FSS ZIRLAI 5: VAN HMUN THIANGHLIM SUNGAH BAWI KHRIH

ZIRLAI 5                                                        April 28- May 4

VAN HMUN THIANGHLIM SUNGAH BAWI KHRIH

SABAT TLAI LAM:                                                     April 28

TUZARH SIAR DING: Rom 8:3; John 1:29; Rev. 5:12; Heb. 7:1-28; Heb. 9:11-15; Lev. 16:13; Heb. 9:20-23.

BIBLE CANG KEN: “Pathian in a sangbik hmunah a cawisang ih, hmin hmuahhmuah lakah hmin cungnungbik a pek. Jesuh hmin upatnak ah vanih a um mi hmuahhmuah siseh, leitlun le lei hnuai ih a ummi hmuahhmuah siseh, a hmaiah an khuk an bil ding” (Fil. 2:9,10).

VAN ih hmun thianghlim ah Jesuh a umnak thu kan sim tikah, “Kan ai-awh in khi hmunah a thleng zo ih, Melkhizadek puithiam a sidan in kumkhua puithiam sang a si zo (Heb. 6: 20).

Kan hrangah Jesuh in leitlun ah pumpek thawiawknak hnatuan famkim ih a tuah theh hnu ah, van ih hmun thianghlim ah kan puithiam sang hna a tuannak thu kha thlung hlun sungah fiang zetin a sim (Heb. 10:12).

Tuzarh sung kan hawlsuah dingmi cu vanih hmun thianghlim ah Khrih ih rawngbawlnak a si ding. Minungpawl in can cemnak ih an timtuahawknak ah himi palai hna a tuanmi hi a thupi zet ruangah ralrin pekmi kan si. “Pathian zumtupawl hrangah van hmun thianghlim sungih thuthennak hnatuan hi theihthiam lo ding a um lo. Puithiam sangih hnatuan le a dinhmun an theih a tul. Cuti a si lo ahcun Pathian beisei vekih zumnak nun langter dingah a har zet (E.G White, The Great Controversy.Pp. 488).

Khrih in van hmun thianghlim ah kan hrang ziangso a tuah? Can netnak ih umpawl in kha mi theihfiang kha ziangah so a poimawh?

THAWHSAL NI                                                          April 29

RAITHAWINAK SANGBIK (Supreme Sacrifice)

A sangbik raithawinak Khrih ih a tuahmi zirnak hi zumtupawl ni neta hrangih timtuah awknak ah a bawmtu a si. Mi in a tumtah mi hngilh loih a tuah rero ahcun hlawhtlinnak an ngah theu. Asinan, an tumtah mi phenah Cross a um ti an hngilh theu. Kan hrangih a tumtah mi kha Jesuh in in tuahsak theh zo. Himi hi a tawp khawk thleng a tumtah mi a si ih, tlolh ding mi a si lo.

Rom 8:3; I Tim. 1:17; I Tim. 6:16; I Cor. 15:53 siar aw. Pathian in a fapa kha ziangah solei tlunah a run thlah?

Pathian in Bawi Khrih kha leitlun sualnak hrang raithawinak dingah a thlah. Cucu taksa ih a ummi sualnak kha mawhsiatnak a um lonak dingah a si . Himi sullam ziangso a si? Jesuh in thi thei lo Pathian a sinak in thihnak a tuar lo, hringnun taksa a thi thei mi a hrukaw ih kan aiawh in a thi.

Pathian sinak nei Pathian taktak in hringnun a hmang, tangdornak thinlung a nei ih Cross thihnak tiangin a tuar (Phil. 2:6-8). Cross parah Bawi Khrih a thih tikah Pathian a sinak in a thi lo. Jesuh in thla kua sung a nui sul sungah siseh, thlan sungah siseh, daiten a um ih Pathian a sinak kha lei parih a rawngbawlnak ah a hmang lo.

Luke 9:22 siar aw. Khrih thihnak kha thi dingin a tumtah hrimhrim mi a si ti ziangtin so in sim?

Mi hmuhsuamnak vuaknak le hremnak thinlung kekkuai in Cross parih thihnak a tonmi pawl kha kumkhua thih hloralnak ihsin luatnak ding a ruat lai ah, kannih in a langte ih thil cangmi vekah kan ruat ding a si lo. Himi duhdawtnak hi a tluktu a um lo ih theih famkim theh ti a um dah lo mi thu a si. Khrih kha thi dingih suak mi a si.

Zumnak le zawnlungnak nei in Pathian kan bia ih, a tlasia zo mi minung in duhdawtnak hi ziangtin so kan neih thei ding? Milai tuahthatnak hi santlaihnak a neih lonak Cross in a sinak ngaingai ziangtin so a sim?

