HSS ZIRLAI 5-NA: VÂN BIAKBÛKA KRISTÂ RAWNGBÂWLNA

ZIRLAI 5-NA            APRIL 28-MAY 4, 2018

VÂN BIAK BÛKA KRISTÂ RAWNGBÂWLNA

CHÂNGVAWN: “Pathianin ani chu dinhmun sâng berah a dah ta, hming azawnga hming hungnung ber chu a pe ta bawk; chuvângin Isua hmingah chuan mi tin, vâna mîte leh leia mîte leh lei hnuaia mîte hi an la thingthi theuh dâwn a ni” (Filipi 2:9, 10).

SABBATH CHAWHNÛ                                                                       APRIL 28

CHHIAR TÛRTE: Leviticus 16:13; John 1:29; Rom. 8:3; Heb. 7:1–28; 9:11–15; Heb 9:20–23; Rev. 5:12.

VÂN biak bûka Krista rawngbâwlna chungchâng sawiin Hebrai Lehkhathawn ziaktu chuan, “Chutah chuan hmahruaitu Isua chu, Melkisedeka anga chatuana

Puithiam Lalber niin kan tân a lo lût tawh a” (Heb. 6:20) tiin sawi a.

Pathian Lehkha Thu, a bîk takin Thuthlung Thar bûte hian vân biak bûka Puithiam Lalber nia Krista hnathawh chungchâng an ziak chiang hlê a—chu hnâ chu he leia kan sualte thâwina ni tûra a inhlan hnû khân a thawk zui nghâl a ni (Heb. 10:12).

Tûn kârah hian vân biak bûka Kristâ rawngbâwlna chanchin kan luh chilh dâwn a. Min sawipui hnâ a thawh hi tâwpna hun atâna inpeih tûra a mîte buatsaih an nih theih nân a pawimawh hlê. Chuvâng chuan hê vaukhânna thu khûn tak pawh hi pêk kan ni rêng bawk a: “Biak bûk leh rorêl lâwkna chungchâng hi Pathian mîte chuan an hre chiang hlê tûr a ni.  An Puithiam Lalberin hnâ a thawh leh a dinhmun chu an hriat theuh a tûl a. Chuti lo chuan, tûn huna an mamawh tak rinna chu an nei thei lo vang a, chu mai pawh chu ni lovin, Pathianin an luah tûra a lo ruat sa dinhmun pawh chu an luah thei lo bawk ang.”— Ellen G. White, The Great Controversy (Indona Ropui), p. 488. Vân biak bûkah hian Kristan kan tân eng thil nge a tih a, chu a thil tih chu eng vângin nge keini ni hnuhnunga chêngte tân hian a pawimawh viau le?

SUNDAY                                                                                            APRIL 29

INHLANNA CHUNGNUNG BER

Isua inhlanna sânzia hriat chianna hian tâwpna hun atân nasa takin ringtûte a buatsaih a. Mihringte hian thil kan tih rêng rêngin kan thlên tum chu a hmâ daih atangin kan lo thlîr lâwk thîn; chû chuan awmze pawh thui tak a nei bawk. Nimahsela, chu kan thiltum chu kan hnungah a awm ni tih hriat pawh hi a tûlna chin a awm ve tho mai. Kan thil sawi hi Kalvari chungchâng a ni a. Khatah khân Isua chuan kan tâna a thiltum chu a lo hlen tawh a, kha kha sût leh theih tawh loh, a tâwp hlen chhuahna ni nghâlin, kan hmâa hlen leh kan tum pawh chu kan puitlin ngei dâwn a ni tih hriat chianna min neihtîr bawk a ni.

Rom. 8:3; 1 Tim. 1:17, 6:16; 1 Corin 15:53-te hi chhiar la. Eng vângin nge Pathianin khawvêlah a Fapa a rawn tirh le?

Tîsâa sual awm hi thiam loh chantîr a nihna tûrin Pathianin Krista chu sual thâwina atân a rawn tîr a.  Hei hi eng nge ni a awmzia? Krista kha Pathian a nih avângin thi thei a ni lo va. Chuvângin LALPA chu mihring rawn ni vêin, thi thei kan nihna chu amahah a inbel vê a, chutichuan, kan âiawhin a lo thi thei ta a ni.

