Zomi Christiante leh Ethics
Thumasa:
Bangzahta in Pasian thu-ah ihpicing khinphialzongin Leitungah mihing a khuasa’ ihihmanin septuak leh septuaklo nisimin nasepna, khualzinna, leh innsungpan in website nangawn panin ihsem khazel hi.
Hih article tomsung ah kagen nopthu pipen ahihleh, “Thu-um midik tak” “authentic Christian” ahi phial zongin ihngeina [culture& custom] ihgamtatna te-ah hong ukzo lai mahmah hi cih ka gennopna hizaw hi. Akitel baihdingin Zomi ahilo namdang, “Thu-um diktak” “authentic Christian” te tawh zong etkak ding ka uthi.
Laisiangtho leh Ngeina tawhkizui gamtatna [Bible and Culture in ethics]
Laisiangtho sungah gamtat hoih zuihdingin Pasian in Moses tungpan’ “thukham namsawm” pia hi. Tua nahoih sepdingte in midangtetunga, sepdingbek hilo in Pasian tungah nahoih sepziading tezong ahi hi. Laisiangtho cihbang zuizo denleng ahoih pen hi a, kisemzolo bekthamlo in ihzat ngeina [cultures] leh Laisiangtho thukham [commandment] te akituah lohciang eideihdan in kideihkaih khazel hi. Tua ahihmanin thu-um mikhatin Laisiangtho [bu 66] sunga Pasian kammalte amun leh ahunzui-in bangci zatdingcih’ theologian leh scholar tebuai pihpen khat a hihi. Tuahkhakthu [case study] tawh akitel theipending in ensuk ni.
Tuahkhakthu ihgen ma-in kitelkhialhna apiangsakte tawmkhat enpak ni. Europe leh America gampan in Asia, Africa, leh Latin America gamte ah gamkeek [colonization] in hongpai hunsungun Europe gampan mahin gammialnasemte [missionary] zong tuagamte ah Pasian nasemding hongtung uha ngeina kibanglo leh biakna kibanglo paukibanglo ahihman in alawhcin nasangun khatlehkhat kitelkhialh na kibuaipihzaw uhhi. Summeek bawlna lianpi [capitalism] leh gamkeekna [colonialism] hongtonkhop ciang’ AD 1200+ kipanin ki langpan na nisuah na leh nitumna, sakleh khangah kihuatna meima pawn lianpi om hi. Tua ahihman in Pasian nasemding mikhatin agam mite tawh kilemna abawlphot keileh lawhcinglo hi.
Gammial nasem [missionary] te
Ih lamkiat/piankhiatna munbekah omin apualam pankhual zinmi honghawh keileh ngeina kibanglo buaina [cultural conflict] omlo ding ahi hi. Ahizongin tu’ kumzalom 21 ciangin ngeina kibanglo minamtampi vengleh pam in ihkineih ciang leh khualzinna tuamtuam ah ihmuhkhak ciangin ahoih tampi a ombangin ahoihlo zongtampitak mah kimu hi. American professor khat Asia gam aa missionary hongsepna pan atuahkhak thute uh tawm enpak ni.
Professor Robert leh Dean Wong
American missionary professor, Robert in, Asian University khat ahi’ China gam ah laihilh dingin kisam ah amahzong uhmahmah ahihman in vasem hi. Asang vua thunei pen Dean Wong tawh thupiangkhat ihgen nuam hi. Dean Wong leh Admission office te in sangnau pang alakte uh damdam in akumkum in qualification kiamsemsem a, kum 3 naciangin professor Robert in HR office, Admission office tetungah laigelh inpiasak hi. Alaigelhna ah, “sangnaupangte a quality uh kiamsemsem hi. Banghang hiamcih leh, mihau teta leh miliante tate apilna uncin takei leh admission pia ihihmanin hih policy bawlphat huai hi” cih atomin alaisungah gelh hi. Athu sau taleh atom in genpak leng’ hihbuai na hangin Dean Wong tua University pan in nasep tawp hi. Western leh Asia te kimakaih zia leadership leh gamtat, ethics, thupi ihsakdan izatdan te akibang loh hang ahi hi.
