ZSS LESSON 12: KHA SIANGTHO TAWH NUNTAKNA

LESSON 12 September 9 – 15

KHASIANGTHO TAWH NUNTAKNA

NIPI NI (SABBATH) NITAK LAM

SIM DINGTE: Gal. 5: 16 – 25; Deut. 13: 4, 5; Rom. 7: 14 – 24; Jer. 7: 9; Hos. 4: 2; Matt. 22: 35 – 40.

KAMNGAH: Ken kong cih in ah, Khasiangtho hangin na nung ta un. Na nuntak uh leh, Na si leh sa uh deihna zui lo in na om ding uh hi. (Gal. 5: 16 RSV)

Christian Labu sung pan in a ngaih mahmah khat ahi, “Hong pai in, Thupha namkim naak” a phuak pa, Robert Robinson (1735 – 1790) ahi hi. A nuntakna sungah Upna tawh a nungta den pa ahi kei hi. A pa sihna hangin heh sak mahmah a, zu leh sa leh numei pasal paktatna sungah kidiah hi. A minthang thu hilh siam, George Whitefield (1714 – 1770) thugenna a zakna tungtawn in, a nuntakna khempeuh Topa tungah ki-aap in, Methodist Pastor khat hong suak hi. La tampi hong phuak hi. A tunga a la phuah la, tang 4 na sungah: “A ni-sim in Nong heh-pih na, A tam-pi hong baa sak den; Na heh-pih na’n hong khih in la,Na kiangpan hong pialsak ke’n.” Tua la tawh kisai in, a gual tawpna ah, Pasian kiang pan in a taisan khakna a kisik thu a phuahna ah, sungah Prone to wander, Lord I feel it, Prone to leave the God I love; (Gamla pi ah ka taisan lam ka kithei hi, Ka it ka Pasian ka nusia kha hi) cih khiatna nei la hi na pi in, ahi zongin tua laimal a deih lo ten, kammal honkhat tawh na laihsak mikmek uh hi. Prone to worship, Lord I feel it, Prone to love the God I serve (biaktak cing na hihna Topa kong thei hi, kong itna hangin nangma na’ ka sem ding hi, cih bang peuh in laih mikmek uh hi.

Labu bawl te in, a hoih ngimna tawh a puahphat hi kha mah dinga, a hi zongin a phuakpa lamal in, Christian nuntakna zia aneih theihna dingin nakpi in a do na thu agen nuam a hi hi. Thu-um mikhat sungah lungsim a hong uk thei ngeina 2 kinei hi: Si leh sa deihna leh Khasiangtho deihna hi a, amau geel pen, aki do (sual) den ahi uh hi. Si leh sa deihna in, Pasian kiang pan in taikhiat ding bek hong geel sak a, Khasiangtho deihna in, si leh sa lunggul- kol tanna pan in suahtak theina hong nei sak hi. Hih thu in tu kaal sunga dingin Paul lunggulh a thupuak ahi hi.

NIMASA NI (SUNDAY) September 10
KHASIANGTHO SUNGAH KALSUANNA

Gal. 5: 16 sim in. Upmuan na tawh nuntakna sungah “kalsuan”na tawh kisai in bang ci kizop na nei uh hiam? Deut. 13: 4, 5; Rom. 13: 13; Eph. 4: 1, 17; Col. 1: 10.

________________________________________________________________________________

“Kalsuan” cih kammal in, Thuciam Lu Bu sungah mikhat in a neih dingin a kilawm thu khat tawh kizom hi. Jew mi a hihna tawh Paul in, a laigelh te sungah, Christian te nuntak zia ding tawh kisai omdan te a gentehna ah guang thei zel hi. Hih kammal tawh a kizawi tawn in Pawlpi masa te tawh kizopna ah gentehna dingin na zang hi. Zeisu nungzui te Christian (Acts 11: 26) ci in a kisap ma in, amau te “Lampi” nungzui te kici ziau uh hi (John. 14: 6; Sawl. 22: 4; 24: 14). Hih thu te tungtawn in i muh theih thu in, tanglai pek a Christian i cih te pen, Zeisu bek bulphuh na tawh Pasian upna sungah kinga te na hi lo uh a, nuntakna “lampi” ah a “kasuan” ding te zong na ki ci uh hi.

