ZSS SINNA 13: NEIHSAKEP-ZEEKNA II GAH

SINNA 13: NEIHSAKEP-ZEEKNA II GAH  March 24- 30 

---

NIPI (SABBATH) NITAAK March 24 

Tukal sinna ah simding: 2 Tim. 3:1-9; Ezek. 14:14; Phil. 4:4-13; Pro. 3:5; 1 Pet. 2:11,12; Matt. 7:23; 25:21. 

Lai Siangtho Bulphuh: Lawkite lakah tua bang nuntakna hoih na nungta un. Amaute in a khial a hong ngawh uh hangin, na gamtatna hoihte uh mu thei ding uh a, Pasian in eite hong veh ni ciangin amah a minthangsak ding uh hi. (1 Peter 2:12, ZIV) 

Neihsakem-zeektute i hihna tawh, a na i sepsak i Pasian tecite bangin nuntakna ahi i kiim le paam a om mite aading ahoih huzaap hi ding kisam hi. 

Leitung panin i tuam om ding hilo hi. Eite hong kipia thuhoih a theilote tungah nuntak hoihzaw i lengsak ding hunpha a ngah hizaw hi hang. Neihsakep-zeekna in Pasianzia nuntak ding i hanciam kawmin khantoh ding hanciam nasep khat hi. Leitung a nundan dangte tawh a kibanglo in nuntak theihna Pasian in hong piak hiaa, (2 Cor. 6:17) mite in tua thu phawk in hong kan ding uh hi. Tua hi-in, eite kiangah, “Ahihhangin note’ lungsim sungah Christ Topa in tuam koih un. Tua na neih uh lametna a hang hong dong peuhpeuh tungah migitna le zahtakna tawh na hilh theih nadingun kigingsa in om gige un” (1 Pet. 3:15, ZIV). 

Hih a nunung sinna ah mimal hamphatna, khalam hamphatna, gualzawhna gahte, eimau huzaap, leh neihsakem-zeektu nuntakna ah lungkimna ahi “note sunga om Christ pen tua thuthuk a minthang lametna ahi hi” (Col. 1:27, ZIV) cih thu i sin ding hi. 

* Tukal sinna na simna tawh March 31 Nipi aading kigingkhol in.

NIKHATNI March 25 NEIHSAKEP-ZEEKNA LEH PASIAN’ MITE 

Pasian’ mite cihpen zai mahmah hi. Pasian a zahtak mite in a siangtho in nungta (Titus 1:1), Christ tawh kibang in Pasian ki-ap aa, Amah a lungkimsak nuntakna (Ps. 4:3, Titus 2:12) nei hi. Pasian’ mite in biakna maan leh nuntak tawntungna kamciam ngahna lak hi. Pilna, hauhna, minthanna, leh vangliatnate tua bang kamciam a pia omlo hi. 

2 Tim. 3:1-9 sim in. Hih laiah Paul hong gen thu in a citak neihsakem-zeektu ii nuntakna tawh ki koici zop hiam?

_________________________________________________________

Job thubu in Job nuntakzia leh gamtatna hong pulaak hi. Thuaksia taleh Pasian’ mite ii nunzia koidan hiam cih hong lak hi. Tua bang nunzia Satan in bangzah in mudah cih zong hong lak lai hi. Pasian mahmah in upna leh nunzia dik ah Job tawh kibang a omlohna pulaak hi (Job 2:3). 

“Uz gamah Job min nei mi khat a teng hi. Hih mipa thutangin a pau baang kei hi; amah in Pasian kihta aa, gamtat hoihlo a pel hi.” (Job 1:1, ZIV). Tua hiaa, a upmuanna thu kammal leh biakna ngeinate bek tawh a lak lo mipa i mu hi. Sittelna haksa lak nangawn ah Pasian a zahtakna in a Pasian’ mi hihna kilangsak hi.Pasian’ mite icih in eite hoihkim cihna hi loa, eimau munah a kicing nuntakna langsak cihna hi. 

Ezekiel 14:14 sim in. Hih Lai Siangtho mun in hih mite nunzia teci bang pang hiam? Eite sungah muh ding kilawm akibang [nunzia] aneih uh bang om hiam? 

