HSS ZIRLAI 1-NA: VÂNA INDONA CHU MARCH 31-APRIL 6, 2018

ZIRLAI 1-NA: VÂNA INDONA CHU

     MARCH 31-APRIL 6, 2018 

---

CHÂNGVAWN: “Tichuan, dragon chu hmeichhe chungah chuan a thinur ta hlê a, a thlah la awm, Pathian thupêkte zâwm a, Isua Kristâ hriattîrna thu neitûte chu do tûrin a thawk chhuak ta a” (Thupuan 12:17).

SABBATH CHAWHNU                                                                     MARCH 31

CHHIAR TÛRTE: Genesis 3:1–7; Ezekiel 28:1, 2, 11–17; Rom. 8:31–39; Rev. 12:1–17; 14:12.

VANAH khian inbeihna, “indona ropui” tia kan sawi mai thin hi a awm ngei thu Bible chuan chiang takin a sawi a. Chu indona chuan kan khawvêl mai ni lo, lei leh vân pum puia thil mak leh râpthlâk tak tak lo thlengte hi a nghawng chhuak ta a ni. Thil tha lo, hrehawm tawrhna, thihna, hnam hrang hrangte din chhuahna leh tlûk chhiatna, chanchin tha hril darhna, ni hnuhnunga thil thlengte—hêng zawng zawngte hi lei leh vân pum pui nghawng chhuak vektu indona avânga lo awm a ni.

Tûn kârah hian chu indona-in bû a khuarna hmun pawimawh zual tlêma zâwng chu kan thlîr ho dâwn a, a bul tan nân tha famkima siam Lucifera, tha famkima siam ni ve tho Adama leh Evi-te suala an tlûkna hmanga leia a helna luhtîrtu thinlunga helna lo awm tan dân chu kan en phawt ang. Hêng “thil pawimawh” tak tak pahnih—suala Lucifera a tlûkna leh a hnua kan nu leh pa hmasa berte an tlûk vê leh tâkna atang hian indona ropui chuan zung kaih tanin, chumi a chin chu chhum lo chat lovin a la kal chho ta zêl a. He lemchan ropui tak maiah hian a bo a bâng awm lovin mi tin kan tel vê theuh a ni.

Chanchin lâwmawm deuh mai chu, eng tik nî-ah emaw chuan he indona hi a la tâwp dâwn a, chu mai chu ni lovin, Setana lakah hian Isuan hnehna pumhlûm a la chang ngei dâwn tih hi a ni. Chu âi maha la lâwmawm zâwk cheu chu, kraws-a Isua a thih tleitlâk tawhna avâng khân chu hnehna chu kan zavâi hian kan chang vê thei ta vek hi a ni. Chutianga hnehna changtûte kan nih avâng chuan a lo kal ngei dâwn a ni tih chiang tak Isua thutiam kan neih zawng zawngte lo thlen hun kan nghah lai hian Pathian chuan amaha rinna nghata a thûte zâwm tûrin min sâwm a ni.

SUNDAY                                                                                                 APRIL 1MI THA FAMKIM TLÛKNA CHU

Bible-a sual leh tha inbeih tawn thû kan hmuh hrang hrangte hi vâna indona awm avânga lo thleng a nih chuan, zawhna eng eng emaw chhân ngâi a lo awm ta a. Chûng zînga pawimawh tak pakhat chua, Eng tianga lo intan nge a nih? tih hi a ni. Hmangaihnaa khat Pathian chuan lei leh vânte hi a siam a, chuti a nih chuan, thil tha lo, tharum thawhna leh inbeih tawnna hi chu a tîr atanga awm sa ve rêng a ni lo vang tih a rin theih a. He indona hi a tîra Pathianin a siam atang ni lo thil dang atanga lo chhuak a nih ngei a rinawm a; tin, Pathian thil siamin a nghawng chhuah pawh a ni chuang lo vang tih a chiang hlê bawk. Eng le khâw le, indona chu a awm ngei a, chu indona chu a taka thleng niin, kan zavâi hian kan tel vê theuh a ni. 

