SINNA 2: PAUL’ THUNEIH NA LEH LUNGDAM NA THU

NIPI NI (SABBATH) NITAK LAM July 1

SIMDING TE: II Pet. 3:15,16; Gal. 1; Fili. 1:1; Gal. 5:12

KAMNGAH: Tu-in keimah in mi deihna zui ka hi hiam? A hih kei leh, Pasian deihna zui ka hi hiam? Mite pahtaakna ding hanciam ka hih leh, Khris’ sila ka hi kei hi. (Gal. 1:10)

University Sangpi khat pan-in sangnaupang honkhat te in, a mau sanghuang laizang san takah, minam, numei pasak, a zawng ahau, upna biakna cih te tawh kisai in ki deidan a om

lo, a ut peuhpeuh te a dingin sungtum pusuah theihna dingin, tawkngakna buuk khat hong

lam uh Kum tampi khit ciangin tua sangnaupang te in a sangpi uh hong hawh kik uh a, a hi

zongin nidang a alam uh tua tawlngakna buuk pen, sangnaupang thak te in na laihgawp mawk uh hi. A kuama peuh ki deidan lo in, ki pumkhat taka omkhop ngeingai theihna dingin a kibawl khan golpi a muhsawm uh pen, tu in minam, numei pasal, a zawng ahau, upna biakna, a kilam dan na tungtawn in, a khan golpi sungah khan meng nono tawh na kidei mang ta hi. Sangnaupang te in bel tangtawng pek panin a kinei toto thuneihna tawh hi ci bangin alaih ka hi uh hi cih san uh hi.

Tua bang mahin, Paul in Galati Pawlpi a laikhak laitak in, hi bang dinmun dan mah a thuak laitak ahi hi. Gentile mite in, Zeisu sungah upmuanna (Faith) khat bek tawh Pawlpi sungah

hong kizop na dinguh a hanciam laitak in, Biakna makai thuhilh sia te in, Biakna kizopna sungah Gentile te hong lut nop uh leh, Vun-at masa ta uh hen, ci in kal tentan uh hi.

Hih buaina, dinmun tawh kisai in, Paul muhna ah Lungdamna Thupuak laigil (essence of the gospel) langdo na taktak ahi hi. Tua ahih man in, a thuhkik hong kul hi. Tua a thuhkikna dingin Galati laikhak hong gelh ahi hi.

NIMASA NI (SUNDAY) July 2PAUL, LAIKHAK GELHPA

2 Pet. 3:15, 16 sim in. Pawlpi masa te in Paul laikhak tawh kisai in koi ci bangin sanguh hiam cih hih Laisiangtho mun in bang gen hiam? Khasiangtho in humop cih tawh kisai Hih mun ah hong bang ci hilh hiam?

______________________________________________________________________________

Paul in Galati gama om Pawlpi mite tungah hih laikhak a gelh laitak in, a laigelh siamna lam a laknuam ahi kei hi. Tua sangin, Khasiangtho makaihna tawh amah leh Galati thu-um mite dinmun a pulak nuam hi zaw hi.

Galati laikhakt dan ama laikhak dangte in Paul ii sawltak nasepna sungah mun thupia dingin panmun la mahmah hi. Gentile gam te ading in gammial phu (missionary) khat ahih na tawh Paul in Mediterarranean tuipi kuampi sunga, a ki thehthang mun tampi ah Pawlpi tampi va phut thei hi. A hih theih zah mahin tua Pawlpi te va veh zel thei hi mah leh, mun khatah hun sawtpi la in ompih man ngei lo hi. Tua bangin a ompih theihloh hangin, Paul in, a laikhakte tawh Pawlpi mite tungah lamlak in, makaih thei hi. Hun tampi tak mah la in, Pawlpi om na mun tuamtuam te ah, Paul’ laikhak te ki hawmsawn koikoi uh hi (Kol. 4:16). Paul’ laikhak te tampi mah mangthang khin hi mah ta se leh, ama min tawh Laisiangtho Thak sungah laikhak a bu in, a tawmpen 13 bang ki mu thei hi. A tunga Laisiangtho mun sunga Peter gen mah bangin, Paul’ laikhat te pen Laisiangtho sungah heltak cing khat hong suak hi. Tua in, Pawlpi masa te tangthu sungah, Paul’ nasepna in bangzah takin thunei in, phattuam pih uh hiam cih kimu thei hi.

