ZSS SINNA 9: MAWHSAK THUKHENNA TAWH KIPELH

SINNA 9: MAWHSAK THUKHENNA TAWH KIPELH
 November 25 - December 1 

NIPINI (SABBATH) NITAAK LAM November 25 

SIMDING TE: Rom. 8: 1 - 7. 

KAMNGAH: “Ahi zongin tu-in ahih leh si leh sa deihna bangin kalsuan lo in, Kha deihna bangin a kalsuan Khrih Jesuh tawh kipawlin a nungta mite pen mawhna thukhenna tawh kipelh hi.” (Rom. 8: 1) 

Rom. 8 in Paul a dingin, Rom. 7 sunga agen khempeuh a dawnna ahi hi. Rom. 7 sungah bel Paul in lungkiatna, tuahsiatna, mawhsakna cih thu te vive bek hong gen hi. Rom. 8 na sungah bel mawhsakna cih te om nawn lo a, Khris hangin suahtakna leh gualzawh theihna hong laih ta hi. 

Rom. 7 sungah Paul in, Zeisu Khris pen na saan nop kei a leh, Tua Rom. 7 sunga om, cihmawh gentheihna khempeuh na luah kul ding hi, ci hi. Mawnna sila na hi dinga, sep dingin na teel thuhoih khat zong na sem zo kei pah ding hi. Rom. 8 sungah bel Khris Zeisu in na mawhna pan in hong hotkhiatna a hoih gamtatna na sepnop te, ci leh sa in a hong sepsak theihloh na mun pan in, suahtakna hong piak nopna thu hong gen hi. 

Paul in agen zopna ah, tua i ngah suahtakna pen man’ tawh teh theih ding ahi lo, amanpha ahi hi ci hi. Pasian Tapa Khris in mihing hihna hong la hi. Tua in eite tawh Amah i kizop theihna lampi a om sun hi a, Ama hoihkim na pen eite in i etteh theihna ding, eite sih tangin aiawh in a hong sih theihna dingin ahi hi. Amah pen “mihingte’ mawhna lungsim mah a nei-in” a hong pai hi (Rom. 8: 3). Tua ahih manin, Thukham’ in a hong kalh diktan theihna leh tua thukham in a deihna teng a kicin’ theihna ding ahi hi (Rom. 8 : 4). Kammal dangin gen len’g, Khris in thu-um mite a dingin mawhna tungah gualzawh theihna ding leh Thukham in a hong kalh gamtat hoihte (Thukham zuihna in Gupkhiatna ngah theihna dingin thalawh theih hi lo a, Gupkhiatsa te i hih man in Thukham deihna ah i kalsuan theihna dingin) a hong sepsak ahi hi. Thukham zuihzawhna hanga thuman na tawh cik mah hun in Gupkhiatna ki ngahlawh ngei lo a, zong hi ngei lo ding hi. Hih thu in Paul leh Martin Luther te’ thupuak a hih mah bangin, eite’ thupuak zong hi sak ding hi hangh. 

NIMASANI (SUNDAY) November 26 

ZEISU KHRIS SUNGAH 

“Ahi zongin tu-in ahih leh si leh sa deihna bangin kalsuan lo in Kha deihna bangin a kalsuan, Khrih Jesuh sungah a nungta mite pen mawhna thukhenna tawh kipelh hi”(Rom. 8: 1). Mawhsak thukhenna tawh kipelh hi a cih ciangin bang a ci nuam hi ding hiam?Koi mun pan in mawhsak thukhenna pan in suakta thei i hi hiam? Bang hangin hih thu mahmah in Lungdamna thu suak thei hiam? 

____________________________________________________________________________________ 

“Zeisu sungah” cih kammal pen Paul laikhak sungah ki tamdawk mahmah hi. Mikhatin Zeisu “sungah” om i cih a khiatna in, amah in Khris pen Honpa leh Gumpa dingin sang ahih man ahi hi. Amah in Zeisu pen a bangkim ah muangngam dinga, Khris nuntak zia kalsuan zia khempeuh amah zia bangin a zui thei dingin hong khensat ta cihna ahi hi. Tua hun ciangin Khris mahmah tawh a mimal in naitak in kizop na tawh hong kipawl thei ding uh hi. 

