ZSS LESSON 5: VAN BIAKBUUK SUNGA CHRIST

LESSON 5: VAN BIAKBUUK SUNGA CHRIST

April 28 – May 4

 NIPI NITAK

Tukal sung sim dingte: Rom. 8:3, John 1:29, Rev. 5:12, Heb. 7:1-28, 9:11-15, Lev. 16:13, Heb. 9:20-23.

Lai Siangtho Bulphuh: “ Tua ahih manin Pasian in amah a sang pen munah tawisang a, min khempeuh sanga min tungnung zawpia iin, tua Jesu min ah vantung, leitung le leinuai a om khempeuh khukdin ding” (Phil. 2:9,10 ZIV).

Vantung biakbuuk sungah Jesu thu Hebru thubu in a genna ah, “tua munah Jesu eite ma ah eite tangin a na lut khinzo hi. Amah Melchizedek gui zui in tawntung Tulpi hong suak hi” (Heb. 6:20).Thukhun Thak sungah leitung ah hong sihna tawh thoihdamna a sep khit ciangin Christ nasep ahi eite a ding van biakbuuk ah Tulpi a sepna siangtak hong hilh hi (Heb. 10:12).

Tukal sung van biakbuuk a Christ nasepna i sinkhawm ding hi. Hun nunung a ding Ama mite kiginkholhna dingin Ama mawhthumsak nasep poimawh hi. Tua ahih manin eite tungah a thupi hilhna hong kipiakna ah, “Biakbuuk thu leh kaldawp thukhenna thute Pasian mite in a tel ding uh thupi hi. Amau a ding na a sepsak a Tulpi thu uh a tel ding kisam hi. Tua hi kei leh, tu laitak ading kisam upna bang gamta theilo ding uh a, Pasian geelsak dinmun tung theilo ding uh hi.” – Ellen G. White, Kidona Lianpi, laimai 488 (manglai ah).

Christ in van biakbuuk ah bang sem a, tua a sep thu theihna in hun nunung a om eite a dingin banghang in thupi hiam?

SUNDAY                                                                                                             April 29A SANGPEN THOIHDAMNA

A sangpen Christ thoihdamna thu sinna in thu-ummite’ hun nunung a ding kiginkholhna dingin thupi hi. Mihingte in mungtup pen mailam ah koih in mitsuan den zaw hi hang. Ahi zongin, mungtup i nunglam ah om lam phawk ding zong thupi hi. Calvary a gen nuam hi hang. Eite a ding Jesu hong picinsak tua mungtup in mailam mungtup kician om cih hong theisak hi.

Rom. 8:3, 1 Tim. 1:17, 6:16, 1 Cor. 15:53 sim in. Banghang in Pasian in a Tapa hih leitungah hong sawl hiam?

Mawhna thoihdamna dingin Pasian in Christ hong sawl hi. Mihing taksa tawh mawhna a deihlohna ahi hi. A siatheilo pumpi tawh Christ hong si theilo ding ahih manin Topa mihing in hong piang a, a siathei mihing pumpi hong silh tawm na tawh eite tangin hong si thei ahi hi.

Pasian ahih phial hangin, Jesu in mihing pumpi hong silh iin Amah mah hong kiniam khiat tawm a, “sihna dong ciang thumang hi” (Philippi 2:6-8).Singlamteh tungah Jesu a sih laitak in a Pasian hihna tawh hong silo hi.Mihingte telban zawh ahilo khat in, naubu sungah a om kha kua sung leh hankhuk sungah a pasian-hihna gamtanglo/kimulo hi. A mihing-hihna a huh dingin Jesu in a nuntakna leh a nasepna ah a pasian-hihna zang ngeilo hi.

Luke 9:22 sim in. Christ sihna in sawmna/geelna ngiat ahih zia bang kimu thei hiam?

A si dingin Christ hong suak hi. A thuak ding kona, zahpihna, satna, leh a kikhailup ding ngaihsutnate a lungsim ah om tawntung ding hi zen cih mitkha ah kibawl thei hi. Tua in tehpih omlo itna hi a, telsiang zawh ding hilo cikmah a om ngeilo itna ahi hi.

