FSS ZIRLAI 7: MATTHAI 24 LE 25

ZIRLAI 7                                       May 12-18 

MATTHAI 24 LE 25

---

SABAT TLAI LAM:                                     May 12

TUZARH SIAR DING: Matt. 24:1-25; Rev. 13:11-17; Matt. 7:24-27; Luke 21:20; 2 Kings. 23:13; Matt. 25:1-30.

BIBLE CANG KEN: “Messiah deu le Profet deu pawl an suak ding ih, mi bumnak ah mangbangza hmuhsaknak mak ngaingai an tuah ding. A cang theitawk in Pathian hril cia mipawl hman an bum ding” (Matt. 24:24).

MATTHAI 24 le 25 sungah  Jesu in a thupi zet mi thutak ni neta hrangah ziangtin kan timtuahaw ding timi thu a sim. Jesuh in ni neta ih thil thleng ding mipawl kha himi bungpawl ah in zirh. A rei hlanih thil um ding mipawl le amah zumtupawl parih a thleng ding mi harsatnak an tuar ding mi kha a hmu.

A tirhthlahpawl hnenih a simmi kha sankhat hnu sankhat can netnak ni tiangih a um mipawl hrang khalih a simmi a si. Jesuh in lamzin nuamih feh dingah in sim lo. Do-awknak, ralhriamnam tuahnak, leitlun siatnak, Khrih deu le leitlun thilah siseh, kawhhran sungah siseh, hremnak tampi a um ding thu kha a sim. A rak simmipawl kha mak zetin an thlen famkimdan kan hmu thei. Curuangah kan sanih a thlen famkim lo hmanah a rak sim mipawl kha kan zum ding a si.

A ra thleng ding mi thu lawng hrangah Jesuh in ralrinnak thu a sim lo. Milai fapa rat zik zawngah zokhal daithlang lo le ralrin thiam dingah tahthimnakpawl tla a sim. Harsatnak thleng hman sehla a ratsal tikah zumtupawl kha tiaraw cia ih an um ding a duh.

THAWHSAL NI                                           May 13

SIMSUNG THU HMUAL NEI ZETIH NEMHNGETNAK

 Tirhthlahpawl in Jesui thu kha cross par a thlenhlan ih ani neta lamah Olive tlangah an reltlang. Jesui a simmi biakinn pi siatbal theh a si ding thu kha an hna thlite ah a cam ringring. Lei can cemnak le biakinn siatbalnak thu an pehzomawknak theifiang dingah thusuh an duh (Matt. 24:3).

Matt 24:1-25 siar aw. Ni neta thuhla Jesuh in a dungthluntupawl hnenih a simmi thucah ziangso an si?

Matt 24:1-25 sungah Jesui simmi thil tampi lakah ni netnak ih zumtupawl lakah bumawknak a um ding thu kha a sim. Profet deu le Khrih deu pawl an suak dingih an lakah bumnak a um ding. Mi hrekkhat in Khrih kha (Profet deu) a si an ti ding. Jesui ratsalnak thu ah mi an bum ding. A poi ngaingai mi cu kha mi thu kha mipipawl in an lungih an thlun.

Siatnak a thleng ding mi kha Pathian thu in hmual nei zetih a nemhngetnak kan hmu. “Khrih timi cu keimah ka si” tiah mi bumtupawl hi hlan laiih sin a tu khalah an um. Hlan lai thuanthu ah kan hmuhmi (Khrih san minungpawl ih an hmuh ve lo mi) phuan langih a ummi simsung thupawl kha hminsintlak zetin an thleng famkim theh. Can neta lam kan naih vivo ih bumawknak le buainak a karh sinsin mipawl ah mangbang ding a um lo.

Kan zumnak a khoh theinak dingah leitlun umdan Jesui in simmi kan zoh ding. Bawi Khrih sanlai ih leitlun thil thleng mipawl kha zumtupawl in an rinnak dungtun loih ruahsannak an neih theinak dingah, a nasa zetmi harsatnak minung parih a thleng mipawl hnangamte ih an tuar theinak dingah a si. Fimnak hmangih ram khelnak thuhla ah midang cun ruahsannak tumpi an nei. Hi thilpawl hi leitlun saduhthahnak men a si.  Atu le atu siatnak a tonmi kan hmuh vekin beidonnak in a khat. Jesui a simmi vekin tuini kan leilungpi umdan hi hruaitu sualpawl ih hruaisualnak ah beiseinak sang zet an neih ding mi kha a liam zo mi kum 2000 laiah Jesuh in a sim zo.

