna beiseina thuchah a ni.

Luke 23:32–43 chhiar la. Eng tiangin nge hê thû hian mi sual zawng zawngte tân “chantuana chanchin thâ” beiseina ropui tak chu a puan chhuah le?

Hê rûkrupa chanchin hi sawiin, Ellen G. White-i chuan mi sual tawrawt tak chu a nih loh thû a ziak a. Nimahsela, Isua chanchin a lo hriat tawhte chu up bo a tum tlat a, chutichuan sualah a lût thûk ta deuh deuh a, a tâwpah phei chuan man niin, dân a bawhchhiat avânga kraws-a khenbeh tûrin thiam loh chantîr a ni ta hial niin a sawi.—Ellen G. White, Desire of Ages (Chatuan Nghahfâk), p. 732.

Mahse a chungah eng thil nge lo thleng ta? Krawsa khenbeh a nih lâi ngei hian Isua chu a hmu ta a, chû vêleh: “LALPA, i lalrama i lo kal hunah min hre reng ang che,” (Luka 23:42) tiin a ngên ta a ni.

Eng tin nge Isuan a lo chhân le? Aw le, ka pui duh khawp mai che a; mahse suala lût thûk zêlin thu tak i hriat tawhte pawh kha i lo up bet tlat thîn a, ka pui thei lo che a ni. A pawi khawp mai! tiin a sawi em? Tûn hmâ pawha a lo sawi tawh: “In felnain lehkhaziaktûte leh Farisaite felna hi a khûm lo a nih chuan vân ramah chuan in lût tawp lo vang” (Matthaia 5:20) tih kha a sawi nawn leh em? (Matthaia 5:20). A tûn hma sualte kha a sawi chhuahsak leh hrim hrim em?A tA

 Chutiangin Isuan a ti lo. Hê mi sual, rûkrû leh nungchang tha lo tak, felna kawngah chhuan tûr eng mah nei lo, a hmâ lawk pawha amah ânchhia lo lawh tawhtu (Matthaia 27:44) lam chu a hawi a. Mi thar diai nia hmuin ti hian a sawi ta zâwk a: ‘Ka hrilh a che, tûnah hian chhandam i ni tih chiang taka inhriatna chu ka neihtîr che a, i sual, i dân bawhchhiat zawng zawng, i thil dik lo tihte kha a zavâiin ngaihdam a ni ta. Chuvâng chuan “Ka hnênah Paradise-ah i la awm vê ang” tiin (Luka 23:43).

Hei hi “chatuana chanchin thâ,” vântirhkoh pakhatna thuchah innghahna chu a ni. Hê thutak tel lo hi chuan dân chungchâng te, Sabbath chungchâng te, leh thih hnua kan awm zui tâk dân chungchâng kan sawite hian eng mah awmzia a nei lo. Hêng kan thurin hrang hrangte hian “chatuana chanchin thâ” chu a laipui bera a nei lo a nih chuan eng nge a tangkaina awm rêng rêng ang le?

He rûkrupa chanchin atang hian i tân eng beiseina thû nge i lo chhar chhuah ve theih awm?

THAWHLEHNΠ                                                                                        MAY 22

PATHIAN CHU HLÂU ULA, CHÂWIMÂWI RAWH U

Vântirhkoh pakhatna thuchah hian khawvêl zawng zawng hnêna “chatuana chanchin thâ” puan darh thu a sawi hnû-ah hê thû hi a sawi zawm nghâl a. “Chatuana chanchin thâ” chu kan hril hian tûn hun atâna hê chanchin tha thuchahin a huam thu hrang hrangte chu kan sawi tel ngei thîn tûr a ni. Tawngkam danga sawi chuan, ni hnuhnung atâna “tûnlai thudik” hian Rev. 14:7 pawh hi a huam tel a ni.

Thupuan 14:7 chhiar la. Pathian ‘hlâu’ tih leh amah ‘chawimawi’ tih awmzia chu eng nge ni? Chu chu eng tianga ti tûr nge kan nih? Hêng thûte hi eng tin nge chanchin thâ nên a inrem le?

