FSS Zirlai 1: ZIRLAI 1: ROME CABU SUNGIH TIRHTHLAH PAUL

ZIRLAI 1 Sept. 30- Oct. 6
ROME CABU SUNGIH TIRHTHLAH PAUL

SABAT TLAILAM Sept. 30

TUZARH SIAR DING : Rom 15:20-27; Acts 28:17-31; Fil. 1:12; Rom 1:7; Efe. 1; Rom 15:14.

BIBLE CANG KEN: “Nan zumnak cu leitlun pumpi ah than a si ih, nan zatei hrangah Jesui thawngin a hmaisabik ah Pathian hnenah lungawi thu ka sim” (Rom 1:8 NKJV).

ROME cabu zirtupawl in a thuanthu umdan an theihthiam ding a poimawh. Pathian tongkam suak thupawl theithiam dingah an pehzomawknak pawl a thupi zet. A thu ih tumtahmi kan theih ding a tul. Paul in himi thu a ngan tikah can bikhiah pakhat sungih a um mi Khrihfa bu pakhat hnenih thu pawimawh pakhat a nganmi a si. A thu thei dingih kan zir ahcun hlawknak nasa zet kan ngah ding a si. 

Curuangah kanmah hi AD kum 100 hlanih Rome acozah kut tangih ummi ah kan retaw ta ding. An lakih mi pakhat hung dingin kum zabi pakhat lai ih Rome khua ih a ummi zumtupawl kha Thiang Thlarau bomnak ruangih luatnak an ngah mi thupawl a simmi ngaitu ah kan dingawter ding.

Paul in a sim duhmi cu ziangvek in so mi pakhat rundam a ngah timi le leitlun pumhuap rundamnak a tarlangnak a si. Paul in mi burpi pakhat hnenah thu a simmi a si ko. Himi ca a ngan tikah a thinlungah tumtahmi a hleice in a nei. Kum za tampi a liam hnu ih kan theih tikah thil umdanpawl hmuahhmuah an danglam thluh. Martin Luther ih cangvaihnak tla a nganmi ca thawn a pehaw mi a si ih, a hmaisabik ngantupawl ih canganmi parah a thumaw ih cuihpawl cu tui kan san khalih thil umdanpawl thawn a bangaw a si. 

THAWHSAL NI October 1
TIRHTHLAH PAUL IH CAKUAT

Rom 16:1,2 ih a langtermi vekin Rome cakuat hi Grik miphunpawl ih an khawpi Cenchreae ihsin a nganmi a si ih Korinth khua thawn naiawte a si. Paul in Korinth khua hnakih tum Phoebe khua thuhla tumtah ih a nganmi a si.

Paul hi khualtlawng mi a siih Rome khua thuhla thaten a thei. Ca a nganmi hi a ni thla thaten a ngan ruangah a cakuatnak khua le ram le miphunhleice pawl hrangah a si tiah kan thei thei.

A voihnih khual a tlawnnak ah Korinth kawhhran a dinih AD 49-52 karlak hrawngah a si (Acts. 18:1-18). A tum thumnak cu AD 53-58 ah a si ih Grik miphunpawl hnenah a va tlawngsal (Acts. 20:2,3). Cui a khualtlawn a netnak lamah Jerusalem zumtupawl hrangah thilpek a dong (Rom 15:25,26). Curuangah Rome cakuat hi AD 58 kum a thoktir hrawngih a nganmi a si thei tiah an ti. 

Paul in a voi thum khual a tlawnnak ah ziang kawhhran pawl so a va tlawn (Acts. 18:23). Galati Kawhhran ih a rak um lo laiah zirhsualtupawl ih vunzim tan dingah le Mosi dan thlun dingin memberpawl an thinlung an hruaipeng theh. Paul dodaltupawl in a ra thlen hlan Rome ih a um lai ihsin an tih tuk zo. Paul in Rome cakuat a nganmi ih thil rapthlak thleng ve lo dingin a hlankhan in a rak ngan. Missionary rawngbawl in a voi thumnak khual a tlawn tumah Korinth khua ah thla thum a cam ih a thlen hnu reilote ah Galati cakuat a ngan tiah an ti.