Tua bang itna ah ei mihing te in puuksuk a upna leh thumanna tawh biak ding simloh hih theih bang om hiam? Singlamteh thu in mihingte hoihna in mannei hetlo ahihna bang hong gen hiam?

MONDAY                                                                                        April 30PASIAN TUUNO 

John 1:29 leh Revelation 5:12, 13:8 sim in. Hih lai ah kua thu gen hiam? Hih thu in tatkhiatna ding geelna hong bangci telsak hiam?

Tuiphumpa John in Jesu “Pasian Tuuno” a cihna in a diktak biakbuuk nasep a kawk hi a, eite mawhna hangin Christ sihna a khawk thoihdamna dinga kigo tuuno limcing tantunna a gen a hi hi. Hi hi, lungdamna thubu li te in hong hilh khempeuh in leitung mawhna a puakhia Pasian Tuuno ahi Jesu kipiakna thute amah a genbel uh ahi hi.

Ahi zongin, Jesu tangthu leh tatkhiatna ding nasepna te lungdamna thubu leh a sihna le a thawhkikna ah tawp lo hi. Hebru thubu kipat pan, Christ in a kigo thoihdamna Tuuno nasep a khit ciangin van biakbuuk ah Tulpi a sepna hong hilh hi. Singlamteh a nasep a zawh khit ciang (Heb. 1:3), Tulpi ahi Jesu thu hong genzom to pah hi. Heb. 7:1-28 sungah kicing takin Tulpi nasep asepna hong lak hi.

Heb. 7:1-28 sim in. Hih lai ah Jesu thu lai-atpa in bang gen hiam?

Hih lai ah a gen thu te thuk in zai mahmah a, a gen bulpi in ahih leh leitung biakbuuk a siampi nam ahi Aaron suante sangin Jesu Christ in ahoih zaw siampi nam ahihna hong lak hi. Tu in, leitung biakbuuk ah leitung siampi hilo in, van biakbuuk ah van Tulpi eite in i nei hi. Tua hi a, Jesu i mitsuan ciangin van biakbuuk a om eite Tulpi ahihna tawh i mitsuan thei ta hi.

TUESDAY                                                                                                               May 1

EITE TULPI

Heb. 7:24-27, 8:6 sim in. Eite a ding lametna lian bang hong kipia hiam?

Siampi dangte neih theihloh picinna tampi te hangin Christ in eite a kicing hotkhiatna hong pia thei hi. Mawhna maisak theihna a nei Pasian ahi hi. A tawntung siampiza zong nei hi. Cina te damsak a, lungleng khuangai te a hehnep hun lai mah bangin itna leh khuatuahna tawh a mite a ding thumna bawlsak hi. Mihing hi napi, mawh neilo in hong piang a, mawhna bawllo suak hi. Mawhpeng ahihna tawh mihingte mawhna khempeuh pua in hong si hi. Pasian-Mihing ahi, Amah bek in van biakbuuk ah mawhnei te a ding thumna bawlsak thei hi.

Hih Lai Siangtho mun in, Christ thoihdamna in khatvei leh a tawntung a ding kimang ahihna hong lak hi. Khatvei bek hong sih kul a, mihing khempeuh tatkhiatna dingin kicinghi. Singlamteh tunga si kua cih ngaihsun le hang, mihing khempeuh a ding koici bangin kicinglo thei mawk ding?

Heb. 9:11-15 sim in. Christ in a sihna leh van biakbuuk ah a nasepna tawh eite a ding bang ngah hiam?

Heb. 9:12 ah Christ in “tawntung tatkhiatna ngah khin” ci hi. Tatkhiatna cih pen Greek pan khiatna dangin “tatna”, “khahkhiatna”, leh “hotkhiatna” zong ahi hi. Luke 1:68 sung a Zecharias in, “Pasian hong pai in Ama mite tankhia zo hi” cih tawh kammal kibang hi. Tua a kigo Tuuni ahi Christ sisan in thoihdamna ding a kicing tatkhiatna, hotkhiatna hong ngahsak hi. Lungdamna thu hong pulaak alian thutak in Christ in hih tatkhiatna ngah a, Ama aa ding hilo eite a ding leh tua Christ thoihdamna a sang mite aa ding kicing cih thu ahi hi.