Hih akibanglo, ‘hierarchical structure’ – zalian zaneu tawhkizui-a makaih zia leh, ‘egalitarian structure’ – aneu alian omlo in policy bang asep ciatciatna genteh na in Asia gamte ah President leh sangnau pangkhat thuneihna [power& authority] pen kitehkak thei lo hi. President cihbangbang, hoih leh hoih keileh sangnau pangten’ zui hi. Hihpen Hierarchical structure tawhkima kaihna hi a, Western gamlam te ahih leh President pa’cih adeih keileh sangnau pangkhatin nialtheih na leh complain theihna, egalitarian structure liangko kikim a ki-uk na ahihman in akibanglo ngeina [culture] nih hongkitukalh kha ahihi.
Ruth Benedict, anthropologist in, shame and guilt culture cih zumna leh mawhna ngeina kammal Japan gamsung azinna pan hongmu khia hi. Professor Robert leh Dean Wong te gamtat zia enleng anih un aman, adik, tuak ahi uh hi. Asian University akisepzawh nadingin mipil mihau ten fund pia uh a tuate’ tuleh tate admission piakei le-uh fund[sum] ngahlo ding in tuami tezong hamphatna ngahkha lo ding hi. Hihpen policy tawhkituak hi’ acih loh hangun Asia gamsung atawmzaw in hihman in nasem ahi hi. Robert in mailam saupi leh a University ii quality hoihsemsem nang ahanciam nuam hi a, amahzong khial tuanlo hi. Western leh Asian ngeina kibanglo tampi om a, gentehna in Asia [Kawlgam] sungte ah guksa, khemsa leh thuman lotawh hamphatna ngahpen serious tak in kila lo a, guksa tawh mizawng tebang ahuh nuam mite ihi bilbel hi. Western te adingin zuaukhem, thuman lo asep sangin mikhat thuman natawh thahding uh olsazaw taleuleu uh hi.
Indonesia aa missionary te
Kum 37 apha [Diduk] Christian innsungpan akhangkhia khat in Christian ahilo pan akhangkhia khat, [Mimi] zi in nei hi. Nisimphial in azi vuaden ahihman in acibang dupkeeita hi. Ateeknu[Diduk] nu in mukha a akiimvua Christian missionary innkuante kiangah huhna ngenhi. Huh angetna ahangpen, amo nu [Mimi] mundang ah apasal omloh kalin taikhiasak nuam hi, banghang hiamcih leh hehpih huai sa hi. Tua missionary innkuan te huh nuam napi’n angeina uh [Indonesia] atheih ciang lunghiang mahmah hi. Khatna ah taisim leh tua khuasungah cik mah hun in ciahkik thei nawnlo leh a khuasungpan un amin lakhia ding uh a abeh aphungtawh zong akizom nawnlo mi-inzong simnawn loding uh ahihman in haksa sa mahmah hi. Missionary innkuan te in numei nu apasal vuakna pan honnuam mahmah napin ngeina apalsatding te angaih sutciang un bangmah semngam pak lo uh hi.
Atawpna ciang missionary te innkuan in akikhen theih nading un lawyer kawmsak in kumpi theih pihdingin kikhen na thukimna bawlsak hi. Azi vuavua mah leh apasal in kikhennang abawlsak missionary pa tungah ahehna tungsak in asun azan in bawlsiat sawm zelzel hi. Christian innkuan pan akhangkhia khat ii zi [Christian lo] pen bawlsia in a Christian lo nu/te gamtat hoihzaw hongsuak hi.