Hun khat khit ciangin, Christian honkhat te in Paul’ laikhak te pen tuamdiak a hih manin, Pasian humop kammal a suah theihna dingin Khasiangtho in panpih hi cih upna hong nei uh

hi. Hih ngaihsut na pen Oxford University pan in khangno mipil nih, Bernert Grenfell leh Arthur Hunt te geelin Egypt gam panin tanglai laizial 500,000 bang hong muhkhiat na pan in hong piang khia a hi hi. (tua laizial te pen papyrus ki ci a, I laidal te a om ma, Zeisu pianma lama kizang singhawng, savun pana kibawl te ahi hi). Tua bangin hong muhkhiatna uh sungah Laisiangtho thak sunga laikhak te, vanngahna receive laite, siahpiak na lai te, mimal laikhak te zong kihel hi.

Mi khempeuh in lamdang a sak thu in, Tua hun a midang lai-at te tangpi’ gelhdan te leh Paul laigelh te’ ki thu-mun cih thu ahi hi. Tua laikhak sungah (1) Laigelh pa leh a ngah ding te’ zahtak piak na tawh muahna kammal zatna (2) Lungdam kohna kammal genna (3) a gen nop thugui te pulak khiatna (4) tawpkhak-thapiak na cih te kihel hi.

Tom kaih ni. Paul in a ma hun lai a laikhak dan te mah zui in, tua hun lai mi te in a maingap theih na ding uh leh, a kineel theih na ding in kammal hoih te zatna tawh kampau hi cih thu ahi hi.

Tun hun laitak in Laisiangtho a ki-aat saan ding bang hi leh, Topa in bang style, kammal, gelhdan te zangin eite’ kiang hong tun thei dingin ngaihsun na hiam?

NINIH NI (MONDAY) July 3PAUL’ A KI SAPNA

Paul laikhakte’ in a huampi in, tanglai laigelh dan’ zui zaw mah ta leh, Galati laikhak in, a

dang laikhak’ dang te sunga kimu lo, a tuamkai diak na om hi. Tua a ki lamdan na thu I deih nak leh, Paul’ in a gelh laitak dinmun hong telsak zaw ding hi.

Gal. 1:1,2 sunga Paul’ kam patna azat, muakna kammal te leh adang mun te ahi, Eph. 1:1; Filip. 1:1; 2 The. 1:1 te tawh saikak in. Muahna kammal tektek a zatna ah, a kibat na leh a ki lamdan na te gen in.

______________________________________________________________________________

Galati laikhak’ sunga Paul muahna kammal te in, a Laikhak’ dangte sangin a sau zawk ban ah, a tuam pha deuhin, sawltak a hihna leh a thuneihna te hong genthuah hi. “Sawltak”  (Apostle) I cih ciangin “sawlkhiatna ngahpa” (someone who is sent) a hih kei leh “kamtaipa,

tangkopa” (messenger) cihna ahi hi. Laisiangtho Thak bu sungah bel kician takin, Nungzui pi 12 te a cihna hi a, Zeisu a thawhkik khit ciangin a mau kiangah kilaak in, tetti a pang dingin a sawlkhiat te ahi uh hi (Gal. 1:19; I Kor. 15:7). Paul in bel hih teeltuamte’ sungah a kihel ka hi hi ci hi.

Paul in a sawltak hihna mikhat tungtawn ah kinga hi cih a nial tentan na pen, Galati a om mihon pawlkhat in, a sawltak’ thuneihna sumit nuam takpi hi cih kilang hi. Bang hang hiam cih leh, Paul’ thugen ahi, Thukham zuihna hang’ hi zaw lo in, Zeisu sungah upmuanna neihna bek tawh Gupkhiatna kingah hi, a cih na tungtawn pan in, Pawlpi sung panin mi honkhat lungdam thei vet lo uh hi. Paul kammal te in thumanna’(obedience) phiat nuam hi, ci in ngaihsun uh hi. Hih Paul a buaisak nuam te pen mi vet’ mahmah te hi lai uh hi. A mau te in theihna tungtawn pan in, Paul’ kammal zat te, John 3:34 sunga Sawltakte’ thuneihna tawh kizom hi cih mu uh a hih manin, tua a thuneihna pen khaktan theih na dingin nasia takin a do dingin hong khensat uh hi.