“Zeisu sungah” cih pen, “ci leh sa sungah” cih ki lehbulh mahmah hi. Rom 7 sunga Paul in a gen nuntakzia te ahi, Khris sungah a kiaap ma-in ci leh sa tawh a kidiah mi, mawhna sungah sila bangin a awk mite, tawh zong ki lehbulh hi. Tua banga ci leh sa tawh a kidiah mite pen, mawhsak thukhenna hangin asi dingte ahi hi (Rom. 7: 11, 13, 24). Bang hang hiam cih leh, amau te in “mawhna thukham” sungah a gamtat man uh ahi hi. Hih mite pen a cimawh leh a genthei dinmun sungah a omte ahi uh hi. (Rom. 7: 24). 

Ahi zongin, tua hun laitak kek mahin, amah in Zeisu tungah a hong ki-aap theih nak leh, thakhat thu in Pasian mai ah a ding thei dingin hong ki lumlet ding hi. Thukham palsatna hangin mawhsak thukhenna a thuak ding pa in, Pasian muhna ah ami picing hong suak ta dinga, Khris dikna puan in a maute tuamkhin ta ahih manun, mawhna a bawl ngeilo bangin amau te hong kisang ta ding hi. Amaute mawhna khialhna te hangin mawhsakna cihte om nawn peuhmah lo dinga, nuntak tawntungna a ngah takcing te hong hi ta ding uh hi. Tua pen amau te kicin man hi lo in, amau dinmun ah a ding, Zeisu hangin amaute’ mi picing a suahsak man hi zaw hi. 

Ahi zongin Lungdamna Thupuakin hih mun ah bei tawp nai lo hi. Mawhna a piangsak thukham pan in bangin suakta sak thei hiam? Rom. 8: 2 

______________________________________________________________________________________

Hi lai mun a, “Nuntakna Kha tawh kipawl Thukham” a cih in mihingte a hotkhiatna dingin Khirs’ ngiimna hi a, “mawhsakna leh sihna hong pia thei thukham” a cih tawh ki lehbulh hi. Rom. 7 sungah mawhna in a hong huzap/ukna hangin sih na tawh ci in na gen hi. Ahi zongin Khris’ Thukham in bel nuntakna leh suahtakna hong ngahsak hi. 

“Pasian kiangah amah leh amah a kipia khia nuamlo peuhmah in, a dang vangliatna anei khat’ thuneihna nuai ah ukcip na a thuak kha te ahi uh hi. Mi kuamah in ei leh ei tungah thuneihna i nei kei hi. Amah in suahtakna thu gen kha mah dinga, a hi zongin amah in sila sungah a kidiahcip ki hi zaw hi. Ama ut thu bangin a om dan in kigen kha mah dinga, ahi zongin khuamial ukpa thu a zui na hi zaw hi. Khris Zeisu ahih leh mawhna sungah a kihen cipna tawh sila a suakte’ sikkhau a sattat dingin ahong pai a hi hi. “ - Ellen G. White: The Desires of Ages, p. 446. Tu in sila hi zaw maw Khris sungah suahtakna a ngahte hi zaw? Kician takin na dinmun bang ci kitheih ding na hiam? 

NINIHNI (MONDAY) November 27 

THUKHAM IN A HIH ZAWHLOH THU 

Bangzah takin a hoih mahmah “Thukham”(Zehtan thukham, Thukham Sawm, a nih in a kop in) ahi phial zongin, mihingte in i ki tangsap pen hong pia thei tuanlo hi. Tua i ki tangsap penpen in, Gupkhiat theihna ding vaihawm leh, mawhna hangin a hong piang, mawhsakna leh sihna pan in hong hotkhiat theihna ahi hi. Tua ahih manin Zeisu a kisam ihi hi.

Rom. 8: 3, 4 sim in. Thukham in ama’ dinmun pan in a hong sep khiatsak theih vet loh, Zeisu in a hong sepsak in bang ahi hiam?
 ____________________________________________________________________________________

Pa Pasian in ci leh sa tawh a kidiah mawhnei mite suahtak theihna dingin, “mihingte’ mawhna lungsim mah a nei, Ama Tapa a hong sawlna” hangin mawhmai sak theihna leh mawhna a piangsak ci leh sa deihna khempeuh tungah gualzawhna hong puak hi. Mihing bangin Khris a hong suahna in a kigeel khol Gupkhiatna lampi a dingin a thupi mahmah kalsuanna ahi hi. Singlamteh tungah a hong sihna in a pahtawi huai mahmah thu hi mahmah na pi in, Gupkhiatna a picin theihna dingin “mimawh bangin a hong suah” a hong nuntakna limlim in a thupi pen pen khat hong suak hi.

