Zo Phualva Thupuak Vol 07: Issue 18: LUNGKIMNA KICING ZEISU’ KHEPHUNG AH

By. Evangelist Lalthlamuana ( Pu Patea)

A piang bang bang ka lungkim na dingin a kisin khinsa ka hih manin, gilkialna , gilvahna, zawnna leh hauhna omzia namkimah lungkinna thusim ka sin zo hi. Keimah thahatna hongpia pa tungtawnin na khempeuh ka hih thei hi. Phillippians 4: 11-13. 

Khat veilai in kumpipa in a huan sungah vak in a singkung leh paak kungsuante en kawikawi hi. Amah in kumpi inn gei ah a mah lungnuam sak ding singkung khat suan dingin a zong a hi hi. A huan sung a singkung suante a vek un thupi mah leh, amau dinmun ciat ah a lungkim zo lo bek bek na hi phial uh hi. Oak ( Kuangkuah) sing in a hih leh, tak sing kung bang in sang hi leng ka lungkim pan ding hi cih thu kumpipa na hilh hi. Tak sing kung in a hih leh lenggah kung bang in a khum mah mah gah leng ka lungkim pan ding hi na ci lai sawn sawn hi. Lenggah kung ta leu leu in, ei khe a zong ding tang zo lo, miangte huhna tawh a mau tung a luai den zong ka lungkim zo mah mah kei na ci lai lai hi. Paak kung khat a pak hoih mah mah in a hih leh singgai kung bangin ka pak namtui mah mah leh ut ingh ci in na thumthum lai hi.

Tua bang in kumpipa huan sunga singkung khempeuh in a mau dinmun ciat a lungkim lohna uh a theih ciangin kumpipa zong hong lungkham mah mah hi. A tawpna ah Phuitong kung in “Ki bel sing kung dangte sangin niamzaw in ka pak zong hoih zaw kei mah, ka lungkim lohna gen ding hi leng singkung dangte sangin gen ding zong hau kha phial mah ning, a, hih hangin tu lai tak a ka dinmun pen ka lungkim mah mah hi”, ci hi. Kumpipa in zong kei hong lungkim sak zo ding hih phuitong bek om hi ci in, tua phuitong kung no bot khia in kumpipa a lungdam sak ding in inn gei ah suan hi. Eite ih tenna hih leitung a nuam sak lo penpen in bang hiam cih leh “lungkim zawhlohna” ahi hi.

BBC, CNN te ih et ciangin leitung mun tuam tuam ah lungphona ki nei kawikawi in, mi tampi thong sung tung, mi khuttum thuak in pawlkhat in a nuntakna uh tanlawh uh hi. Tua a hih manin ih tenna leitung pen mi a lungkim theilo te hangin gal leh sa mun hong suak ta hi. Tua mah bangin pawlpi sung ah zong phun ding bek bek zong zong , mi khialhna bek bek ih

zon ciangin pawlpi sung zong nuam thei lo hi. Tua bang pawlpi ah Kha Siangtho in nasem thei lo hi. Innkuan sung ah zong, nupi te zing thawh a kipan in midangte gensiat ih kipat pah leh innkuan nopna zong om thei lo hi. Innkuan ah zong Kha Siangtho in nasem thei lo hi. tua bek thamlo in, a zite tung lungkim zawh lohna hangin meigong leh tagah piangin, pasal tung a lungkim zawhlohna hang in angkawmna zong hong tam semsem ta hi.

Mi pawlkhatte in a hih leh ih neihsa tung ah lungkim lo ih hih manin golguknekna hong khang semsem a, tua hangin hau semsem mah leh a huaihamna uh khang semsem mawk hi. Tua huaihamna in tuma a mi lungdam thei khat hih na panin, mi lungkham thei mahmah khat hong suah hi. Nasep thanuamna leh phatuamngaihna in thupi mahmah hi. A hih hangin tua te pen huaihamna tawh a ki zop khak leh manthanna ah hong lutpih hi. Huaihamna leh phatuamngaihna pen a tawntung in tonkhawm den a, tua phatuamngaihna in huaihamna ah hong tunpih thei hi.

Hih lungkim zawhlohna pen bang ci bangin do ding cih ih theih kei leh ih mailamhun ding lungkham huai mah mah ding hi. Eite khempeuh ii lungsim sung ah inndei hawm khat om hi. Hih a mun awng pen leitung nate in dimsak zo ngei lo hi. Tua munawng khan min pen “Lungkim lohna” a hi hi. Gentehna in, innkuan khat in vengte bang in TV ong deih hi.  Tua a dingin nasep hahkat in hong thalawh zo a, tua TV hong lei khit ciangin a banban in fridge, puansawp set, bike, mawtaw cih bangin lungkim cih omlo in hong ban pai pai thei hi.