Paul in bang ci bangin Thuciam Lui bu sunga kimu thei kalsuan na tawh a ki lamdang gentehna na zang a hi hiam? (Saikak in. Exo. 16: 4; Lev. 18: 4; Jer. 44: 23 leh Gal. 5: 16, 25; Rom. 8: 4.

_________________________________________________________________________________

Sepna bawlna tawh kisai in Thuciam Lui bu sungah, “kalsuan” cih kammal bek tawh a khiatna na om lo a, “thukham tawh kalsuanna” na ki ci zaw hi. Jew te in “Halakhah” cih kammal a zat uh ciangin khawsung gamsung ki-ukna tawh a kisai thukhun te a gennuam uh hi a, tua te sungah, Thukham leh tangla Pupa te khang pan in ngeina tawh kisai Rabbi (Jew sia te) hilh te kihel hi. Tua hi a, “Halakhah” pen “Jewish te Thukham” kici pah a, tua pen, Hebrew kammal tawh “kalsuan dingte”cihna a hih man in, “pai na ding lampi” cih a deihna hong hi hi.

Paul in agen a sunga “Khasiangtho tawh kalsuanna” acih ciangin thukham zuihna tawh kalsuan na a ci nuam ahi kei hi. A hi zongin Christian te in thukham palsat na tawh nungta un a ci nuam zong a hi tuan kei hi. 

Tua ahih manin, Paul in thukham leh thukham thu ah thuman theihna tawh kisai in, a langdo ngei kei hi. A ma langdo thu in, thukham tawh diktan a sawm te leh thukham a kizat khialhna te bek a hi hi. Pasian lunggulhna bangin thuman theihna maan in a puatham tawh gamtat tentan na hi zaw lo in, Khasiangtho deihna banga lunggulhna tawh sunglam panin a hong gamtang khia sak thuman na hi zaw hi (Gal. 5: 18).

Nangma nuntakna sungah bang ciang bang “Khasiangtho tawh kalsuanna” nei kha ngei na hi hiam? Bang ci bangin gamta na hi hiam? Tua bang gamtatna zawngsat theihna dingin bang zah bangin haksa sa na hiam?

NINIH NI (MONDAY) September 11
CHRISTIAN TE’ BUAINA

“Bang hang hiam cih leh ei’ pumpi ut bangin gamta lehang Kha Siangtho’ deihna tawh na kituaklo a, Kha Siangtho’ deihna bangin gamta lehang ei’ pumpi deihna tawh na kituaklo zel ahih manin hih nihte gel a kilangpang niloh na hi a, note’ ut bangin a gamta theilo na hi uh hi”. (Gal. 5: 17 sunga leh, Rom. 7: 14 – 24 sung zong sim in). Hih kammal te tungtawn panin, thu-ummi khat na hihna tawh, bang zah takin a hong nasak kammal te suak thei ahi hiam?

___________________________________________________________________________________

Hih bangin nakpi  takin do ding a cihna sungah Paul in, mihing khempeuhin a do ding kul hi a ci nuam ahi kei hi. A hi zongin, Christian khat hihna tawh sung lam lunggulhna tawh kisai galdo na om thei hi a ci nuam ahi zaw hi. Bang hang hiam cih leh, mihing te pen, pumpi deihna sungah lunggulhna tawh a piang khia te i hi hi (Rom. 8: 7). Tua hi a, Kha thu ah i suahthak tak ciangin sunglam galdo tawh kisai buaina taktak a hong kipan hi (John 3: 6). Tua i cih ciangin Christian a hi lo te in zong tua bang buaina a tuak khalo cihna hi lo in, a tuak kha zong om hi. A taktak in tua kilem lohna a hong piangsak penpen in Khasiangtho ahi hi. A hanciam Christian khat adingin kalsuan na khempeuh ah a ki langpan den galdo na nam nih nei den uh a, Ci leh sa’ (pumpi) deihna leh Khasiangtho’ deihna ahi hi.