Rome cakuat a nganmi ah a thupi zetmi thuthangtha ih daan hrampi fehdan Paul in a ngan. Judah le Zentailpawl ih an buaipi theu mi a dinhmun kha a tarlang. Cule Judah-pawl in an neih mi thukam le ruahsannak pawl kha a tu ahcun Zentail-pawl hnen khalah pek a si ve ti kha a langter. E.G White. The Acts of Apostles. P. 373.

Bible sungih a ummi cabu hmuahhmuah hi ziangruangah himi a ngan, ziangvek dinhmun so a tarlang timi hi a thupi zetih zir dingmi a si. Judah le Zentail kawhhran pawlih an buai theumi thusuhnak pawl kha Rome cakuat sungih kan theih ding a thupipawl an si. 

Na Kawhhran in tulai ah thubuai an suahpi mi ziangso a si? Na kawhhran sung (or) lenglam khuimi so tihnung deuh? Himi thubuai cingfel dingah ziangvek so na hman? Na tuahdan, na dinhmun, na thinlung putah lo buaitertu tampi na tong ding. Ziangtluk in so bansan mai na duh theu? Himipawl ah mai sinak zohfelawk hi ziangah so a poimawh?

TLAWNGKAI NIKHAT October 2
ROME KHUA TLAWNG DING PAUL IH SADUHTHAH

A pawimawh bik cu a tlaitluan ih mahte tonnun neih hi a thabik mi a si. Pehtlaih awknak a phunphun a um ih, phone, email tivekpawl an si ih, hmel hmuhawk le taksa daiaw rori ih pehzomnak tluktu a um lo. Curuangah Paul in cakuat a nganmi sungah amai mit rori ih hmuh le ton a duhnak a ngan. Ziangruangah an hnen rat a duh timi tla thei hai she ti a duh.

Rome 15:20-27 siar aw. Paul in tuante ih a feh thei lonak thu ziangso a sim? A va thlen tikah ziang tuah so a tum? Mission rawngbawlnak dingah hmun lailibik a si nak, thusim mi ziangso a nei? Paul ih tongkam a hmanmi ihsin mission rawngbawlnak ah le tettikhannak dingah kan zir ding ziangso a um? Rom 15:27 ah Judah le Zentail-pawl an thuhla thei hiar um zet mi le thupi zet Paul in ziangso a sim?

Zentail-pawl hnenih rawngbawltu in thuthangtha a din zonak hmun kha hnatuantu midang thawn tanta in thuthangtha kha hmunthar ah fehpi dingah thinlung takten a forh rero theu. Cui san lai Khrihfa cu a ding pekte a si ih, rawngbawltu khal malte lawng an si lai. Thuthangtha kha hmun thar dangah luhpi in missionary hnatuannak hmual a neih lai cantha a liam pang ding ti a phang zet. Thuthangtha simnak ah retheih khal le Jesui hmin an theihnak ding a si ahcun hmunthar ah a feh vivo. Midang in hram an rak bun zonak par ahcun sak bettu si a duh lo. Curuangah a thei hrih lo mipawl in an thei ding a si tiah a ti (Rom 15:20,21). 

Rome ah hmun hnget khuarih um ding hi Paul ih tumtahmi a si lo. Spain ram ah thuthangtha sim ding a saduhthah a si. Himi a timtuahawknak ah Rome ih a ummi Khrihfapawl ih tanpinak kha a beisei. 

Paul in hmun tharih rawngbawl theinak dingah kawhhran dinghnget zopawl hnenah bomnak a hawlta theu a si. Khami ihsin Mission hnatuannak ih a tulsam mi hmuahhmuah thawn ziangvek ih pehzomawknak so a tul?

Rom 15:20-27 siar aw. Paul in Bawipa rianih rawngbawl dingah ziangtluk in so tha hiarnak a nei. Nang teh ziangvek thinlung put le tuahdan so na nei? Thinlung sungih tha hiarnak ziangtluk in so na nei?