Ezekiela 28:1, 2, 11–17 leh Isaia 14:12–14 chhiar la. Hêng thûte hian suala Lucifera a tlûk thû leh sualna leh thil tha lo a lo awm tan dân eng nge min hrilh?

Lucifera chu mi tha famkim niin, vânah a chêng thîn a. Eng tin nge amahah hian sualna chu a lo chhuah mai theih le, a awmna hmun lah duhthusâma tha famkim a ni bawk sî a? A chhan ka hre lo a ni. Hei hi Bible pawhin “dân bawhchhiatna thurûk” (2 Thess 2:7) tih chungchâng a lo sawina chhan pawh a ni maithei e.

Pathianin rilru nei a thil siam zawng zawngte hnêna duhthlan theihna zalênna a pêk huang pâwnah Luciferan suala tlûkna chhan tûr eng mah a nei lo. Ellen G. White-i chuan heti hian chiang takin a lo sawi a: “Sual a lo awm chhan sawi tuma sual lo awm tan dân sawifiah hi thil theih loh tawp a ni a. . . . Sual chu thil awm tha hlê hlê lâi tibuaitu, a lo awm chhan sawi fiah theih sî loh a ni. Thu inthup, sawi fiah theih miah loh niin, ngaihhnathiam ngawt dâwn ila, kan hum tihna a ni sî ang. Ngaihhnathiam theihna tûr chhan tha tak emaw, a lo awm chhan târlang theih emaw ni ta sela chuan, sual a nihna a bo hlauh dâwn sî a ni.”— The GreatControversy (Indona Ropui), pp. 492,493.

Sual tih thumal hi tha lo tih thumalin thlâk pawh ni ila, a thil sawi awmzia chu thuhmun reng a ni tho vang. Hetiangin: “Thil tha lo lo awm chhan sawi tuma thil tha lo lo awm tan dân sawifiah hi thil theih loh tawp a ni a. . . . Thil tha lo chu thil awm tha hlê hlê lâi tibuaitu, a lo awm chhan sawi fiah theih sî loh a ni. Thu inthup, sawi fiah theih miah loh niin, ngaihhnathiam ngawt dâwn ila, kan hum tihna a ni sî ang.  Ngaihhnathiam theihna tûr chhan tha tak emaw, a lo awm chhan târlan theih emaw ni ta se chuan, thil tha lo a nihna a bo hlauh dâwn sî a ni.” Duhthlanna zalên tak i neih i lo hman tawh thin dânte kha ngaihtuah lêt la. Eng vângin he kan zalênna hmanga duhthlanna kan siamte hi ngun taka kan ngaihtuah thin a pawimawh?

THAWHTANNNΠ                                                                                     APRIL 2HRIAT MAI A TÂWK LO

Thil tha lo lo awm chhan chu sawifiah thei lo mah ila (lo awmna tûr chhan tha a nei lo va), Pathian Lehkhabû hi chuan vâna awm Lucifera thinlungah a intan tih a sawi a. Ellen G. White-i thuziak atanga thu ngaihnawm leh bengverh tak tak kan hmuhte bâk hi chu Pathian Lehkhabû pawhin vâna thil tha lo lo awm tan dân min hrilh tam lo hlê. Chutih rualin, leia a lo awm tan dân erawh chiang takin a sawi lang thung.

Genesis 3:1–7 chhiar la. Hetah hian Adama leh Evi-te sualna tilangtu eng thil nge thleng le?

Thil lungchhiatthlâk tak mai chu Evi hian an hnêna Pathianin a sawi hre reng chunga a tisual tâlh tho kha a ni. Heti hian Pathianin a sawi chu a sawi chhâwng ve leh a: “Pathian chuan, ‘In ei tûr a ni lo va, a khawih pawh in khawih hauh tûr a ni lo, chutilochuan i thi mai ang’ a ti a ni” tiin (Genesis 3:3). Pathian Lehkhabû-a kan hmuh chinah hi chuan khawih chungchâng eng mah a lang lo nâin, kha thing rah kha an ei a nih chuan an thi ngei dâwn a ni tih erawh a hre tho a ni.

