HSS 2nd Quarter 2018: TAWPNA HUN ATANA INBUATSAIHNA

PUITLING SABBATH SIKUL 

BIBLE ZIRHONA

TAWPNA HUN ATANA INBUATSAIHNA

By

Norman Gulley

April, May, June   

2018

1. Vâna Indona Chu ............................................... 

2. Daniela leh Tâwpna Hun..................................... 

3. Isua leh Thupuan Bû .......................................... 

4. Chhandamnate leh Tâwpna Hun Chu ................. 

5. Vân Biak Bûka Krista Rawngbawlna ................... 

6. Dân “Thlâk Danglamna” Chu .............................. 

7. Matthaia 24 leh 25 .............................................. 

8. Siamtu Chu Chibai Bûk Rawh U......................... 

9. Tâwpna Huna Bumnate.......................................

10.         America leh Babulon ...........................................

11.         Pathian Chhinchhiahna Nge Sakawlh Chhin-chhiahna Zâwk?.......................................

12.         Babulon leh Harmageddon ...................................   

13. Kan Lalpa Isua Lo Kal Lehna Chu .......................

Thuhmahruai:

KRISTA LEH NÎ-TE TÂWPNA

Mihring tîsâ ang pû-a Isuan a lei zin kawng a zawh tâwp dâwn hnaihah khân hêng thûte hi a zirtîrte thlamuan nân a sawi a:

“In thinlung mangang suh se; Pathian in ring e, kei pawh mi ring vê rawh u. Ka Pâ inah chênna tûr tam tak a awm a; awm lo ni se ka hrilh daih tawh ang che u chu. In tân hmun buatsaih tûrin ka kal dâwn a. Chutia ka kal a, in tân hmun ka han buatsaih chuan ka lo kîr leh ang a, ka hnênah ka hruai dâwn che u a ni; ka awmnaah nangni pawh in awm ve theih nân. Ka kalna tûr in hria a, a kawng pawh in hre bawk e,” (John 14:1–4).

A thil sawi hi a awmzia hre fiah kîlh kêlh rih lohin, a thutiam chu eng tikah nge a lo thlen dâwn tih pawh hre lo mah se, a thu sawite atang hian thlamuanna an hmu ngei a ni tih erawh a chiang a. A Pa inah chênna tûr hmun an nei ve dâwn a. Chu hmun chu amah Isua ngeiin an tâna a buatsaih a ni bawk.  Hei zet hi chu hê khawvêla neih an lo châk ve thin âi pawha tha zâwk daih a ni ngei ang.

Hê thu a sawi hmâ deuh hian Isua chuan a lo kîr leh hmâa thil lo thleng tûr thenkhatte a lo hrilh tawh bawk a. Chu chu hun lo awm tûra thil lo thleng tûr chanchin niin, a nghahhlelh awm loh angreng viau mai. Indona, indo thuthang, hnam hrang hrangte indo tawnna, tâm leh lîrnghîng te chu “nau vei tantirhna” chauh a la ni tih a sawi a. Hêngte bâkah hian, tihduhdahna te, inphatsanna te, inbumna te, leh fiahna te pawh a la rawn thleng dâwn bawk a ni.

Hetiang hi a nih avângin “nî-te tâwpna” (Daniel 12:13) hunah chuan kan chêng tawh a ni tih a chiang hlê mai. Nimahsela, tâwpna hun tak tak—Isua lo kal lehna hmanga a vâwrtâwp a thlenna tûr—chu eng tikah nge a lo thlen dâwn tih kan hre lo va, kan hriat pawh a tûl lêm lo bawk. Chutih rual chuan, a lo thleng ngei dâwn a ni tih leh, kan lo inbuatsaih lâwk tûr a ni tih erawh chu kan hriat a tha hlê ang.Keini, tûnlâi huna chêngte hi chu kan vânneihna chin thui tak a awm—hêng Isua thil sawite hi a zavâi deuh thâwin, a sawi lâwk ang taka a lo thlen famkim hlawm tawh dân kan hmu thei bîka. Hun hrilhlâwkna thu ropui tak tak pahnih lo thlen famkim tâkna pawh kan hmu thei bawk. A hmasa zâwk chu, Daniela 7:25-a kan hmuh, “hun khat leh hunte leh hun chanvê” hi a ni a (Rev 12:6, 14; 13:5; Num. 14:34 pawh en bawk ang che), chu hun chu A.D. zabi paruknaah (A.D. 538) khân intanin kum zabi sâwm leh pariatna zawh dâwn hnaih lamah (A.D. 1798) khân a tâwp a. Hun hrilhlâwkna sei ber, Daniel 8:14-a ni 2,300 hrilhlâwkna pawh hi kum 1844 khân a lo thleng famkim ve leh ta bawk a ni.

Eng tin nge kan lo inbuatsaih lâwk ang? A chhânna tha ber chu: “Chutichuan, Krista Isua, LALPA chu in lo pawm tawh bawk a, amahah chuan awm reng ang che u” (Col. 2:6) tih hi a ni âwm e. Tawngkam danga sawi chuan, khawvêlah hian thil râpthlâk tak tak a thleng reng a, thuthang mak pui pui leh tâwpna hun chungchângah phei chuan thu lêng vâk eng eng emaw a awm deuh reng a, hêngte hian kan rilru a hruai kâwi daih thei a; amah Krista, kan inbuatsaihna chhan tûr awm chhun chu ngaihtuah lovin, a lo kal lehna hnaih tawhzia min kawhhmuhtu nia kan hriat thilte ringawt mai chu ngaihtuah bera neih awl tak a ni.

Tûn kuartar-a kan zir tûr hian tâwpna hun lam a hawi deuh ber dâwn a; mahse chumi ngawr ngawr chu a chhui tûr a ni chuang lo. A tinzâwn ber chu Isua a ni a, chumi chu ni hnuhnunga thil thlengte leh chûng thil lo thleng tûrte atâna lo inbuatsaihna hmangin kan zir dâwn a ni. Chutia kan zirna lamah chuan khawvêl chanchin kal tawha nî leh thlâ leh kum pawimawh te, thil thleng chhinchhiah tlâk te, leh khawvêl chanchin kal tawh te kan thlîr lêt a tûl dâwn a; a chhan pawh hêngte hi Bible chuan tâwpna nêna inzawm tlat nia a sawi vâng a ni. Nimahsela, hetiang kârah pawh hian Bible chuan Isua chanchin chu sawiin, amah chu tu nge ni tih te, kan tân eng thil nge a tih tawh tih te, keimahniah hian eng thil nge a tih mêk tih te, leh a lo kal leh hunah eng thil nge a tih leh dâwn tih te min hrilh a. Krista leh khenbeh tawh a

nihna chu kan rinna laimu ber a ni tûr a ni. Paulan, “In zînga ka awm chhûng khân Isua Krista leh [amah chu] krawsa khenbeh a nih thû chauh lo chu eng dang mah hria nih ka tum loh kha” (1 Corin 2:2) a lo tih ang khân. Amah chu kan en ngun poh leh amah ang kan lo ni zual deuh deuh ang a, a thu kan âwih zawh poh leh kan hmâ lawka thil lo thleng mai tûrte leh tâwpna hun tak taka lo thleng tûr, Isuan amah hmangaihtûte tâna a buatsaih “hmuna” kan luhna nî atân chuan inbuatsaihna tha zâwk kan nei bawk ang.

Tûn kuartar-a kan zirlâi bu buatsaihtu, Norman R. Gulley-a, PhD, hi Southern Adventist University-a thawk, Systematic Theology-ah research professor a ni.