ZSS SINNA 10: NEIHSAKEP-ZEEKNA II PANLAAK

SINNA 10: NEIHSAKEP-ZEEKNA II PANLAAK 

 March 3 - 9 

---

NIPI (SABBATH) NITAAK March 3 

Tukal sinna ah simding: Col. 1:16-18; Heb. 4:14-16; 3 John 3; Gen. 6:13-18; Rev. 14:6-12; 1 Pet. 1:15, 16. 

Lai Siangtho Bulphuh: Ahangin, Pasian in a nin a nungta dingin hong sam loa, a siangtho a nungta dingin hong samzaw hi. (1 Thess.4:7, ZIV) 

Neihsakep-zeekna in thuk-in zai lua mahmah ahih manin, a zaina zia in i lung hong mangsak thei hi. Neihsakep-zeekna in ol (baih) napi telhak theizel ahih manin kitelkhial thei pahpah hi. Bangbang hitaleh, Christian a hiaa, pawlpi ahizongin neihsakep-zeekna loin hi theilo hi. Christian khat hihna in adik neihsakemzeektu khat hihna hipah hi. “Hih in ngaihsutna leh theihna hi loin sepkhiatna hi. Hih in a tak aa Christian nunzia thukhun hi. Hih in nuntakzia akilawm khat ciang tel ding leh a dik khalam kalsuanna ah pelmawh a kisam khat ahi hi. Tuain lungsim theihna bek hilo nuntakna bup tawh utna leh khensat gamtatna ahi hi.” –Leroy E. Froom, Stewardship in Its Larger Aspects (Mountain View: Calif., Pacific Press Publishing Association, 1929), p. 5. 

Chritian neihsakem-zeektu khat hihding bang thupi upsannate kisam hiam? Tu kaal sung Christian nuntakna ah neihsakep-zeekna in panlaak a cingzaw in i sin ding hi. Tehkaakna tuamtuamte tawh i sinto ding hi.

* Tukal sinna na simna tawh March 10 Nipi aading kigingkhol in.

NIKHATNI March 4 A LAIGIL AHI CHRIST 

Lai Siangtho bup ii laigil in Jesu hi (John 5:39) aa, eimau mah Amah tawh kizopna i neih kul hi. Amah in mawhna gawtdaan hong piaksak zo in “mi tampi tatna” pia khin zo hi (Mark 10:45). Jesu in vantung leh leitung a thuneihna khempeuh nei (Matt. 28:18) a, na khempeuh Ama’ khutsung ah om hi (John 13:3). Mindangte khempeuh sangin Ama’ min sangzawaa, ni khat ni ciangin Amai ah khuk khempeuh khukdin ding uh hi (Phil. 2:9-11). “Na khempeuh ii a nungta laigil in Jesu hi” – Ellen G. White, Evangelism, p. 186. 

Eimau neihsakep-zeekna bulpi in Jesu hiaa, i thahatna naak ahi hi. Ama’ hangin, nuntak taakcing nunna i langkhiasaka, i nuntakna laigil in Amah hi cih i lakkhia hi. Haksatna tampi Paul in thuakkha mai ding hi, ahi zongin, koikoi ah om taleh, a tungah bangbang piang taleh, hinna ding masuat khat bek neia, “Kei aadingin nuntak, Christ hiaa, sih lah metna ahi hi. (Phil. 1:21, ZIV). 

Col. 1:16-18, Rom. 8:21, leh 2 Cor. 5:17 sim in. Eite hihna khempeuh ah koi bangin Jesu a laigil ahihna thu hong gen hiam?

___________________________________________________________________________________________________________________ 

Christ ii nunna laigil ahih keileh neihsakepzeekna dik om theilo hi (Gal. 2:20). Amah in eite “lametna thupha” (Titu 2:13) laigil hi. “Na khempeuh a kibawl ma-in Amah omaa, Ama’ sungah na khemepuh om hi” (Col. 1:17, ZIV). Lengzawlpi in lengpei ii laizang hi-in, lengbuppi a puak mah bangin Christ in neihsakem-zeektu khat ii nuntakna laigil ahi hi. A kip lengzawlpi in lengpei diktak a kipeina ding a kipsak banin, Jesu zong Christian nuntakna hong kipkhosak nun laigil ahi hi (Heb. 13:8). I ngaihsut leh i sep khempeuh Ama’ huzaap ahih kul hi. Neihsakep-zeekna in Jesu tungah kinga in phualsa ding hi. 