Pathian niin, Pathian ze famkim chu nei tho mah sela, “mihringte angah” a lo piang a, tichuan, kraws-a “thi hial khawpa thu zâwmin” (Phil. 2:6–8) a intitlâwm ta a ni. Krawsa Isua khenbeh a nih khân Krista Pathianna chu a thi vê lo va; a thih vê loh dân erawh chu Pathian chauhin a hria. Eng tin emaw tak, mihringte hriatthiam phâk loh tûr sîin Isua Pathianna chu chhûl chhûngah thla kaw chhûng leh thlân chhûngah ni thum leh zan thum chhûng eng mah ti lovin a awm vê hlê hlê mai a; tin, amah Isua pawhin he leia rawng a bâwl chhûng zawng khân a Pathianna chu a mihrinna tanpuina atân a hmang ngâi miah lo bawk.

Luke 9:22 chhiar la. Hê thû hian Krista thihna kha thleng ve tûr rêng a nihzia eng tin nge a sawi le?

Krista kha thi tûr sê rênga piang a ni a. Nuihsan te, vuâk te, sawisak te leh hrehawm taka khenbehna A la hmachhawn tûr hrechang lo va awm lai nei ngai lo tûr angin kan suangtuah thei âwm e. Hei hi chu a tlukpui awm lo hmangaihna a ni a, tûn hmâ pawha la hriat ngâi rêng rêng loh leh a thûkzia hriat zawh sên rual loh a ni bawk.

Hetiang hmangaihna thûk lutuk hmâah hi chuan mihringte hian inphah hniam leh rinna leh thuâwihnaa chibâi bûk mai loh chu thil dang eng nge tih theih kan neih le? Kraws thû hian mihringte thil tih thatin hlutna a neih lohzia eng nge min hrilh?

THAWHTANNΠ                                                                                 APRIL 30

PATHIAN BERÂM NO CHU

John 1:29, Rev. 5:12, 13:8 chhiar la. Hêng thutena thil thuhmun an sawi chu eng nge ni a, chu an thil sawi chuan chhandamna ruahman kan hriatthiam theihna tûrin eng nge pawimawhna a neih?

Baptistu Johanan “Pathian Berâm No” tia Isua a koh khân biak bûka a rawngbâwlna kâwkin a sawi a ni tih a chiang a. Chû mai pawh chu ni lovin, sual thâwina atâna Hebrai-hoten berâmno an lo talh tawh zawng zawngte (leh biak bûk rawngbâwlnaa an hlan ran dang zawng zawngte pawh a ni tho bawk a) famkimna awm chhun atâna Krista thihna kâwkin a sawi a ni. Dik tak phei chuan, Chanchin Tha bu palîte hian, thil dang eng eng emaw chu sawi tel ve tho bawk mah sela, a sawi ber chu khawvêl sualte la botu Pathian Berâm No a nihna anga Isuan thil a tih chanchin a ni.

Nimahsela, Chanchin Tha bûte hian Isua leh kan chhandamna atâna a hnathawh chanchin leh, a thihna leh a thawhlehna-te chauh sawiin an duh tâwk mai lo tih erawh hria ila. Hebrai lehkhathawn hi chuan, a tîr atang rêngin sual thâwina Berâm No a nihna anga Kristan a hnâ a thawh zawh tawh hnua vân biak bûka Puithiam Lalber a han nih tâk thu a sawi nghâl a. Kraws-a a thih hnua he hnâ a thawh tâk thu sawi lan a nihna hmasa ber (Heb 1:3) atanga a bung dawt leh zêlahte pawh hian, Isua chu Puithiam Lalber anga sawi a ni zui ta zêl a. Vân biak bûka hnâ a thawh chu Heb. 7:1–28-ah hian kimchang takin ziak a ni.

Heb. 7:1–28 chhiar la. Hebrai Lehkhathawn ziaktu-in Isua chungchâng a sawi chu eng nge ni?

Hêng chângte hi thûkin hausa hlê bawk mah se, a thil sawi laimu ber chu Isua Krista kha lei biak bûk rawngbâwlna khawih thîntu Arona thlah atanga lo chhuak puithiamte âi khân a tha zâwk a ni tih hi a ni. Tûnah chuan lei biak bûka râwngbâwltu puithiam âiah, vân biak bûka rawng min bâwlsaktu Puithiam Lalber kan nei tawh a. Chuvângin Isua chu en bera kan neih hunah, amah chu vân biak bûkah kan tân Puithiam Lalber niin a han awm ta tih kan hmu thei dâwn a ni.

