ZSS SINNA 1: NEIHGULHLUATNA II HUZAAP

SINNA 1: NEIHGULHLUATNA II HUZAAP December 30-January 5

NIPI (SABBATH) NITAK Dec. 30

Tukal sinna ah simding: 1 John 2:16,17; Luke 14:26-33:12:15-21; Deut 8:10-14; 1 Tim. 6:10; John 15:5; Gal. 2:20.

Lai Siangtho Bulphuh: “Hih leitung deihna tawh kizuiin na gamta nawn kei unla, na lungsim uh thaksuaksakin na kipumkhel un. Tua hileh a hoih, a lungkimhuai, a hoihkim Pasian deihna bang ahi hiam, cih khentel thei in na pakta thei ding uh hi.” (Rom. 12:2, ZIV)

Pasian’ kammal in “Leitung deihna” (Rom 12:2, ZIV) zuih loh ding hong gen hi. Ahi zongin neih le lam lunggulhluatna ii zolna, hauhnopluatna leh hauhna tawh septheihna in thahat in vanglian hi. Mizawng hitaleh mihau hitaleh mitawmnocikte bek neihgulhluatna huzaap khengzo bek uh hi. Christian te zong tua sungah i awk hi.

Hauhna ahikeileh nang leh na itte noptakaa om theih nading nakpitak sepna pen mawhna siatna hilo hi. Ahizongin sum ahikeileh sumzonna in ngaihsutna khempeuh a luah ciangin dawimangpa’ thaangzak ah a awk ihi aa, leitung deihna a zui ihi ta hi. 

Sum leh hauhna sung bek ah nuntak picing leh nuntak nuam om cih leitung in hong ngaihsunsak hi. Ahi zongin Satan in sum pen maituam in zang aa, Christian te dona ah Satan in neihgulhluatna galhiam lian khat in hong zang hi. Bangbang hitase leh, sum deihlo kua om aa, tu laitak leh mailam aadingin sum in tampi hong sepsak thei hilo hiam? Sum in lunggulhnate thakhat in hong ngahsak pah kha theiaa, ahi zongin a tawpkhakna ah mihing kisap taktak nate ah lungkimna hong pia zo tuanlo hi.

* Tukal sinna na simna tawh January 6 Nipi aading kigingkhol in. 

NIKHATNI December 31LEITUNG’ PASIAN

Sum in leitung’ pasian hong suakkhin aa, neihgulhluatna in a biakna hong hipah hi. Neihgulhluatna in a lungmuanna picing hilo tawmvei sung bek lungmuanna hong pia aa, telhak leh a simthamin a lauhuai khat nahi hi.

Neihgulhluatna in, i telkhehna ah, hauhna leh neihsa lunggulhnate kha lam thumaan sangin thupisakzawkna leh manphasakzawkna hi. Neih le lam te manpha kha thei mah hi, ahi zongin amau manphatna in ei hong uk ding hilo hi. “Sum iplah peuhmah in sum a deihzah nei ngeilo aa, hauhna iplah peuhmah a ngahzah tawh a lungkim ngeikei hi” (Deut 5:10, ZIV). Bangzahta i nei zongin, pha cih om ngeilo; tam neih semsem nading hanciam tektek in lungkim om ngeilo - leitung nate lunggulhna ah a buaihuai thu hih ahi hi. Thaangzaak hong hipah hi.

1 John 2:16,17 sim in. Hih munah bang thupi taktak ci hiam? 

Luke 14:26-33 sim in. Jesu in hih laiah Christian te aading bangin akisam phabel hi hong ci hiam?

Hih bangin ngaihsunkik leng, sum zonna leh sum deihna bek tawh hun a beite in a supzah uh simhuai taktak hi. “Mi khatin leitung buppi a neih hangin a hinna taan leh bang phatuam ding ahi hiam?” (Mark 8:36, ZIV). “Christ leitung hong pai hun lai-in, mihingte in a niampen mun dong atun laitak hun hi. Mihing kikholhkhopna thubulte kineuseh hi. Nuntakna in a diklo leh bawltawm bang aa ... leitungbup biakna khempeuh in khalam leh ngaihsutna mansuah uh hi. Phuahtawmthu leh khialhna te tawh mihingte in kihhuai takin zualzanna leh neihgulhluatnate ah puuk khin uh hi. Tawntung thu ding nungngat san in tu laitak hun bek ngaihsun in nungta uh hi.” – Ellen G. White, Education, laimai 74-75.