Christian tangthu sung khempeuh ah, tua banga buaina sung pan in suahtak theihna lunggulh mahmah tek uh hi. Khat khat te in buaina aven theihna dingin ki pawlkhopna sung pan in ki hepkhiat sawm uh hi. Khat khat te leuleu in, pianpih mawhnopna (sinful nature) pen hehpihna in hong phiatmai thei ziau lel ci uh hi. Tua banga ngaihsutna te khial tuak hi. A hi zongin si leh sa (pumpi) lunggulhna te’ Khasiangtho vangliatna tawh gualzawhna kingah takpi thei na pi, Topa Zeisu a hong pai kik a, pumpi thak a hong piak masiah, anam tuamtuam tawh lungsim galdona a kiphu kha lai veve ding ahi hi. Kipawl khopna sung pan in kihep khiatna lel tawh, pianpih mawhnopna lungsim’ ki paaikhia thei lo a, koi lailai ah i pai zongin, buaina khat teitei tawh I kido hong kul veve dinga, sihna ahih kei leh nihvei kumkik na bekin tua buaina te hong veng sak thei bek ding hi.

Rom. 7 sunga Paul in agelhna sungah, Christian nuntakna sunga sunglam kido na a ventheihna dingin, i hihnop teng hih lohna tawh kidal thei hi ci hi. Tua bang a cih ciangin, sunglam buaina khempeuh a huam in a gennuam ahi hi. Bang hang hiam cih leh, mihing hihna sungah tua deihna, lunggulhna te geel a kido tuak takpi mah hi a, Khasiangtho deihna lam in kha tawh kisai vai te hong deihsak lai takin pumpi deihna lam in tua te na hua mawk hi. Ci leh sa deihna hangin i lunggulh luat te zong, khasiangtho in na langpan zel hi. Bang hang hiam cih leh a kikheel nuam lungsim deihna a nangzo dingin i pumpi mahmah tha’ in neem lua hi. Tua hi a, si leh sa lunggulhna pan in i suahtak theihna dingin, lam-etna a om thei sunsun in, Khasiangtho lam apang dingin khensatna tawh pump’ deihna i langdo ngiat ding ahi hi. Tua ahih manin Paul in, Khasiangtho deihna bangin a nungta thei dingin a hong sawl ngaungau ahi hi.

Hih mihing hihna sunga om deihna nam 2 tawh kisai, na nuntakna ah, bangzah takin galdona nei khin na hi hiam? Tua bangin a bei theilo kido na ah bang ci bangin tua thu mah tawh a kido Christian khat tungah kalsuan zia ding hilh thei ding na hi hiam?

NITHUM NA (TUESDAY) September 12
SI LEH SA GAMTATNA TE

Mihing sunga buaina a hi, pumpi leh kha lam kido na thu agen khit ciangin Paul in, Gal. 5: 18 – 26 sungah, tua a kihua mahmah lunggulhna te a pian theihna a zai zaw in hong gual suk hi. Tua a kikhum suk thu te khempeuh, Greece ngeina a zangpih Rome gama nungta Jew te’ laibu te sungah ki gelh hi. Tua a kigual gamtat zia dingte sungah i pelh ding leh i zuih ding thu honkhat ki hel hi.

A nuai a Laisiangtho mun te sung pan in, a kigual suk a sia leh apha gamtat zia ding a hong lakkhiat na tawh kizui in, hoihtak in sitin la, Gal. 5: 19 – 24 sunga Paul in a gualhsuk te tawh bang ci bangin kinai huai thei hiam? Jer. 7: 9; Hos. 4: 2; Mark 7: 21, 22; 1 Tim. 3: 2, 3; 1 Pet. 4: 3; Rev. 21: 8.

______________________________________________________________________________

Paul in Christian gamtat zia ding a telcian mahmah, theih mahmah a hihna tawh kizui in, asia leh apha kalsuan zia tawh ki zui in Galati Laikhakna sungah, a kilamdan na nam 2 te a thupitna hong gual suk ahi hi. Tua bangin a ki lamdanna a gualhna ah, a sia lam tawh kisai in “Mihing (si leh sa) te pianzia” cih leh a de ih huai thu tawh kisai in, “Kha Siangtho’ gahte” na ci hi. Tua in a tuam vilvel na uh ahi hi. James D. G. Dunn in a gelhna ah, “Ci leh sa lunggulhna in ngetna hi a, Khasiangtho deihna in hong suakkhia sak hi ci hi. A khat zaw in angsung zawngsatna tawh kisai in, a uangtat sak thei angsung lunggulhna hi, a dang khat leuleu bel, midangte phattuam na ding agen nuam hi a, lungsim daihna, a pha thuhkik theihna, mi muan takcing suahna ahi hi. A khat zaw in mihing zia tawh kizui in ut-utin gamtat theihna leh a khat zaw in, Pasian muanna tawh sunglam ki puahphatna theihna dingin a muanhuai gamtat luhek na tawh khauhtakin dintang ngam na ahi hi.” – Epistle to Galatians, p. 308.