Matt. 24:25 siar aw. Kan zumnak sawhhngetnak dingih bawmtu ah himi ziangtin so kan hman ding?

TLAWNGKAI NIKHAT                                May 14

A NET TIANGIH DINGHNGET

Matt 24:9 le Rev 13:11-17 siar aw. John ih nganmi thuphuan sungah le Matthai sungah a bangaw mi thu ziangso Jesuh in a sim.

Leitlun pumhuap in thutak dodal ih bumawknak le sakhaw fehsual thlun dingih hneknak kha can netnak lamah Pathian zumtupawl parah a um ding ti a sim. Cuih harsatnak, mi huatnak le thihnak tiang a thlen hmanah a ding ngamtu an si ding.

Matt 24:13 siar aw. Leitlun pumhuap doawknak lakah rundam ih um thei dingin rinumnak timi ziangso a si ding?

Bible thutak thawn a thinlung kilhimaw lotupawl cu a netnak ih do-awknak ah nehtu an si thei lo ding. E.G White, The Great Controversy. Pp. 493,494). Bible thutak thawn a thinlung kilhimawtu cu ni neta ih bumnak in zinpeng ah a hruai thei lo ding. Bumnak neh thei dingin thutak ah hram bunmi an si.

Matt 7:24-27 siar aw. Pathian hnenih rinum hnu ahcun a tul mi dang ziangso um lai?

Pathian thuah theihnak kau le thuk nei ih hramthok hi a thupi zet. Cule Jesui a simmi vekin harsatnak a thlen tikah kan dingsuak thei ding. Kan zir zomi vekih nun nei in Jesui thutak a thlun vekin kan thlun ding. Jesui in simmi inn saktu pahnih tahthimnak kan theih mi kha harsatnak tuar thei le thei lo karlak ih a danglamawknak a si.

Zawnlungtu cun a dinghnget thei ding ih, zawnlung lotu cu a tluk ding. Ziangruangah so a si ding? Zawnlungnak in zumnak a khohter ih a danglamter thei lo.

TLAWNGKAI NIHNIH                                 May 15

TUKSUUMZA THIL BORHHLAWH

Tuksuumza ih siatsuahnak kha can netnak ah a um ding tiah Jesuh in fiangten a sim (Matt. 24:15). Cumi cu Daniel cabu sung thu a lakmi a si (Dan. 9:27; Dan. 11:31; Dan. 12:11).

 Pathian in tuksuumza tampi  a sim. Danpeksalnak 27:15 ah Pathian thukhaam buarih milem biak kha Pathian hmaiah ningsinza a si. Puithiam Hnatuan 18:22 ah, neih bangaw mi sualnak (diriamnak) tuah hi Pathian hmai ah tuksuumza a si. Curuangah tuksuumza sualnak hi sakhua donak a si.

Matthai 24:15 le Luka 21:20 siar aw. Jesui tuksuumza sualnak a simmi theifiang dingin ziangvek in so in bawm?

 AD 70 kum ah Jerusalem khua ih a thlengmi tuksuumza siatsuahnak kha mitthlam ih hmu thei dingah Jesuh in a rak sim. Kha mi kha Jerusalem khawpi lawng si loin Biakinn thianghlim tla milem bia Rome-pawl in an siatbal theh.

Jerusalem siatnak hi simsungnak neta a thlen famkimnak a si. Cuih tlunah kan hmai ih a ralai dingmi can netnak ih thil thleng dingmi hmuhsaknak a si. Jesui a sim duhmi cu leitlun mipawl lungruh ih an um lonak dingah le zumnak dodalnak a um lonak dingah Jerusalem siatsuahnak in a hmuhsak. Pathian daantatnak kha an sualnak phutawkih an ton dingmi kha a langter (E.G White, The Great Controversy. Pp. 22,23).

Dan. 12:11 le Dan. 11:31 ah tuksuumza thil borhhlawh kha Rome uk sungih Pope lalnak khaisan a sinak thawn an pehzomaw. Bawi Khrih ih in tuahsak zo mi le a tuih in tuahsak rero lai mi rundamnak le sual ngaihdamnak van hmun thianghlim ih a hnatuan lai mi va lonsaknak a si.