Topa Zeisu in thungetna hong sin sak na ah, nisim kha kham khop dinguh an hong pia in ci in hong hilh hi. Tua hi leh innkuan in nisim a ih kham khop lian lian ding bek nekding nei mawk leng ih lungkim zo diam? Pasian in a hih leh “Pasian gam leh Ama dikna zong masa un,tua hih leh a dang na kisapte uh kong piakthuah ding hi” a cih pen mi pawlkhat in a gam leh a dikna sangin a hongpiak thuah dingte (laihpuai) na buaipih mawk hi hang. Tua a hih manin, eite kha nuntakna in na thuak mah mah hi.

Solomon in atenna kumpi inn pen kum 13 sung in lam hi. Lebanon mual tung a nasem ding a a cial mi pen 300,00 pha a, a gam sung a nasem ding in mi 150,000 val in sem den hi. A vanpua dingin nisim in mi 70,000 bang zang den a, suang a sek ding in mi 80,000 cial a, tuate a makai pen mi 3300 bang om hi. Kham (gold ) hau mahmah a, mi dangte piak bek zong talent 666 bang pha hi. Tua khamte tawh kidalna lum (shield) a lian 300, a neu 300 bang bawl in tuate pen a huan buk sung ah koih hi. Saiha pen haulua in, kumpi tutphah in bawl a, a haite khempeuh khai bekbek hi a, sumngo a hih leh haulua kisa suang bang in zangh hi. Kumpi innsung a khatvei annek pen mohvui seng 30, mohvui a hamte seng 60, bawngtal 30, tuu 100, gamsa namkim zang hi. Sakol leh sakol leng tulsawm val nei a, paunak la dawng 3000 phuak in, la 1005 phuak hi. Zipi 700 leh zineu 300 nei hi. 

Tua bang in a kisap omlo zah a ahau a lian kumpi Solomon in leitung nate ah lungnopna zong a hih hangin tua lungnopna a zon pen a muh loh zia hi bangin hong gen hi. Mit in a khuamuh ah lungkim lo in, bil in a khuazakna ah lungkim lo hi. Pilna tam sem sem leh buaina tam sem sem hi. Theihna a tam sem sem ciangin lungkham mangbatna tam sem sem hi na ci hi. Thuhilhna laibu ( Ecclessiastes) bu sim le uh cin, laimai kim ah la hileh a sakkik bang in a gen pahpah thu in, “Na khempeuh a mawkna pi hi” ci in 23 vei na gen hi. A tawpna ah upna, lungnopna leh lungkimna a tawntung pen hih leitung nate hilo in Pasian kiang bek ah om hi cih a phawk ciangin lungkimna man taktak pen Pasian kiang ah a omlam phawksan hi. Tua a hih manin Pasian zahtak in a thupiakte na mang un na ci hi.Tua a hih manin leitung kumpi minthang pen Solomon in leitung nate ah lungnopna kicing a muh zawh loh pen nang Volume 07, Is sue 18 Sept 8, 2017 Thupuak leh kei in zong leitung nate ah mu zo ngei lo ding hi hang. 

Tua lungkimna a kicing pen Sawltak Paul in Acts 4:11-13 na ah a nuntakna ah a neihna thu tawm bang kikum ni. Zawndan, hauhdan, gilvahdan leh gilkialdan zong na khempeuh hong

hongsik Pa hang in ka hih thei hi na ci hi. Eite kisapna pen pen in sum leh pai, inn leh lo te hi masa lo in, koi ah ih om zong, ih tung ah bang bang hong piang ta zong, Topa aw khasia kei ning, lungdam hong ko den ning a ci thei nuntakna pen hi Topa in a tate hong piak nop pen a hi hi. A puatham hauhna hilo in, lungsim sung hauhna hi zaw hi. Paul in hih bang lungkimna pen Zeisu’ khephung pan in a ngah a hi hi. Kristian tampi lakah nunzia ah Khazih muh ding omlo a kampau bek a omte ki tam mah mah ta hi.

James Smith in Lungdamna thu pen bu 5 om hi na ci hi. Tuate in Matthew, Mark, Luke, John leh Nang na hi hi. Billy Graham in banci hiam cih leh, “Lai-at leh a sim siamlo na vengte, na ompihte leh thu-umlo mite nangawn in tua lungdamna thu bu 5 lak ah a tam sim penpen in, a bu 5 na hi “Nang” pen a hi hi na ci hi. Ute naute aw, eite pen Pasian’ Lungdamna thu bu a 5 na ih hi hi. Mite in ih gamtatna leh ih kampauna pan in Zeisu thu na thei ta uh hen. 