Christ in eite a ding a “tawntung tatkhiatna” “ngah” cih thu leh tua a zawhkhit ciangin eite tangin van biakbuuk ah nasep kipan cihthu ngaihsun in. Christ in van biakbuuk ah eite a ding hong sepsak cih thu in bang lametna hong guan hiam?

WEDNESDAY                                                                                    May 2EITE MAWHTHUMPA

Mawhna in Pasian leh mihing kikal ah a lauhuai kikhenna hong tunsak hangin, Christ thoihdam sihna tungtawn in mihingte Pasian kiang kipuak kik a, Pasian mai ah luttheihna i neizom thei hi.

“Eite in tua lametna kha adingin sikkip in i nei a, kip mahmah in muanhuai hi. Tua in, puanzak nung mun siangtho sungnung ah lut a, tua mun ah Jesu eite ma ah eite tangin a na lut khinzo hi. Amah Melchizedek gui zui in tawntung tulpi hong suak hi” (Heb. 6:19,20, ZIV). Hihmun ah Jesu in bang hong sepsak ci hiam?

Heb. 9:24 sim in. Hih lai ah Jesu nasep lak ah bang zong kihel ci hiam?

Pasian mai nadong ah eite ai-awh in van biakbuuk sungah Jesu va lut hi. Tua in, ama siangtho hoihna leh eite a ding a hong ngahsak tawntung tatkhiatna tawh Pa mai ah Jesu mawhthum nasep sem hi.

Jesu i san ciangin i mawhna te hong kimaisak a, Pasian mai ah maisaksa leh a siangtho in i ding thei hi. Christian i suah khit a lamdang gualzawhna ding kamciam ngah khit nangawn zong mawhna i bawl thei lai zel hi. Tua bang hun ciangin, vantung ah eite Tulpi in mawh hong thumsak hi. Mawhnei mi ai-awh in ding a, eite sepna paulam hilo (hoihna neilo ihih man) in Pa mai ah Ama hoihna eite a bangin san dingin hong thumsak hi. “Tua ahih manin ama tungtawn in Pasian kianga a paite khempeuh kicingtak in honkhia thei hi; bang hang hiam cih leh amaute tang aa a thumsak dingin a nungta tawntung hi” (Heb. 7:25, ZIV).

A piangthak Christian khat in Christ hehpihna leh lainatna a kisap tawntung lam phawk khalo in a om hiam? Jesu sungah nuntakna thak neihna leh a lamdang kikhelna a om hangin mawhmaina leh mawhmaisakna kisam tawntung lo a om hiam? Tua ahih leh, Christ in eite Tulpi ahihna theihna in banghang in manpha hiam?

THURSDAY                                                                                                         May 3SIANSUAH NI

Hebru thubu in leitung biakbuuk in eite Tulpi ahi Jesu nasepna van biakbuuk limcing ahihna hong hilh hi. Leitung biakbuuk nasepnate, biakbuuk deinihte, thoihdam nasep leh siansuahnate in “Moses in biakbuuk lam dingin a kipat ciangin a kihilh bangin vantung a om pen liim leh kibatpih” ahi hi (Heb. 8:5).

Leitung biakbuuk nasepzia ah deinih ahi Siangtho Mun leh Siangtho Pen Mun ah nasep a om bangin van biakbuuk ah Christ nasepna ah zong om hi. Leitung biakbuuk ah thukhenna tawh kisai Siahsuah Ni in hong lak a, Siampilaibu 16 sunga om bangin, biakbuuk siansuahna thu ahi hi. Tua in kum khat in khat vei Tulpipa deinihna ahi Siangtho Pen Mun ah lut a, mipite tangin siahsuah nasep sem hi (Lev. 16:12-14).

Heb. 9:20-23 sim in. Siansak ding leh hahsiang ding kisam bang om hiam? Hih in Christ nasep Siansuah Ni tawh bang kime-mat hiam?