Chûveleh, Setana chuan ualau tak leh chaltlâi takin chûng thûte chu a rawn hnial ta nghâl a. “Rûl chuan hmeichhe hnênah chuan, ‘I thi hauh lo vang’ tiin a hrilh a” (Genesis 3:3).

11

Hetiang bâka thil inkâwlkalh chiang hi a awm thei tawh dâwn em ni? Setanan a va pawh dân hi a tîrah chuan a rûk a râl deuh hlek a ni a; amaherawhchu, a thû leh hlâ a lo bengkhawn a ni tih leh, a lo hnial kalh lêm lo a ni tih a hriat hnû chuan uâlâu takin LALPÂ thupêk chu a rawn hnial ta chat mai a. Thil lungchhiatthlâk deuh mai chu, Evi khân hre lovin eng mah thil a ti lo kha a ni a, chuvangin “Ka hre lo” a ti thei miah lo.

A hre ngei a. Nimahsela, hre reng chungin a tisual tho a ni. Khatiang hmun duhthusâma tha Eden Huanah meuh pawh khân Evi (a hnu-ah Adama pawhin thutak hre reng chungin thil sual a ti vê leh ta tho a) chu hriatna ngawt chuan a vênghim zo chuang lo va. Chuti a nih chuan, hriatna ngau ngau hi chu chhandam kan nihna tûrin a tâwk emaw kan ti tûr a ni lo. Ni e, Pathian Thûin min hrilh chu kan hriat ngei chu a tûl alâwm; mahse a Thû-in min hrilhte chu zâwm tûra kan intukluh pawh a ngâi bawk a ni.

Pathianin thil pakhat a sawi a, Setana pawhin thil dang a lo sawi bawk. Evi leh Adama-te hian hriatna chu an ngei ngei a, chuti chung chuan Satana thu sawi an ngâithla ta zâwk a. Hetiang deuh tho hi a tîr ata vawiin thlenga thil nihphung a la nih dân hi ngaihtuah la. Evi leh Adama-te thil tihsual ang hi kan tih vêna tûr lakah eng tin nge kan lo invên ang?

THAWHLEHNΠ                                                                                         APRIL 3LEI LEH VÂNA INDONA

Kan nu leh pa hmasa berte suala an tlûkna chuan khawvêlah hian sualna, thil tha lo leh thihna a thlen ta a. Hetiang thilte hi eng vânga lo thleng nge ni a, tû tihsual rah nge ni tih thû-ah hian ngaihdân hran hran kan nei a ni maithei e. Nimahsela, mi zawng zawng min nghawng vektu buaina, tharum thawhna leh innghirnghona awmte hi chu tu nge haider thei ang le?

Lei leh vân pum pui huap vek indona, inbeihna chungchâng kan sawi a ni a; chu chu thil dik tak a ni bawk. He inbeihna hi khawia lo intan pawh lo ni mah se, he leiah pawh hian a rawn kâng kâi ve ta a. Bible hi ngun taka kan chhiar a nih chuan—Eden Huana mihring an tlûk atanga Isua lo kal leh thleng, hemi chhûnga thil thleng hrang hrangte hian indona ropui tak thleng chu kawng hrang hranga târlan a nih dân kan hmu thei ang.  He indona kârah hian kan chêng mêk a. Pathian Thu chuan eng thil nge thleng mêk tih te, a phênah eng thil nge awm tih te leh, eng tiangin nge a tâwp dâwn tih te chiang takin min hrilh vek a ni.

Revelation 12:1–17 chhiar la. Heta indona—vânah thleng phawt a, chumi hnua leia thleng ve leh nia a sawi hi eng indonate nge ni?

