FSS ZIRLAI 9: MAWHPUHNAK A UM NAWN LO

ZIRLAI 9: MAWHPUHNAK A UM NAWN LO
 November 25- December 1 

SABAT TLAI LAM: November 25 TUZARH SIAR DING: Rom 8:1-17 

BIBLE CANG KEN: “Curuangah a tu ahcun tisa duhzawngih nung loin thlarau duhzawng ih a nungtu, Khrih Jesuh ah a umtupawl hrangah cun thiam lo conak a um nawn lo”. (Rom 8:1)

ROM 7 ih a phi kha Paul in Rom 8 ah a ngan. Paul in Rom 7 sungah dawnkhamnak, sung zatlaknak le mawhthluknakpawl a sim. Rom 8 ahcun mawhpeknak ai ah Jesuh Khrih thawngin luatnak le nehnak thu a sim. 

Rom 7 ahcun Jesuh Khrih na hnon ahcun tiah a sim ih Rom 7 ih zangfah thlak nun neitu kha nangmah na si tiah Paul in a sim. Sual ih sal na si ruangah tuah ding na duhih na hril mi kha na tuah thei lo. Rom 8 ahcun Khrih Jesuh in sual ihsin luatnak in pek ruangah na duhmi thil tha cu na tuah thei, asinan na taksa duhhiarnak in a lo kham a si. 

Himi luatnak hi Paul in rikham um loih pekmi a si tiah a ti. Pathian fapa Jesuh in hringnun ih a hmannak cu a tuah mi vekih kan pehzom vivo dingah a si. Kan zohthim ding (or) a nun kan cawn dingah le kan ai-awh ih thi dingah a ra. Misual sinak nei in a ra ih (Rom 8:3), Daan thu ih in phutmi dingfelnak kanmah ah famkim ih a um theinak dingah a si (Rom 8:4). Phundang ih sim ahcun Jesuh in sual a neh, cule zumtupawl hrangah daan ih phut mi cu a famkimter. Cumi cu rundam kan si zo ruangah a famkimnak in pek. Daan thlunnak hi ziangtik hmanah rundamnak ding a si dah lo ih, in run thei fawn lo. Himi hi Paul le Luther ih an ken mi thuthangtha a si ih kanmai ken mi thuthangtha khal a si. 

THAWHSAL NI November 26 

JESUH KHRIH AH 

Tu ahcun tisa duhzawng ih nung loin Thlarau duhzawngih nungtu Khrih Jesuh ih a um mipawl hrangah cun thiamlo conak a um nawn lo (Rom 8:1). Thiam lo conak a um nawn lo timi ziangso a si? Ziang thiam lonak so a si. Himihi ziangah so thuthangtha a si thei? 

_________________________________________________________________________________

Paul in, “Jesuh Khrih ah” tiih a ngan mi hi thu tluangtlam a si. Mi zokhal Khrih ah a um timi cu rundamtu Jesuh Khrih, a Bawipa ah a pom tinak a si. Amai duhnak hnakin Jesui thu kha a thinlung zaten a rinsan ih thuthen felnak a tuah zo. A phi suak mi cu Jesuh thawn pumkhat an si zo. 

Jesuh sungah timi hi tisa sinak thawn kan zohthim ahcun Rom 7 sung hmuahhmuah ih kan sim rero zo mi a si ih, Paul in zokhal Jesui hnenah pumpekaw in zumnak a neih hlan ahcun sual ih sal a si. Thi dingih dantatnak tangah a um (Rom 7:11,13,24). Sual daan a thlun (Rom 7:23,25). Hivek hi zangfakza dinhmun ih dingmi an si (Rom 7:24). 

Asinan Jesui hnenih a pekawk ahcun hmakhatte ah Pathian thawn umtlang theinak dinhmunah a thlenpi. A hlanah daan buar thiamloco mi kha tu ahcun Pathian hmuhah mi famkim a si. Cule sualnak tuah lo dinhmun ah a um sal ih, Jesui dingfel thianghlimnak ih thuamh mi a rak si. Thiamlocoter a si nawn lo. Kumkhaw nunnak ngahtlak sual nei lo a si zo. Ziangahtile Jesui nun famkim kha amai nun famkimnak ah retsak a si. Cumi a co ngahtui hrangah thiam lo conak a um nawn lo. 