“Kei loin bangmah na hih theikei uh hi” (John 15:5, ZIV). Neihsakep-zeekna laigil in a hawmpi hi loin tu leh a tawntung dong i gamtatzia hong puahzuun a nungta taktak Christ ahi hi. 

Jesu in i nuntak laigil hi ciaa gen leh ahi bangkeeka a nungta ki om thei hi. A hong kamciam ahi, Amah na lutsak leh na sungah hong nungta ding a cih bangin na sungah Jesu nungta takpi cih naki bangci kitel theih ding hiam? 

NINIHNI March 5 BIAKBUUK UPNA THUKHUN 

Mite in biakbuuk leh neihsakep-zeekna a kizom in ngaihsun ngei khollo hi. Biakbuuk-thu in upna thukhun thupi khat ahihbangin neihsakep-zeekna zong upna thukhun thupi khat ahihna tawh kizopna om hi. “Van biakbuuk a (Christ ii) thoihdam nasepna diktak telna in i upmuanna ii tawphah ahi hi.” - Ellen G. White, Evangelism, p. 221. Pasian deih bangin neihsakep-zeekna i panlaak i tel ding kisam pha mahmah hi. 

1 Kings 7:33 ah sakol lengpei thu gen hi. Biakbuuk upna thukhun thu lengpei tawh i tellah ding hi. Lengpei a a kipei ciangin kiptak akipei theih nading lengzawlpi in len hi. Sihna a thuakna leh a thawhkikna in (2 Tim. 1:10) biakbuuk ah Christ a nasep ii tawphah bulpi hi (Heb. 6:19,20) hi aa, i upna hong kipkho sak hi. Tua biakbuuk panin eite tang-in thoihdamna hong bawlsak hi (Heb. 8:1-2). 

“Lai Siangtho bekmah cih thugui lenkawm in Adventistte in a upna thukhunte biakbuuk upna thukhun tungah lamto uh hi.” – Fernando Canale, Secular Adventism? Exploring the Link Between Lifestyle and Salvation (Lima: Peru, Peruvian Union University, 2013), pp. 104, 105. 

1 John 2:1; Heb. 4:14-16, leh Rev. 14:7 sim in. Hih munte in biakbuuk a Jesu nasepna bang hong gen hiam? 

Biakbuuk upna thukhun in Christian theology ii laigil ahi tatkhiatna leh gupkhiatna thutak hong lak hi. Biakbuuk ah Jesu sihna thu bek hilo, vantung biakbuuk ah thoihdamna sep zong kimu hi. Siangtho Pen Mun ah Pasian thukham a thupi-na leh atawpna thukhenna omtakpi ahihna zong i mu thei hi. A bulpipen ah, a luangkhia Jesu sisan hangin gupkhiatna ngah theihna kamciam ahi hi. 

Biakbuuk upna-thukhun ah i muh bangin neihsakep-zeekna ii panlaak in tatkhiatna thutak lak hi. Jesu hong sepsaksa leh sepsak laitakte i thuk tel sem ciangin Christ, a nasepna, a thuhilhna tawh i kinaizaw aa, neihsakepzeekna thugil nuntakpih ding hong deihna i telzaw sem hi. 

Heb. 4:14-16 sim in. Mawhna leh angsungkhualna tawh i buai hun ciang, bang lametna leh thahatna lak ding kamciam om hiam? 

NITHUMNI March 6 CHRIST-BULPHUH UPNA THUKHUN 

Singlamteh ii nasep leh tatkhiatna thutak vanglian tak a kilahtelna ahihmanin biakbuuk thu thupi mahmah hi. I upna thukhun khempeuh, lam khat teitei in, lungdamna leh tatkhiatna kamciam tawh a kizom hamtang hi. Lengpei kannate sikte bangin upna thukhun dangte zong Jesu sunga upna tawh tatkhiatna thutak panin hong kipan hi. 

“Mawhsawp nadingin Christ kipiakna thutak lian in thutak dang khempeuh kituahbomna ahi hi . . . A lamdang Tanpa kipiakna a sinte in hehpihna leh thutheihna ah khang ding uh hi.” - Ellen G. White Comments, The SDA Bible Commentary, Vol. 5, p. 1137. 

John 14:6 sungah Jesu in Amahmah “thutak” a kicihna bang khiatna nei hiam? John 17:7 tawh etkaak in. Tua thutak tawh bang hih ding i hiam? 3 John 3. ______________________________________________________________________________________________________________ 

I upna thukhunte in i hihna leh i paina masuan huzaap hi. Upna thukhunte in Pasian-thu ngaihdan bek hilo hi. A dik upna thukhun in Christ sungah bulkip nga aa, i nuntakzia hong huzaap hi. A taktakin, ei Seventh-day Adventist i hihna ngiat in na dang sangin i upna thukhun hilhnate ah kilang deuh hi. Hih Lai Siangtho bulphuh thuhilhnate in Seventh-day Adventistte hong hisak phadeuh hi. 

