Kumkikna Lamen Innkuan - Khen 18 (Azom2)

  

 LEITHAK NGAIHSUNIN

Mailam Minthana Muhna.—Jesu makai in khuapi panin tuaksuk uh hi. Hih leitunga mual lianpi khat in Jesu pua zoloin, kiphelkhapa, zangkuam zaipi asuak hi. Atung ettoh ciangin Kongpi 12 leh bulphah 12 anei khuapi kimu hi. Pang khatah kongpi thum oma, kongpi khatah vantungmi khat ta om hi. “Khuapi, alian khuapi, hong pai zota hi, vantung Pasian kiangpanin hong kumsuk ta hi” ci in kiawng hi. Tualeh eite’ dinna munah hong kinga hi. Tua khuapi’ pua-a alamdang aminthang nate endingin kapai khia uh hi. Inn golpipite, ngun bangin paak ka mu a, khuam lianpipi lite tawh kido-in kep tawh kizemin etlawm mahmah hi. Hih inntein misiangthote’ luahding ahi hi. Tuate khat sialin kham tawh kibawl laibusaal nei hi. Misiangtho tampite alut uh kamu hi. Ataang kham lukhute suahkhia in tua laisaalteah akoih uh hi. Tua ciangin innkim-a huan lakah paikhiain, leitang tawh na asem uh hi. Hih leitunga lei tawh nasep bang hilo hi. Hivet lo hi. Amaute lutungah khuavak oma, atawntungin Pasian tungah phatna la kinken uh hi.

Huan dang khat ka mu hi. Tualai ah paak bekbek ka mu-a, khat lo-in “guai ngeilo ding” ci in ka awng hi. Tua khit ciangin lopa kungsang pona khat kamu hi. Hing kilkela, ngun leh kham meel pua in pahtawina tawh Kumpi Jesu akhutvan uh hi. Tua khit ciangin ganhing namkim tawh akidim zangkuam kamu hi. Humpi, tuuno, kamkeei, ngiate kilem takin takhawm uh hi. Tuate lak kanawk uhciangin daitakin kanung uh hong zui uh hi. Singkung lak kalut uha, leitunga khuamial gammang tulakdan hiloin khuavakin taan zihziah hi. Singhiangte in kiling ngiaingiaiin “gamlakah ngaihmuang takin ihteeng dinga, singlakah ihlum ding hi” ci in ka awng uh hi.1

Asang Thusinna.—Tuamunah bangmah kisinlo ding hiam? Tualaiah eite maiah bang hong kilak ding ihthei kei hi. Christ tawh nuntakna tui kiangah lam ihpai ding hi. Piansaknate ahoihna aphatna Amahin hong lak ding hi. Ama adingin eitein bang hia, eite in Ama adingin bang hi, cih zong honggen ding hi. Tuin ih theihzawhloh thumaante tuaciangin ihtheita ding hi.2

Vantunginnpiah pilnasang ihzawh nangin Christian innkuanin kipattahna sang ahi hi.3 Vantungin sang hia, apiang vantung leitungte’ thu sinding hiin, eite sia in Mongneilo Pasian hia, hih sang ie ahiang khat zong Eden ah kiphut ngei hi. Eden huan sanga atangtung khin hotkhiatna kisin laiding hi.

Piancil-in akiphut Eden sang leh ahong paiding sang kikalah leitung tangthu ahi, mihing’ mawhna, thuak- siatna, Pasian kipiakkhiatna, sihna leh mawhna tungah gualzawhna, Ama maiah mihingte pianngei kipiakik thu ahi hi. Pasian in mite hilhkik ding hi. “Ka mite in Ka min theiding uha, tuani ciangin amaute in Keimah hong theiding uh hi. Tua in Keimah kahi hi.”

Tua lai-ah, eite mit tuamna hong kilakkhiatsak dinga, leitung ie hoihna muhloh ihnei keiding hi. Vantung’ minthanna ihet ciangin tu-in gamlapi panin ih-en a, ahizongin mawhna ie dalna akilak khit ciangin leitungbup in “Pasian’ hoihna” ah kilang dinga, ihsin ding vaivum in vum ding hi.4

Vantungah Theihna Pungding.—Hotkhiat mite sindingin piansak khempeuhte kihongkhia ding hi. Sihnawnlohna in asuahtaksak mah bangin leitungdangte ah akhate uh tawh leengdinga, leitung mawhna hangin adah mite-in gupna angah amuh uhhangin kipakna lasa ding uh hi. Genkhiatbeilo nuamna tawh leitung suan leh khaktein mawhna sungah akia ngeilo mite nuamna leh pilna sinding uh hi. Pasian’ bawlsate alungngaihna panun akhangkhangin amuhkhiat uh pilna saalte kihawm ding uh hi. Ciangtan aomlo khuamuhna tawh piansaknate en ding uha, ni, kha, aksite leh amaute ading Pasian’ hunsehnate zong mu ding uh hi. Aneu pen panin alian pen dong, na khempeuhte tungah Piangsakpa’ min kigelh hi. Tuate khempeuh tungah Ama’ hauhna kipulaak hi.