A hi zongin, a mau te in Paul’ sawltak hihna pen direct takin nial sam lo uh hi. Tua zahpi in a thupi lua hi masa kei ci uh hi. Amau te’ cihnop zawk thu in, Paul pen Zeisu’ nungzui masa

taktak hi lo a hih manin, a thuneihna pen Pasian kiang pan hi lo dinga, mihing ahi Antioch panin Pawlpi makai te in, Paul leh Barnabas tegel’ giammial phu dingin a seh uh hi ding hi, ci uh hi (Sawl. 13:1-3). A hih kei leh, Paul’ a tuiphum pa Ananias’ kiang pan a hong pai hi ding hi, ci lai uh hi (Sawl. 9: 10-18). A mau te’ ngaihsut na ah, Paul’ pen Antioch a hih kei leh Damascus pan in, kamtai pa hi lel dinga, tua kan, hi ken teh’ ci uh hi. Tua ahih manin, a ma thugen te’ ama ngaihsutna hi lel dinga, Pasian kiang pan a Kammal te’ hi lo ding hi, cih san uh hi.

Paul in zong hi banga a lauhuai mite’ upmawh siatna, mawhsak na thu thei a hih man in, dawng kik pah a, tua Sawltak thuneihna’ pen Pasian piak a hih zia kipsak hi.

Tu laitak, I Pawlpi sungah ki bilhcip na panin, koi ci bang lampi tawh Laisiangtho thuneihna in, tona’ (challenge) thuak a hi hiam? Tua to na’ koi ci bangin thei-siam ding

I hi hiam? A thupi zaw khat ah, Laisiangtho thuneihna in, nangma ngaihsut na sungah

koi bang ciang hong huzap zo hiam?

NINIH NI (TUESDAY) July 4
PAUL’II LUNGDAMNA THUPUAK

A Sawltak’ thuneihna a kihuut kawm in, Galati mi te kiangah Paul in, bang thu bulphuh in muahna lai gelh ahi hiam? (Gal. 1:3-5 leh Ephe.1:2; Fil. 1:2; Kol. 1:2 te tawh saikak in).
______________________________________________________________________________
Paul laikhak te sungah a tuamkai diak na a kammal zat khat in, muahna kammal a zat sim in, Hehpihna (Grace) leh Nopsakna (Peace) cih kammal tegel zomtuah in, hel hamtang hi. Hih kammal nih te geel pen Greek mite leh Jew mite a dingin, kimuh khopna ah, a zat ngeina khat uh a hi hi. Greek laibu gelhte in, thumasa sungah muahna kammal, lungdam kohna kammal (Greeting)a aat uh ciangin, “Chairein” a cih uh pen, Paul in a aw suah kibang veve “Charis” (a khiatna: Grace= Hehpihna) cih kammal na zang hi. “Peace” (nopsakna) cih bel Jew mite in, a zat uh “muahna”, “lungdam kohna” kammal ahi hi.

Hih kammal tegel Paul in a zatna pen, mite lungkim na ding beka, a zat hi lo hi. A taktak zaw in, tua kammal te in, a ma’ Gospel Thupuak bulpi hi zaw hi. (Tua bek thamlo, Laisiangtho Bu Thak agelh te sungah Paul mah in, hih kammal zang pen hi). Tua Hehpihna lehh Nopsakna in Paul kiang pan-in hi lo a, Pa Pasian leh Topa Zeisu kiang pan hi zaw hi.

Gal. 1:1-6 sim in. Paul in Lungdamna Thupuak (aspect of the gospel) sungah bang thugui let te huam dingin hong hel hiam? 
______________________________________________________________________________
Paul’ laikhak sunga, a thupatna, muakna kammal sungah, Lungdamna Thupuak luanzia laigual tawmcik khat tawh ahong pat kiau hangin, anuai lam khanneu laigual dangte sungah, ciiltak in hong gencian suk hi. Lungdamna thupuak I cih pen, bang thumaan tungah ki-nga hiam? Paul in a hong theihsak nop thu in, ama’ langpang te’ bulphuh thukham zuihna tungtawn pan-in hi zaw lo in, Lungdamna Thupuak taktak I cih in, Topa Zeisu Singlamteh tunga eite adingin a hong sihna thu leh tua sihna pan-in a hong thawhkikna tungtawn pan-in suahtakna I ngah na ah ki-nga zaw cih thu ahi hi. Khris’ hong sihna leh thawhkikna in, a hong huzap, mihing te’ mawhna leh sihna hong suktan sak bek thamlo in, gilopa vangliatna, saltan na pan in suahtak theihna hong pia a hih man-in, ei leh ei te in, I septheih ngeiloh ding masuan khat a hong sepsak na ahi hi.

Ei te a dingin Pasian in, Khris tungtawn a, a hong bawlsak a lamdang Hehpihna leh Lungnopna thu te hangin Paul in, a lungngaih ciangin Pasian pahtawi lo in om thei lo hi. Tua pahtawina kammal (Doxology) pen, Gal. 1:5 sungah ki mu thei hi.