Van biakbuuk ngiat siansak, hahsiang a kulna Lai Siangtho siam tampiin lamdangsa uh hi. Ahi zongin, hih thu Siansuah Ni thu gen ahihna i tel ciangin, buaina vengpah hi. Heb. 9:23 in van biakbuuk a Christ nasepna in Israel-te biakbuuk ah leitung tulpipa in Siansuah Ni aa a nasep diktak honglak ahi hi. Leitung biakbuuk ah leitung siampipa’ siansuah nasep in van biakbuuk a Christ nasepna hong malah khol ahi hi. Hih siansuahna in Christ vankah khit phet in kipanpah hiam cihthu hong laktel lo hi. Daniel thubu sinna pan in, hih nasep pen 1844 pan kipan cih kimu thei hi.Tua hi a, hun nunung a nungta Christian khat ihihna tawh tuhun in hun mawkmawk hilo a thupi zahtak huai hun a nungta cih thu leh Christ in a beisa in bang hong sepsak a, tu laitakin van biakbuuk sungah Tulpi ahihna tawh bangsem hiam cih telcian ding kisam hi.

Vansawltak masa thupuak in: “Ama thukhen hun hong tungzo ahih manin Pasian kihta un” (Rev. 14:7) ci.

Tua thukhenna in beina nai ahihna lak hi. Hih thumaan in eite nunzia koibangin huzaap huai hiam?

FRIDAY                                                                                              May 4

NGAIHSUT BEH DING: Hebru thubu in leitung biakbuuk in leitung ah thoihdam nasep leh vantung ah Tulpi nasep tawh Christ in eite a ding hong sepsak nate limla ahihna honglak hi. Isreal-te biakbuuk in lungdamna thu hilhna dinga limlak hi tawntung hi.Tua in tatkhiatna geelna hi a thoihdamna, mawhthumna, thukhenna, leh mawhna beina thute Jews te hilhna ding ahi hi. Daniel thubu in van biakbuuk a Christ nasepna tawpna hun beina ding thu laisim te in telzawk theihna ding khuavak hong puak beh hi. “Siansuahna, thukhenna, leh dik le mawh tangkona, hihthu te bulphuhna tawh hunbeina thu Daniel muhkholhna ah Siansuah Ni in leitung tangthu beina ahihna hong lak hi. Siansuahna in van biakbuuk le kumpi leh siampi ahi Messiah nasepna tawh kizom hi. Pasian mai ah Messiah in siansuah nasep a kipat hun ding, thukhenna, leh mawh le dik tangko nasep dingte laisim mite in atel theihna dingun tua mangmuhna in hun tawh kisai hong gen hi.” – Handbook of Seventh-day Adventist Theology (Hagerstown, Md: Review and Herald® Publishing Association, 2000), p. 394.

KIKUP DING DOTNATE:

1.         Ellen G. White kammal en in: “Biakbuuk ah tanglai mite in a mawhnate uh upna tawh ganhing tungah sisan tawh a kisuanbang lian in, thuciam thak ah a kisik mipa mawhna te upna tawh Christ tungah kisuan a van biakbuuk ah kisuanto (transfer) hi. Biakbuuk a ninsak mawhnate siakkhiatna tawh leitung biakbuuk siansuahna akizawh mah bangin a kiciamteh mawhna te phiatsiangna tawh van biakbuuk siansuah kizo ding hi. Tua nasep a kizawh madiak in, mawhna kisikna leh upna tawh kua in Christ siansaknaminvawh ngah ding cih etcianna om masa phot ding hi.” –The Great Controversy, pp. 421, 422. Christ siansakna minvawh ngahna ding thunih a gen bangte hiam? Ni nunungte ah haksatna lak ah nungta Pasian mite a dingin bang hangin hih thu theih ding thupi hiam?

2.            Lev. 16:15,16 sim in. Sisan i thupi-na bang hiam? Sisan in bang limla hiam? Hia hun lai in Siansuah Ni nasepna ah banghang in sisan thupi phadiak hiam? Tu hun in ee eite a ding sisan in bang deihna nei hiam?