Pasian in eite a dingin ahong sepsak ahi, Khris a hong sawlna hangin, tu in thukham in a hong kalh ahi dikkisak theihna a hong piang thei hi a, tua in thukham kalhna khempeuh sepzawhna hong nei sak thei hi. Tua in thukham deihna khempeuh apha tawh kicin sak zawhna a hi hi. “Thukham nuai ah” (Rom. 6: 14) ki cin na om thei kei mah ta leh, “Khris sungah” kicin na piang thei ta hi.

Tua mah bangin, i phawk ding thukhat in, Thukham deihna cin khin ta i cih ciangin, thukham zuihna ah hahkat takin zui zawhna in Gupkhiatna ngah na dingin kicing hi a cihnopna hi lo hi. Tua bang tawh zong cikmah hun in kingah ngei lo hi. A cihnop na in, Pasian in a hong deihsak nuntakna bangin nuntak theihna hi zaw a, leitung lungsim pianzia leh leitung lungsim deihna khempeuh phiatsiang (Gal. 5: 24) khit ciangin Zeisu zia leh tong tawh i nuntakna ah i lahkhiat theih ding hi zaw hi.

Rom. 8: 4 sunga “nungta/kalsuan” cih a khiatna in “a mah leh amah ki makaih” cihna ahi hi. “ci leh sa” a cih ciangin mawhna kithei na pi in a kikheel nuamlo te cih nopna ahi hi. Ci leh sa tawh kalsuan i cih ciangin ama’ ang sung lunggulhna in ukcip in a nungta te a ci nuam ahi hi.

A lehlam pan in, Khasiangtho sungah kalsuan i cih ciangin, thukham in akalhna mun ah lawhcing takin diksakna ngahna ahi hi. Tua dikna pen Khasiangtho panpihna bek mah tawh a tangtun thei ahi hi. Zeisu Khris sung bekah Thukham in a kalhna khempeuh te tungah suahtak theihna ki ngah bek hi. To Zeisu lo in bel, tua bang suahtakna a om thei kei hi. Mawhna sungah sila a suak mikhat a dingin a pha a bawl theihna dingin a geelgeel hangin, piang thei ngei lo ding hi (Rom. 7: 15, 18 enkawm in).

Bangzah taka pha in thukham zui zo na hi hiam? Thukham zuih tawh Gupkhiatna kingah thei hi cih santheihna nawlkhin phot inla, na nuntakna ah thukham in a kalh dikkisak theihna te a picing tak a kalsuan khin na hi nai limlim hiam? Na hih nai kei leh bang hangin hi nai lo na hi hiam? Na nuntak zia hoih lo te tungtawn in a paulap taklo bang dinmun te paulap in nungta lai na hi hiam?

NITHUMNI (TUESDAY) November 28 
CI LEH SA MAW KHASIANGTHO 
Amau pumpi deihna bangin a nungtate, amau pumpi deihna in a lungsim uh a uk hi; Kha Siangtho deihna bangin a nungtate, Kha Siangtho in amau lungsim a uk hi. I ngaihsutna, i pumpi deihna uksak lehang sihna tawh kizom hi; i ngaihsutna, Kha Siangtho uksak lehang nuntakna leh nopsakna tawh a kizom hi. (Rom. 8: 5, 6). Hih mun hoihtak in ngaihsun kawm in. Hih sung pan in bang thupuak kimu thei hiam? Na nuntakna bang ci zat cih hong bang ci gen hiam? 
_____________________________________________________

Hih lai mun ah “bangin” cih kammal in Greek lai in “kata” cihna hi a, “tawh kituak in” cihna hi. “ngaihsutna” a cih na in zong “ lunggulhna” hi pah hi. Mi tampi takte in amau ci leh sa lunggulhna tawh kizui in a picin theihna dingin hong ngaihsun khia pah uh a, pawl khat leuleu te in, kha thu bekmah ngaihsut in nei a hih manun, Pasian thu te a zui dingin/a gamta dingin lunggulh na nei uh hi. Lungsim sunga i ngaisutna bangin a gamtang dingin a kikhensat hi mai a hih manin, hih minam nih te in a nuamtuak un a gamtang ahi uh hi.