TLAWNGKAI NIKHAT                                               April 30

PATHIAN TUUFA

John 1:29; Thuphuan 5:12; Thuphuan 13:8 siar aw. Hipawl ih an langter cia mi ziangso a si? Himi an tarlang mi in a thupi zetmi rundam khawkhannak theithiam dingin ziangtin so in bawm?

Tipil petu Johan in Jesuh kha Pathian tuufa a ti tikah Puan biakinn rawngbawlnak a langter. Sual raithawinak hrangih thahmi tuufa ih a khihhmuh mi kha Bawi Khrih a si tiah a langter. Thuthangtha bu li pawlin leitlun sualnak hmuahhmuah phurtu Pathian tuufa ngaingai hi Jesuh a si tiah a hnatuan dan le a umdan ihsin an simih an zirh tambik mi a si.

Kan rundamnak ding hrang Jesui hnatuannak a thihnak le a thawhsalnak kha thuthangtha bulipawl in a cem tiangin an sim theh.

Hebru cabu in a hramthok ih a zirhmi cu tuufa vekin sual thawinak ih a pekawk theh hnu cun Bawi Khrih kha van hmun thianghlim bikah puithiam bawibik ih hnatuan mi tumtah in a sim. Cross parah Jesui thihhnu ah (Heb. 1:3) Puithiam sangbik hnatuannak fiang zetih a simnak a si. Van hmun thianghlim sungih a hnatuannak cipciar zetih a simnak hmun cu Heb 7:1-28 kha a si.

Hebru 7:1-28 siar aw. Cangantu in Jesui thuhla ziangso a sim?

Lei puan biakinn sungah Aaron tefapawl ih puithiam rawng an bawldan hnakin tha sawnih Jesui rawngbawlnak a sungmuril kha thuk zet le famkim zetin himi cang pawl in an sim. Lei puan biakinn ah puithiampawl ih rawng  bawlsaknak ai-awh in a tu ahcun van hmun thianghlim ah rawng in bawlsaktu puithiam sang kan nei zo. Jesuh kha kan zoh ringring ahcun van hmun thianghlim ih puithiam sang hna in tuansaknakpawl kan hmu thei ding.

TLAWNGKAI NIHNIH                                                  May 1

KAN PUITHIAM SANG

Hebru 7:24-27 le Hebru 8:6 kha siar aw. Ruahsannak sunglawi ziangso in pek.

Puithiam dangpawl ih an tuah thei lo mi rundamnak famkim ih a tulmi hmuahhmuah tuah theh dingah sinak famkim neitu le tuah theitu cu Bawi Khrih a si. Sual in thlahsak theitu Pathian kumkhua tlaitluan ih puithiam a si. Khrihfa san hmuahhmuah ah duhdawt zet le zawn ruat zetin khawhar riahsiapawl a hnem ih mina a damter, amah zumih rinsantupawl hrangah palai hna a tuansak. Amah kha za ah za milai a Sinan sual cithlah lo mi vekin sual nei loin a nung. Sualnak nei lo asinan minung hmuahhmuah ih sualnak a phurih vansang mangbang in thihnak a tuar. Pathian/ minung a simi amah lawngin van hmun thianghlim ah misual hrang palai hna a tuan thei.

Keimah kha keimah ka si a titu khan Cross parah thihnak tuarin mi hmuahhmuah hrang a pekmi kha ziangah famkim loin a pek ding timi kha kan ruah dingmi a si.

Heb 9:11-15 siar aw. Khrih in a thihnak le vanah kan hrang rawng a bawlnak thawngin ziangso congahmi kan neih?

Heb 9:12 ah Jesui pekmi cu kumkhua rundamnak tiah a sim. Grik tongin ‘redemption’ run ti mi hi tlannak man pekih run ti le thlah zalen le luatter tiih lehlin a si theu. Cumi cu Luke 1:68 ah kan hmu thei ih, Zekhariah in Pathian in a mipawl a vehih a run tiah a ti (NKJV). Khrih thisen kha sual raithawinak hrangah sawisel ding um lo thisen a si. Khrih in tuufa vekin sual thawinak a tuah ruangah rundam suah zalen theinak a nei. A sunglawi mi thuthangtha kha amai hrang si loin kanmai hrang sawn a si. Bawi Khrih raithawinak zumih a pomtu hmuahhmuah hrangah hmual nei zetih thiltitheinak kha Jesui a pek mi a si.

