MS 13: Khazih Aadingin Anvaakna

Nipi 13na: Khazih Aadingin Anvaakna

March 31Sabbath Sawm leh Thumna Hungeelna

1. Mipi Lasakna: “Zeisu Kian Singlamteh Pua Aa” ZBC 279

2. Mipi muakna: Sabbath School Makai

3. Hun hon thungetna:

4. Gamdang Adventist Thuthang Genna: “Khazih Aading Anvaakna”

5. Sumpi donna: Sum don laaitakin naupangte lasakna:

6. Tawpna La: “Miallak Tui Pan Kikona Aw In” ZBC 411

7. Hun khak thungetna:

Akihel Dingte: Thudongpa leh taangthu dotna a dawng ding khangno pasal khat leh numei khat. (Thugen siamte teel un). Zuih ding: Hih Dotna leh Dawnna bawlna ah a kihel tengin lot ngah in gen ziahziah leh zaaknop mahmah ding hi.

############@@@@@@@@@#############

Khazih Aadingin Anvaakna

Thudongpa: Tu kuata sungin, Inter-American Division sung aa om, Puerto Rico, Mexico, Jamaica, Trinidad, Tobago leh Belize gamte kiangpan a zaknophuai taangthu i zaa hi. Tuni in, Belize gam pan a khangno laai a kiteeng nupakopte tawh a tuamdiak kimuhna i nei ding hi.

Junior leh Stephanie Roberts in, Jamaica ii khuapi Kingston ah an bawlna company nei uh hi. Adventist pawlpi sungah tui hong kiphum uh ciangin, a sumzon daan uh hong kheelaa, haksatna hong phul kha uh hi. A ansai vuah, kaikuang tawh kibawl an leh zu lamsang peuhmah zuak nawnlo uhaa, Kiginni (Friday) nitaak aa kipan Saturday (Sabbath) nitaak dong a sai uh khaak uh hi. 

Khaileh! Taangthu gen kipan ni maw. Hehpihna tawh na kum phazah nong gen thei ding hiam? 

Junior: Kum 28 phata ing. 

Stephanie: Kum 27 phata ing

Thudongpa: Note geel bangcibangin kimu kha nai vua?

Junior: Ka nihtuak un Jamaica gam aa om sa leh zu kizuakna company ah ka semkhawm uh hi. Kei a makai hi-in, neektheih ka bawlna vuah, kaikuang leh a dang tuipi sung aa om ganhingte ka hel uh hi.

Stephanie: Ka nasep pen zu sai ah Manager zom, huhpa (assistant) ahi hi. Zu zong ka duh mahmah hi.

Thudongpa: Bangci bangin Seventh-day Adventist pawlpi thu thei nahi uh hiam?

Junior: Tuma kum thum laai-in, ka Adventist lawm khat in amau inn ah a kibawl khenneu (small group) Lai Siangtho sinna ah hong sam hi. Lai Siangtho thu sinkhopna pen lungluuthuai kasa hi. Stephanie zong ka zol leh ama’n lungluut lo mawk hi.

Stephanie: Manlah kahih manin hun ka ngah kei hi. Ahizongin, tua zawh kum khat khitciangin Junior tawh Lai Siangtho thu sinna ah ka kihel leh ka sim uh a thu lamdang kasa hi. Hih thu Lai Siangtho sungah a om hi mawk maw,” ci-in ka dong hi. Sabbath thu Lai Siangtho sung mun tampi ah a kigelh lam ka thei ta aa, Saturday (Sabbath) ni pen Pasian biak nading nipi ahih lam ka tel ta hi. Ni khat, Kha Siangtho in, “Hun ta hi” hong ci tawh kibang hi. Tua ni-in, Pasian tungah ka nuntakna ki-aap ding ka khensat ta hi. Voksa ne in, kaikuang zong ka ne aa, zu nangawn ka dawn hi. Hiphial mahleh, tuate ka ngolh ding haksa lo hi. “A maan lam ka theih thute ka nuntakpih ding phamawh ta hi,” ci-in ka ngaihsun hi. Gupkhiatna saangin zu a thupi zawdingin ka ngaihsun kei hi.

Junior: Stephanie tawh ka nih un Pasian tawh hoihtakin ka kinaai nuam uh hi. 2015 kum September kha in ka kiteeng uhaa, tua zawh kha khat khitciangin ka kituiphum uh hi.

Interviewer: Na ansai uh bangci ahia leh?

Stephanie: Friday (kiginni) nitaak leh Saturday (Sabbath) ni sai hon lohna haangin sai hon zawh nawnloh nading thu hong kigen hi. Tui ka kiphum uh ciangin ka sumluut uh hong kiam mahmah hi.