Vânah indona a thleng phawt a, chumi hnû-ah leiah pawh a thlen ve leh thû kan hmû a. Indona hmasa zâwk chu dragon (chu chu Setana a ni, Thupuan 12:7–9) leh Mikaela (Hebrai tawnga a awmzia chu, “Tu nge Pathian ang?” tihna a ni) inkâra thleng a ni a. Pathian laka hel Lucifera, Setana (Hmêlmapa) tia hriat a lo ni ta, thil siam ve mai ni sî chuan Siamtu Isua, chatuan mi (Heb 1:1, 2; John 1:1–4) chu a do a nih chû!

Chutiang chuan Lucifera chu amah Siamtu lakah a hel ta a. Hê indona ropui hi pathian pahnih inbeih tawnna ni lovin, Siamtu laka thil siam a helna a ni zâwk a, chu helna chu thil siamte beih a nihnaah a lang chhuak bawk.

13

Vâna an inbeihnaah khân Setana chu Krista lakah a lo tlâwm tawh a, chuvâng chuan he leiah hian rawn ûm zui lehin, Isua chu mihring tîsa pû-a a rawn pian vêleha lo tihhlum nghâl dân kawng a zawng a. Mahse a thiltum chu a tihlawhtling thei ta lo va, chu mai chu ni lovin, thlalêra an inhmachhawnnaah leh kraws-ah pawh khân a chak lo zâwkah a tang leh ta zêl a, chuvâng chuan Krista mîte bei tûrin a thawk chuak ta a ni. He indona hi Kristian kohhran chhûngah ngei pawh hian nasa takin a thleng a (Rev 12:6, 14–16), Isua lo kal leh huna Setana a tlâwm nawn leh thlengin a kal chho zêl rih dâwn a ni (Rev 12:17).

Revelation 12:10–12 chhiar la. Hêng Bible chângahte hian châng danga indona leh inbeihna thu hrang hrang kan hmuhte kârah eng beiseina nge kan hmuh le?

NILÂINΠ                                                                                                  APRIL 4TÂWPNA THLENGIN IN HNÊNAH

Thupuan bû hian Pathian mîten hun eng emaw chên chhûng chu tihduhdahna an tawrh tûr thu a lo sawi lâwk a. Thupuan 12:6-a kan hmuh ni 1260 (Thupuan 12:14 pawh en la) hian kohhranin kum 1,260 chhûng tihduhdahna a tawrh chungchâng kha a sawi a ni.

“Hêng tihduhdahna, Nero-a lal lâia intan, Paula pawh martara a thih vêna hi kum za eng emaw ti chhûng chu a kal zêl a, a châng chuan a han zual leh hlê a, a châng chuan a han nêp ve leh deuh bawk thîn. Kristiante chu thil sual râpthlâk tak tak titûa puh niin, chhiatna lian tak tak—tâm tlâ te, hri lêng te leh lîrnghîng te chu anmahni vânga lo thleng niin an ngâi a. Chutia vântlâng huat leh rinhlelh rawn an ni chu remchângah hmangin sum leh pâia hlâwkna beisei mi tu tûte emaw chu kâwktû-ah tangin, pawisawi lote chu dâwtin an hêk ta thîn a. Rom lalram laka hel, sâkhaw hmêlmâ leh vântlâng nun tikhaw lotu nia ngâiin thiam loh chantîr an ni a. An zînga mi tam tak chu sakawlh pûkah paih luh niin, thenkhat chu ennawm siamna hmunah an hâl hlum bawk.”— The Great Controversy (Indona Ropui), pp. 40, 41.

Hetih lâi hian hmeichhia (kohhran) chu thlâlêrah a tlânchhia a (Thupuan 12:6). Mupui thla khing hnih nei angin vawi hnih ngawt sawi a ni. Hê a thla khing hnih hmang hian amah tanpuitu tûr awmna hmunah a thlâwk lût a. Thlalêra a awm chhûng hian uluk taka vên tlat a ni a, rûlpui (Setana) pawhin eng tin mah a ti thei lo (Thupuan 12:14). Hetiang hian Pathian chuan tihduhdahna nasa tak kârah pawh a mi la bângte chu a humhim tlat thîn a, tâwpna hunah pawh a humhim leh bawk ang.