Neihsakep-zeekna panlaak in Jesu sungah i nuntak bangmah thutak upna thukhun bang nuntakna hi aa, tua in i nunzia ahoih lam in huzaap ding hi. “Jesu sunga om thutak tawh kizui-in ama sungah hong kihilh zo ahih ciangin note in amah thu na zaksa uh hi takpi hi. Tuma lai aa na nuntakna uh tawh kisai-in khemhat lunggulhna in a siatsaksa na milui uh suahkhia ding, na lungsim puakzia uh kibawl thak ding, amaan thumaanna le sianthona taktak sungah Pasian tawh kibang dinga kipiangsak mithak na silh ding uh note hong kihilh hi.” (Eph. 4:21-24, ZIV). 

Hihlai mun ah thutak theihna bek hi loin nuntakpihna in bangdan hiam cih i mu hi. Neihsakemzeektu hihna in upna thukhun um bek loin tua thutakte i nuntakna leh midang tawh kizopna ah nuntaksakna ahi hi. 

NILINI March 7 VANSAWLTAK THUMTE’ THUPUAK 

Siatna lianpi tun ding tawh kisai Pasian in leitung nihvei bek vauhilh hi: Noah tungah khatvei (Gen. 6:13-18, Matt. 24:37) leh vansawltak thumte thupuak tungtawn khatvei (Rev. 14:6-12). Hih thupuakte in leitung ah hong piang ding thute hong lak hi. Hih thupuakte i telzia khangsemsem aa, ahizongin a thupuak leh nasep in Christ sungah upna tawh diktansakna mah ahi hi, “adiakin vansawltak thumna’ thupuak.” – Ellen G. White, Evangelism, p. 190. Kammal dangin gen leng, leitung ah i tangko ding a hong kisawl thupuak, tulai thutak thupuak ii laigil in, Jesu leh eite aading a lian hong kipumpiakna thu ahi hi. 

Rev. 14:6-12 sim in. Hih thupuakte ii laigil bang hiam? Leitung aading bang gen hiam? Hih thupuak tawh kisai bang vaipuak eite in nei a, neihsakep-zeekna tawh bangci kisai hiam? 

Seventh-day Adventist i hihna tawh, thutak ahi vansawltak thumte thupuak tangkona tawh Christ nihvei hong pai ding kiginkholsak ding eimau nasep ahi hi. Tawntung thu tawh kisai khensatna mite in a bawltheih uh kul hi. Neihsakep-zeekna panlak in Pasian tawh hih nasep ah khut kilen a sepkhop ding ahi hi (2 Cor. 5:20; 6:1-4). 

“Leitung aading galvil leh khuavak puakte ahi dingin a tuam vilvel in Seventh-day Adventistte hong kikoih hi. Amau’ tungah a si ding leitung aading a nunung pen vauhilhna ki-ap hi. Ahoih Pasian’ kammal vangtang amau tung om hi. Amaute zahtakkaai a lianpen nasep ahi vansawltak thumte’ thupuak kipia hi. Tua zahin a thupi nasep dang omlo hi.” – Ellen G. White, Testinomies for the Church, vol. 9, p. 19. 

Vansawltak thumte’ thupuak nasep in lei tawh a kimat kha lengpei mongte limla hi. Amau nasep in thuupna ah lampial loh nading leh ni-nunung thupiangte ah vaipuak neihna tellah ding ahi hi. Eite hih thupuak a kemzeektute ihi aa, leitung ah a tangko dingte ihi hi. 

Ni-nunung thupiangte i ngaihsut ciangin lim leh nite i thupisak den hi. Tuate thupi mah hi, ahizongin, i thupuaknate ah Jesu leh hong kipiakna thu masakpen leh laigilpen i hihsak ding kisam hi. 

NINGANI March 8 NEIHSAKEP-ZEEKNA 

A siangtho a nuntak ding Christ in hong deih hi. Neihsakem-zeektu nuntakzia ding a “siangthona” Ama’ nuntakna in hong lak hi (Heb. 9:14). I nuntakna leh ei hong ki-apte Pasian’ lungdam nadingin i zuunkep kul hi. Neihsakep-zeekna in tua sianthona lahna ahi hi. 