Ci leh sa lungsim in a hih theih vetloh bang hiam? Rom. 8: 7, 8 
_________________________________________________________________________________________________________________

Ci leh sa in a lunggulhna bangin a gamtang dingin lungsim in a hong khensat tak ciangin, a taktak in tua in Pasian deihna tawh a kigal neihna dinmun a hong tun ahi hi. Tua bangin lungsim a khensat khinte in Pasian’ deihna bangin a kalsuan noploh zia a lakkhiatna zong hi pah hi. Pasian thukham te a langpan na hi a, Pasian mahnah tungah zong a langdo na ngiat hi pah hi.

Paul mahmah in a hong lunggulh sak thu in, Khris kihel lo in Pasian Thukham pen zuih theih ding a hih loh zia hong gen nop bulpi ahi hi. Mi khatkhat in bang zah takin ahanciam hangin Khris kihel lo in thukham zuih ding a piantheih loh zia pen, gen kikkik gen tawntung hi.

Paul in a diakdiak in a hanciam thu in, Jew mite in amaute thukham ahi (Torah- Moses gelh Laisiangtho Lui sunga bu masa 5 teng)te sangin Khris Zeisu a kisap zawkna uh thu ahi hi. Pasian teeltuam leh Pasian’ kilaakna a ngah khak uh hangin amau te in a nuntak zia te uh, Gentile te mawhna bangin a gamtat zia te uh sia khin ta a hih zia lakkhia nuam hi. Hi khempeuh te tungtawn pan in a sintheih ding thu uh in, amau te in Messiah kisam uh hi cih thu ahi hi. Tua Messiah kihel lo in amau te in mawhna sung mahah sila bang hi lel uh a, tua ukna sung pan in suahtak theihna lampi dang om tuan lo hi, cih thu a theih ding uh lunggulh hi.

Hih thu khempeuh te in, Thuciam Lui sunga Pasian in apiak te khempeuh in Gupkhiatna dingin cing zolo ahih zia Paul in, a tel thei mahmah lo Jew te tungah a dawnna ahi hi. Tuma lama a septe khempeuh uh zong a hoih mahmah a hih zia pom sak veve na pi in, tu in a hong tung ahi Missiah pen a pom beh theihna dinguh a lunggulh man ahi hi.

Tuma nai 24 sung na kalsuan zia ki enpha kik in. Na sepna khempeuh te in Khasiangtho deihna maw ci leh sa deihna? Tua na dawnna in na dinmun hong bang ci gen hiam? Ci leh sa deihna a hih khak leh bang ci bangin kheel hong kul dinga, koi ci bangin kheel thei ding na hi hiam? 

NILINI (WEDNESDAY) November 29
NANG SUNGA OM KHRIS
Paul in a hong gen ngeisa mah hong gen kikkik a, mihingte nuntakna ah i tuahkhak pelmawh dingin thu kikalh te hong tehkaak kik a: Kha deihna ahi Pasian in ahong ciamsa Khasiangtho deihna bangin nuntakna leh, ci le sa deihna ahi mawhna sungah lut theihna ding nuntak na cih ahi hi. Khat in nuntak tawntungna hong tun thei a, khat zaw in sih tawntung theihna hong manawh pih hi. A kikaal laklawh ah( a kai-ngawi in) om theih hi lo hi. Topa Zeisu mahmah in, “Kei hong pawlpihlo peuhmah keima lang hi uh a, kei hong kaihkhoppih lo peuhmah a thehthang ahi uh hi” ci hi. (Mat. 12: 30). A cih nop dan kician mahmah pah a, a vom leh a kang khentel theihna sangin telbaih zaw lai hi.

Rom. 8: 9 - 14 sim in. Zeisu sungah amau leh amau a kipumpiak ngamte tungah bang kamciamna ki pia hiam?
 ______________________________________________________

“Ci leh sa” sungah nuntakna leh “Kha” sungah nuntakna zia a ki lehbulh sitset ahi hi. “Kha” sungah nuntakna i cih pen Pasian Kha’ a hi Khasiangtho ki makaih sakna a hi hi. Hih Laisiangtho mun sungah Khris Kha (The Spirit of Christ) ci ngiat hi. Tua hi a, Khris aiawh dingin a hong om thei Kha ahih manin, Ama hangin Khris in thu-um mite sungah a hong teeng thei ahi hi (Rom. 8:9,10).