Asinan, hi hmuah in thuthangtha hi a famkim hrih lo. Sual sal ihsin luattertu ziangso a si? (Rom 8:2) Jesuh in milai rundamnak ih khawkhan mi “Thlarau lam daan in sualnak le thihnak daan” thawn zohthim sehla, Rom 7 ih a nganmi sual daan ih a ukmi ih cemnetnak cu thihnak a si. Khrih ih daan in nunnak le luatnak a thlenpi. 

Pathian hnenah pumpek a duh lotupawl hmuahhmuah cu huham nei mi a dangih thununnakih ukmi an si. Amai ta a si ve lo. Zalennak thu a sim ve ko nan amah kha hmuhsuam mi sal a si ringring. Amai thuthen catnak vekih a um ruangah porhaw zet hman sehla thimnak lal thuhnuai ih kuntu a si. Jesuh kha sual salih temtawnnak cikcinpawl a botcat theh tu asi. E.G. White, The Desire of Ages, p. 466. 

Sal na si maw? Khrih ah miluat so na si? Ziangtin so fiangten na theisuak aw thei ding? 

TLAWNGKAI NIKHAT November 27 

DAAN IH A TUAH THEI LO MI 

Raithawinak daan le thukhaam (10) pawl hi an tha theh. Ziangtluk ih an that hmanah kan hrangih a tulbik mi in tuahsak thei lo. Rundam tul kan sinak lawng in sim thei. Sual in a thlenpi mi thiamlo coternak le thihnak ihsin luat thei dingah Jesuh kan tulzia in simtu lawng a si.

Rom 8:3-4 siar aw. Kanmai tuah thei lo mi daan kha Khrih in ziangtin so a tuah? Pathian in sual taksa pu in misual ah a fapa a run thlah ih rundamnak a tuah. Tisa ih a um mi sualnak kha thiamlo a canter zo. Khrih ih hringnun a hmannak kha rundam khawkhannak ah a thupi zet. Cross kha cawisan a phu taktak. Ziangahtile rundamnak ih khawkhanmi a tuahsuaknak a si. Misual dinhmun ih Khrih a dinnak hi a thupi zet a si.

Pathian in Khrih a run thlahnak san cu daan ih in fial mi dingfel thianghlimnak kan thlen theinak ding in tuahsak. Daan in thil tha tuah dingah in fial. Rom 6:14 ih a simmi daan hnuai ih a um mi hrangah cun a cang thei lo mi thil kha Khrih sung ihsin cun tuah thei theh mi a si.

Kan thei dingmi cu, dan ih a fialmi tuahnak hi rundam ngahnak dingah a si lo. Rundamnak kha mit ih hmuh theimi a si lo. A sullam cu tluangtlamte ih nunnak in tuah theinak Pathian in in pek. Cucu zawnlung ih thu thlun theinak nun in neither. Kan tisa hiarnak le kan duhthusampawl tla Cross ah khenbet a si zo (Gal. 5:24 NKJV). Cuih hnuah Khrih ih nun mawi cu kan nunah a langter a si.

Rom 8:4 ih a sim mi vek cun “Mah rori ih” tuahnak a si. Tisa timi ih a langter mi cu tuahtharnak ngah hrihlomi, tisa duhnak a si. Tisa duhnak hi zumnak hlanah a um zo a si. Kan pianthar hnu khalah a um thotho. Tisa duhnak thlun ih feh timi cu tanghmasialnak ih thunun mi tinak a si.

Thlarau hruainak thlun timi cu daan ih fialmi tuah famkimnak dingah a si. Himi hi Thlarau Thianghlim bomnak lawngin tuah famkim a theih a si. Jesuh Khrih nun neih lawngah daan ih in fialmi zalen zetih tuah theinak a um. Khrih thawn thenawknak ahcun zianghman kan tuah thei lo. Sual salah tuhlutaw tui hrangah cun thiltha tuah dingin duhhril theinak a nei lo (Rom 7:15,18).