Dan. 8:9-12 ah Rome uknak phun hnih in  cawisan a sinak thuanthu ah kan hmu. (1) Khrihfa uknak kha zamrang zet le hlawhtling zetih  a karh (Dan. 8:10-12). A thuneihnak kha raltha zetin hmai a norpi ih, arsi hrekkhatpawl kha lei ah a hlon (Pathian zumtupawl a hrem ih, a thahnak). Amah kha cungnungbik Pathian fapa tiah a salaw (Dan. 8:11). Milem bia Rome uknak a tluk hnu ah Pope ih lalnak khaisan a si. Cumi ah Rome uknak hmin a hlo lo. Kifate kha Rome thuneihnak ih uknak a hmuhsaknak pakhat a si. Dan. 7:9,10 ih thuthennak, Dan. 8:14 ih Biakinn thianfainak, Matt. 24:29 ih van ih hminsinnakpawl tla, Pathian in amah zumtupawl harnak an ton canih a bom ding thupawl tla kan hmu thei a si.

TLAWNGKAI NITHUM                                May 16

FALA PAHRA

Matthai 24 ah a ra thleng dingmi thil hminsinnakpawl thei rori dingih a sim hnu ah Matthai 25 ah cu mi thil thleng ding mi hrangih timtuahawkdan ding thu a sim.

Matt 25:1-13 siar aw. Fala pahra tahthimnak thu a si. Jesui ratsalnak ding hrangih timtuahawkdan theithiam dingah himi in ziangtin so in bawm?

Jesuh in a tumtah mi theithiam dingah fala pahra thu a sim. Hihi Khrihfapawl sim duhnak a si ih do-awknak ah Setan lamtang an si lo. Vancung uknak ram mipawl (Matt. 25:1), an si nan a netnak ah an itthat theh (Matt. 25:5). Bawipa Jesuh cun fimvar zetih hngak dingah a sim (Matt. 24:42). (or) Fimvarte ih an um lo cun Bawipa rat tikah an timlamaw man lo ding.

Fala pahra-pawl in mopa ton dingih an hngak lai ah mei-inn an nei cio. A ratnak hngakhlap zetih thlirtupawl an si. Mopa a thlen tlai ruangah zumtupawl an it that. An rin lo laifang zantim ah mopa ratnak au-aw an thei ih an tho (Matt. 25:1-6).

Fala aa-pawl cu timtuahawknak a um lo ruangah an thin a phang. Ziangah so? Lehlin pakhat ahcun “Kan mei-inn zinaan a cem” ti a si (Matt. 25:8). Grik cahram an lehlin dik mi ahcun, an mei-inn pawl kha san a tlai lo (or) a mit tinak a si. An mei-inn pawl kha mit duapdo (vang duapdo) in a um. Zinaan malte lawng an nei ih, Jesui ratnak timlamawknak hrangah a daih lo tinak a si.

Cu mi ah a poinak a um maw ?

Himi fala-pawl in Jesui ratnak hngak tu tui san Khrihfapawl a zohter ih, Khrih thawn umtlannak tonnun kha a lenglam ih langnak lawngih a nei mi an si. Thlarau hnatuannak tonnun zinaan tampi an nei ko, asinan tuan tul mi tampi lak ihsin malte an tuahmi ah an lung a awitawk ruangah an mei-inn kha vang duapdo in a um.

Milai thinlungah sinak thar nun nei dingah a duhdan le rem tidan in hna a tuan. Asinan fala aa-pawl ih khihhmuh mi cu lenglam thiltuahnak lawngih lungkim mipawl an si. Pathian ih ziaza thu zirnak le Pathian thawn lengtlangnak an nei lo ih, Pathian kha an thei lo. Curuangah ziangvek in kan um ding ti an thei lo ih Pathian rinsan dan ding khal an thei lo. Pathian an rennak tla tumsuk lam an pan vivo. E.G White, Christ Object Lesson. Pp. 411.

Himipawl ih an palhnak vek tuah lo dingah ziangvek hmuhdan so kan neih ding? Rundam hnangamnak nei thei dingah ziangvek thlirdan so kan nei ding? Kan nun ziangvekih thleng danglamaw ding so kan si?

TLAWNGKAI NILI                    May 17 NA TALENTPAWL HMANGAW

Matt 25:13-30 siar aw. Kan talent-pawl kha ziangvek in so Jesui ratnak hrangah timlamawknak dingah kan hman ding?

A danglam zetmi thuthimnak kha Jesuh in a sim. A hmaisa ih thuthimnak thawn bangaw in Jesui ratsalnak hngaktupawl fimkhur ih umnak ding thu a simnak a si. A pahnih ih a sim duhmi cu fimkhur le fimkhur lo umdan thu a si. Thlarau lam thuah daithlang ih an um ruangah kumkhua hloralnak an ton thu simnak a si.

Fala pahra ih Zinaan kha thlarau thianghlim a hmuhsak ih sui tangka khal a si thotho (Matt. 25:15 NIV). Grik cahram ih talent timi hi thlarau laksawng simduhnak a si. Thlarau thil pek kha a hmannak ding zawnih hmannak thu a si (The SDA Bible Commentary Vol. 5. Pp. 510).