Junior: Ka kituiphum zawh phetun, ante hong lei zeelzeel khat in, mopawi aa neek ding tuipi ante Jamaica sum tengh khat (US $ 7,700) man hong vaaikhak hi. January 2 ciangin mopawi bawlna ah neek ding hiaa, tua ni pen Sabbath ni tawh kituak sawnsawn hi. “Sabbath ni sim, bangmah ka zuak kei uh hi,” ka ci maita uh hi. Ka supna lianpi khat uh pen, a hau mahmah sumzon siam nupi khat tawh ka kizom thei nawnkei uh hi. Amau innkuan (4) aadingin nipi khat in tamveipi mah ka an bawlte uh hong lei uhaa, a inn vuah an huan lo uh hi. Ahizongin, tui ka kiphum khituh ciang in, an lak ah ama’ duh phatdiak kaaikuang leh voksa ka hel nawnloh lam uh ka gen uh hi. Ka hawh nunungpen vuah, hih nupinu in a huan hulsa vok phei satakte votsakna bawm sungah a koih hong lak in, “Hih huanhulsa voksa pen na huan ding uh hi kei. Nong at neen sak thei ding uh hiam? ci-in huhna hong ngeen hi.

Hih pen ze-etna khat hi dingin ka um hi. Tua vokphei sabaak pen a sabuai tungah nusia in, ka celIphone sungpan a sianglo ganhingte lawnna vaai tawh kisai ka hilh nadingin Lai Siangtho mun ka hong hi. A hizong in, ka gen thu ama’n nagi nuam vetlo hi. Ka thugen hong phelh in, “Na teelna in ka nuntaakzia hong nawngkaaisak hi,” hong ci hi. 

Stephanie: Pasian in nuihzaakhuai dingin na hong sem hi. Kha sawm lehgiat khitciangin, hih nupinu in Friday nitaak an ne khawm dingin hong sam hi. An vai tawh kisai ka buai nawnkei hi hong ci hi. Sabbath thu zong theisiam mahmah hi. Ni a tum dektak ciangin ka ciah ding uh ka gen ciangun, “Na hun uh hong cing tamah ei. Ciah ta vo,” hong ci hi. Sunday ni biakinn ah a kikhopna thu hong gen ciangin lamdang kasa uh hi. Sabbath thumaan hong saan theih nadingin thu ka ngetsak uh hi.

Interviewer: Bangcibangin na ansai uh hong zom thei nahi uh hiam?

Stephanie: Kha nih sung, neek ding bangmah a neilo phial kahi uh hi. Tawlkhat sung bang, naseemte thaman a cingin ka pia zokei uh hi. Hi phial mahtaleh, a lamdang mahmah thu hong om hi. Naaihuaiteng leh lawmteng in an hong puak uh hi. Midangte kiang panin anpheel ngah uhaa, hong hawmsawn uh hi. Kuamah tungah an ka ngen ngeikei uhaa, gilkial in zong ka om ngeikei uh hi. An tampi om ahihmanin a kisamte ka hawmsawn zolaai uh hi.

Junior: Tu ma lam saangin ka ansai nasep uh hong hoihzaw ta hi. Hun beisa in ka ciilsiam kei uh hi. Tu-in an tuamtuam hong lei dingte tawh ka kithei ta uhaa, ka sumluut uh zong hong khang zawdeuh ta hi. A hun sawt lawmbawlna leh pawi lianpii saangin zumte anneekna pawi leh nitaakan lamsang ka hanciamzaw uh hi. An hong leite lakah Adventist khat kihelaa, an hong lei mi thak nih zong hong zawn in, tua te’n zong i upna saang uh hi. 

Sabbath ni aa, an ka zuak loh uh ko aadingin lungkhamna leh vangikpi omlo hi. Sunday Nilini (Thursday) dong deihtakin na ka seem uhaa, Friday (Kiginni) nitaak nai 2 dong ka sem uh hi. Tua bangin Sabbath ni aadingin ka kigingkhol thei uh hi.

Interviewer: Tuni aa na khensatna uh na lung uh a kim mah hiam?

Stephanie: Ka nuntaakna hong picing seemseem bang in ka ngaih sun hi. Ka nuntaakna ah Pasian in kikheelna piangsak hi cih ka thei hi. “Pasian’ na sep ding khensatna neikei leng, bang dinmun ah ka om mawk ding hiam?,” ci-in ka ngaihsun zeelzeel hi.

Junior: Seventh-day Adventists te’n a upna uh hangsan takin a geen ding uh hanthawn nuam ing. Tan (10) saang ah ka saangkah pihte (2) pen Adventist ahihlam uh ka thei hi. Amaute Ki-ginni (Friday) ni sim in inn ciah baih napi uh banghang cih genlo mawk uh hi. Amau in a upna thu uh hong gen hileh, Sabbath thu-maan ka theih nadingin kum (10) ka ngaak kul hetlo ding hi. Tua ahih manin, a upna uh a gen phat mahmah nadingin ka haanthawn hi. Genkhia zo seemseem leeng, mi a tam seemseem in Gumpa Topa Zeisu thu hong thei ding uh hi.

Thudongpa: Seventh-day Adventists i hih pen i zumpih ngeikei dingaa, Topa Zeisu hong paikik ding i lametna a haang zong a genkhia dingin i kigingkhol tawntung ding hi.

Tu kuata Sabbath 13na sumpi phaltakin pia ciat ni, tuahileh, Inter-American Division sung aa om, mitampite in Topa Zeisu hong pai baih ta ding ahihna theithei ding uh hi.

############@@@@@@@@@#############