TLAWNGKAI NIHNIH October 3
ROME KHUASUNG AH PAUL

A tu cu Rome khua sung an thlengih ralbawi Captain in kil dingih thupekmi kha ralkap za hotu in a suah zalensal. Asinan Paul kha amah kiltu ralkappawl thawn a duhduh ih um dingah a thlah (Tirh. 28:16 NKJV). Paul in a netnak ah h mi cangih a tarlangmi ziangso a sim, ? Kan duh lo zetmi ruah lopi in kan parih a thleng mi ah hi thu ihsin zirlai ziangso kan lak thei?

Thawnginn sungih ummi a si ko nan Rome khua ih thil um dingmipawl kha Paul in a thei cia a si. A thabik dingih kan tumtahmi le kan ruahnak hngakhlap zetih kan thlirmi kan khawkhan mipawl kha kan ngah thei theu lo. Missionary in khual a tlawn tum thumnak ah

Europe ram le Asia Minor lamih a um mi Kawhhran-pawl hnen ihsin mi harsa bomnak thawhhlawm thawn Jerusalem ah a thleng. Asinan ruahban loin amah kha an kai ih thir cikcin in an tem. Cuhnu ah Caesarea ah kum hnih sung thawng an thlak. Cui hmun ihsin Kaisar hnenah a zuukhannak a tuah. Cumi hnu kum thum sung thawng an thlakih Rome khawlipi ah a thleng. Himi hi Rome ih ummi kawhhranpawl hnenah anmah tlawng dingih tumtahnak a neihmi a rak ngannak vek a bang.

Acts 28:17-31 thu in Rome ah a um laiih thu ziang so in sim? Khami pawl ihsin a thupi zetmi zirlai ziangso kan ngah thei? 

Paul ih thusim mi ruangah si loin temtawn ih a umnak ruangah thuthennak zungih a um mipawl kha Khrihfa sinak lamah an thinlung a hip theh. Himi hi sualnak in thlarau tampi a temtawnnak kha a botcat ih thlarau suah zalennak a tuahsak. Himi lawng a si hrih lo. A sim bet mi cu “Bawi Khrih ruangih ka unaupawl tla cikcin ih tawn ka sinak ruangah zumnak hngetin an um ih Pathian thu simnak ah an ral a tha sinsin a si” tiah a ti (Fill. 1:14). E.G White, The Acts of Apostles. P. 469.

Thiltha a suah thei mi buainak na ruah ban loin voi ziatso na ton (Fill. 1:12). Kha mipawl kha a thazawng ih a hersal thei lo hmanah Pathian rinsannak tonnun na neih mipawl ihsin ziangso na ngah thei? 

TLAWNGKAI NITHUM October 4
ROME KHUA IH MI THIANGHLIMPAWL

Rome khua ih kawhhran kha kutkaihnak le upatnak a pek. “Rome khua ih ummi Pathian duhdawt mi le a minung si dingih kawhmi nan zatei hnenah kan Pathian le Jesuh Khrih ih zangfahnak le daihnak nan hnenah um hram seh” (Rom 1:7). Himi tongkam ihsin zumnak, thurin zirhawknak, thutak hrampi ziangpawl so kan lak thei ding?

(1) Pathian ih duhdawt mi : A duhdawtnak a cohlangtupawl cu mi thianghlim a hrilmi tiih theihmi an si. Pathian in leitlun a duhdawtnak a dik tinak kha a si.Himi hi milai sinak ah kan hmu thei, in duhdawttu kha phundang ten kan duhdawt ve. Anmah thawn nun tawmpiawknak thil thleng a tongaw mi a um. Duhdawtnak in duhdawtnak a phut.Duhdawtnak hi amai cante ah thil a famkim mi a si. 