Hih si leh sa deihna leh Khasaingtho deihna a kilam dan na thudang khat in, “pumpi deihna te’ ci in khat sanga tamzaw genna (plural) ah na zang hi. “Khasiangtho deihna” leuleu ah khat guak bek tawh kisai (singular) in gen hi. Bang hangin tua bangin a kilamdang dingin khen hiam cih leh, si leh sa deihna limlim in kikhen thangna bek mah piangsak thei a hi: kiphin na, ngaihsut kibat lohna, ki pumkhat theih loh na te bek mah kawk hi. A dang khat zaw a hi Khasiangtho deihna in: Kha thu tawh kisai bek mah gahkhat bek mah gah khia thei sak a, kipum khatna sungah a thumal 8 te kiphum khawm hi.

Hih kammal te tungtawn pan in mi kimkhat te leuleu in, thuman taka a kalsuan mi khat a dingin Pasian upna tawh kisai bangmah phamawh nawn lo hi, ci liang uh hi. Tua bang dan nak hih lo hi. Paul’ in agualhsuk te tungtawn pan in, Pasian tawh kisai asia lamin ngaihsutna khak na in, mihing kizop na sungah, nu leh pa lamah gamtat na, lungsim gamtat zia te leh Biakna tawh kisai thu a tuamtuam te ah hong kikhen thang gawp sak thei hi. Tua bek tham lo in, nuntak tawntungna zong hong taansak thei hi (Gal. 5: 21).

“Si leh sa deihna te”a cihna sung en kik in. Tua sunga om thukhat, a hih kei leh mal khat bekbek in Thukham Sawm sunga thukham te khat leh khat sanga tam zaw bang zahzah bang palsat theihna ding lampi mukhia thei na hi hiam?

NILI NI (WEDNESDAY) September 13
KHASIANGTHO GAH (Gal. 5: 22 – 24)

“Ahi zongin Kha Siangtho’ sawlna bangin gamtatnate pen: Itna, lungdamna, lungnopna, lungduaina, migitna, hoihna, cihtakna, dikna, leh pumpi ki-ukzawhna hi a, hih bangin a gamta mite, Thukham in bangmah cih theilo hi.” (Gal. 5: 22 – 23). Koi ci bangin Thukham Sawmte zuihna tawh thuman na in, hih Laisiangtho sunga om Khasiangtho gahte hong nei thei sak ding hiam? (Mat. 5: 21, 22, 27, 28; 22: 35 – 40).

__________________________________________________________________________________

“Ki itna” neih theihna dingin, Thukham Sawm te zuih dingin a hong kipia a hi kei hi. A hi zongin Pasian leh Mihing te in bang ci bangin “Itna”lakkhia ding cih’ hong genna hi zaw hi. Thukham deihna kantan in Itna na neih zawh nak leh, tua itna in thukham tawh ki langneih ngei lo ding hi. Pasian it theihna ding leh midang te it theihna ding na neih thei kei leh Thukham Sawm in a mawkna ahi hi, tua mah bangin, Piansak nate’ na it theih kei leh, Leitung ii huppna thukhun (Law of gravity) in zong a mawk na hi ding hi.

Tua mah bangin, Si leh Sa deihna tawh kizui nam 15 te leh, Khasiangtho gah ahi gamtat hoih a deih huai nam 9 te pen, a kigal (do) uh ahi hi. Laisiangtho misiam te in, tua gamtat hoih nam 9 te pen, nam 3 ta in khen uh a, a bom in nam 3 a suah uh hi. A hi zongin a hi dimdiam a gualhsukna (order) ah, a thupit na uh tawh kizui in, koi zaw masa leh kilawm cihna ah bel, deihdan kibang lo hi. Khat khat te in To 3 Pasian a hihna uh tawh kizui in, bom 3 kikhen hi a ci zong om a, khat khat te in bel, tua bom 3 tawh kisai in, Pasian tawh i kizop na ding, vengte tawh i kizop na ding leh, ei mahmah in i neih ding a ci zong om hi. Khat khat te leuleu in, a huam pi in Zeisu in aneih zia leh tong te’ a gelh uh hi ci uh hi. Hih ngaihsutna tuamtuam te in, hoihna a tuamtuam nei mah ding uh a, Paul in bel Christian nuntakna sungah Itna tungtawn in, thupi a sak penpen teng a hong gualhsuk ahi hi.