Ni hnuhnunga buaina lo thleng tûr chungchâng a sawi tum pawhin Isuan a mîte chu heti hian thlamuanna thû a hrilh a: “Kei kumkhuain, khawvêl tâwp thleng pawhin in hnênah ka awm zêl ang” (Matt 28:20). Amah zuitu tam takte martara an thih tho bawk si lâiah hian (Rome 8:31–39 leh Matt 10:28 en la), he thutiam ropui tak hi eng tianga hrethiam tûr nge kan nih le?

15

Pathian hmangaihna laka ata chu—tihduhdahna emaw, tâm emaw, thihna emaw—eng mahin min then hrang thei lo. Kristan min awmpuina hi—tûnah a ni emaw, tâwpna hunah emaw pawh ni se—natna, tawrhna, fiahna leh thihna hial pawh a ni ang, tuar vê lo tûra humhim bîkna a ni lo va. Chutianga humhimna dawn bîkna tûr thutiam chu pêk kan ni ngâi lo rêng rêng zâwk a ni. A awmzia chu, Isua leh Isuan kan tâna a lo tih tawhte azârah, hêng fiahnate kan tawrh lâi hian Pathian chuan min awmpui tlat a ni tih beiseina leh, thutiam nei chungin kan nung thei a; lei thar leh vân thara chêng tûrin chatuana nunna thutiam chu kan nei bawk tihna a ni zâwk. Hê leiah hian eng anga hrehawm nasa pawh tuar mah ila, Paulan, “Felna lallukhum chu ka tân dahin a awm tawh a, chu chu LALPA, ngaihtuahtu fel tak chuan chumi nî-ah chuan mi pê ang; ka hnênah chauh ni lovin, a inlârna ngâi (a lo lan hun nghâkhlel) apiangte hnênah pawh” (2 Tim. 4:8) a tih ang khân, beiseina nung kan nei tlat reng thei a. He beiseina leh thutiam hi keini a lo lan hun nghâkhlel taka thlîrtûte tân ngei hian pêk a ni.

NINGÂNΠ                                                                                                 APRIL 5DÂN LEH CHANCHIN THÂ

Keini Seventh-day Adventist-te hi chuan kan dinna chu kan kohhran hmingah pawh kan hmang nghâl a.

Seventh-day tih hian ni sarih nî Sabbath a entîr a, chu chuan Thu Sâwm Pêka pakhat chauh ni lo, a zavâi hian zawm vek tûr a ni tih kan ring tih a tilang. Adventist tih hian Isua lo kal lehna ringtûte kan ni tih a tilang vê thung a, chu thutak chu a lo kal hmasak tuma mihringte tlan nâna a thih avâng chauha lo awm thei a ni bawk. Chutichuan, kan kohhran hming, Seventh-day Adventist tih hian tûnlâi atâna thu dik pawimawh tak tak pahnih: dân leh chanchin thâ-te chu min kawh hmuh a, hêng thudik pahnihte hi then hran theih miah loh a ni.

Eng tiangin nge hêng Bible chângte hian dân leh chanchin tha inzawm hnaihzia an sawi hlawm le?

Jer 44:23 

________________________________________

Rome 3:20–26 

_________________________________________ 

Rome 7:7

_____________________________________________ 

Chanchin thâ chu chanchin lâwmawm tak a ni a, Pathian dân bawhchhiaa thil sual ti tawh ni mah ila, krawsa Kristan kan tâna thil a lo tih tawh chu kan rinna azârah kan sualte ngaihdamna, Pathian dân kan bawhchhiat tawh avânga ngaihdamna chu kan chang leh thei a. Chu mai chu ni lovin, chu dân chu a zavâiin leh a phût dân ang taka zâwm thei tûra thiltihtheihna pêk kan ni tawh bawk.

Chuti a nih chuan, tûn hun hnuhnung, indona ropuia inbeihnain a vâwrtâwp a tawn chhoh mêk lâi hian, Pathian mîte chu a danglam bîk deuh taka lan chhuahtîr a ni pawh hi thil mak a ni lo rêng a ni.