THAWHLEHNΠ                                                                                          MAY 1

KAN PUITHIAM LALBER

Heb. 7:24–27, 8:6 chhiar la. Hêng chângahte hian eng beiseina ropui tak nge pêk kan nih le?

Kristan a famkima mihringte a chhandam theihna chhan chu puithiam dang zawng zawngten an neih vê theih ngâi rêng rêng loh nihna eng emaw a neih bîkvâng a ni. Amah chu Pathian, sual ngâidam theitu a ni a. Puithiam hlun nihna a nei bawk. Damlote a tihdam a, mi lungngâite a hnem thin lâia a hmangaihna leh a khawngaihna tho khân tûnah pawh a mîte tân sawipui hnâ a thawk reng a. Mihring ni tho mah sela, sualna nei lova lo piang niin, chutiang chuan a lei dam chhûng nîte kha a hmang tluan bawk a ni. Sualna pakhatmah nei lo a ni a, mihringte sual zawng zawng belh khâwm rit tak chu phurin a thi ta a. Chutiang chuan, Pathian-Mihring a nih angin, amah chauhin vân biak bûkah khian mi sualte sawipui hnâ chu a thawk thei a ni.

Hêng Bible chângten an târlan ni bawk chu sual thâwina atâna Krista inhlanna kha tum khatah tlingtlâk fel nghâl vek a ni tih hi a ni. Tum khat chauh a thlen a tûl a, chu chu mihring lo piang tawh zawng zawngte hnêna chhandamna thlen theihna tûrin a tling tâwk a ni. A enga pawh chu ni se, krawsa thî-a kha tu nge ni tih ngaihtuah hian, khatiang thilpêk ropui tak kha eng tin nge mihring zawng zawng tân a tâwk zawh loh theih tehlul ang ni?

Heb. 9:11–15 chhiar la. Kristan a thihna leh tûna vân biak bûka rawng a bâwlna azâra thil min hmuhsak tâk chu eng nge ni?

Heb. 9:12 chuan Kristan “chatuana tlanna” min hmuhsak thû a sawi a. “Tlanna” tia an lehlin thin Grik thumal hian “lei” tih te, “chhuah zalên” tih te leh “chhan chhuak” tihte pawh a kâwk thei bawk. Luke 1:68-a Zakarian Pathianin a mîte a “rawn kan a, a tlan chhuak ta” tih thû a sawi a, “tlan chhuak” tih lâi tak nên hian a tawngbul lamah chuan thumal thumun reng a ni. Kristâ thisen—sual thâwina atâna tling zo awm chhun thisen—tih thû a sawi hian Krista kha sual thâwina Berâm No a nihna anga tlannna, chhanchhuahna hmutu a ni tih a kâwk. Chanchin tha lâwmawm êm êm mai chu, hê tlanna hi Krista khân amâ tân ni lovin, keimahni tân zâwk a hmû hi a ni a; an tâna Krista inhlanna pawmtu zawng zawngte tân a lo sâwt ta bawk a.

Kristan kan tân “chatuana tlanna” a “hmû” tih thû leh, hemi hi a hlen chhuah hnûah chauh kan âiawha vân biak bûkah hna thawk tûrin a lût ta tih thû hi ngun takin ngaihtuah zui la. Hei hian vân biak bûka Kristan kan tâna hnâ a thawh chungchângah eng beiseina nge min siamsak sawi ang che.

NILÂINΠ                                                                                                    MAY 2

MIN SAWIPUITU

Sual chuan Pathian leh mihringte inkârah inthen hranna hlauhawm tak rawn thlen tawh mah se, kan sualte thâwi nâna Krista thihna a zârah Pathian hnên hruai thlen leh kan ni a, amah chu kan pawh chhunzawm reng thei ta bawk a ni (Eph. 2:18; 1 Pet. 3:18 en la).

“Chû beiseina, nunna thîrchakâia kan neih chu a chiangin a nghet a, puanzâr chhûng lamah chuan a lût ta bawk; chutah chuan hmaruaitu Isua chu, Melkisedeka anga chatuana Puithiam Lalber niin kan tân a lo lût tawh a” (Heb. 6:19, 20). Hêng châng pahnihten a sawi anga Isua kan tâna thil a tih chu eng nge ni?