Pathian hlâu tih leh amah chawimawi tihte hi thil inkûngkaihna nei lo a ni lo va. Bible-in min hrilh dân ang taka Pathian kan hlâu a nih chuan, amah chu chawimawina kan hlân ngei ang. A hmasa zâwk hian pakhat dang pawh ti vê leh nghâl tûrin mi a hruai ngei tûr a ni.

Hêng chângte hi chhiar la. “Pathian hlâu” tih awmzia kan hriatthiam theih nân eng tin nge min puih a, eng tiangin nge chu chu a hnêna chawimawina hlan nên a inzawm? Genesis 22:12; Exodus 20:20; Job 1:9; Eccle. 12:13; Matt 5:16.

Hêng chângahte hian Pathian hlâu tih chu a thu zâwm tih nên inzawm tlat nia sawi a ni hlawm a, Pathian thû kan zawm a, thil dik leh tha kan tih hian a hnênah chawimawina kan hlân tihna a ni. Pathian hlâu tih awmzia chu Pathian tih leh zah ngawih ngawih tihna angte’n sawi a ni ve thîn a; mahse chu âi chuan a la thûk zâwk daih. Pathian chu hlâu tûra hrilh kan ni.

Suala tlu tawh kan ni a. Mi sual kan ni bawk. Thih phû hliah hliah kan ni. Thil sual leh tha lo tak tak kan lo tih tawhte kha hriat chhuah leh châng neiin kan inthiam lo êm êm thîn a, Pathian dik leh fel taka chuan eng tin tak min ti ang maw tiin kan îp châwih châwih thîn a ni lo’m ni? Hei tak hi Pathian hlâu tihna chu a ni? Chu hlauhna chuan ngaihdamna chang tûrin Kraws-ah min hruai thleng a, chumi hnû-ah, Kraws hi awm ta lo se, kan nun min chântîr ngeitu tûr sual lak ata min tlêng fâi tûrin Pathian thiltihtheihna chu min ta neihtîr leh bawk a ni (Matt. 10:28).

Eng tiang takin nge Pathian hi i lo hlauh ve tawh le? Chu hlauhna chu eng tiangin nge thlarau thil tak pawhin kan tân a that a, kan rinna leh kan laka Pathianin a phûtte la thu tak lehzual tûrin min puih bawk?

NILÂINΠ                                                                                                 MAY 23

A RORÊL HUN CHU A LO THLENG TA

Vântirhkoh pakhatna thuchahah hian Pathian hlâu tih leh a hnêna chawimawina hlân tih chu rorêlna nên inzawm tlat anga târ lan a ni a (Rev. 14:7). Bible hi a thil sawiah a chiang a nih ngâi chuan, Pathian hi dikna Pathian leh, rorêlna Pathian a ni tih a chiang hlê. Eng tik nî-ah emaw chuan hê khawvêla hmuh tûr vâng tak rorêlna fel leh dik chu a lo la thleng ngei dâwn a ni.

Mihringten Pathian a hlauh a tûl hi thil mak a ni lo. Chuvâng tak chuan “chatuana chanchin thâ” pawh hian rorêlna chu a taka thleng ngei tûr a nihzia a sawi rêng a. Hêng thil pahnihte inkûngkaih tawn dân chu eng nge ni? Chanchin thâ chu “chanchin lâwmawm” a nih chuan, keini hi kan zavâia mi sual vek niin, Pathian dân pawh lo bawhchhe theuh tawh mah ila, rorêlna nî a lo thlen hunah chuan kraws-a khenbeh rûkrupa ang bawk khân kan sualna leh dân bawhchhiatna avânga kan phû ve rêng hremna chu kan tuar dâwn lo va ni.

A hnuaia chângte hi chhiar la, tichuan hê zawhna: ‘Keima thil tih thatte rin chhana ding tûr ni ila, ka tling zo ngût ang em?’ tih hi inzâwt ang che. Matt. 12:36; Rev. 12:14; Rom 2:6; 1 Corin 4:5.

Kan lûa kan sam zâi awm zât nên lam hre vektu Pathian chuan khawvêl chungthû hi a la rêl dâwn a. Nimahsela, chu tak chu “chatuana chanchin thâ” hi chanchin lâwmawm a nihna chhan a ni tlat. Rorêlna chu a lo thleng dâwn a; Isua zuitu rinawm, LALPA Isuâ hminga sil fâi, tihthianghlim leh, thiam chantîr ni tawhte tân erawh chuan “thiam loh chantîrna rêng” (1 Cor. 6:11) a awm lo thung ang, a chhan pawh Isua Krista chu an felna a ni a, ani felna chuan rorêlna a pal tlangtîr dâwn vâng a ni.