Zualzanna leh neihgulhluatna ii huup tawh tu laitak hun bek ah a nungta mite omzia na theihngei a om hiam?

Neihsa deihlo kua i om hiam? Dotna in: i neih vante in, tamse takeileh, ei hong neikik ahih lam bang ci theih ding i hiam? Kua bekin eite hong neih ding kilawm hiam, hong neih lam bangci tel ding? 

NINIHNI January 1ANSAL DIPNA

Luke 12:15-21 sim in. Bang thu hong gen hiam? A hau selo mi khat aa dingin zong a thupi bangteng zat pah theih om hiam?

__________________________________________________________________________________________________________

I zawng aa i hau zongin, vante neih ding lunggulhluatna in athupi nate tungpan in tawmvei sung, a beipak ding leh tawntung nate hong suplawhsak ding nate tungah hong mitsuan sak hi. Kham leh ngun tawh kibawl milim taktakte bia kei kha mah ni. Bangbang ahi zongin, lamtuam tawh ngun leh khamte a bia ihih khak ding lauhuai mahmah hi.

Hih gentehna khat pen neihsa zon kinluatna ah leitung mun tampite aading a kituak mahmah thu khat hi. Vanzuakte in a zuak vante uh a deihhuai dingin mellawm theipen in zuak uh hi. A vanzuakzia uh en le hang a vante uh i neih masiah lungkimna ngahlo, lung nuamlo phial zah dong ding hong suah mai uh hi. Company khat in van khat bawl in, a van bawl uh ei akisam bangin hong zuak uhaa, en zong i kisap mah kisa in kilei kha takpi hi. Ataktak in cileng, hong mengzo lua uh nahi mawk hi. Leitung nate a lam-en lo Christiante nangawn zong tua bang khemnate pan peng tuanlo hi.

Deut 8:10-14 sim in. Hih laiaa hong vauhilhna bangin pawlpi mimal khatpeuh aading bang lauhuaina om thei hiam?

___________________________________________________________________________________________________________________

Lai Siangtho ahihkeileh tulai leitungthu ah, akikholtoto hauhna leh vante neihna in khalam, Pasian itna, vantungnate lunggulhna leh khathu lunggulhna a khansakna thu namuh natheih a om hiam? Kikupna ah pawlpi mite hawmsawn in. 

NITHUMNI January 2NEIHGULHLUATNA II ZOLNA

Leitung ii zolzuakna in vanglian thahat pha mahmah hi. Companyte in a vanbawlte uh sum tampi bei in i mai ah hong lak den hi. Muhnophuai leh mitla dingin melhoih theithei mite zangin hong zolzuak uh hi. Tua zolzuaknate i et ciangin ahoih mite batnopna mah tawh zong ei le ei ki-en in i deih zel hi.

Neihgulhluatna in khelpil takin aki theikhoplo aa pumpi taksa lungkim nading zolzuakna zang hikeileh lawhcing hetlo ding hi. Hih in zolzuakna thusim khat hi pah hi. Ahi zongin, ei a tamzawte bangin neihgulhluatna lauhuaina pan suahtak ding ahanciam dente aading guu tawh kibangin lauhuai mahmah hi. 

Matt. 6:22-24 sim in. Christian ngaihsutna leh gamtatna ah mittang in bang limla ci hiam? I kisap taktak ahilo nate ii simtham zolna in hong nektum loh nadingin bangci gamtat ding i hiam? 

Taksa lungkimna ding zolzuakna in vanzuakte’ aa dingin a thahatna khat hi. Vanlei dingte lungsim ah lawpna a om theih nading bawlna tawh vanzuak uh hi. Nundang khat ah om bangin ngaihsutna ah tawmvei sung nopsakna pia nuntakna mite in nuamsa hi. Theihtelna leh khavai thutak kihello a diklo biakna himahtaseleh deihhuai leh iplahhuai ahih manin mite in niallo uh hi. Deih in zong neih ding kilawm kisa ihih manin banghang neilo ding kici ta. Zolzuakte in i kisap bang teek in hong zolzawhna tawh bangzahtak a tam neihsate kibei khinta aa bangzah kibei lai ding cih Pasian bek in thei mai ding hi.