Tawntung hunte kiveiin, akicing zaw, avanglianzaw Pasian’  kipulaakna kimu ding hi. Pilna in apungto zel ahihmahbangin itna, zahtakna, leh lungnopna zong khangto zel hi. Mite in Pasian’ thu sintektek leuh, Ama’ zia leh tong iplah semsem ding uh hi.5

Mihon Nuntakna.—Eite ihkitheih bangin amaute zong ihtheiding hi. Eite sungah itna leh hehpihna Pasianin ahong guansak mahbangin diktakin zatkhiatna ihmu ding hi. Asiangtho nuntakna aneite tawh kikholh khopna ihnei dinga, vantungmite leh khang tawntunga misiangthote kithutuakna in vantung innkuan leh leitung innkuan asiangtho kikhihna piangsak hi. Tuate in ahong paiding eite tuahding nuntakna ahi hi.6

Leithakah Hunbeisakna.—Leithakah hotkhiatna angah mitein acilin Adam leh Evua lungnopna aguan nasepte sem ding uh hi. Eden huan nuntakzia kinungta dinga, huan leh lo ah hun kizang ding hi. “Amaute in inn lamding uha, teeng ding uh hi; leenghuan bawlding uha agah neding uh hi. Midangte teen nading inn lamlo dinga, mite nekding leengah huan bawllo ding uh hi. Banghang hiam, cih leh singkungte hun in mihing hun mahbang hia, Ka teeltuamte in akhut tawh asep uh tawh nuamsa ding uh hi.”7

Tualaiah mihing’ neih vangliatna khempeuh kikhang khan dinga, siamna khempeuh khangto ding hi. Nasep lianpipite kivaihawm dinga, kitangtun ding hi. Tua laiah iplahding nalamdang athak omdinga, kahtoh ding mualsangte zong naom ding hi. Thumaan thak zong omdinga, pumpi, khuak leh kha vangliatnate akisam muhding na om ding hi.8

Tangtung Kuan hita.—Leitung tangthu athupit pen hunin anungta ih hi hi. Mawhna bawlding hun, palsatnaah tualbial hun ding om nawnlo hi. Tulai hun zong tuabang mah hun ahi hi. Tawntung gamgi atungta ihhi a, hun leh tawntung vaiah hun thupi sung alut ihhi hi. Tu-in misimin ihlungtang kienkikinin, khalam khuamialna leh ihbuahbannate Dikna Nitang tawh asiangsak dingin thum hun ahi hi.9

Na khempeuh atangtun ding hunah aom eite in ahong tungding thu lobuang bangdang lunglawp huai hiam? Pa masate in Eden huan panin akalsuan khiat hun panin akingak, thu akingen, akilunggulh, leh akivil thu in kumkikna bek ahi hi.

Khualzinpih sanggamte aw, leitung hunzatnate leh leitung khuamial laizangah eite ihom lai hi. Asawtlo-in Honpa hong kilangdinga, hotkhiatna leh tawldamna hong pia ding hi. Upna tawh ahong tungding Pasian khut tawh akibawl leithak lamah khuadak ni.10

Mimal Kigin nading Thumna,--Meilom tuangin vantungpan ahong kumkik Christ amuak dingin kithawi un. Nisim in leitungnate nalungtang panun hemkhia un. Nathuaknauh tungtawnin Christ tawh kipawlkhopna bang hiam, cih thei un. Thukhenna adingin kiging un. Thu-umte khempeuhin aiplahdingin Christ ahong kum ciangin tawldamna tawh Amah adawnte lakah nakihel ding hi. Tuani ciangin hotkhiatmitein Pa leh Tapa minthanna tangin ding uh hi. Vantungmite in tumtheihte tumin Kumpipa pen gualzawhna pakte tawh dawnding uh hi. Tuuno sisan tawh akisawpsiang khinte in dawn khading uh hi. Gualzawhna awgingkhia dinga, vantung thawnding hi. Christ in zozo hi. Amahin vantung zumpi lutin, hotsa mite kithuahpihna tawh, Ama thuaksiatna leh akipiakhiatna tetci pang ding uh hi.11