_______________________________________________________ 

Neihsakep-zeekna in Pasian’ mite nuntakna lahna hi. A citak neihsakem-zeektu in Pasian’ mite lim a nei bek hilo hi. Amaute Pasian zia nei-in, hih Pasian’ mite in amau nuntakzia ah kilang hi. Muanna tawh Pasian apnate akepcing ziate un a Pasian’ mi hihna kilangsak hi. Amau upna in a sepna bek uh tawh lakkhia hilo in, a seplohte uh tawh zong kilangkhiasak hi. 

NINIHNI March 26 LUNGKIMNA 

“A piang bangbang ka lungkim nadingin a kisin khinsa ka hihmanin, kisapna nei ahih thu a gen kahi kei hi.” (Phil. 4:11, ZIV). A piang bangbang ah a lungkim ding hilehang, tua lungkimna koi laipan hong pai pipen ding hiam? 

Timothy a laikhak laitakin, a nopmawh mi pawl khat omaa, tuate in, “Pasian’ mite’ summet bawl nading bek a ngaihsun hi” (1 Tim. 6:5, ZIV). Tuabang mite in thungai te a cihtak (tua “cihtakna” ah nasepna panpihna zong kihel) uh leh hau ding uh ci-in gen hi. Hauhna pen cihtakna tawh kikimsak in neih leh lam thupi ngaihsut luatna hiaa, Christian kineih zuau-na hi. 

A taktakin, Pasian’ mite leh hauhna kisai lo hi. Kisai hileh, leitung ah mi ninpente pawlkhat a haupen ahihna hangun Pasian’ mite a neite in kingaihsun ding hi. Tua sangsik in, Paul hong genna ah, “lungkim taka Pasian’ mite hihna in metna ahi hi” (1 Tim. 6:6, ZIV). A piang bangbang ah lungkim taka Pasian’ mite hihna in hauhna nam lianpen hi, ahangin, Pasian’ hehpihna in sum le paai ngahnate sangin manphazaw pek hi. Tua hiaa, “annek ding leh puansilh ding i neih nakleh tua tawh lungkim ding” (1 Tim. 6:8, ZIV) ahi hi. A tawpna ah, bangzah i nei zongin, tua bangin i ngaihsut leh a dang ngah ding om tawntung ding hi. 

“A piang bangbang ah lungkimna in a khalam thusim, siamna lian khat hi. Sin ding hiaa, thusim bangin sin ding ahi hi... Christian lungkimna in a khum, dai-didee, hehpihna dim lungsim hiaa, suakta takin Pasian’ pilna leh a piang bangbang ah apzawhna hi...A manpha zatui bung hi aa, haksat hun ah a lungbuai lungtang aading hehnepna leh damna hi.” – Jeremiah Burroughs, The Rare Jewel of Christian Contentment, pp. 1, 3. 

Rom. 8:28, Heb. 13:5, leh Phil. 4:4-13 sim in. Hih munah lungkimna kidim nuntakna neih nading hong huh thei bang kammalte kimu thei hiam? 

NITHUMNI March 27 MUANNA 

Paunak 3:5 sim in. Ei theihna tungah “kinga” lo ding cih thu eite aading bang thupuak om hiam? (Isa. 55:9, 1 Cor. 4:5, 13:12) 

Pasian neihsakem-zeektute ii ngimna leh tupna in “na lungsim khempeuh in Topa muang inla, nang theihtelna tungah kinga kei in” (Paunak 3:5, ZIV) ahi hi. Asep sangin a gen baih zawtham mah hi. I theihna bek tawh Pasian itna leh hong kepna um napi, i thuak khak nate ah bangzah vei lung himawh thei zel i hiam? Khat veivei, i ngaihsutna ah, mailam ding lauhuai suah kha mah ding hi. 

Tua leh, koibangin Pasian muan ding ei neihsakemzeektute in sin thei ding i hiam? Muanna in zatna tawh kiam loaa, Topa i muan sem leh i muanna khanglian semsem ding hi. A citak neihsakem-zeektu ii nuntakna in Pasian muanna lahna hi. Tua muanna in neihsakemzeekna ii taw-phah leh a tawsawnpi hiaa, i sepna ah muhtheih hong suak hi. 

“Na lungsim khempeuh tawh Topa muangin.” “Na lungsim” cih kammal in Lai Siangtho sungah tehkaakna kam in kizang den hi. Tua in i thukhensatnate i sungtawng mihing hihna ahi, i nunzia pan hong pai khia hi cihna hi (Matt. 22:37). Tua sungah mihing hihna ii laigil ahi – tatzia, tupna leh sawmnate kihel hi. I sai theihloh nate ah Pasian muan ding baihzaw hi. Tel ding dang omlo muankul cihdan piante. Tua sangin, muanna taktak in i sai theih nate ah teel ding a bawlkul ciang “lungsim pan” hong pai teelkhakna thu ahi hi. 