“Tua ahih ciangin Kha-in na nungta un, tua hi leh mawhdim pianngei deihna na tangtun kei ding uh hi, kong ci hi” (Gal. 5:16, ZIV). “Mawhdim pianngei deihna” te numei-pasal uukna lam bekin i bulhtuah zelkhak hangin a dang bang gamtatnate in hih mawhdim pianngei deihna tangtunna hi thei hiam? 

______________________________________________________________________________________________________________________________________________________________________________

NILI NI January 3
EI LE EI KI-ITNA

“Ahang in, nangma hihna tan sanga a sangzawin nang le nang ki-ngaihsun kei in. Ahih hangin, Pasian in nang hong piaksa upna zah tawh kizui-in amaan thukhenna tawh nang le nang na kingaihsut nadingin ka ngahsa hehpihna hangin note tungah kong gen hi” (Rom 12:3, ZIV).

Pasian in, “Na melhoihna na kisaktheihpih a, na thupina hangin na pilna na siasak hi” (Ezek. 28:17, ZIV) ci hi. Lucifer in amah hihna sangin kilian ngaihsut zaw aa amah le amah kikhem hi. “Kei le kei Sangpen Pa bangin ka kibawl ding” (Isa. 14:14) ci-in a lungsim ah a gen ciangin, kiliatsak tawmna leh ama neihloh thu ngahsawmna kilang hi. Ei le ei kikhemna leh ei le ei kiliatsaktawmnate in akilang pha mahmah Lucifer kiatna bulpi ahi hi.

Hih mun a Lucifer puukna in ei le ei dik kisakluatna leh ei le ei kimuan ki-itluatna in mawhna zungpi ahihna hong hilh hi.Amawh mihing khatpeuh in i hihlohpi hikisakna sangin akilangtang ei le ei kikhemna zaw bang om mawk hiam?

Hih gamtat luheekte i ngaihsut zah sangin theihhak khollo zaw hi. Nebuchadnezzar in ama hihna sangin a sangzaw in kingaihsun hi (Dan. 4:30). Pharisee te in zong midangte sangin pha kisazaw mawkmawk uh hi. (Luke 18:11,12). I kidop keiaa leh hauhna in zong hihbang khemna sungah hong tunpih thei hi. 

1 Timothy 6:10 sim in. Paul in bang alauhuai thu hong vauhilh hiam?

Alauhuai mite thu kidop ding Paul in Timothy ahilhna ah “sum deihlua te” (2 Tim. 3:1-5, ZIV) kihel hi. Sum deihluatna in kipummuanna, kiphatsakna leh ei le ei hi kisakna tunna ding tawsawn thei hi. Tua hi aa neihgulhluatna in a thupi zah leh i hihna zah sangin hong kingaihsunsak zaw hi. Sum i hauh ciangin i hina zah sangin kipingaihsut thei zaw hi hang. Mikhempeuh i hauhnop hangin a hau tawmcik bek ahih manin sumhaute kiphatsak in kisial baih hi. 

Filippi 2:3 sim in. Neihgulhluatna in a kilawm Christian nunzia tawh ki bangci kelki cih hong telsak hiam?

_____________________________________________________

NINGANI January 4
NEIHGULHLUATNA II KIMANNA NEIHLOHZIA

Amau hihna leh Pasian hihna tawh kihualkhawm ahih manin neihgulhluatna in a phelkhap zawhloh Pasian a it mi tampi om hi.

Deut 7:6, 1 Pet. 2:9, John 15:5 leh Gal. 2:20 te sim in. Pasian’ aa hihna i cih in banghi aa, koi bangin ihihna mu thei ding?

Pasian in ci hi, “Keimah, lengguipi kahi hi. Note hiangte nahi uh hi... Kei loin bangmah nahih theikei uh hi” (John 15:5, ZIV). Amuanhuai kizopna hong gen hi. “Thumanna diktak lungtang panin phulkhia hi. Chris tawh lungtang nasepna ahi hi. I phal nakaa leh, i ngaihsutna leh i ngimnate ah Ama’ hihna tawh kihualkhawm in, i lungsim leh lungtang in Ama’ deihna bangin eima lungkim utthu tawh zui-in sem thei ding hi hang.” – Ellen G. White, Khangcin Lungdeih, laimai 668.