Heb. 9:24 chhiar la. Hê thû hian Krista hnathawhin a huam tel chu eng nge ni?

Isua chu hmahruaitu a ni a, vân biak bûk, Pathian awmna hmun ngeiah khian kan Âiawh a nihna angin kan tân a han lût tawh a. Chû chu, Isua chu Pâ hmâah a ding a, tlanna min siamsak thatna nên rawng bâwlin, kan tân ‘chatuana tlanna’ chu min neihsak ta a ni.

Isua kan pawm chiah hian kan sualte chu ngaihdam a ni a, Pathian hmâah chuan ngaihdam tawh leh tlen fai tawh niin kan ding vê ta a ni. Nimahsela, Kristian kan lo nih ve tâk hnû-ah pawh, thlêmnate hneh theihna thutiam ropui tak tak nei tho mah ila, thil sual tih zauh châng kan la nei leh thîn. Chutiangah tak chuan, Isuan vânah khian kan tân Puithiam Lalber a nihna angin min dîlsak hnâ a thawk a.  Ani chu an sual simtûte âiawhin a ding a, keimahni thil tha tih ni lovin (thil tha tih engmah kan nei sî lo va), amâ thil tha tih zâwk chu kan tân Pa hmâah a sawi a. “Chuvâng chuan amah kal tlanga Pathian hnên rawn pantûte chu a tâwpkhâwk thlengin a chhandam thei bawk a, anmahni dîlsak tûrin chatuanin a nung reng sî a” (Heb. 7:25).

Mi piang tharte zînga tû hian nge Krista hmangaihna leh khawngaihna a mamawh zui rengzia inhre lo ang le? Chumi awmzia chu, Isua-ah chuan nun thar nei tawhin, kan nunah pawh danglamna ropui tak awm tawh tho mah sela, ngaihdam ngâi kan la ni reng tho tih kan inhre theuh hlawm a ni. Chuti a nih chuan, eng vângin nge Krista chu kan tân Puithiam Lalber a ni tih hriat hi a hlut êm êm le?

NINGÂNΠ                                                                                                  MAY 3

TLANNA NÎ CHU

Hebrai lehkhathawn hian Hebrai-hote biak bûk rawngbâwlna kha kan Puithiam Lalber nia Krista a luhna leh, amah pawh lawm luh a nihna hmun vân biak bûk entîrna niin a sawi a. Lei biak bûka pindan pahnih awmte leh, serh leh sâng an khawih zawng zawngte kha “Mosian biak bûk a sak dâwna Pathian kaihhruaina a dawn ang entawna siam leh hlimthlâ” vek a ni (Heb 8:5).

Lei biak bûk serh leh sângah khân pindan pahnih— Hmun Thianghlimah leh Hmun Thianghlim Bera rawngbâwlnate a awm ang chiahin, vân biak bûka Krista rawngbâwlnaah pawh a awm ve a. Leviticus 16-a kan hmuh angin, lei biak bûk rawngbâwlnaah khân rorêlna chu Tlanna Nî-ah thlengin, biak bûk tlen fâina an nei nghâl bawk thîn a. Hei hi kum khatah vawi khat, Puithiam Lalberin pindan chhûngril zâwk, Hmun Thianghlim Bera tlen fâina leh mîte tâna tlanna hnâ thawk tûra a luh tumin neih a ni thîn (Leviticus 16:12–14).

Heb 9:20–23 chhiar la.  Then leh tihthianghlim ngâi chu eng nge ni a, eng vângin nge heta a thil sawi hi Inremna Nî-a Krista rawngbâwlna sawina a nih le?

Vân biak bûk khi tlen fai, “tihthianghlim” ngâi a nih thu a sawi hi mithiamte chuan mak an ti deuh hlek a. Amaherawhchu, heta a thil sawi hi Tlanna Nî anga kan ngâi a nih chuan hriatthiam loh tûr a awm lo thung. Heb 9:23-ah hian vân biak bûka Kristâ hnahthawh chu hmânlâi Israel mîte biak bûk rawngbâwlnaa kum tina an  neih thin Tlanna Nî-a puithiam lalberin a tih thinin an entîr dik tak a ni tih a sawi a. Lei biak bûk tlen fâi a nih tuma puithiam thil tih khân, vân biak bûka Kristan hna a la thawh tûr chu a lo entîr lâwk a ni. He lâi châng hian vân biak bûk tlen fâi hnâ chu vâna Krista a chhoh vêleh neih zui nghâl niin a sawi lo va.