Zomi Christian leh Gamtatna (Ethics)
Bachelor Degree kasin lai-in ka lecturerkhat uh classmate khatin dotna donga, “Naupaai nupi khat suaktheilo in ki operate keileh anau si ding a, ki operate leh anau hingin’ anu siding hi” tua ahih man in Christian ten bangcih khensat ding ihiam? Ci hi. Mikang missionary innkuan khat Papua New Guinea ah vakuan uh a, innkuan zatding van leh mission nasepna ding vantampi agam pan un Tembaw [ship] tawhkhak uh hi. Avante hongtungta hi cih azakciangun office ah athoh dingin vapai uh a, ka vante uh hongtungta hiam? Acih leh tungmah hi ci uha ahizong piakhia nuam lo uh hi. Amau zong lamdang sa uh a, khuasung a innveng thu-um mite khat tawh office vapai dingin zawn hi. Tua a innvengpa kiangah athu teng agen leh, ‘ha ha ha’ sum themkhat lotle cin olnotak hongpia ding uh hi ci hi. Tualeh bangsum maw acih leh, huaukawm sa in, ‘golhguukdan e’ [bribe] ci in a mikang te tuabang gamtat thei ngeilo ahihciang vua pia nuam lo uh hi. Akhak manlah hilo, atungsa piakkhiatna ding sumtawh mai-etding peuhmah hithei lo hi ci in alupei sa in ciah hi.
Tua mikangte ngeina [custom] ah hihbang omngeilo-a a sponsor tezonglah tua aitang ding sum pia lo uh ahihmanin golhguuk insum kapia hi cileh a sponsor te umlo sawnsawn ding cih atheih ciangun avante thoh lo in mission nasepna akisamte zong a omthei bangbangin sem hi. Southern Chin tekhat, Boston ah Sangka kah lai in huhna hong ngena Catholic Charity Office ah azi sapvai ding translate sak ding ahi hi. Kenzong vazui pah in ama genbangbang English tawh kagensaka ahizongin azi asapding kipatcillai a agenteleh a thumveina kapaiciang vua agente hongkibang phanawnlo ahihman in, lawyer khatin athugente umlo ahihman in tudong samthei lo hi.
Transzominational cih term kalungsim ah hongsuak hi. Ahangpen Sanggam zomite Mikang gamte ah citizen suak tampi ki-omta a ahizongin pianna Zogam tawh nisimphialin email, phone, leh facebook tetawh kizomden ahihman in trans-zomi cih kammal, Peggy Levitt muhna, “Transnational Villagers” tawh hongkibang hi. Tuabek lo-in Levitt kum nihdektak sung Miraflorenos, Dominica Republic ah research abawlna tawh ei Zomi te tulaktak khuasak zia kibang kasa mahmah hi. Miraflores khuaneu khata om mite in’ Bostonte’ puansilh style dan, innsung vanzatte akipan kibangsak uh hi. Ahizongin Miraflorenos mite adingin apeemna bulpi uh, Boston pen tai[mile] 1000 khawngbek hi a ei Zomite sangin bel naizaw tham hi.
Zomi tezong US lampan in innlam innkuan pihtekiang ahawh/ciah omzelzel ta ihihman in leh, ihsum naakpi pen US leh gamthumna lamvive ahihman in Transzomi cilengzong kikhialnawnlo ding hita hi. Miraflore tezong Boston pan sumlut vive tungah kinga ahihman un US te ii gamvai [politic] leh biakna [religion] te tungah zong damdam inkinga ta uh hi. Bang hang hiam cihle amau gam sunga om pilsinna sang [school] tualkhantohna [community development] ading sum khempeuh zong US gampan hongpai ahihman in US gamsung a amipih te uh cihbangbang in Miraflore ah politic hita leh biakna lam hitaleh thukhensat ta uh hi.