Gal. 1:1-5 sim in. Na tel dan in, Paul in a kammal zat “Gospel” a hi, “Lungdamna Thupuak” a cih ciangin bang hi a, bang teng kihel cih mukhia thei na hi hiam?

NITHUM NI (WEDNESDAY) July 5
LUNGDAM NA THUPUAK DANG OMLO

Paul’ laikhak te in a huampi in, muak (h) na kamhon na tawh a bulpat khit ciangin bangin zom hamtang hiam? Koi ci bangin Galati laikhak tuamkai diak hiam? Gal. 1: 6 sung leh, Rom. 1:8; 1 KCr. 1: 4; Fil. 1:3; 1The. 1:2, mun te tawh saikaak in.
______________________________________________________________________________
Mun tuamtuam a om Pawlpi mite tungah lai akhak ciangin, Paul in, A mau khuatual Pawlpi Buaina te leh To’na a neih te uh a kuppih theih zel mah bangin, thunget sakna tawh muah(k)na kammal te a zat tawntung ban ah, laisim mite in a kip Upmuanna a neihna hangun Pasian tungah a lungdam na pulaak zelzel thei hi. A khelnono gamtatna tawh kidiah Korin Pawlpi a laikhakna ah zong tua bang kammal mah zangin na hopih hi (1 Cor. 1:4 leh 5:1 saikak in). A hi zongin Paul in, Galati Pawlpi a laikhak ding ciangin, a lungsia (dah) lua mahmah ahih manin, Lungdam kohna kammal cih te hel nawn vet lo in, a thugui pi sungah lut pih pah hi.

Galati khua sungah a piang thute hangin, Paul in a bangzah takin lung himawh hiam cih a theihna dingun bang kammal khauh te hong zang khia hiam? (Gal. 1:6-9; 5:12 sungte sim in). 
______________________________________________________________________________
Galati mite a khialna uh hangin Paul in, iip nei vet lo in a nasia takin mawhsak hi. Sapna a ngah Christian dingin micitak lo te ci-in ngawhgiap hi. Gal. 1:6 sunga “nusia” cih kammal pen, galkap khatin a galkap hihna panin a tawp leh gam a dingin a cihtakna a “nusia” cih kammal tawh a kibang ahi hi. Kha thu in gen leng’ Galati mite in, Pasian kiang pan in upna thu ah nunghei khin uh hi, cihna ahi hi.

Galati mite in koi ci bangin Pasian kiang pan-in nung-hei khin uh hiam? A tuamkai Lungdamna thupuak a san man uh ahi hi. Paul in a gennop thu ah, Lungdamna thupuak (gospel) khat sangin a tam zaw om hi a ci hi lo in, a hi zongin, Pawlpi sung pan in, mi honkhat in Zeisu sungah Upmuanna (Faith) neihna bek tawh kicing lo a, adang Lungdamna thupuak dang, a om lai bangin, (Sawl. 15:1-5) a hilh te a gennuam ahi hi. Tua bangin, Lungdamna Thu (gospel) lang gen in, a heikawi nuam te tungah heh mahmah ahih man in tua bang mite in, Pasian haamsiatna a thuak ding uh lunggulh phial hi (Gal. 1:8). Hih thu tawh kisai in, Paul in uanggen nuam lua a hih man in a kibang kammal nih vei pulak liang hi (Gal. 1:9).

Tu hun ciangin zong, I Pawlpi sung mun khatkhat te ah, I Thugui let (Doctrine) te sangin I tuahkhak thute (Experience) ki uang zat lua kha thei hi. Pasian tawh I kizop dan leh, I tuahkhak/ muhkhak thu te a kilim gen pen zong a hi hi. A hi zongin, I tuahkhak thu te bangzah in thupi mah ta leh, Paul laikhak in bang dan in, Thugui let (Doctrine) maan I neih ding a thupit zia hong hilh hiam?

NINGA NI (THURSDAY) July 6
PAUL’ LUNGDAM NA THUPUAK A BULPI

Galati gam pan in, a langpang mite in, Paul’ thugen te pen, midang te a thuzawh theihna dingin, a ma lunggulh dandan in a gen hi lel ci in mawhsak uh hi. Mi deihna bang zui-in, hanciam in mi zol nuam hi leh Paul in bang ci bang lampi tawh kalsuan zaw ding hiam? (Gal. 1:6-9, 11-14) sim in.
______________________________________________________________________________
Bang hangin Paul in, a kikheel Gentile te tungah vun-atna a neihna ding un kun lo hiam? Paul’ a langpang lam te in bel, Paul’ in koi ci bang khat pan in akikheel uh pha zo a ci hi’n teh, ci in mawhsak uh hi. Amah pen, midang te pahtaak dingin hanciam pa a hih manin, hih Gentile te in vun-at loh theihtheih na dingin ngen veve ding uh ahih manin, a nelhsiah bawl hi zaw ding hi ci in ngaihsun uh hi. Tua ci bangin hong langpan uh ciangin Paul in, a neu 8 leh 9 sungah I muh mah bangin a khauh kammalte tawh dawng kik hi. A thupuak te ama lunggulh bang lian in kisang siam hi leh, kammal dang zangin dawng kha mah ding hi ven.