Ziangtluk ih tha in so Daan na thlun. Daan ruangih rundam ngah ding kha ret tha ta hrih sehla, daan ih dingfel thianghlimnak hmuahhmuah lakah pakhat tal na nunin a tuah famkim thei mi a um maw? Ziangruangah so a si. Na nunziaza ih na hmanmi ah ziangvekin so famkim lonak na ngaithiam thei?

TLAWNGKAI NIHNIH November 28 
TISA LAMAH (OR) THLARAU LAMAH 
Tisa lam duhzawngih a nungtu cun tisa lam thil an ruat. Thlarau duhzawngih a nungtupawl cun Thlarau lam thil an ruat. Tisa duhnak thlun cu thihnak a si. Thlarau duhnak thlun cu nunnak le hnangam daihnak a si (Rom 8:5,6). Thucah hrampi ziangih sinso an rat? Na nunih na zawhmi lamzin ziang a lo sim? 

Hitawk ih “Cuhnu ah” timi an theihthiamdan cu “cuti vekin” ti a si. Grik tongin “Kata” ti a si. Hi hmunah “thinlung” (Mind) ih a sullam cu, thin bang lung retheihnak a sim duh. Mibur pakhat cu tisa ih a duh thusam mi famkim dingin lung retheihnak an nei. A dang cun thlarau lam thil an ruat. A parih thu neitu kha an thlun dingmi a si ko. Thinlung ih ruahmi kha tuahnak ah a lang. Himi pahnih an nunih an cangvaihdan an danglamaw zet.

Tisa lam thil a ruat mipawl ih a do thei lo mi ziangso a si (Rom 8:7,8). Taksa duhnak famkimter ding an ruah tikah Pathian dodalnak an langter ringring a si. Pathian 101 102 duhmi tuah ding a ruat lotupawl an si. Anmah cun Pathian kha langhngan in an do ih raltha zetin daan an buar.

Paul in Khrih thawn nan thenawk ahcun Pathian daan thlun theinak a um lo timi a langter duhmi a si. Paul in a tumtah mi kha a simsal ih, ziangvek harsatnak khalah zuam rero ding a si. Bawi Khrih thawn thenawtupawl cun Pathian dan an thlun thei lo. Paul ih a sim duhmi cu Judah-pawl in “Torah” daan an neih mi hnakih an tul sawnmi kha theithiamdingah a forhnak a si. Tuahnak ih an langter mi cu Pathian in a simfiang ko nan, Zentail-pawl vekin sualnak an tuah thotho (Rom 2). Himi zirlai in runtu Messiah an tul theh ti a langter. Jesuh tel lo cun sual sal an si ih, a uknak tang ihsin an luat thei lo.

Ziangahso thlung hlun tuahdan hi rundamnak hrangah a famkim in Pathian in a pek lo timi Judah-pawl ih an theihthiam lo mi a simfiangnak a si. Paul in Messiah kha nan pom tik lawngah thil tha hmuahhmuah nan tuah thei ding a si tiah a ti.

A liamcia mi nazi 24 sung kha zoh kirsal aw. Thlarau hruainak maw, tisa hruainak so na thlun? Tisa lamih na feh ahcun thlengawk na tulmi ziangso um? Ziangtin so na tuah thei ding?

TLAWNGKAI NITHUM November 29 
NA SUNGAH A UM MI KHRIH
Paul in a tumtah mi thupipawl a sim vivo ih, milai in ziangvek ih an nun khalle a cang thei mi thil pahnih an ton dingmi a tahthim. Milai sualfa sinak le lei tisa hiarnak sungih um dingah (or) Pathian in thlarau pek dingih thu in rak kam zo ruangah thlarau lamah nung ding kan si. Pakhat sawn cu nunnak lamah in hruai ih, a dang pakhat cun kumkhaw thihnak ah in hruai. Hitei pahnih ah tannak lam nei loih um a theih lo. Jesui a simmi cu “Ka hnenih a tang lotu cu I dodaltu a si, I finkhawmpi lotu cu a thekdarhtu a si” (Matt. 12:30). A dum a silole a rang a si tengteng a tul. A karlak a lai ih um a theih lo.

