MCS Vol 01, Issue 07: HONPA HONG SUAHNA

Thupatna: Leitung ah mawhna hong om cil a kipan mawhna pana Pasian in mihing a hotkhiat ding hun, khua vannuai in kum tul tampi ngak uh hi. Mite' lakah mi khat a Pasian ahong pian ding vantung mite in pilvang takin ngak gige uh hi. Mawhna vangik hong gik zaw semsem ahih manin mite in tua hun ding ngaklah mahmah uh hi. Satan in lah Pasian Tapa leitung ah ahong pai ciangin athat dingin ngak gige hi. A tawpna ah Pasian' sehna bangin ahun hong tung petpet hi.

1. Mary in nau paai ding a hih lam kua'n va gen hiam? (Luke 1:16, 30, 31)

Theih ding: Gabriel pen Pasian' van kamtaipipa a hihi. Mite' kiangah puak ding a thupi mahmah thute amah kisawl hi. Mary kianga a puak hih thu in a thupuak khempeuh lak pana a thupipen a hihi.

2. Mary in tua thu bangci nial hi-am? (Luke 1:34).

Theih ding: Mary pen Joseph kici mi khat tawh a kiteng dinga zuthawl kipiasa ahi hi. A kiten taktak ma-un, pasal nei nai lopi-in gaai ding cih thu tawh ama vang akiam ding hong hi hi.

3. A hong suak ding naungek tawh kisai-in vangtung mi in bang teng gen hiam? (Luke 1:35).

Theih ding: Hih thu in Isaiah 7:14 sunga genkholhna a tangtun nading ahi hi.

4. Mary le Joseph-te Bethlehem ah a pai nading uh bang thu hong om hiam? (Luke 2:1-5)

Theih ding: Joseph lah zawng, Mary lah gaikhah mah-mah ta ahih manin khual azin ding uh haksa sa mahmah uh hi. Ahi zongin tua ma kum za sagih lai-a Mikah 5:2 sunga genkholhna a tangtunna ahi hi.

5. Naungek koi lai-ah hong suak khilkhial hiam? (Luke 2:7)

Theih ding: Pasian' Tapa Jesu pen vantung ah vantung mi khempeuh in a pahtawi ziahziah uh ahi hi. Ahi zongin leitung ah a seiniam bel mihing namin Amah hong piang hi.

6. Naungek a va lawm masapente' lakah kua khawng kihel hiam? (Luk 2:8-15)

Theih ding: Gimpi-a nasemte' kiangah hih thupha van-tung mite in a va puakna un, Pasian in mizawng daipate a khualna hong lak hi.

7. Naungek Jesu a zong kua dang om lai hiam? (Matthew 2:1, 2)

Theih ding: Jesu in kuamah deidan tuam nei lo hi. Phung leh nam, mel leh sa, neih leh lam cihte khen lo-in Jesu in mi khempeuh khual kim hi.

8. Hih mipilte a kuan khia sak bang hiam? (Matthew 2:2,9)

Theih ding: Hih gam dang mite pen leitung buppi hong tan ding pa a hong suahna ding tawh kisai Lai Siangtho leh genkholhnate a limet mahmahte a hi uh hi.

9. Mipilte in bang letsong manpha nono puak uh hiam? (Matthew 2:11)

Theih ding: Naungek Jesu pen Kumpi khata ngaihsun uh a hih lam mipilte' letsongte in kilang sak hi. Ahi zongin Jesu pen gam kumpi dinga hong piang hi lo hi.

10. Ama tokhom a lauhuai sak hih thu Kumpipa Herod in koici phialmang sawm hiam? (Matthew 2:16-18)

Theih ding: Tangthu sungah amah A lian Herod kici hi. A taktak a hi-a upmawh ahi zongin ama langpang ding peuhmah dopbawl lo hi. Bethlehem kim nai-a naupang khempeuh thah ding thu pen ama lungsim a kilat-khiatna ahi hi. Pasian' Tapa hong suahna tawh kisai a genkholhna a tangtunna zong hi lai hi.

11. Joseph in naungek leh a nu koi-ah taipih hiam? (Matthew 2:13-15)

Theih ding: Gamla-a a gimhu-ai mahmah khualzinna ahi hi. Mipilte' piak letsongte mah a khualzina uh leh Egypt gama a om sung uh a nuntakpih uh hi ngel ding hi.

12. Herod a sih khit ciangin amaute koi-ah hong teng uh hiam? (Matthew 2:19-23)

Theih ding: Genkholhna a tangtuna khat hi leuleu hi. Joseph pen singlep siamna tawh a kivak hi-a, Jesu zong a hong gol ciangin, tua mah hong sem hi. Mark 6:3 le Matthew 13:55

Thukhupna: Jesu hong suah ciangin na lamdang tampi in hong zui hi. Pasian' Tapa, mihing Tapa hong suah cianga a piang dinga a kilamen bang lian ahi hi. Pasian mahmah mihinga a hong pian ding eite' tel zawh a hih loh hangin, mihing' tanga mawhna daan a hong thuak ding a hih nak leh, mihinga a hong pian loha a phawmawh ahi hi. Tua tham lo-in, mihing khat a hong suahna ah Pasian' Tapa in a zawngbel leh a seiniambel dinmun hong la-in, mi khempeuh' a dinga na a sem ding a hihna hong lak hi.