Hih Laisiangtho mun sungah Paul in Rom. 6:1-11 sung thu mah hong pulaak kik hi. A gentehna thu tawh kizui in, Tui i kiphum tak ciangin “mawhna pumpi” ahi mawhna abawl den pumpi pen, a ki susia cihna ahi hi. Tua “Mihing lui in Amah tawh Singlamteh tungah si khin ta hi” (Rom. 6: 6). Ahi zongin Tuiphumna sungah a kiphum khin a hih mah bangin, kiphum paisuak lo in, thawhkikna zong kihel hi. Tua ahih manin Tuiphum na a ngah khin sa te in, nuntakna thak sungah a kalsuan dingin a thawhkik uh kul cihna a hi hi. A cihnop na ah, Mihing lui hihna sih sak theihna dingin, a nisim a hunsim in eima’ deihteelna tawh i kalsuan ding cihna hi pah hi. Pasian in Mihingte’ suahtakna pen suksiatsak sawm ngei lo hi. Mihing lui hihna a sih khit hangin, mawhna a kibawl theih veve ahi hi. Kolose mite tungah zong Paul in. “note sungah a om leitung lungsimte na sisak un, na ci hi (Kol. 3: 5).

Tua ahih manin, Pianthakna sungah i kikheel khit hangin, mawhna tawh kisai in nakpi takin kidona om lai ding hi. A ki lamdan na dingah bel, Khasiangtho in a om pih te nuntakna ah, tu mahmah in Pasian’ vangliatna in gualzawhna pia dinga, tua bek tham lo in, amah in mawhna sila pan in a suakta khin ahih na tawh kizui in, mawhna sila a suak kik dingin zong hih teitei nopna nei nawnlo ding uh hi.

Zeisu sihna pan in a thokik sak Pasian’ Khasiangtho nangma sungah a om dingin a phal na hih nak leh hong om thei ahih zia ki ngaihsun in. Eite a dingin bang vangliatna hong om ding cih ngaihsun kawm in. Tua bang in ahong om theihna dingin bangin nang hong daal lai hiam? 

NINGANI (THURSDAY) November 30
TA’ HONG SUAKSAK THEI KHASIANGTHO
Khris sungah athak kizopna i neih theihna dingin Paul in bang ci bangin hong gen hiam? (Rom. 8: 15). Hih kamciamna te tungtawn pan in eite a dingin bang lametna mu thei ihi hiam? Bang ci bangin i nuntakna ah tangtung sak thei ding ihi hiam?
 _________________________________________________________________________________________________________________

Tua kizop theihna thak in lau na pan in suahtak theihna ci in kigen hi. Sila i cih pen matna athuak te ahi hi. Amah in a topa/a neipa tungah atawntungin lau na tawh nungta hi. Kum bangzah takin, a To a dingin na asep hangin ama thalawhna tungtawn panin phattuamna/ meetna a om dingin a ki ngaihsun ngei kei hi. Zeisu Khris a sangte tungah bel tua bangdan a hi kei hi. A masa in ama lunggulhna tawh kizui in kiphal takin a To a dingin nasem hi. A nihna ah “Itna nei lehang launa omlo” (1 John 4: 18) a cih mah bangin launa kihel lo a To’ na sem ding hi. A thum na ah, Ta taktak bangin ta suahtheihna ngahta ahih manin, man tawh a kituat thei lo gamhluah za a ngah thei te hong hi ta uh hi.

“Saltangte lungsim a lauthawng sak phadeuh te in, amaute thagum hatna tawh biakna thukham te kalhna khempeuh zuihzawh na dingin hanciam na tawh nuntak theihna ahi hi. Abraham thuciamna sungah a ki om ciang bekin lam-etna om thei bek a, tua thuciam na in Zesu Khris sungah Upmuanna hangin Hehpihna tawh a kingah thei bek ahi hi.” - Ellen G. White Comments, Thi SDA Bible Commentary, Vol. 6, p. 1077.

Pasian in Ama ta te a hi dingin a hong pom khin hi cih kician takin i theihtel na dingin bangin hong ki ciansak hiam? (Rom. 8: 16).
________________________________________________________________________________________________________________

I sunglam ah Khasiangtho nasepna hangin Pasian in a ta dingin hong pom ahih zia kitel hi. Tua bangin kalsuan na ah, eima feeling bek tawh kalsuan na in kicing lo a, amah in Pasian Thubu sunga ama muhtawm khawvak tungtawn pan in, a telsiam na tawh kizui in a kalsuan hangin a nuntakna sungah ama theihkhop dingun, a lungsim sungvuah kiphawkna a hong om na tungtawn pan in Pasian tate ahi dingin kipom khin a hih zia uh kithei ding uh hi.