Rom 8:9-14 siar aw. Jesuh ah apawk pumhlumtui hnenah ziang thukam so a pek? Tisa duhnak ih nun le thlarau duhnak ih nun tahthimnak a si. Thlarau duh vekih nun timi cu Pathian pekmi thlarau ih ukmi tinak a si. Himi cang ahcun Khrih ih Thlarau tiah a hmang. Kan theihthiam ding mi cun Khrih ai-awh ih in umpitu tinak a si. Amai ruangin zumtui hnenah Khrih in a umpit (Rom 8:9,10).

Himi cangah Paul in Rom 6:1-11 sungih a umzia lang dingin a simsal. A umzia a langter mi cu, sual rawngbawlih hloral dingmi kan taksa kha sual tisa le sualnak ih a khatmi a si ih Baptisma a co tikah cun sual rawngbawltu a nun hlun taksa kha thinglamtah ah khenbet a si (Rom 6:6), a thi mi kha tihnimnak ah vuiliam a si. Baptisma nak kha vuiliamnak lawng a si lo ih, thawhsalnak tla a tel. Cui tihnimnak ihsin a thosal mi cu nunthar neitu a si. Mi hlun keimah timi thihternak a si ih, duhhrilnak nitin in a tu le a tu kanmah tei tuah ringring dingmi a si. Cumi ah Pathian in milai zalennak siatbal in khuahkhirhnak a hmang lo. Sual tuah thei dinhmun ah kan ding ringring. Paul in Kol. 3:5 ah “nan sungih hna a tauntu pumsa duhnak kha that uh” tiah a ti.

Kan pianthar hnu khalah sualnak do ih buai ding a um ringring lai a si. A danglam mi cu Pathian thlarau ih in cencilh ruangah kha mi kha vanlam nehnak huham in a luahkhat. Kan sim bet asile, an Bawipa kha sual sal ihsin mak zetih a luatmi a si ih, daan buarin suahsual rawng a bawl duh nawn lo.

Jesuh kha thihnak in a thotersaltu Pathian thlarau kha kan hnenih in cencilh dingah in pekmi a si. Kha mi thiltitheinak kha kan ta a si timi ruat aw. Kan tontaihnak ihsin a tumtahmi vekin ziangtin so kan nung thei ding?

TLAWNGKAI NILI November 30 
THLARAU IH FACAWM
Khrih thawn a tharte ih pehzomawknak Paul in ziangvek in so a sim? (Rom 8:15). Kan hrangah thukam in pekmi ihsin ruahsannak ziangso kan neih? Ziangtin so kan nunah a taktak ih kan nunpi thei ding? 

A tharte ih pehzomawknak a langter mi ah tihphannak ihsin luatnak a si. Sal timi cu khuahkhirh mi a si. A pu kha a tih ringring. A pu hrangih an tuan mi ah ngahmi zianghman an nei lo.

Jesuh a pomtu cu cuvek an si ve lo. A hmaisa ih cangvaihnak cu mai duhhrilnak ih tuah a si. A voi hnihnak ahcun thinphannak um loih duhdawtnak hnatuannak a si (1 John 4:18). A voi thumnak cu fa hrawn sinak a si. Ro cotu ah a cang. Khuahkhirh mi thlarau cun sakhuanak daan vekin nunnak an hawl. Daan thlun famkim an duhih anmai thazang suahin an tang. Jesuh kan zum ruangih kan ngahmi zangfahnak, Abraham hnenih a thukam mi bangin ruahsannak kan ngah thei. E.G. White comments, The SDA Bible Commentary vol. 6. P. 1077.