Paul in gamtat hoih nam kua a gualhsukna tungtawn pan in, “Itna” mah a na masak pen na in, a koih khak mawkmawk hi lo ding hi cih kician hi. Gal. 5: 6, 13 sungah Christian nuntakna sungah a thupi pen a genna ah “Itna” mah na bulphuh hi. Tua bek tham lo in, hih gamtat hoih nam 9 te mah, a mundang te ah zong na gen kawikawi hi (2 Cor. 6: 6; 1 Tim. 4: 12; 6: 11; 2 Tim. 2: 22). Nam 9 sung pan in, a dang teng pen, mi-kim (Christian ahi lo te na ngawn) in aneih theih thu hi a, ahi zong in “Itna” in Christian te a tuam diak a hihna uh kilat khiatna a hi hi. Christian te a dingin “Itna” i cih in gamtat hoih tampi sungah a kihel mawkmawk bek cihna hi lo in, a dang gamtat hoih khempeuh neih theihna dingin a kisam pen hi zaw hi. Khasiangtho gah sung pan in “Itna” in a sang penpen ahi hi (1 Cor. 13: 13; Rom. 5: 5). Christian khempeuh te a dingin “Itna” in i gamtat zia ding leh, I nuntakna mahmah hih sak ding ahi hi (John 13: 34, 35). A hi zongin atawn tungin, Itna lahkhiat theihna ding bel hak mahmah mawk hi.

Itna sungah bangzah takin angsung-nialna kihel hiam? Angsung-nialna kihel lo in Itna na nei thei ding hiam? Bang ci bangin Zeisu in Itna leh angsung-nialna tawh kisai hong hilh hiam?

NINGA NI (THURSDAY) September 14
GUALZAWHNA LAMPI

Ci leh Sa deihna leh Khasiangtho deihna hangin sunglam galdo na hanginm Thu-um mi khempeuh te lungsim sungah thangpaih, sinso na om thei tawntung mah ta leh, GalChristian nuntakna i cih in,  guallelhna, tuahsiatna leh mawhna sungah ki uksak lo ding hi hangh. Gal. 5: 16 – 26 sungah, Ci leh Sa sungah Khasiangtho hong uk theihna ding tawh kisai in, nuntak theihna ding tawhtang in bang hiam?

_____________________________________________________________________________________

Gal. 5: 16 – 26 sungah, Khasiangtho in hong uk theihna dingin nuntakna ah sepkhiat ding nam 5 hong gen hi. A masa pen in, Khasiangtho in hong sawl bangin gamtat ding (aneu 16) ahi hi. Greek laimal in “peripateo” cih a khiatna in, “a kiim ah pai, ahi kei leh “zuih sawm” cih na hi. Greek mipil Aristotle (384 – 322 BC) nungzuite “Peripatetic” ki ci hi, bang hang hiam cih leh, amu te in Aristotle pai na mun khempeuh ah zui uh hi. Tua ahih man in Paul in hih kammala zatna ah, zui kiaukiau cihna hi lo in, a tawntungin nisim kalsuan na ah “omkhawm” den a ci ahi hi. Tua bek tham lo in, a gamta dingin sawlna tawh “kalsuan” un hong ci hi. Khasiangtho tawh kalsuan I cih ciangin nisim vai khempeuh ah vai thupi pen in seh ding cihna zong a hi hi. A nihna in kammal in “ki makaih sak” (aneu 18) cihna ahi hi. Hih kammal deihna in, eite in a kilawm mun te i tun theihna dingin, Khasiangtho makaihna mang ding cihna ahi hi (Rom. 8: 14; 1 Cor. 12:2 tegeel saikak in). Eite nasep in a makai ding hi lo in, a nungzui ding cihna hi zaw hi.