Nungzuite in amau lungsim khempeuh tawh Pasian amuanzia uh hong lak hi. “Tu aa, nasepna ah kihelte mah bangin amau zong thanem in huhsam uh hi, ahizongin, Topa muangngiat uh hi. Hauhna nei uhaa, ahizongin lungsim leh ngaihsutna kihel, mi khatsim in na khempeuh ah Pasian a masa, nunung, ahoihpen ah koih ding maw cih om ciat hi. 

I saitheihloh nate ah Pasian muan ding baihzaw cih dik hi. I sai/uk theih nate ah Pasian koibangin muan ding teelna bawl thei ding i hiam? 

NILINI March 28 EITE’ HUZAAP 

“Ahang in, hun khat lai-in note khuamial nahi uh aa, ahizongin tu-in Topa sungah khuavak nahi uh hi. Khuavak tate bangin na nungta un.” (Eph. 5:8, ZIV). Paul in lungsim kikhelna in mipi muh theih ahihna hong gen hi. “Khuavak ah lam i pai ciangin” (1 John 1:7, Isa. 30:21), a kilekkim neihsakep-zeekna in leitung huzaapna a nei khuavak teci ahi hi. 

Jesu in, “Keimah leitung khuavak kahi hi” (John 8:12, ZIV) ci hi. A kipkho i nisim tatziate tawh Pasian khuavak a lenghsawnte ihi hi. 

I lahkhiat neihsakep-zeekna in koibangin Pasian’ min thangsak hiam? I gamtatna in midang tungah bang huzaap nei hiam? Matt. 5:16, Titu 2:7, 1 Pet. 2:11, 12. 

Neihsakep-zeekna in Pasian neihsate kepzuunna sangin a lianzawlai vaipuak hong lak hi. I neihsakep-zeekna in i innkuan, i kiim leh paam, leitung, leh khuavannuai mai ah kilak (1 Cor. 4:9) ahi hi. I nasepnate ah kilang in kumpi gam thu in i nuntakna ah bang huzaap nei cih lak hi. Tua hiaa, midangte i huzaap thei hi. Pasian thukimpih ahi, migitna leh nunhoih tawh Christ i lak thei hi. 

I nasepzia hoihte in i neihsakep-zeekna tawh akihual kul hi. I nasepna in midik khat ii neihsakepzeekzia kimuhna khat ahi hi. “Amah in na thumaanna zingsang khuavak bangin tangsak dingaa, na thutangna sun nitang bangsak ding hi” (Ps. 37:6, ZIV). Nasepna ah neihsakem-zeektu khat ii huzaap in “mun simtham leh lawh nuai ah khuh” (Luke 11:33) hilo aa, mualtung ah kilam khuapi (Matt. 5:4) bang hi. Inn leh nasepna ah tua bang nuntakna tawh, na kiim aa omte ngaihsutna leh lungsim na huzaap ding hi. “Piansak na khempeuh amau sep ding ciat kiseh a, amau panmun ciat ah phunlo ding hi. Khalam nate ah pasal leh numei khatsim in sepna ding mun i nei ciat hi. Christ silpiak i ngah zah tawh kizui-in Pasian’ nasepna hong kihawm dimdiam hi... nang aadingin tatzia hoih lah nading hunpha ngah nahi hi. Nasepna ah thunei Christ tungah lungsim khempeuh tawh ki-ap in.” – Ellen G. White, This Day With God, p. 243. 

NINGANI March 29 I ZAKNOP (LEH ZAKNOP LOH) KAMMALTE 

Leitungah peemta leh khualzinte ihi aa, a kicing, ahoih, a lungnophuai vantung manawh ihi hi (Heb. 11:13,14). I tun mateng hih leitungah i nuntak kul hi. Kidona lianpi ah hong gen bangin Christiante panna neilo in a laizang ah om kingah lo hi.Pasian aading ahikeileh galpa aading i nungta hi. “Kei hong koppih lote kei lang a pang ahi hi. Kei hong kaihkhoppih lote a thehthang ahi hi.” (Matt. 12:30, ZIV). Amah hong kumkik ciangin eite koi lam ah pang cih siangtak leh teltak in kilang ding hi. Christ hong kumkik ciang, nungzui kicite in kammal nih lakah khatzaw za ding uh hi. Tua kammalte bang hiaa, deihna bang hiam? Matt. 25:21

 __________________________________________ 

Matt. 7:23 

____________________________________________ 

Christ’ kammal “pha hi” cih in neihsakem-zeektu khat aading a zaknop pen leh a lungkimhuai pen hi ding hi.

