Adventist le Halloween

                 

Thu Masa 

Kumsim October 31 acin ni sial-in, leitung mi atul alom tampi takte’ sung pan adiak in, America gam leh England gama om mi pawkhat in-ah, mun tuam tuam ah party (pawi no) bawl uh in, Halloween ni, pahtawi na ci-in, mibum thei, dawi-ai tawi, siampu te’ puansilh daan te tawh kizeem in mi lauphawng in nuam sa mah mah uh hi. Hih Halloween huntak atun ciangin, naupang te bek hilo in, atamzaw khangcing khin sate na ngawn zong kihel uh aa, alauhuai thei thei dingin dawi gilo upmawh kizep uh aa, inn khat pan inn khat ah pai-in, pawlkhat bangin vansut sak cih bang omlai uh aa, ngeina seh in nopsa mah mah lai uh hi. United Nations Children’s Fund (UNICEF) leitung bup naupang donghu kipawlna te bangin 1965 kum pan kipan Halloween ni-in mipawlkhat atuam vilvel in seh liangin, alauhuai mah mah dingin zeem uh aa, Halloween pawi leitung mun tuam tuam aa naupang te bawl’ sak zawh na dingin tua ni pen sumdong na ni-in zangh kawm uh hi. Philippines gam ah, Halloween huntak ciangin, alauhuai  thei pen pen in akizem, adawi gilo upmawh lim dan aa om thei pen te apawl pawl in kidem’ na om sak in, azo te letsong leh pahtawi na tam pi pi pia uh hi. 

Halloween cih min ih zakna pen Roman Catholic biakna sung pan hong gingngaih khia hi aa, Mi Siangtho te’ Pawi, Mi Siangtho te phawkna in kumsim November ni khat ni sim-in bawl den uh hi. AD 600 kum in Pope Boniface IV in, All Saints' Day cih tawh nabawl hi, Pope Gregory III in November 1 pen PAGAN celebration ding in Christian sungah onglut pih ahi hi. Pawlpi’ calender ah tuamkoih ngiat uh aa, phawkna leh pahtawina bawl den uh hi. Tua mi siangtho te’ pawi ma-in akibawl pen nitak pawi ‘All Hallows’ Eve’ hi aa, October 31 nitak in kibawl aa, tua pan in Halloween cih hong piang khia ahi hi.  

Halloween ii Tangthu leh Hong Kipatkhiat na: 

Tapidaw masa te’ hun lai-in, taanglai Britain (England) leh Gaul ah Druids (Biakna makai te) pawi pan in hong kikhang, hong kizel khia ci’n mipil’ tampi bawl’ Encyclopedia Britanica Bu ah kiciamteh hi. A tangthu tawm en suk pak leng: Celtic (European) mite teenna ahi Great Britain gam sungah: Ireland, Scotland, and Wales gamte ah Samhain, anlaak zawh pawi zong akici pupa ngeina pan hong ki pan khia ahi hi. Tanglai in Britain leh Ireland gam ah khang kizom to to in abawl det uh Samhain cih min nei pawi khat khaal abei October 31 (amau’ khuahun khuadam kipat hun) ni-in Celtic mite’n bawl to to uh hi. Hih October 31 ni ahih leh Celtic te leh  Anglo-Saxon te ii mualdawn ah dawi gilo leh kaute a hawlkhiat na uh leh a do na un, mei lompi phuaal (meipi hal) uh hi. A kumthak pawi uh zong ki ci thei hi. A hih ni lap in, gamvak te, gancing te, gamgiak te, kitun tuah ngeingai uh aa, thu kikum khawm in ah agam ki ukna te uh, a thukhun te uh leh a gam, a leitang, a neihsa te uh puahpha in a kisiansuah ni uh  ahi hi. Hih hun teh, asisa te ii kha te pen amau ii inn tek ah hong vaak (hawh) hi ci’n zong um uh hi. Tuhun ah, hih Halloween ni tawh kisai ngaihsut na ah, mi pawlkhat bangin ah nupa suah na, kamphat na, cidam’ na, leh hih ni in ih sih phial leh zong lungkim huailua, amanpha (adeihhuai) pen ni cih bangin asang pawlkhat om hi.  