Himi thu kan ruah cun kan rundamnak kha kumkhua daih in Jesuh in a tuah theh hnu ah, kan ngahmi a si. Kan ai-awh in van hmun thianghlim ah lutin rawng in bawlsak. Khrih in van hmun thianghlim ah kan hrang rawng a bawlnak thu ah ruahsannak ziangso in pek?

TLAWNGKAI NITHUM                                                  May 2

IN SIMSAKTU (OR) PALAI (Our Intercessor)

Pathian le minung kha rapthlak zetin sualnak in a thenter. Khrih raithawinak ruangah minung cu Pathian hnenah a thlenpi. Curuangah Pathian hmaiah a tlaitluan in luh theinak kan nei (Eph. 2:18; I Pet. 3:18).

Himi beiseinak hi hnangamnak in petu thirkawn bangtuk a si. Kan hrangah humhimnak hmun a si ruangah khoh zetin kan dingih van biakinn puanzar lan tahrat in hmun thianghlimbik sungah a thleng zo. Jesuh kha kanmai ai-awh in cuih hmun ah a thleng zo. Melkhizadek puithiam sidan in kumkhua puithiam sang ah a cang zo (Heb. 6:19,20). Himi Bible cang ihsin kan hrangah Jesuh in ziangso in tuah sak?

Heb 9:24 siar aw. Khrih hnatuanmi ziangso a ngan?

Kan ai-awh in van hmun thianghlim ah Jesuh in hmai tawnin Pathian hnenah a lut. Jesuh in Pa Pathian hmaiah rundam kan si theinak dingah kan ai-awh in a ding.

Jesuh in kan sual in thlahsak theh zo ti kan pom ahcun Pathian ih ngaidam mi le thianghlimter mi kan si zo. Khrihfa cu a mak zet mi nehnak thukam in pekmi kan si nan sualnak kan tuah theu. Jesuh kha van biakinn thianghlim sungah puithiam sang tuanin kan palai ah a ding. Sualsirtupawl ai-awh in a fehih kan thatnakpawl thawn feh loin Pa hmai ah amai thatnak kha kan thatnak ai-awh ih pomsak dingah a dil. Curuangah a tu le kumkhua in amah ruangah Pathian pantupawl a rundam thei. Kumkhua ih a nun ruangah Pathian hnenah a dilsak ringring (Heb. 7:25).

Mi piangthar Khrihfapawl cun zangfahnak le lainatnak an ngah ringring theinak dingah Khrih kha an hrangah a tul ringring timi thei loin an um dah lo. Khrih ah nunthar ngah ih danglam zetih nun thlengsak kan si hnuah sual thlahsak le ngaithiam tul ah zoso a tuahaw ringring ding? Curuangah Puithiam sang vekin Jesuh kan theihnak hi a sunlawinak ziangruangah so a si? 

TLAWNGKAI NILI                                                        May 3

REMNAK NI (The Day of Atonement)

Hebru cabu ih in zirhmi cu Hebru miphunpawl in lei puan biakinn rawngbawlnak in van biakinn thianghlim in khihhmuhnak a si. Cuih hmun cu puithiam sang tuanin Jesuh a luhnak hmun a si. Lei puan biakinn rawngbawlnak ah a khan pahnih in a then ih raithawinak hmun le thianhlimawkternak hmun a si. Moses in puanthlam biakinn a sak laiah khan Pathian in a hnenah “Tlangpar ah zohthim ding ka lo hmuhmi vek cekci in na sak pei” a ti (Heb. 8:5 NKJV).

Lei puan biakinn rawngbawldan khalah innkhan pahnih a um. Hmun thianghlim le hmun thianghlim bik ti a si. Himi vekin van ih biakinn thianghlim khal a si ve. Leitlun ah remnak tuah ni (remawknak puai ni) hi thuthennak hmuhsaknak a si. Cumi cu hmun thianghlim thianfainak ih a sullam a si (Lev. 16 sungah kan hmu thei). Puithiam sangbik in hmun thianghlimbik sungah kumkhat voikhat a lut (Lev. 16:12-14). Mipi ai-awh in thianfainak hna remawknak a tuah theu.

Heb 9:20-22 siar aw. Ziangah so tithianghlim le thianfaiter a tul. Pathian thawn remawknak tuahnak ni in Khrih rawngbawlnak ziangpawl so a langter?