(2) Mithianghlim si dingih kawh: Lehlin hrekkhat ahcun himi thu hi “tobe” dingah timi hi ngandan phundang “italic” in an ngan. A san cu letlingtui betmi tinak a si. Cuih cafang pahnih a um lo ahcun a sullam a simfiang thei fawn lo. Khami cafang kom pahnih tel loin vun ngan bang sehla, “Called Saints” ti a si dingih mi thianghlim tiih hmin kawhmi ah a cang ding.

“Mi thianghlim” timi hi Grik tongah, ‘hagio’ ihsin lehlin a si ih, a sullam ngaingai cu ‘a thianghlim mi’ “Holy” tinak a si. “Holy” thianhlim timi ih a san cu, ‘dedicated’ hlan mi (or) “aapmi” tinak a si. A thianghlimmi pakhat cu Pathian ih thleidan mi tinak a si. Bible ih a simdan ahcun mi thianghlim timi cu a bawi si dingih Jesuh Khrih a hriltu kha mi thianghlim tiah a koih a nun sung thianghlim teih a nungtu ding tinak a si.

Paul in mi thianghlim si dingah kawhmi tiah a ti. Himi umdan vek a si ahcun mi hrekkhat cu kawh lo mi an si ding. Ephe. 1:4; Heb 2:18 le 2 Peter 3:9, Paul ih sim duhmi theithiam dingah himi Bible cangpawl in ziangtin so in bawm?

A sunglawi zetmi thuthangtha pakhat cu mi hmuahhmuah hrangah Jesuh a thi timi a si. Amai ruangah kan zaten rundam dingih kawhmi kan si. Mi thianghlim si dingah leilung sersiam hlanih kawhmi kan si. A hramthok ihsin Pathian in Jesui ruangah mi hmuahhmuah rundamnak ngah dingah tumtah mi a si. A netnak an hloralnak mei ih urkang dingmi cu Setan le a dungthluntupawl lawng an si (Matt. 25:41). Mi hrekkhatpawl in a sunglawi mi laksawng pekmi kha a thathnemnak ah an hmang lo. Mi tampi cu rundamnak sunglawi an neih ringring mi theithiam loin rilrawng le tihal vekin rundamnak an hawl rero.

Leilung sem hlan ihsin Jesui ruangah rundamnak ngah zo mi ah Pathian in a lo ko zo. Amai kawhnak kilhim ih kai hnget dingah ziangah so na nun pumhlum ih pek dingih sian lonak na nei lai?

TLAWNGKAI NILI Oct. 5
ROME KHUA IH ZUMTUPAWL

Nan zumnak thu leitlun pumpi ah than a si ih, nan zatei hrangah Jesuh Khrih thawngin a  hmaisabik ah Pathian hnenah lungawi thu ka sim (Rom 1:8). 

Rome kawhhran ah minung ziangzat an um ti kan thei lo. A dintu hi Paul (or) Peter zo sawn an si timi thuanthu cabu sungah hmuh ding a um lo. Jerusalem khua ih Pentecost ni ah piantharnak rak ngahtu (Tirh. 2). Rome khua ih va tlawng (or) va ceer ih umtupawl ih dinmi

kawhhran upa hohanak ih rak dingmi a bang. Leitlun ah khawpi hminthang a si ruangah zumtupawl an cervaihnak ruangih sin a lut mi tla an si thei.

A mak ve mi cu Pentecost khawmpi hnu kum 10 bawrvel tiang tirhthlahpawl in an tlawngih an vehvai timi theih ding a um lo. Jesui thih hnu kum 20 hrawng lawngah Rome kawhhran sungah thatho zetin an um. Himi kawhhran hi taima zet le cak zet ih um dingah Bawipai tuahmi a si. E.G.White Comment. The SDA Bible Commentary Vol. 6, P. 1067.

Zum timi kau deuhih vun ruah cun rinumnak ti a si ih, Bawi Khrih sungih ngahmi nunthar lamzin ah rinum zetih ke kar tinak a si. Rom 15:14 siar aw. Rome khua ih kawhhran Paul in ziangvek in so a tarlang. Rome khua Khrihfa pawlih tonnun kha phun thum in thangthatnak a ngan.