Hih ih gen Samhain pawi hunsung ahih leh October 31 nitak hun pan November 1 sun sung bup zangh uh hi. Hih pawi pen Celtic mite ii zat pawi thupi hun khat ahih ban ah Tapidaw biakna Britain gam ah alut Kum zabi nga (5th Century) hun na dong ah min nei mah mah hi. Britain gam ah Tapidaw biakna hong lut tak ciangin Celtic mite Tapidaw lam ah ong kihei uh aa, tua Samhain pawi pan in Tapidaw Mi Siangtho te’ pawi tawh paikaan to uh hi. Irish leh Scottish gam mite honpi khat America gamah hong lal (peem) uh aa, a gam vua a bawl det uh dawibiak na “Nitak pawi (All Hallows Eve)” kumsim in bawl uh in ah, hong khangcing, hong pung cing mah mah un ah, a sawt sawt tak ciangin US gam hong lawh to ta un ah, aaluu kial (potato famine) tun kum (1845 – 1846) sung bang in Halloween pen gam bup pawipi khat in hong piang to hi. 

Tua hun tak ciangin, naupang uham te akizeem liamluam sa in, inn khat khit inn khat ah va kiban kawi kawi hamtang se uh hi. Tua pen mikang lai in, Trick-or-treat ki ci hi. A hangin, taanglai Druid (Biakna makai siampu) te in zong a uniform tek uh silhsa in, inn khat khit inn khat ah aban ban in va pai uh aa, amau’ neek ding, azat ding uh leh dawi gilo te piak ding uh cih bangin na a tuamtuam va ngen kawi kawi uh hi. Khua sung mite’n neek ding, dawn ding te a piak kei vua leh, tua a pia khialo te’ innkuan te dawi’ min tawh phuisam in, hamsiat uh aa, tangthu pawlkhat ah tua apialo te innkuan sung pan khat tei tei tua kum in si hi, ki ci hi.  

Tua bang in ava lut kawi kawi na vuah, Druid a kici siampu te in a gol sim sim kawlkai san (mong-la-uuh) ih cihte a sung hawm sak in, amai lam pang teng dawi lim dan in bawl, zeem un ah tawi kawm uh hi. Tua pen, a lauhuai mah mah dawi kha ci uh hi. Tua kawlkai san sung khuaimei tawh taan uh aa, lalcin (meipi) ihzat bangin zangh in dee in tua tawh zan ciangin inn khat khit inn khat ah pai uh hi. America gam ah hih bangin a zat uh pen Kum zabi 18th pan 19th Centuries sung teng ahi hi. Tu in tua kawlkai san taangin maipum (pumpkin) tawh laih ta leu leu uh hi. Tua min a kipia dawi kha pen, “Jock,” ci uh aa, America gam ah “Jack, lalcin (mei) sung aa om dawi kha” cihna hi aa, or (ahih kei leh) mikang lai in, “Jack-O-Lantern,” ci uh hi. 

Etphat Kikna leh Ki Sittelna 

1. SDA te in, Halloween tawh kisai, a tuam vilvel in pelhdet na ding thu pulaak ih nei nai kei phial zongin, pawlpi dangte’ hong huzaap theih thusim khat leh a sia mah mah dawi’ hong khemna hih daan pawi athapia ih om’ loh nadingin kidal kholh ding ahi hi. (Pulaak na action lak na aom khit leh lah telvat lo hing, aom nai kei leh ka cih na bek) 

2. Halloween taangthu ih et tak ciangin LST tawh akizop na neng cilik zong omlo, ki memat hetlo hi, bek thamlo in, Christian Pawlpi tawh zong ahong ki pan masa hi beek lo lai hi. Taanglai lawki, pu pa tual pan aa hong kizangh khia, upmawh san pawi ahi hi. Upmawh tawh kisai-zuih ding LST in hong hilh na omlo hi. (Siampi Laibu 20:6). 