Gal. 5: 25 sungah adang kammal nih te kidawk hi. A masa zaw in, “nungta ding” cihna a hi hi. Greek kam in “zao” hi a, Thu-um mi khempeuh tungah kitheih takpi na tawh nuntakna thak (pianthakna) hangin a “nunta” dingin hong seh hi. A kilaih themthum thei a hi lo suah thakna nisim kalsuan na a hi hi. Bang hang hiam cih leh, Khasiangtho tawh I nuntak ciang bek in, Paul in Kha sungah ki “kalsuan” thei bek ding hi ci hi. Kalsuan (lampai) cih a khiatna in (aneu 16 sunga) “pumpi deihna banga kalsuan na” tawh ki bang lo hi. Hih kalsuanna “stoicheo” i cih in, galkap sunga kizang kammal hi a, a kigualh diitdeet na pan un, “kal suan ding” ahih kei leh “kituak takin” pai ding a cihna zong ahi hi. Tua ahih man in Khasiangtho i cih in, kha lam nuntakna hong guan bek hi lo a, nisim nuntakna kalsuan na khempeuh ah a hong makaih, lam a hong lak den khat ahi hi.

(Aneu 24) sungah Paul in a kammal zat “singlam teh ah khencip” (crucified) a cih ciangin, hong lipkhap huai phial hi. Khasiangtho nung i zuih tak ciangin ci leh sa tawh kisai lunggulhna khempeuh sihsak theihna dingin kiptak in a khensat dingin a hong hanthawn nuam ahi hi. A hi mah hi, Paul in kha tawh kisai ah, i ki vaak theihna dingin, si leh sa deihna khempeuh ngawl sak ding hanga, tua si leh sa deihna teng singlamteh tungah khencip (that) mang phot ding cih a deihna tawh a hong genteh ahi hi.

Khris’ gualzawhna tungtawn pan in a gualzo mi na suahtheih na dingin, pelh ding in a kilawm bangbangte’ tungtawn pan in, bang ci bangin kikheelna leh deihteel na tawh, kalsuan ding na hi hiam?

KIGIN NI (FRIDAY) September 15

SINBEH DING: “Christian’ nuntakna pen a tawntungin hong maam hilhial lo ding hi. Buaina nasia taktak in hong buak ding hi. A nasia mahmah ze-etna te in nuai gawp ding hi. “Si leh Sa lunggulhna in, Khasiangtho deihna tawh ki langpan a, Khasiangtho deihna zong Si leh Sa lunggulhna tawh ki lehngat hi. Leitung beikuan a nai semsem na tawh kizui in, langpang pa in a hong khem theihna leh a hong tha-angsiahna nasia mahmah ding hi. A hong do na kihtak huai semsem dinga, zong hong kiziing tektek ding hi. Khuavak leh thumaan a nial te in, a lungsim uh hong khauh tektek ding uh a, thukhualna hong nei lo semsem ding uh hi. Pasian a itte leh Ama Thukham te a zuite tungah a nasia mahmah zaw langpan na hong om ding hi.” – Ellen G. White Comments, The SDA Bible Commentary, Vol. 6, p. 1111.

Khasiangtho ki huzap sakna in, a lungsung ah Khris nuntak zia a tengsak te ahi uh hi. Ei te in Khris i mu ngeikei a zong i kiho kha ngeikei hi. A hi zongin, Khasiangtho in koi lai mun ah om ta le’ng hong nai thei mahmah hi. Khris a nei mi khempeuh te sungah tua Khasiangtho in na hong sem ding hi. Tua bangin Khasiangtho hong teng hi cih a ki thei mite sungah, Khasiangtho gahte a hi: Itna, lungdamna, lungnopna, lungduaina, migitna, hoihna, cihtakna, dikna cih te hong nei ding kuh hi.” – Ellen G. White Comments, The SDA Bible Commentary, Vol. 6, p. 1112.

KIKUP DINGTE:

1. Singlamteh tungah si leh sa lunggulhna te khencip a cihin bang a deihna hi ding hiam? Bang ci bangin tua ci kalsuan theih ding i hi hiam? Bang zah vei bang tua ci kalsuan ding i hi hiam?

2. Si leh Sa deihna tawh a kalsuan khat, gamtatna hi lo Upmuanna bek tawh Gupna bang ci ngah thei ding a hi hiam?

3. Nangma nuntakna sunga Topa deihna banga na kalsuan na ah, bang haksa penpen sa na hi hiam? Bang ci bangin Pasian tawh i kilem theihna dingin, mawhna thu ah bang ci bangin gualzo thei ding i hi hiam?

ooOOoo