(1) Thatnak famkim thawn a um mi : Mi in kanmai nundan pianzia rori a si ko an ti thei kem? Kanmah thawn an pawlkomawk tikah an ngaihsaknak kan hmuhmi in an nun ih thatnak a khat liam mi nun an neih mi ih hip in kan um maw?

(2) Theihnak famkim thawn a um mi: Bible in theihfianternak, thuthanawknak, thutheihnak hi thupi zetin a langter. Khrihfapawl hi Bible an zirmi thate ih theithiamtu an si ding. “Thinlung thar ka lo pe ding” timi ih a sullam cu, “Khua ruahnak thar ka lo pe ding” timi a si.

Khrihfa zumnak ih a tuah dingmi cu thutak theifel ih ngaihven ringringnak thinlung thlengsak mi a si ding. E.G. White, My Life Today, p. 24.

(3) Pakhat le pakhat ruahnak pekaw theitu: Zumtu midang thawn pawlkomawknak nei lo, mahte lawngih um hi thlarau nun pitling neih a theih lo. Kanmah kha midang ih forh tul kan si vekin midang thazang petu si kan tul. 

Na umnak kawhhran ziangvek so an si? Tihzah kainak ziangvek in so an neih? A thupi sinsin mi cu, mi pakhat in a zaten neih theh thei a si maw? A phi na ngahmi an zate hnenah sim aw. A poimawhmi cu, “An dinhmun cawisan dingah ziangtin so na bawm ding?”. 

TLAWNGKAI NINGA October 6

RUAHBET DING : Sualnak ruangih rundamnak khawkhan mi a si lo. Thil pakhat a ummi ruangih thil tuahcop mi khal a si lo. Leilung sem hlan ihsin milai rundam dingih Pathian khawkhan remruatmi a si (I Corin 2:7, Ephe. 1:3,4; 2 Thess. 2:13,14). A hrampi cu Pathian in milai parah kumkhua a hmunmi a duhdawtnak a langter mi a si (Jer. 31:3).

Himi khawkhannak hi a liam zomi can le tui kan san le a ralai dingmi khalah kumkhua daih a si. Pathian ruatcia le hrilcia miphunpawl ih thlawsuah an don dingmi tla a tel cih. Ziangkim hi Khrih ah pumkhat a si vekin rundamnak le sual ngaihthiamnak ah Khrih thawn bangawknak tla a kengtel. Kumkhaw ro luahtu dingih cohlannak le Thlarau Thianghlim ih hminsinnak le sunloih peknak tla a tel cih (Ephe. 1:3-4). Himi khawkhannak ih a tumtahbik mi cu Jesui tuarnak le thihnak kha a si. Himi hi milai ih duhphorhnak ruangih a um mi le rinlo paral ih thil cangmi ruangah a um mi a si lo. Pathian in tlennak tumtah a neihmi hngohsan a si (Acts. 4:27,28). Leilung sem hlanih thah mi tufa Jesuh kha thutak a si (Rev. 13:8 KJV). The Handbook of Seventh-day Adventist Theology, (Hager Stown, Md, Review and Herald Publishing 2000). Pp. 275,276.

RELTLANG DING:

1. Protestant remthatnak ih a sullam reltlang uh. Thupi zetin ruat aw? Tui ni ah himi um lo sehla, kan leilung ziangtluk in so a danglam ding?

2. Leilung sem hlan ihsin rundam dingih kawh kan sinak kha tampi in ruat rero aw (Titus 1:1,2; 2 Timo. 1:8,9). Himi kan hmuh tikah ziangah so thazang kan ngah. Himi in milai hmuahhmuah hrangah Pathian duhdawtnak thu ziangso in sim? Milai hnenah a pekmi zangfahnak dung tun hi ziangah so riahsiatza zet a si thei?

3. Tlawngkai nili ni zirlai a netabik thusuhnak kha ruat aw. Na rual pipawl in an tul a si ahcun na kawhhran tihzah kai thei dingin ziangtin so na bawm ding?