“Mihring hi amah an puhnate lakah a insawi fihlîm zo lo. Sual dum kâi a kawrfual chu inthuam chunga a sual puangin Pathian hmâah a ding a. Nimahsela, kan Âiawh Isua chuan sual simna leh amâ hnêna an rinna nghahna hmanga an thlarau kawltîrtûte tân dîlna awmze nei tak a thlen a. A tân sawisakin amah puhtu chu Kalvari hnialkhân chak tak hmangin a titlâwm ang. Kraws-a thi khawp hiala Pathian dân a zawm thatna chuan, lei leh vâna thuneihna zawng zawng a pe tawh a, a Pa khawngaihna leh inremna chu a mi sual hnênah a pe dâwn a ni.”—Ellen G. White, Testimonies for the Church, vol. 5, p. 471.

Rorêlna chu lo thleng ngei tûr a nih thû hian ngaihdamna ka mamawhzia eng tin nge min hrilh le? Kan laka thil tisualtute hnênah Pathianin Isua zâra khawngaihna leh ngaihdamna min chantîr ang kha eng tin nge kan pêk chhâwn ve theih ang?

NINGÂNΠ                                                                                                MAY 24

LEI LEI VÂNTE SIAMTU CHU CHIBAI BÛK RAWH U

Rev. 14:6, 7 hi chhiar nawn leh la. Vântirhkoh pakhatna thuchaha thil danglam bîk tak awmte chu eng nge ni a, eng tiangin nge chûngte chu a inkûngaih tawn theuh le?

Chanchin thâin a tih ang bawkin, khawvêl hnêna thuhretu ni tûra kohna thû leh, Pathian hlauva a hnêna chawimawina hlân tûra kohna thûte pawh hian Pathian chu Siamtu a nihna anga chibai bûk tûrin min sâwm a. “Tûnlâi thudikin” a ken tel thil dang dang—chatuana chanchin thâ te, thuhretu ni tûra kohna thû te, rorêlna te hian Pathian chu Siamtu a nihna tel lovin eng nge awmzia a neih rêng rêng le? Hêng thûte leh thutak dang zawng zawngte hi LALPA chu thil zawng zawngte Siamtu a nihna thutak lungphûm atanga lo chhuak vek an ni.

LALPA chu Siamtu a nihna anga chibai kan bûk hian, thil engkim bulah kan lêt leh tihna a ni a. Mihring nih leh mi nung nih awmzia bulpuiah chuan kîr lehin, mihringte hi chu Pathian anpuia siam kan nih avângin thil siam dang zawng zawngte lakah kan danglam bîka ni tih min hriat chhuahtîr leh bawk a ni.  LALPA chu Siamtu a nihna anga chibai kan bûk hian kan nunna atân leh nakina kan beiseina atân amah chu innghah nân kan hmang a ni tih kan pawmzia kan tilang a. Chuvâng chuan a nia, ni sarih nî Sabbath serh pawh hi a pawimawh êm êm rêng ni. Pathian chauh hi min siamtu awm chhun a ni tih kan pawmzia leh amah chauh chu chibai kan bûk a ni tih a bîk taka kan tihlanna a ni. A awmzia chu, chanchin thâ leh rorêlna a nih hi chu thu hran ni se, Siamtu a nihna anga LALPA chibai bûkna hi a dah pawimawh hlê tihna a ni.

Rev. 14:8–11 chhiar la. Hêng chângte hian Siamtu a nihna anga LALPA chibai bûk a pawimawhzia kan hriatthiam theihna tûrin eng thû nge an sawi le?

Ni hnuhnunga thil thleng tûrte a lo thlen mêk lâi hian Siamtu âia sakawlh leh a lem chibai bûk zâwk tûra intihluihna chu khawvêl hmun hrang hrangah a thleng dâwn a. Sakawlh leh a lem chibai bûktûte tâna vaulâwkna thu rum tak hi ngun taka kan ngaihtuah a nih chuan, Pathian chu Siamtu a nih avânga mihringte chibai bûk phû awm chhun a nihzia pawh kan hrethiam ngei ang. Buaina hnuhnung berah chuan hê thû hi tûn hmâ zawng âi khân a pawimawh lehzual dâwn a ni.