Bang hangin Paul in, Mihing te lungkim’ na ding hanciam kawm sa in Khris nungzui kisuak thei lo hi, ci hiam?
______________________________________________________________________________
Pasian kiang pan in direct thuneihna tawh Lungdamna Thupuak tangko a hih zia Gal. 1:11, 12 sungah a pulaak khit ciangin, a neu 13-24 sungah koi ci bangin a kampau deihna genkhia hiam?
______________________________________________________________________________
Hi ci bangin Lungdamna thupuak a neih theihna pen Pasian lo ngal, kuama kiang pan hi thei peuhmah lo a hi zia, Gal. 1:13-24 sungah a teci pan-na ah ki mu thei hi. A neu 13, 14 sungah a kikheel ma thu, a neu 15, 16 sungah a kikheelna thu, tua khit zawh thupiang te 16-24 sung tengah ki mu thei hi. A sapna ngahna tawh kisai in a thupuak te a ki tangnial gawp loh na dingin, Paul in ding kawm sa in thugen ciatciat hi. Bang thu bang la piang ta leh, a kisawl thu te a gen dingin, a sem dingin a kiging sa in om hi.

Zeisu sungah Sapna ngah na hihna tawh ki zui-in bang zah in ki theihcian na nei na hi hiam? A nasem dingin Pasian in a hong sap takpi mah ka hi hi ci-in, koi ci bangin kitel cianna nei na hi hiam? Sapna angah takpi mah na hih lam na ki telcian laitak keek mahin, midangte’ hong cianpiakna bang hangin na man theih na dingin sin kul lai hiam?

KIGIN NI (FRIDAY) July 7SINBEH DING:

Mun leh gam khempeuh a om Pawlpi sung phial ah, a pian kipat tunga kipan Jew minam a hi ngiat thu-um mi te om uh hi. Tua banga a piangthak Jew te mitsuan in, Paul a langpang thuhilhsia te in Pawlpi sungah mun leh phual hong la thei uh hi. Laisiangtho sung’ bulphuhna tungtawn pan-in Paul in a thuhilh te zawhthawh thu tawh nial zo ngei lo ding cih ki thei uh ahih man un, Paul’ thuneihna a sutsiat theih na dingun, ngimna dang khat hong zong khia uh hi. Amah (Paul) pen, Sawltak taktak te lak ah a kihel lo a hih ban ah, Topa Zeisu kiang panin, Sawlkhiatna lianpi (commission) direct in ngah lo hi. Tua bek tham lo in, Peter, James leh Sawltak dangte thuhilhna tawh a kilehbulh thu te pulaak hi ci in ngawhin mawhsak dikdek uh hi.

Hi ci bangin Dawi gilo in, Pawlpi sung hong suksiat sawm na a muh ciangin, Paul lungsim’ nasia takin kitok hi. A manlang thei pen-in Galati Pawlpi mite tungah lai hong khak paha, a ngaihsut khialhna khempeuh uh pholak khia in, Upna sung panin a lampial khempeuh te tungah nakpi takin taai in thuhilh hi. Ellen G. White: Sketches from the Life of Paul, pp. 188, 189.

KIKUP DINGTE:
1. Nangma theihna tawh kizui in, Gospel I cih (Lungdamna Thupuak) pen bang cidan in gencian thei ding na hi hiam? Laigelh dang tuamtuam te sung pan in bangci tel theih ding I hi hiam?

2. Paul in, Galati a Laikhak thukong hon na sungah, Zeisu sihna ahang’ a kician sitset in hong pulaak hi. Bang hang’ hi dinga, tuhun ei adingin a khiatna bang nei hiam?

3. Gal. 1:14 sunga, Paul in amah mah, tang Jew te ngeinate a nakkin mahmah mikhat a hih zia a pulaak na tawh kizui in, I Upna sungah ngeina in bang ciang mun hong la a, Paul tangthu tungtawn panin, ei a dingin bang ci bangin, Upna sung kalsuan na ah, Ngeina tawh a kisai in koi ci khentel theih ding I hi hiam?