Hnen-umpawl in an Bawipa hnen ihsin thil ngahmi an nei. An Bawipa in an thiltitheinak tawk cio in rinsan zetih a pek mi an si (Matt. 25:14,15). Anmah rinsan ruangah thilpek a pek ih, anmai neih lo mi thil parah kilkhawitu tuanvo an nei. Curuangah hi hnen-umpawl hi an Bawipa a thlen tikah an tangka thuhla relfel an si ding (Matt. 25:19).

Thlarau thilpek kha Thiang Thlarau hnenin a ra (I Cor. 12:1-11,28,31; Eph. 4:11). Thlarau laksawng an ngah mipawl kha an hrangih thuthangtha an don mi a si. Petu um loin thilpek ngah thei a si lo. Thlarau Thianghlim pekmi laksawng sunglawi kha an donmi a si.

Khrih ruangah kan zaten thilpek kan dong theh. Hi thilpek hi a hnenah le thlarau thianghlim hnenah pumpekawknak ihsin kan thiltitheinak zulin pekmi kan si. Ka co phutawk ka co lo  tiawtu cu thil tisualtu a si. A hnenah laksawng pek a si ko nan, tuahsuak mi an nei lo ih a laksawng ngahmi a karh lo. A hnenah duhsak zetih pekmi laksawng hmangin tuahmi a nei lo. Cuvekpawl cu Jesuh in zangzel hrokhrawl tiah a ti ih, nasa zetin a mawhsiat.

Jesuh in a ratsalnak  thuhla a simmi ah himi thuthimnak a hmang. Ni neta hrang timlamawknak ah kan talent hman thu in zirh mi ziangtluk ih thupi  so a si.

TLAWNGKAI NINGA                                   May 18

RUAHBET DING: Talent pakhat a ngahtu in a Bawipai tangka leisungah a phum. Thilpek malte lawng a dongtu in Khrih hrang hnatuannak ah in olh seh ti an duh ih, an ngah mi talent kha a karhter lo. Curuangah hivek in ralrinnak pek a si. A ropi zet thilpawl tuah thei sehla ziangtluk in so an lungawi ding. An ngahmi laksawng a mal ruangah tuanvo lak loih ngaidam a duh hi an palhnak a si. Laksawng in pekmi talent hi kan thinlung put le ziaza hniksaknak a si. Talent karhter duh lonak in rinum lonak a langter. Talent panga ngahtu in pakhat ngahtu vekin lei ah phum sehla vanlam thilpek talent pakhat dongtu ih hman sualmi a lang vekin a daithlannak a lang ve ding.

Thil malte ah rinumtu cu thil tampi par khalah a rinum ding (Luke 16:10). Thil malte a poimawhnak ruat lotu cu thilih man a ruat lotu a si. Cuih thil malte in kan nunih thil tampi parah dan in neihtertu a si. Khrihfa nunah a thupi lo tuk timi a um lo, thil tenaupawl ih poimawhnak kan hngilh ahcun kan nun ziaza remthatnak dingah tihnung phunkim in a khat ding (E.G White, Christ Object Lesson. Pp. 356).

RELTLANG DING:

1.       Mi hrekkhatpawl in leilung in famkimten thil umdana suahpi leh ding tiah ruahnak an nei, an saduhthah mi ziangso a si ding? Kha mi ruahnakpawl kha a sullam hawl ding um loin ziangah so a palh theh?

2.       Zumnak hnget khoh dingah zawnlung in Pathiansimmi tuahsuak theh timi ziangso a si? Tuahnak um lo zumnak hi a thi (Jame 2:26). Ziangah so a si? Pathian thukhaam thluntupawl in thin sau in tuar theinak an neih a tul timi ruat aw (Rev. 14:12). A ra thleng dingmi hrangih timtuahawknak ah kan hmuhmi thil tenau hi ziangah so kan hrang a poimawh.

3.       Fala him pahra thu ruat sal aw. Anmah vekih umlo dingin an thuanthu hi ziangah so kan hrang fimnak in petu a si thei? Fala him a aa mi vekin bumaw mi si lo dingah ziangti ih ralrin so kan tul?

4.       A cang thei ahcun hrilcia mipawl hman bum a tumding timi a san ziang a si? Hril mi timi kan theihthiamdan ziangvek so a si? (Matt. 24:31; Rom 8:33; Col. 3:12). Bumnak hi ziangtluk ih tihnung so a si?