Bible tlawngtapawl in vanih hmun thianghlim thianfai tulnak thu hi mak an ti lutuk. Kumkhat voi khat remnak puai ni ih hmuhsaknak cu thubuai rehternak a si tiah an ti. Heb 9:23 sungih a simmi kha lei hmun thianghlim ah Israel puithiampawl in kumtin Pathian thawn remnak puai an tuah mi ni in Jesuh Khrih van hmun thianghlim ah a taktak in a tuah mi khihhmuhnak a si. Lei biakinn thianghlimbik sungah puithiam Bawibik in thianhlimnak a tuahmi kha van hmun thianghlim ah Khrih in ni khat ni ah puithiam sangbik hna a tuan ding mi a khihhmuhnak a si. Jesuh in van hmun thianghlim thianfainak a tuahmi kha van ih a kaiso veten a tuah tinak a si lo. Himi rawngbawlnak hmun a thlengnak hi AD 1844 kumah a rak thok mi a si ti kha Daniel cabu kan zirnak ihsin kan thei thei a si. Khrih ih in tuahsak zo mi le van hmun thianghlim ah in tuahsak rero mi ah thumaw in himte ih kan um theinak dingah ni neta ih Khrihfapawl in himi tikcu can sungah kan um ti kan theihawk a tul.

Vancung mi pakhatnak ih a phuanmi cu “Pathian upat uhla a mak saknak thangthat uh. Ziangahtile miphun kip an thuthennak can a thleng zo (Rev. 14:7 NKJV). Thuthennak ih hmuhsak mi cu can netnak kan nai tuk zo timi a si. Himi can a nai zetmi ih kan nunah ziang vekih nung dingin so kan nun in nor.?

TLAWNGKAI NINGA                                                     May 4

RUAH BET DING: Hebru cabu ih a khihhmuh mi cu lei puan biakinn umzia a langter ih, Khrih in lei ah in tuahsak dingmi kan hrang raithawinak le vanah puithiam sang in tuansak ding mipawl a si. Israel-pawl ih puan biakinn hi thuthangtha zirhlaipawl a khihhmuh ringring. Cumi cu Judah-pawl hnenah rundam khawkhannak thu a zirh. Cuihpawl cu raithawinak, palai rawngbawlnak, thuthennak le ni netnak ih sual cem netnakpawl a zirh duhmi a si. Daniel cabu ih can netnak thuhla theih theinak dingah ca siartupawl bawmtu le Khrih in van hmun thianghlim ah a netnak tuanvo lakih hna a tuannakpawl thei dingah in bawmtu a si. Can cemnak hrangah Daniel ih langnak a hmuhmi ih a sim duhmi cu Pathian thawn remnak tuahnak ni ah thianfainak, thuthennak le thiam coternak kha langter in a sim ih, lei can cemnak kha a lamdang ngaingai ding a si. Van biakinn thianfainak le Messiah ih lalnak le puithiam sang hna a tuannak hi an pehzomawknak a um. Can thennak hi langnak in a langter hmaisa mi cu ca siartu in rundamnak thu kha olten an theihthiam theinak dingah a si. Messiah in vanhmun thianghlim thianfainak a tuah mi ah van Pathian hmaiah sual thianfainak le thuthennak kha a tuahmi a si (Handbook of Seventh-day Adventist Theology (Hager Stown, M.d: Review and Herald Publishing Association, 2000). Pp. 394).

RELTLANG DING:

1.   E.G White nganmi zoh ahcun : Hlanlai zumtupawlin an sualnak kha an zumnak ruangah thawiawknak tilva parah sual cu an thum ih lei puan biakinn sung nitinten sual khawlkhawm mi cu kumkhat voikhat biakinn thianfainak ah rannung thisen in an thianfaiternak hi Jesuh van hmun thianghlim ah a takin sualnak a ummi a thianfainak a si. Lei puan biakinn ah sual an rak khawlkhawm mi ruangih a balhter mi kha an thianfaiter mi in van hmun thianghlim ih a ummi cabu sungih sual hminsinnakpawl kha Khrih thisen in a hloter theh ih a ummi cabu sungih sual hminsinnakpawl kha Khrih thisen in a hloter theh ih, phiatfainak thianhlimternak khihhmuhnak a si. Kha mi tuah hlanah Jesui remnak a tuahmi ruangah amai parah zumnak nei ih sual sirawtupawl kha nunnak cabu sungah hmin ngansak an si. Kha mi cekfelnak cabu kau ih zohnak kha a rak tuah sungmi a si. The Great Controversy. Pp. 421, 422). Remnak tuah ruangih thathnemnak thil pahnih a ummi kha ziangso an si? Ni neta ah harsatnak tuartu ding Pathian zumtupawl in himi thu theih hi ziangah so a poimawh?

2.      Puithiam Hnatuan 16:15,16 siar aw. Thisen ih langtermi kha ziangso a si? Thisen in ziangso a khihhmuh. Thisen suakmi in remnak ni ah a liam zo mi canih sualnakpawl remnak tuahsalnak ah a takih a umter ih, cumi in tui ni kan hrangah ziang sullam so a neih?