3. SDA te in LST om bangin ih sih khit tak ciangin bangmah kigamtang nawnlo cih ih um hi. Ih naupang te kiangah zong mi sikha kici a om hetloh lam ih hilh hi. LST tawh kileh bulh lian lian in Satan leh apawl te in nasia tak in na hong sem uh hi. LST Piancil pan Mangmuhna ah Satan leh apawl te aom lam LST in kician tak in hong genzo hi. (LST Piancilna 3:1; Job 1:6; Matt. 8:31; Mangmuhna 12:9) 

4. Sangkah na, abucing khantoh na’ng kipat tah na ah, ngaihsut na hoihlo, amanlo, adik lo thu te sang naupang te’ lungsim sungvuah koih khak hetloh na ding ih kihilh hi. LST Paunak 22:6 in, “Naupang khat aneu lai-in lampi man tawnsak le cin, a teek dong in lampial ngei nawnlo ding hi”, cin hong lam lak hi. Pasian’ deihna ahilo na khat peuh peuh ih hilh ngei kei hi. 

5. LST Thuhilhkikna 18:10-12, “Note lakah a tanu ahi a, a tapa ahi zongin biakna-in a zang, ai a saan, khong a khai, mailam thu a gen, ai a tawi, bum a zang, van a kah, sikhate tawh a kiho, sikha thu a dong kuamah na om kei ding uh hi. Bang hang hiam cih leh hihte a hih mi peuhmah { Topa}-a' dingin a kihhuai ahi hi. Hih bang a kihhuai gamtatnate hangin note' mai panin { Topa } na Pasian un amaute hawlkhia hi.” Hih thu tudong mah in zuih ding hi. 6. Halloween ngeina pawi ah kihel na, zatpihna in, bangmah atheinailo naupang te ahizongin, atheisa uham te ahizong in Pasian’ thumaan pan in Satan in ih ngaihsutna hong pialsak thei ding thu ahi hi. 

7. Ellen G White, kamsang nu in Halloween a pulaak na lian a om loh zen zen hangin, sikha thu upna (spiritualism) tawh kisai in, kidal kholh zia ding, “Ki Dona Lianpi Laibu” sungah tampi na pulaak hi.  

Thukhupna  

SDA te in ih hih leh sikha thu tawh kisai maitang tampi tak pan hong kipan pan ahih lam ih thei khin zo  hi. Ih ut, ih uuk pen pen te ta tawh Satan in hong khim thei deuh hi. Tua uuk na tuamtuam  te pan in, naupang te leh ulian te Pasian’ thuman pan pialkhia sak zo thei pen hi. Tua man in SDA te in Halloween tawh kisai aki bawlna, a ki gualnopna, a kizep na aa kipan a khempeuh ah neng cilik zong ki memat loh ding ih ki za sak pha pha hi. Nisimin a sia a pha i tuak kha den-a, Pasian in mimal deihtel theihna a hong piak pen mihing ii hamphatna ahi hi. Ahi zongin, mihing in zaleen na leh dik sakna (justice le freedom) thupi sak lua ihih manin tua hamphatna kizang khial thei zel hi. Halloween adeih (lunglut) te in amau’ deihna hong gen ding uh a, ei SDA te in zong Pasian’ deihna mah gen tangtang zaw ding hong kisam mahmah ta cih hong phawk sak hi. Khristian dangte sangin ei SDAte in Zeisu Khrih leh Ama’ deihna alamsang zaw dingte ih hi hi.  (NB: A kisam tampi omlai hi…… edit phal hi.)  

Etkak Laibu te: 

- Gerhard Pfandl, PhD (Associate Director, Biblical Research Institute). Halloween and Seventh-day Adventists.  Available at: http://www.gcchildmin.org/pdf/halloween.PDF (Accessed November 3, 2014) 

- Encyclopedia Britanica – Micropedia, 15th ed., s.v. “Halloween.” 

- New Catholic Encyclopedia, 1967 ed. S.v. “All Saints, Feast of” 

- The Encyclopedia of Religion, 1955, s.v. “Halloween.”

Translated by: PAU L. DAL  November 3, 2014