Numei..!Numei..!

1. Numei pen a pasal' ki etna limlang hi. (Ruth Bill) 

2. Numei hoih pen Sia za khat(100) tawh ki bang hi. (Zawr Herbert) 

3. Ngaihsutna hoih a pia theilo numei lauhuai hi. (Mother Terasa) 

4. Pasal te' ngaih theih a manpha pen in numei' lung-tang hi. (Geo Holland) 

5. Numei pen pasal sangin hatlo zaw ahih man in dawm in. (Victoria) 

6. Zi pil a nei pasal pen lawhciang hamtang hi. (Napoleon) 

7. Numei cih pen panpih, ahuh cihna hi. (Hebrew)

Source: Hangpi Hatzaw FB.

CIDAMNA THU

Sunshine (Nitaang): Nitaang i cih nam thum om hi: 

1). Manta mel (Natna lungno that hi). 

2). Akang mel (khuavak pia hi). 

3). Asan mel (lumsak hi). “Khuavak hoih mahmah aa, i mit in nitang a muh ciangin nuam mahmah hi” (Eccle. 11:7). 

Zingsang nisuak tung minute 3 sung khawng en le-hang ni pan a hong pai dat khatin i mit-nauta pailet in I khuak sungah lut aa hong khangmoi sak, hong nosuak sak hi. “Ahi zongin ka thu a hongmang note tungah dikna ni hong tang dinga, tua in nizang bangin note tungah cidam-na hong tun ding hi” (Malachi 4:2).

Nitaang pan a kingah phattuamnate:

1. Sisan kizelh na tha hatsak hi.

2. Lungtang pan sisan puakkhiat na tha hatsak aa atam zaw puakkhia zo sak hi.

3. I sihui te sungah oxygen atam zaw puak thei sak hi.

4. I siluan zia maan sak hi.

5. Natna lungno adal sikaangte thahatsak, pungsak aa, nat-na lungno suksiatna thahatsak hi.

6. Hemoglobin a kici natna ki-lawh loh nading a dal Pro-tein dat pen thapia in pungsak hi.

7. Ni suak tung pen naungek suaktung ci eng (jaundice natna) bawlna ding zatui hoih pen hi.

8. I sin thahatsak in, i pumpi sunga om gute lakhia hi.

9. Pumpi sunga (cholesterol) thau-te kiamsak hi.

10. I sagolhte cidam in thahatsak hi.

11. I lungsim ngaihsutna le muhnate thahatsak in lungkia natna damsak hi. “Nitang in inn sung a om natna lungno te that hi. Natna omlo a lungnuam innkuan ih hih ding thupi pen hi” (MH 276). ✍ Sianu Aye Cing

TATE KHANSUAH SIAMNA

Naupangte Sangkahna: American pilsinna sangte in sangkhan mun nuam, ngaihsutna kihopkhiat theihna, kisat kivelnate zat lohna, ngaihsutna le nuntakna ah mimal kim kampau theihna cihte thapia uh hi.

Sangte in nulepate tungah a lamet uh:

♕ Nu-le-pa le siate kimuh khopna pai pelmawh ding (a tawmpen kum1 in 2vei ta kinei hi).

♕ A kisap leh ki pumpiak a sepna (volunteer) nei ding.

♕ Naupangte innlai bawl dingte zawhpih gai ding.

♕ Sang panin laikhak (thupuak laidal) te sim hamtang ding.

♕ Sang khak ni le zum khak nite thei ding.

Sang ii vaihawmna ahi kimawlna tuamtuamte ah na tate a kihel nangin thapia in.

Nitumna gamte ngeina ah naupang (numei/pasal)te kimawlna / kipawlna tuamtuamte a kihel nangun khaktan ngeilo uh hi. Tua bang kimawlnate ah a kihelna uh hangin phattuamna tampi ngah thei uh hi:

♕ A ci uh dam zaw hi.

♕ Hun awng neilo uh a, buaina om lo zaw hi.

♕ A khanpih lawm-le-gualte tawh kilawmtatna nei thei uh a, a kihel lote sangin huzap hoihte ngah zaw uh hi.

♕ A siamna, kivaknate uh khangto uh a, amau le amau kimuanna nei uh hi.

Nang in naupangte kimawl nite ah va pai in, tha na piak ding ahi hi. Ref: Parenting Presentation (Zop Lai Ding)

MAKAI HIHNA

⚉Thumanna tawh gam a ki-uk ciang in mi khempeuh kipak a, thuman lo tawh a ki-uk ciang in mi khempeuh hingim hi. Solomon Paunak (Pro 29:2)

⚉ Thumanna in minam lamsang a, thuman lohna in zumna piangsak hi. Pro 14:34

⚉ Makai pa mizawngte tungah a thuman leh a za kip ding hi. Pro 29:14

⚉ Mizawngte a nenniam ukpa in mehtehmehgah susia huihpi tawh kibang hi. Pro 28:3

⚉ Thuman tawh a ukpa in gam thahat sak a, golhguuk a ne pa in gam susia hi. Pro 29:4 

Source: Building A Better Cambodia

Volume 01 Issue 07 by DavidLian on Scribd