Rom. 8: 17 sungah eite in gamhluah te i hih zia hong gen a, tua in Pasian innkuan sung mi kihi ta a cihna ban ah, tua pan in gamhluah dingte, Pasian ta te i hihna tungtawn panin, i Pa kiang pan in a manpha mahmah gamhluah vante a ngah thei te kihi ta hi. Ahi zongin tua gamhluah theihna pen kilawm kituak ihih manin a ngah theih ihi kei a, eite tang dingin a hong si Zeisu hangin, Ama’ a hong Hehpihna tawh kizui in, Pasian’ hoihna tungtawn pan bek in ahong piang thei bek ahi hi.

Topa tawh bang zah taka kinai na hi hiam? Amah a thei taktak na hiam aw ahih kei leh a thu bek mah a thei? Nangmah ahong piangsak pa leh a hong tankhia pa kiangah kinai takin na kizop theihna dingin na nuntakna ah bang ci bangin ki lamdanna na bawl kul ding ahi hiam? Tua bang a kizopna na neih theihna dingin bangin hong khaktan hiam? Bang hang hiam? 

KIGINNI (FRIDAY) December 1
SINBEH DING: Gupkhiatna a kigeelna sungah, thu-um mite a dingin hih Leitunga mahmah ah haksatna leh sittelna a om lo dingin kigen ngei lo hi. Tua sangin aituam Khris mah bangin ei leh ei kinawl khin in, mite gensiat kosiatna thuak kawm nungzui a suak dingin sapna a ngahte ki hi zaw hi. Tua bangin sittelna leh bawlsiatna te in Khris zia leh tong neih theihna guan a, Pasian mite taktak ahih zia uh kilang khia sak zaw hi. Zeisu’ thuakna te i thuakpihna tungtawn pan in pilna sin i hihna leh kikhalna te hong piangsak a hih manin, a nungciangin midangte tungah a hilh kik thei ding hi zaw hi.” - The SDA Bibel Commentary, Vol. 6, pp. 568, 569.

“Pasian Tokhom tung pan in a hong kaisuk sik khauzang in mun a thuk pen dong a ban dingin sau khop mahmah hi. Khris in mun a thuk pen a om mawhna sungah a suuk pen pa nangawn kai to in, Pasian ta hih theihna leh Khris mahmah tawh gamh a luah khawm thei dingin mun sang dawn ah lamto thei hi.”- Ellen G. White: Testimonies for the Church, Vol. 7. p. 229.

Van mi khempeuhte in a pahtawi uh mikhat in hih Leitungah mihing te ahong makaih theihna dingin, mihingte’ dinmun hihna hong la in, mawhna sungah a puuk khin Vantungmi te leh, mawhna sungah a puuk lo Leitung mundanga om mi khempeuh te theih dingin Pasian in Ama hong panpihna hangin, Ama Thukham deihna tawh kizui lampi ah kitawn thei tek hi cih a theihsak na ding ahi hi. ...

“A hong tatkhiat theihna dingin a kisam khempeuh eite hong Gumkhiapa in hong piaksak zo khin hi. Mi a kuama peuhin Satan kol sungah awk kul nawn lo hi. Khris mahmah a vanglian Huhpa a hi dingin eite mai mahmah ah a hong din sak den ding hi.” Ellen G. White: Selected Messages, Book 1, p. 309.

KIKUP DINGTE:
1. Kiginni sunga Ellen G. White in a gelh thu te lungngai kik in. Tua te in lam-etna hong bang ci neihsak thei hiam? Tua bangin gualzawh theihna dingte i nuntakna ah bang ci ngah thei ding? Zeisu in tampi a hong sepsak hangin, eite in eite a dingin a kilawm dinmun ding a kilawm ciang bang hangin tung thei mahmah lo ihi tam?

2. Kha thu tawh kisai in (Rom. 8: 5), nisim in na nuntakna sungah na ngaihsut theih bang te hi ding hiam? Khasiangtho in bang ahi dingin hong deih hiam? Khasiangtho deihna na nuntakna sungah a khaktan dingin bang thu te en in, sim in, ngaihsun na hi hiam?

3. Ci leh Sa deihna leh Khasiangtho deihna ahi, Kidona Lianpi sungah i kalsuan laitak in, a kaingawi kingah lo a, munkhat zawzaw ah pang ding cih thu a hih manin, i nuntakna ah a thu neu mahmah zong hong hi mai ding hi, tua dinmun ah bang ci bangin na deihteelna in na kha lam dinmun hong khang hong kiam sak thei ding hiam?