1 Pet. 1:15, 16 leh Heb. 12:14 etkaak in. “Siangtho ding” leh “siangthona” in bang khiatna nei hiam? Neihsakep-zeekna tawh ki bangci memat hiam?

______________________________________________________ 

Lengpei mongah siktuamna tosakzaw ahihna Zawmah (Roman) te in mukhia uh hi. Lengpei kiim kibelh sik in neihsakep-zeekna limla hi. I nisim nuntakna leh khalam nuntakna a kinawkna thutak hong lak hi. Tua in nuntakna ah i phutkhak suk leh to, gualzawhna leh guallelhnate ah i upmuanna hong lak hi. Neihsakepzeekna in i sepna leh i hihna a kilangsak a pualam siktuam ahi hi. Diktak ki-zuun gamtat leh nuntak i teci ahi hi. Christ a langsak i nisim gamtatna in lengpei mong atuam lampi tawh kitaat den sik tawh kibang hi. 

Gamtatna vanglian ahihmanin Christ tungah i kiapna tawh kepcing kul hi. “Kei thahatna hong pia Christ tungtawnin na khempeuh kahih thei hi” (Phil. 4:13) cih lungmuanna leh kamciam tawh i nungta ding hi. 

“Kha Siangtho nasepna tawh kha siangthosakna in mihingte sungah Christ pianngei tuhna hi. Lungdamna thu biakna in gamtatna ah Christ nuntakpihna hi. Hih in gamtatna leh nasep hoih a pokhiasak Christ hehpihna ahi hi. Lungdamnathu in sepkhiat nuntakna tawh kikhen theilo hi. Christian nunzia leh nasep khatsim in Christ nuntakna limla ding ahi hi.” – Ellen G. White, Christ’s Object Lessons, p. 384. 

Na nisim nuntak, pianzia ki-en in. Na sungah Christ a omna, na a sepna, mithak in hong bawlna a kilang hiam? Ama’ siangthona na sungah a kilat theih nading bang teelnate na bawl ding kisam hiam? 

KIGIN NI March 9 

NGAIHSUT BEH DING: Lampi tawh a kitaatna hangin sakol lengpei kiim a sikbulhte lepthak a kul hun om hi. Tua lemthak dingin tua sik mahmah nakpitak sekna leh khetna kisam hi. Tua sik lepthakna in neihsakep-zeekna limla siangthosakna nuntak ahi hi. Nuntakna ahaksa leh a nathei thulian ahi a thuneu hitaleh i tuah ciangin Christ' lungsim tawh thuhkikna ahi hi. Hih siangthosakna ah i sum, innkuan kizopna, ahi-keileh neekzon nasepte ah Christ deihbang a sep ding ahi hi. I theihsa bangmahin, khat veivei a haksa lam tawh hih thute i sinkha zel hi. 

Sik lepthak ding baihlo hi. Mihingte gamtat lepthak ding zong baih tuanlo hi. Peter nuntakna ngaihsun in. Mun khempeuh ah Jesu tawh kithuah hi mahleh, Jesu kampan in hih kammal, “na upna a lawhsap loh nading thu ka ngen zo hi. Na kiheikik ciangin na sanggamte na thahatsak in” (Luke 22:23, ZIV) a za ding Peter ki lamen lo ding hi. Jesu a nial zawh a sawtlo in Peter nunna hong kikhel hi, ahizongin a haksa mahmah thuakna leh nasaknate khitciang hipan hi. Thu khatah, ama’ neihsakep-zeekna ki lemthak hi. Khauhtak seekna khit ciangbekin Peter piangthak aa, masuan thak ah a nuntakna kihei hi. 

KIKUPDING DOTNATE: 

1. “Amah le amah kinial in, nisim in ama’ singlamteh kisuan ding” (Luke 9:23) Jesu hilhna in siangthosakna nuntakna tawh bang kisai hiam? Bang kikilh khin hiam? Gal. 6:14. Hih in siangthosakna hong koici laktel hiam? Koi bangin Pasian bang thei ding i hiam? 1 Cor. 2:16. 

2. Christian nuntakna leh Topa na zuihna ah ahaksa thute in thu hong hilhna na tuak thu bang om hiam? Midangte thuakna pan in mimal sim in bang hilhlak la thei ding i hiam? 

3. Midangte upna tawh a kibanglote ngaihsun in – gentehna – Sabbath, misite omzia, Piansakna, Nihvei Kumkikna, a dangdangte. Tua upna thugilte in i nuntakna a huampi in hong bangci huzaap ding kilawm hiam?