FSS 2nd Quarter 2018: NI NETA HRANGIH TIMTUAHAWKNAK

UPA SABAT SKUL ZIRLAI

NI NETA HRANGIH TIMTUAHAWKNAK

A Ngantu : Norman Gulley

April, May, June

2018

A Sung Um Thupawl

(1)     Lei Leh van Huap Ih Thu Elawknak........................6 (March 31-April 6)

(2)     Daniel Le Can Netnak.......................................... 16 (April 7-13)

(3)     Jesuh Le Thuphuan Cabu .................................... 25 (April 14-20)

(4)     Can Netnak Leh Rundamnak ............................... 34 (April 21-28)

(5)     Van Hmun Thianghlim Sungah Bawi Khrih ......... 44 (April 28 – May 4)

(6)     Thukhaam Thlengnak ......................................... 54 (May 5-11)

(7)     Mathai Bung 24 Leh 25 ........................................ 64 (May 12-18)

(8)     Sersiamtu Biaknak.............................................. 74 (May 19-25)

(9)     Can Netnak Ih Bumnak ....................................... 84 (May 26- June 1)

(10)  American Le Babulon ......................................... 94 (June 2-8)

(11)  Pathian Hminsinnak Le Sahrang Hminsinnak..105 (June 9-15)

(12)  Babulon Le Armageddon.................................... 115 (June 16-22)

(13)  Kan Bawipa Jesuh Khrih Ratsalnak.................. 125 (June 23-29)

Ni Neta Le Bawi Khrih

Jesuh in hringnun a hman laiih a can neta lamah a tirhthlahpawl hnemnak hitin a sim.

“Thin har le beidong in um hlah uh, Pathian zum uhla kei khal I zum uh. Ka Pai inn ah umnak innkhann tampi a um, nan hrangah cuih hmun rem dingah ka feh ding. Cutin si hlah sehla hitin ka lo sim lo ding. Nan umnak ka rem ngah hnuah ka rasal ding ih, ka hnenah ka lo hruai ding. Cule ka umnak ah nan um ve ding. Ka fehnak ding hmunih lamzin nan thei ko” tiah a ti (John 14:1-4).

Jesu in hnemnak thu an hnenih a simmi a san an thei lo ih a thlen ding can khal an thei lo. A pai innah umnak innkhaan tampi a um maw? An hrangah Jesuh in hmun a va remsak sokhaw? Leitlun ih an neih mi hnakih tha sawn a si rori ding.

Hnemnak thu a sim hlanah a dungthluntupawl thawn Jesuh cu can tawite an to ih a ratsal hlanih thil cang ding mipawl kha fiangte in a sim. Cuih a ra thleng ding mipawl cu ngai nuammi a um lem lo. Ral doawknak thuthang, miphun pakhat le pakhat, ram pakhat le ram khat doawknak, mangtaam, hmun tinah linghninnak, hivek riahsiatza ih hramthok ding mi a sim. Hremnak, phiarawknak, bumawknak, harsatnakpawl kan thei ih, a ra thleng rero ding a si.

Deut. 12:13 ih can netnak thu a simmi kha a tui kanmai san a sinak a fiang zet. Himi thupawl ih a hnukpi Jesui ratsalnak ding a thlen can kan thei lo, kan theih tla a tul lo. Simsung thupawl a thlen famkim ding tiih zum le cuih thil thleng dingmi hrangih rak timtuahawk hi a thupi sawn.Ralrinnak thu Jesui a rak simmi an thleng famkim vivo ih cuihpawl cu a tui kan sanah co tha kan ngahnak dingah a si. A thupi bikih a rak sim cia mi thu pahnih a thlen famkim zo mi kan hmu. (1) Dan. 7:25 ih a simmi kum thum le hrek simsung thu kha zabi 6, AD 538 ihsin zabi 8 AD 1798 kumah a netnak a thleng famkim. (Rev 12:6,14; rev. 13:5; Num. 14:34 ah kan hmu thei ve). Simsung thu ih tikcu can reibik ni 2300 thu tla 1844 AD kumah a thleng famkim zo mi kan hmu thei a si.

Tu kuata sungih kan zir dingmi cu can netnak thu a si ih, a zaten kan zir theh lo ding. Can netnak thu le cuih canih thil thleng ding mipawl hrangah ziangtin so kan timtuahaw ding timi ih a tumtah mi cu Jesuh ratsalnak hi a si. Cuih can ih leitlun thil thlengmi thu le minung umdan pawl in can netnak thu thawn an pehzomawknak Bible ih a sim mipawl kan zoh tlang ding a si. Himi thuthawn pehaw in Jesuh hi zo a si, ziang in tuahsak, kan sungah ziangtin so hna a tuan, a ratsal tikah ziangso a tuah ding timi Bible ih a sim mipawl an tel ding. Paul ih a sim vekin Bawi Khrih le a thihnak hi kan zumnak hrampi a si. Nan hnenih ka um laiah Khrih le thinglamtah ih a thihnak siar lo thildang ngaihtuah ding ka tum lo (I Cor 2:2 NKJV). Amah kan ruat ringring ahcun amah vek kan si ding, Amah vekih zawnlung kan si ding. Rei lote ah a ra thleng cing ding mi Jesuh in a duhdawt mipawl hrangih a rem mi hmunah kan luh can a thleng ding. Cuih can cu hngak hlap zetin kan thlir ih, cumi hrangah timtuahaw sinsin ding kan si.

Norman Gulley, Ph.D hi Southern Adventist University ah Systematic Theology zirnak hmunah hruaitu a si.