Alang khat ah, neihgulhluatna in i neihsate tawh akibang hihna hong guan hi. I neihzah leh i leizawh zah tawh i hihna ipulaak zel hi. James in i kidop ding hong genna ah, “Na ngun na khamte uh kekseu hi. Tuate kekseuna in note’ langah teci pang dinga, mei bangin na sa uh a ne ding hi. A beisa hun sung teng hauhna na khol zo uh hi” (James 5:3, ZIV). “khol” cih ciangin neihsa tampi kaikhawm in khoihkhol in tua tawh a hihna uh geel in om cihna hi (Luke 12:19-21).

Neihgulhluatna in i hihna hong buaisak, amsak thei hi. Mi tampite hihna pen a neihsa uh tawh i telkhial thei hi. I neihsate i pasian suak hi (Matt. 6:19-21). Mi khat in, “Ka neihsate om keileh bangmah hi keng” ci ngei hi. Leitung nate i neihna bek tawh i hihna i teh bangzah in dahhuai hiam. A beipak ding sauvei kimanglo nunzia tawh nuntak ding bangzah in Christiante aading daikai zen hiam. I nunna Pasian tawh kibangsak zaw ding maw i neihsa tawh kibangsak zaw ding? Khat ahih keileh a khat zaw hipah lel hi.

Na neihsa vante tawh na hihna bangzah kisuun hiam? 

________________________________________________________

KIGINNI January 5

NGAIHSUT BEH DING: “Tuni in galpa in man tawmno tawh khate lei ta hi. Lai Siangtho in, ‘Na mite man tawmno in na hong zuakzo hi” ci hi. Mi khat in akha leitung pahtawi nading, adang khat in sum aading, khat in lungkim nading, leh adang khat in gualnop nadingin zuak hi. Hih bangin nisim in mankideek den hi. Jesu’ sisan in atatkhiat khate tehtheiloh in manpha mahmah taseleh Satan in mantawmno tawh lei ding hanciam hi.” – Ellen G. White, Testimonies for the Church, Vol. 5, Laimai 133.

Neihgulhluatna tawh kha manphate lei ding Satan’ mungtup ahi hi. Neihgulhluatna pau theilo a, ahi zongin paunam khempeuh thei hi. Ahau azawngte’ aading lungkimna leh lungnopna pia thei ahih manin “Ka kisap teng neikhin ing, lunghimawh ding dang omlo hi” cisak hi. Tua hi-in, neihgulhluatna in Pasian muanding sangin neih le lamte muanna hong neisak ahih manin mihingte lungsim susia hi. Ahi zongin, tua guu damna zatui in, “Thahatna hilo, vangliatna zong hilo in, keima Kha hang ahi hi’ Vanglian Topa in ci hi” (Zech. 4:6, ZIV). Neihgulhna ki-uk saklo aa Pasian tungah ki-ap in Kha Siangtho makaihna ki-uksak mite neihgulhna in zozo lo hi. 

KIKUPDING DOTNATE:

1. Tukaal sung i sin laihuainate in, zawng in bang mah nei takeileng, bang lampite tawh hong zol zo thei hiam?

2. Mi pawlkhat in, “Sum khawng kin keng, sum kei aa ding thupi kei” ci thei hi. (Tua acite sumhaute hi thei bilbel zaw.) Banghangin hih bangci diklo thei hiam? I nuntakna ah sum pen thupi tham hi. Lai Siangtho hilhna tawh kituak in diktakaa sum bangci kemzeek thei ding i hiam? 

3. “Nget le kekseu in a siatsak theihna le gutate in luh a, a guk theihna mun hih leitungah na gou-te uh khol kei un. Nget le kekseu in a siatsak theihlohna leh gutate in luh a, a guk theih lohna mun vantungah na gou-te uh khol un. Ahang in, na gou-te uh omna munah na lungsim uh zong om ding hi” (Matt. 6:19- 21, ZIV). Jesu’ hong hilhna in bangci bangin alauhuai neihgulhluatna pan kikepna hi thei ding hiam?