Peemta teleh Namdangte
USA gam pen Immigration country kici hi. Gamtuamtuam pan peemta teteenkhopna, innteek omtuanlo cihna hi. Tuapeemtate ciahkiknawn loin atengsuak te cihna zong ahi hi. Portugal te leuleu ahihleh kum zalom 13 akipan muntuamtuam ah sumzong paizongin nazin uh a, angah uhsumte inn leh lopuahna dingin a gamuh khakngekngek uh in amite mahmah zong hunkhatciang ciah kik uh hi. Tuciangciang USA gama tungkhin peemtate, Europe, Asia, Africa leh Latin America te aciahkik tamlo hi. Tua telak ah Zomitezong kikhel tahi. Tua hi a ngeina kibanglo tampite lak leh zuihleh dankibanglote omkhopna ahihman in ngeina kigawm, multicultural ih ut a utta keizongin asuak ta hihang. Gentehna in: nung March 2017 sung Haka lamte Tangval khat Georgia pan Indianapolis a, akitheih pih nungak khat midang te Mopawi [wedding] khatpan kimuthei uh a, (amau pen online pankingai] Georgia State ah taipih [eloping] sawm in a numei utpak lo-in mawtaw sungpan akinial lam uh’ US police ten athu uhzakha uh a, hihpa in [rape] buansawm hici in criminal case tawh man uh hi. Zogam [custom] ngeina hileh atuamkhat hidinga ahizongin US leitang himawk ahihman in US te lawzuih pihkul hi. Filipino numei nokhat US ah vazin in atunphet in inntekteen khan [room] sungkhatah anekding leh adawnding koihsak in nikhat/nih sung amahkia koih uh hi. US innkuan te muhna ah khualzin tawltawh suaktatak in amah utut in tawlnga hen cihna hi a, Filipino nu adingin ahihleh hongzindo danuh aw ee, abangciliang ahiam? Thusiam keisi uh ee kalungleeng lua hi’ ci in innlam gen hi ci hi. Muhna gamtatna, manpha ihsakna, leh biakna paiziate hongkibat lohciang tuakawm kaalah eimau upnabek mah, hoih ihsakbekmah, ihgamtatzia bekmah te lensuak ding maw ahihkei leh minamdangte atawh gawmkhawmdingin mikimtawh kilem ding cihte mipil te’ buaipih thukhat ahihi.
Minamdang tetawh omkhoptheih kipawlkhawmtheih ahiciangkhat thupi himah leh thu-umte adingin tua ihgamtatte Pasian leh akammal Laisiangtho tawhkituak hiam? Cih thupizawlai hi. Tuamuntak ah anthropology leh missiology te tampi honghawm sawnthei hi. Thu-um mite adingin alauhuai pilvangna dingin syncretism kici, Pasian thugil leh mihingngeina tegawmkhawm mangin atawpna ah Pasian thusang mihingngeina zawhsakna ahi hi. US ah ihom ciang hibangthu te theih huai kasa hi. Tuaban ah Pasian in mawhna neuleh mawhna lian Laisiangtho sungah akhensitset loh hangin, zuaulian leh zuauneu bel omleh kilawm hi. Abraham in Sarah kasang gamhi acihpen dikkhinlo ahihman in zuauneu kicithei hi. Banghang hiam cihleh Abraham intua azuau nahangin nahoih piangsakzaw dingcih mukhol hi. Ahizongin Jacob in apa Isaac akhempen Esau ii thuphadeih gawhin tua hileh innnuam lonuam ah tengin nuntakna nuamsa dinghi ing, ci a Esau adingin aneksak ahiban ah khemna tawh thupha angahsawm ahihi. Tualai-a maungeina [custom] in mawhsaklo phial himah leh tuni ciang hihthu kigenlai hi.
Ama thupha leh Ama deihna olnotak in kigawmthei ding hiam? Zogam a Lampi leh Leibawlnang sumte khatleh nih hamphatna pen ahamphakha ten Ama deihna cithei ding maw? Jacob zuaugen Pasian deihna ahidiam?
Thukhupna
Hihbang hun khangto sungah ngeina kician, upna kician kiplet kawmsa in gamtat hoihlo, ngeina hoihlo telak ah Pasian deihna tawh kituak gamtatzia ihzuih zawh nadingin Zogam a omte sangin gamdang a-omte adingin vailian pikhat himawk hi. Nung lehmai ngaihsun kawmsa in leh Pasian khahsuah lo-a khuasak zawh nangin ihvek pitungah Topa in thupha hongpia ta hen!
Khazih sungah,
Pau Do Lian
Study Ph.D. Intercultural Studies
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.