 I septheihzah tawh Ama’ neihsate diktak zeekzuun ding hanciamna ah a kicing pen Pasian thukimpihna i zak ciangin a kigen zolo nuamna om ding hi, ahangin eima tatkhiatna in sepna hang hilo Christ in ei aading hong sepsakna ah zungkha cih i theihna ahi hi (Rom. 3:21, Rom. 4:6). 

A citak neihsakem-zeektu nuntakna in a neihsa upna lenghkhiatna hi. Pasian mai ah amau sepna tawh a kidiksak tawmte kammal i mu hi (Matt. 7:21, 22). Matt. 7:23 ah eimau kidiksak tawmna in man a neihlohzia hong lak hi. “Christ nungzuite in Topa neihsate a piakkik ciangun, amaute in “pha hi, a hoih leh a citak nasem aw, ... na Topa lungdamna ah hong lut in” cih kammal azak ciangun a ngah dinguh goute a khol uh ahi hi.” – Ellen G. White, Khangcin Lungdeih, p. 523. 

Atawpna ah, neihsakep-zeekna in a thupiak lianpen nihte ahi, Pasian itna leh i vengte itna hiaa, tua in sepna khempeuh ah hong tawsawn hi. 

KIGINNI March 30 

NGAIHSUT BEH DING: “Pasian’ itna a lak dingin hih leitungah Christ hong pai ahi hi. A nungzuite in Ama’ patsa nasep zop ding ahi hi. Khat le khat ki huh leh ki thakhauhsak ding hanciam ni. Midangte aading ahoih sepna ah lungnopna dik kimu thei hi. Mihing in Pasian leh a mihingpihte a itna tawh ama’ deihna lang ah na sem ngeilo hi. Angsungkhual kei semsem leh a lungnop semsem hi, ahangin ama aading Pasian’ ngimna taksuak sak ahih man hi.” – Ellen G. White, Counsels on Stewardship, pp. 24,25. 

“Pawlpi khat ah nuntakna a om leh, khanna leh punna om hi. Topa aa, a laakna leh piakna, ngahna leh apkikna ahi, kikheekna zong om tawntung hi. Thu-um diktak khatciat tungah Pasian in khuavak leh thupha pia aa, tua thu-um mi-in Topa aading a sepna in midang tungah hawmsawn hi. Angah nate a piak ciangin a ngah theihzah ding khang semsem hi. A thak hehpihna leh thutak aading mun kibawl pah hi. Khuavak siangzaw, a khang theihna te ama’ aa hi. Hih piakna leh ngahna tungah pawlpi nuntakna leh khanna kinga hi. Ngah napi a pia ngeilote ngahna kangg (pai nawnlo) ding hi. Ama’ tung pan midang tungah thutak a luan nawn keileh, a ngah theihzah dingtaan (sumh) ding hi.” – Ellen G. White, Counsels on Stewardship,p. 36. 

KIKUPDING DOTNATE: 1. Pasian muanna in koi bangin lungkimna ah hong tun hiam? Banghang “na khempeuh ahoih dinga bawl” (Rom. 8:28) cih ding baih napi, up ding haksa hiam? 

2. Class ah dong in. Kammal 25 sang a tawmzaw in, neihsakep-zeekna a khiatna gen in. Kammal 25 sang tawmzaw mahin, banghangin neihsakep-zeekna Christian nuntakna ah a thupi khat hi thei hiam? 

3. Matt. 7:21-23 sim in. Bang thu om hiam? Banghang in hih mite in a septe uh gen ding uh hiam? Amau kammal in amauthu bang gen hiam? Ei zong koi bangin, ei le ei kikhemna ah i puklo thei diam? 

4. Christian huzaap mimal dinmun ciang bekin i ngaihsun kha zel hi. Innphual pawlpi dinmun in ee? Na pawlpi in na kiim le paam ah bang huzaap nei hiam?

oo00OOO00oo