Daniela bû hi ngun taka kan zir chuan, hê rawngbâwlna hi kum 1844-ah khân thawh tan a ni chauh tih kan hre thei ang. Chuvâng chuan, ni hnuhnunga chêng Kristiante kan nih angin kan hun tawn mêk hi a urhsûnzia kan hriatthiam a tûl a, chutih rual chuan hun kal tawha Kristan thil min lo tihsak tawh leh, tûna vân biak bûk Hmun Thianghlim Bera min tihsak leh mêk pawh hi ngaihngam taka ring mai tûr kan ni bawk.

Vantirhkoh pakhatna chuan, “A rorêl hun chu a lo thlen tâk avângin Pathian chu hlâu ula, châwimâwi rawh u”a ti a (Rev. 14:7). Rorêlna lo thleng ta nia a sawi hian tâwpna chu a hnâi tawh hlê a ni tih a kâwk a. Chumi chuan eng tin nge kan nun a nghawng?

ZIRTÂWPNΠ                                                                                              MAY 4

NGAIHTUAH TÛR: Hebrai lehkhathawn hian lei biak bûk kha Kristan hê leia kan sualte thâwina atâna thil min la tihsak tûr leh, kan Puithiam Lalber nia vâna thil min la tihsak leh tûr lo entîr lâwktu, a hlimthlâ a nih thu a sawi a. Hmânlâi Israel-te biak bûk kha chanchin tha puang chhuaktu zirlâi tha tak a ni reng thîn a. Juda-te hnêna chhandamna ruahman zirtîrtu niin, inthâwina, insawisakna, rorêlna leh sual tâwp hlenna te a huam. Daniela bû hi chuan vân biak bûka Krista hnathawh hmâwr bâwknaa tâwpna lam bîkte hi hrethiam thei tûrin min pui ve tho bawk.

“Daniela inlârna hmuh hian biak bûk tlen fâina, rorêlna leh mi thianghlimte thiam chantîrna-te sawiin, Tlanna Nî atanga khawvêl tâwp thleng chanchin min hrilh a. Hê tlen fâina hi vân biak bûk leh, lal leh puithiam a nihna anga Messia hnathawh nên a inzawm tlat a ni. Hêng a inlârna hmuhte hian hun thu sawiin, a chhiartûte tân pawh chhandamna chanchina Messia’n tlen fâina, rorêlna leh mi thianghlimte thiam chantîrna hnâ a thawh hun tûrte lo hre thei tûrin a pui a ni.”—Handbook of Seventh-day Adventist Theology (Hagerstown, Md.: Review and Herald® Publishing Association, 2000), p. 394.

SAWI HO TÛRTE:

u Hê thû, Ellen G. White-in a lo ziah hi han thlîr teh:

“Hmânlâi chuan mipuite sualna chu rinna-in sual thâwina chungah nghah niin, a thisen chu lei biak bûkah suan luh a ni a, chutiang chiah chuan thuthlung tharah pawh sual sim tâte sualna chu rinnain Krista chungah nghah a ni a, vân biak bûkah suan luh a ni ta a ni. Lei biak bûk tlen fâina chu sualin a tihbawlhhlawh tawhte lâk kiannaa hlen chhuah a ni thîn ang chiah khân, vân biak bûk tlen fâina tak tak pawh chhiahchhiaha awm sualte lâk kianna, thâi bona hmanga hlen chhuah tûr a ni. Nimahsela, hlen chhuah a nih hmain sual simna leh Kristaa rinna nghahna azârah tuten nge a tlanna chu hlâwkpui thei dâwn tih hriat nân chhinchhiahna bûte chu en hmasak phawt a ni ang.”—The Great Controversy (Indona Ropui), pp. 421, 422. A tlanna hlâwkpui thei tûrte chu tute nge tih hriat theihna tûr thil pahnih a sawi chu engte nge ni? Chumi hriatthiamna neih chu eng vângin nge Pathian mîte tân hian a pawimawh viau le?

v Leviticus 16:15, 16 chhiar la. Thisen chuan eng nge a entîr a, eng nge pawimawhna a neih? Eng vângin nge thisen chu Tlanna Nî an hman dânah khân a pawimawh êm êm a, keini tân eng nge awmzia a neih ve le?