Lai Siangtho sang a kah lai tangval khat pen tuipi kantan in tembaw pi tawh khualzin khia hi. Thakhat in huipi leh guahpi thuak in tua tembaw pen kisia hi. A tuanpih te suakta zolo in

sikhin mah leh, kamphatna lianpi tawh singtum tawng khat mankha a hih man in tuipi gei hong tung thei hi. Tua tuikulh ah mi te tawh teng khawm hi. Amah in tua tuikulh a mite muhna ah Lai Siangtho zong sim ngeilo in, zong a hilh ngei kei hi. A hih hangin amaute kisap hun, huhna a kisap hun sim in pai in huh tawntung hi. Hun hong bei to to a, tua tuikulh ah Lai Siangtho siam pawlkhat in Pasian thu tangko ding in hongpai uh hi. Amaute in tua tuikulha mite pen Pasian leh Zeisu thu hilh uh hi. Tua bangin a hilh laitak un amaute laka a putek khat hong dingkhia a, “Lawm te aw, tua na gen uh Zeisu pen ka khua uah om hi, na up kei uh leh kong lak thei ding hi” ci hi. 

Amaute in zong lamdangsa in tua putek zui in tuapa muh sawm uh hi. Tua putekpa in khuanawla bukneu khat ah lutpih in tua innsung a lut uh leh , tua pa pen hunkhat lai a Lai Siangtho sang a kah pih uh a lawmpa, tembaw kibung a sikhin tham ding a lamet uh pen na hi mawk hi. Tua a lawmpa in a nuntakna leh gamtatna tawh Zeisu thu a tangko na hi mawk hi. Paul zong mite in thuman lo in a ko uh ciang thuak dan siam in, mite in bangbang ahih uh zong, asih ding ciang nangawn in thuakdan leh omdan siam hi.

Benjamin Franklin in, “Lungkimna in mi genthei penpente zong mihau in bawl thei a, lungkim zawhlohna in mi haupen te zong mizawng pen in bawl thei hi”, na ci hi. Eite kisap pen pen in genthei pi pi a hauhna ahi hi. Hih ih khualzinna leitung ah sum lehpah ah genthei kha mah ni teh, a hih hangin Topa in na lungsim hauhna hong pia nuam pen pen hi. Natna na thuak kawm kawm in damna hong pia nuam a, thuakna na neih lai nangawnin lungkimna hong nei sak nuam hi. Si ding hi phial zong in nuntakkikna ding lungnop khamuanna eite tung ah nei ding in hong deih hi. Tuate pen bang ci bangin neithei ding ih hiam? Hih dotna pen eite ih nuntak sung in mantak in ih phi zawh na dingin ih hanciam ding hi. Ih dotna a mantak a dawnna a muzo te pen hih leitung a kampha pen te ih hi ding hi. Mi tampi te in hizah in zong uh himah leh banghangin mu zolo uh hiam? A hang in, Zeisu omlohna mun ah eite in va zong kha pah pah hi hang. Zeisu kiang bek ah lungnopna tawntung pen om bek hi. A deihte khempeuh tung ah hih thupha hong tung ta hen. Leitung nate tung ah lungkimna leh lungnopna a tawntung a kimang ding om lo hi. Tua a hih man in tu in aman pha pen Khazih ih taan sangin eite lungdam sak pen pen leitung nate a hi phial zongin, Zeisu tawh hong ki gamla sak leh hong taan sak ding a hih leh paisan ngam ciat ni. Hih leitung na ih paisan ngam lohte in a tawp ah lungkhamna kan hong pia lo hi a, tua Zeisu in lungkimna kicing tawntung a ki mang ding pen hong piathei hi cih up-na tawh tuni tuhun a kipan in ih zonna munte khel in Zeisu kiang bek ah om hi cih thu um in, Zeisu khephung a zuan ciat dingin Topan thupha hong pia ta hen. Amen.

Thuphilte:

Mihai in a haiman liau zol o a, mipil in a pilman ne zo lo hi. Mizo Proverbs

Mi khempeuh lakah a lungdam thei lote a lungdam theilo pen a kingaihsunte ahi hi. Hume

Haksatna ih cih pen Pasian in a vangliatna kilatsak theih nading a tausang hong bawlsak ahi hi. Hudson Taylor

Na sum na pai na ngahna tawh kizui in Pasian pia in, Pasian in nang tungah na piakkhiat tawh kizui ini hong pia kik ding hi. Peter Marshall

Ka tunga hong hoihte tungah ka hoih a, ka tunga hong khialte tungah ka hoih a, tua teng hangin na khempeuh a hoih hi. Leo Tze

Minthanna pen tawmtawm a akine thei ‘gu za’ ahi hi. Honare de Bolzac

Minam itna ih cih pen hehpih tehihna in ka ngaihsun a, tua pen inn pan hong kipan ding hi. Henry James

Zo Phualva Thupuak - Vol 07, Issue 18 by DavidLian on Scribd