Khawvêla thil awm mak tak takte hi han ngaihtuah la. Hêngte hian anmahni Siamtû chanchin eng nge min hrilh a, eng vângin nge amah chiah hi chibai kan bûk phû a nihzia an târ lan?

ZIRTÂWPNΠ                                                                                            MAY 25

NGAIHTUAH TÛR: Bible zir mîte chuan Rev. 14:7 thû, “vân te, lei te, tuifinriat te, tuihnâ te Siamtu chu chibai bûk tûra kohna” leh, Exodus 20:11-a kan hmuh thupêk palîna hi a inzawm a ni tih an hriatna a rei tawh hlê a. Sabbath hian “ni ruk chhûngin LALPAN lei leh vân te, tuifinriat leh a chhûnga awm zawng zawngte chu a siam a ni” tih min hriat nawntîr thîn a ni.  Hêng châng pahniha tawngkam an hman hi inang viau mah se, Thupuana mi hi chu a dang ta deuh hlek a, LALPA chu “tuihnâte Siamtu” pawh ni bawkin a sawi.

Heti hian John Baldwin-a chuan a sawifiah a: “‘Tuihnâte” tih tawngkam a hman chhan hi a awm ngei niin ngâi ila, eng vângin nge Isua hian a thuchah puang chhuaktu hi Exodus 20:11-a a sawi tel ve loh a belhtîr le? Eng vângin nge he vântirhkoh hian thil siam dang, entîr nân, thingkûng te, savâ te, sanghâ te leh, tlâng te sawi lang sî lova ‘tuihnâte’ tih hi a sawi lan bîk sî?

“Pathian rorêlna hun danglam tak a lo thlen thu a sawinaa ‘tuihnâte” tih tawngkam a sawi lang hian, Thupuan bû chhiartûte chu Pathian rorêlna lo thleng tawh kha ngaihvêntîr a tum a ni maithei a. . . . ‘Tuihnâte” tih tawngkam hmang hian Nova hunlâia tui lêt kha sawiin, Pathian chuan amah chu Rorêltu Pathian a nih mai bâkah, Pathian rinawm leh khawngaihnaa khat (chutiang Pathian a nihzia chu tui lêt thû-ah hian chiang takin a lang) a ni tih uâr taka sawi a tum a ni ngei ang. Chutiang a nih chuan, heta ‘tuihnâte’ tin thû a hman chhan hi mimal leh thlarau lam thila tuilêtin awmzia a neihzia min hriattîr tûr leh, Thupuan 14-a thuchah hmasaber hmanga puân chhuah ni ta tâwpna hun thara vân rorêlna lo thleng ngai pawimawh tûra chhiartûte fuihna tûr a ni ngêi ang.”—Johana Baldwin, ed., Creation, Catastrophe, and Calvary: Why a Global Flood Is Vital to the Doctrine of Atonement (Hagerstown, Md.: Review and Herald® Publishing Association, 2000), p. 27.

SAWI HO TÛRTE:

u  Isaiah 53:6-ah chuan “Kan za hian berâm angin kan vâk bo va” tih thû kan hmû a. Hebrai tawnga “kan za,””kan za vâi”tih sawina thumal chu cullanu a ni. Hemi chângah tho hian Isaia chuan Isua chunga LALPAN “kan zâa khawlohna”a nghah thû a sawi bawk a. Heta “kan zaa” tih pawh hi Hebrai tawng chuan cullanu tho a ni. Engtin nge he tawngkam hian kan sual chu eng anga nasa pawh lo ni se, a chin felna chuan a khûm?

v  Kraws-a rûkru an khenbeh chanchin atanga zirlâi kan zir chhuah theih dangte chu eng nge ni? Khâ rûkrupa kha ngaihdam niin, kraws atang khân lâk thlâk leh lo ni ang se, eng tiang taka danglamin nge a nun a hman zui i rin? I chhânna chuan kan nun tidanglam tûra Krista thiltihtheihna chungchâng eng nge min hrilh le?