Rev 14:12 chhiar la. Eng tiangin nge he thû hian dân leh chanchin tha inzawm dân a târlan le?

Keini Seventh-day Adventist, Pathian dân hi kan zawm a ngâi a ni tih ringtûte hian eng tin nge dân zawmna chu dân zawm avânga chhandamna hlawh chhuah tumna (legalism) ni lovin, Pathian kan hmangaihna atanga lo chhuak leh amâ tlan tawh kan nihna rah zâwk a nihzia kan lantîr theih ang?

ZIRTÂWPNI                                                                                              APRIL 6

NGAIHTUAH TÛR: Rev 12:9–12 leh Ellen G. Whitei bû, Thlahtubulte leh Zâwlneite phêk 9–20, “Eng Vângin Nge Sual Chu Phal A Nih?” tih chhiar ni se.

17     18

“Thil siam zawng zawngten hmangaihnaa rinawmna an pawm chhûng zawng kha chuan lei leh vân pum puiah inremna tluantling a awm thîn. Anmahni Siamtu thiltum hlen chhuah chu vân mîte hlimna ber a ni a. A ropuina târlan leh amah fakna lan chhuahtîr chu an hlimpui êm êm bawk thîn. Pathian an hmangaihna chu a chungnung ber tûr a nih rualin, mahni hmasialna tel miah lovin anmahni pawh an inhmangaih tawn theuh bawk a. Vân mîte inlungrual tlânna tichhe thei tûr eng thil mah a awm ngâi lo.  Nimahsela, chutianga hlim taka an awm tlân thinna chu tihdanglam a lo ni ta a. Krista dawta vâna awm zawng zawng zînga ropuina leh thiltihtheihna sâng ber changa, Pathian chawimawina ropui ber dawngtu lak atangin sualna chu a lo intan ta a.”—Ellen G. White, Patriarchsand Prophets (Thlahtubulte leh Zâwlneite),pp. 10-11. (link chu English ami ani).

Ellen White-i tawngkam, “hmangaihnaa rinawmna” tih hi ngun takin lo ngaihtuah la. Hê tawngkam, awmze ril tak mai nei hian hmangaihna chuan rinawmnaah mi a hruai lût thîn a ni tih a kâwk. Mi, a kawppui hmangaih tak chuan chu a hmangaihna chu rinawmna hmangin a lantîr thîn a. Chutiang chiah chuan hêng vân mîte pawh hian an ti a, keini pawhin Pathian nêna kan inlaichînna chu hmangaihna hmangin kan lantîr ve tûr a ni.

SAWI HO TÛRTE:

u Setana hi a taka awm ngei a nihzia leh, indona ropui kal mêka a inhnamhnawih dân Bible atangin hriat theihna tûr kan nei em? Setana chu mihringte thinlunga sual leh thil tha lo entîrna ni mai lovin, a taka awm ngei a ni tih mîten an hriatthiam theih nân eng tin nge kan tanpui ang? 

v Keini Seventh-day Adventist-te hian Bible thu dik hriatna kawngah nasa taka malsâwmna kan dawng a. Chumi hriatna chu ropui viau tho mah se, eng vângin nge hriatna ringawt chuan min chhandam theih chuan sî loh? Rilrua hriatna ringawt ni lo eng thil dang nge mamawh kan neih le? 

w I nuna Isua awmpuina i lo chan ve tawh dânte leh tûnah pawh i la chan zêl dân chu eng nge ni? Eng tin nge chûngte chuan buaina hun i hmachhawn hunah a tanpui theih ang che? 

x In pâwl thenah, “hmangaihnaa rinawm” tih chungchâng hi sawi ho ula. Eng tin nge he thû hian dân leh khawngaihna mai ni lovin, rinna leh thuâwihna inlaichîn tawn dân hrethiam thei tûrin min tanpui? Hmangaihnaah hian zalênna a awm a ni tih chungchâng eng nge min hrilh? “Hmangaihnaa rinawmna” tih hi eng tiang kawngtein nge kan puan chhuah theih ang?

ooOO00OOoo