Pathian in fatak ih in pomnak ziangtin so theihfiangnak in pek? (Rom 8:16). Fatak sinak cohlannak cu kan sungah thlarau thianghlim in tetti a khannak ihsin a nemhnget. Kan ruahnak ah himnak a um lo. Pathian thu an theihmi tleunak an ngahmi vekih nunpitu hi a thabik. A theihmi thu cu thinlung sungih a dik rori ti ih simtu an nei ih cumi ihsin Pathian falepawl ih an pom theinak a si.

Rom 8:17 ah, ro cotu ka si tiah a sim. Vanlam Pathian sungkua ah kan tel ih, fatak ro cotu kan si. Kan pa ih ro sunglawi congahtu kan si. Kan hlawhsuahmi a si lo. Pathian hmai ah dinhmun thar in neither ih, nun ze famkim pek kan si. A zangfahnak thawngin cotlak ih in tuah ruangah kan ngahmi a si. Cumi tla kan ai-awh in Jesui in thihsaknak ruangah kan co mi a si.

Bawipa thawn ziangtluk in nan nai aw? Amai thuhla le amah rori na thei ngaingai maw? Nangmah lo sersiamtu le lo rundamtu Pathian kut kai ih lengtlang thei dingin nun thleng ding ziangso na neih?

TLAWNGKAI NINGA December 1 
RUAHBET DING: Pathian uknak thu ah zumtupawl hrangih rundam khawkhannak ah harsatnak le hremnak ihsin luatnak dingih thu a peknak a um lo. Jesuh in amah thluntupawl kha an nunnak phatsanih amai lamzin thlun dingin a ko. Khavek harsatnak le hremnak lak ihsin Jesui nun ziaza kha a mipawl in langter sal dingah a si. …… Jesui tuarnak sung ihsin a ralai dingmi canih sunloihnak midang hnenah sim le phuang dingin dan tuahsak mi le zirhmi kan si. The SDA Bible Commentary, vol. 6. Pp. 568,569.

Pathian Bawi tohkham ihsin a rung tlami thir cikcin cu a thukbik hmun tiang a thleng thei. Khrih in lak tlak lo misual kha a cawisang sal. Pathian fa si thei saldingah a sar suak. Khrih thawn kumkhaw nunnak ro cotu an si. E.G. White, Testimonies for the Church Vol. 7. P. 229.

Van khawlipi ih ummi hmuahhmuah in an sunloih mi kha milaipawl hruaitu an hotubik si dingah leitlun ah hringnun a hmang. Sualah a tlu mi vancung mi le a tlu ve lomi leilungpawl an sim ve mi cu Pathian bomnak thawng lawngin mi hmuahhmuah in Pathian daan thlun theinak zin an zawh thei ding….

In tlennak man cu runtu Bawi in a pek theh zo. Setan salah pekaw ding a tul nawn lo, thiltitheinak huham hmuahhmuah thawn in bawm theitu Khrih kha kan hmaiah a ding ringring. E.G. White, Selected Messages Book. 1. Page. 309.

RELTLANG DING: 
1.Tlawngkai ninga zirlai ih E.G. White canganmi kha siar salaw. Kan hrangah kha mipawl ihsin ruahsannak ziangso kan ngah thei ding? A thupi sawn mi cu kanmai nunah himi thukamnak in nehnak taktak ziangtin so in pe thei ding? Jesui ruangah tampi kan nei, kan tuah thei dingmi tuah thei lo dingah kan um ih kan kilhim theiaw pei maw? Ziangruangah so a si? 

2. Nitin ten na thinlung ih na ruahmi ziangpawl so an si? Thlarau ih hruainak vekin na um maw? (Rom 8:5 RSV). Hihi a sim duhmi ziangso a si? Na mitin ziangso na zoh? Ca na siar mipawl na thinlungih na ruah mipawl, na nun sungah ngah thei lo dingih a lo tuahtu ziangso a si? 

3. Do-awknak mak ah kan dingih, himi pomdan hi tampi in kan neih a tul. A karlakah um a theih lo, fiangfel zetin ziangpawl so a langter? Thil tenau tiang kanmai duhhrilnak ih kan tuahmi a si ih, himi thutak sunglawi in kanmah ah man a neih theinak dingah ziangtluk in so kan theihfiang a tul?