Kumkikna Lamen Innkuan - Khen 18 (Azom1)

EDEN HUANAH NUNTAKNA

Eden Kipiakik.—Eden huan lamnuam panin mite akihawlkhiat sawtpi khit ciangdong Eden huan omlai hi. Amaute in mawhna aomlo huan siangtho gal et theizel uha, asungah lutding vantungmite in phallo uh hi. Pasian’ vangliatna ataanna kherubim vantungmitein Paradis kongpi cing uh hi. Tuamunah Adam leh asuan akhaktein biakpiakna apiadingin hongpai uh hi. Hih munah thuman ding kipsak zel uha, tuapan mahin athupalsatna hangun kihawlkhia uh hi. Mawhna tuihualin leitungbup atup ciangin mihingte gitlohnain tui tawh sawpsiangding khensatna ngaha, Eden huan aphutpa’ khutin leitung panin kihemkhia hi. Ahizongin atawpnaah “vanthak leh leithak” hong kipiakik dinga, akipatcila minphatnate sangin alianzaw in hong kipiakik ding hi.

Tuaciangin Pasian’ thukham azuitein nuntakna singkung nuaiah sihnawnlohna huih dik ding uha, akhang tawntungin mawhna alutlo leitungdangte in kicinna tawh akidim Pasian bawlsa nate limlahna tua lungdamna huan, Piangsakpa ngimna akicinsak mawhna tawh akisawh khalo huan en ding uh hi.1

Hotkhiatna ngimna lianpiin Pasian maipha ngahkik dinga leitung kilakik ding hi. Mawhna hangin akimansuah khempeuh kipiakik ding hi. Mihing bek hilo, thuzuite’ tawntung teenna ahidingin leitang nangawn akitankhia hi. Kum tulguk sung Satanin leitung auk ding hanciam hi. Pasianin leitung abawlcila kipanin angimna bulpi tuin tangtung sak hi. “Sangpenpa’ misiangthote in kumpi gam lakikdinga, atawntungin aneiding uh hi.”2

Akileisa Neihsa Tatkikna.—Leitungin hotkhiat mite’ tawntung teenna asuah ciangin piansak lai-a Pasian ngimna tangtungta hi. “Midiktein tua leitang luahding uha, atawntungin teengding uh hi.” Eden huanah meikuang nam-in Adam leh Evuate alutding phallo-a acinhun akipanin misiangthotein alamet hunuh “akileisa neihsa tatkikna” hong tungta hi. Acil apatin leitung pen mihingte’ gam dingin akipia ahi hi. Satan’ khemna tawh tu tanvei galpa khut sungah aom hia, tatkhiatna ngimna lianpi tungtawnin kilei kik zo hi.3

Adam masa hangin akimansuah khempeuh Adam nihna tawh hong kipia kik hi. Kamsangpa in, “Tuuhonte Tausang aw, Zion’ tanute bukna suangpi, nang tungah amasa ukna nangawn hong kipia hi” naci hi. Paul in zong “akileisa neihsa tatkhiatna” thu nagen hi.

Pasianin misiangthote leh milungnuamte’ teen na dingin leitung nabawl hi. Pasian’ vangliatna tawh kithak suaksakin, mawhna leh dahna panin suahtakna kipia a, tatsa mite tawntung-inn asuah ciangin Pasian’ ngimna tangtung ding hi.4

Eden Huan Adam Kipiakik.—Eden huan panin akihawlkhiata kipan leitunga Adam’ nuntaknain dahna bek tawh kidim hi. Nahteh site, meihal biakpiakna ganhingte, piansaknate’ maitang amualsak, mihingte’ sianthona aninsak khempeuhin mawhna phawksak hi. Leitungin mawhna tawh kidim amuh ciangin akisikna ie khuisatnate, leh akihilhkholhna adawnnate in mawhna hanga apiang ama’ tunga samsiatnate ahi hi. Lungduai kiniamkhiat takin amawhna dantatna kum tul khat phialsung pua hi. Thumaan takin kisik kika, ahong paiding Honpa hehpihna muang hi. Thawhkikna lamensa in asi hi. Pasian’ Tapa in mihing guallelhna leh kiatna honkhia in, tu in, Ama’ palai sepna tawh, Adam in amasa ukna nangawn ngah kik hi.

Lungdamna tawh kidima, amahin khatvei lai-a anopsakna leh sianthona aneih lai-a amahmahin tua singkung gahte lo-in, nein, akaihkhop hunlai hunte-a singkungte alawng hi. Amahmahin azep khauguite, kep nuam asak pakpalhte mu hi. Akhuakin ataktak ahihna mu-a, hihin Eden huan ahong kipia kik hi, ci hi. Tua huan panin akihawlkhiat laisangin hoih zaw lai hi. Nuntakna singkung kiangah Honpa in paipiha, minthana apua agahte lo in anesak hi. Atung lam aetleh hotkhiatna angah a innkuan mihonpite amu hi. Pasian’ paradise ah ading uh hi. Tuaciangin atezialzial ama kham lukhute suahin Jesu’ khephungah koih hi. A awmah kibelhto in, Honpa akawi hi. Amahin kham tawh kibawl tumtheihte la in, vantung innkhumte athawn “Phathuai, phathuai, phathuai Tuuno, kithat a ahingkik Pa” la kisa hi. Adam innkuanpihtein akham lukhute uh suahin Honpa khephungah khia in abia uh hi.

Adam kiat lai in akap vantungmite in Jesu athawhkik khit, vantung akahtoh khit, Amah aumte adingin hankhuk ahonkek khit, hih innkuan kikaihtuahna tetcipang uh hi. Hotkhiatna nasep kizo ta ahihna mu uh hi. Phatna lasaknaah a awte uh kipawlin gingsak uh hi.5

Leitung Khualzinte ading Innpi Kibawl.— Mailam gaamluah dingpen thutak suahlua ahihmanin pawlkhatte khalau-in kha thu gen uh hi. Tua manin Jesu in Pa’ inn ah omna abawldingin kapaiding hi, naci hi. Pasian’ thuhilhna asangte adingin vantungin ataktak ahihna theihloh omlo ding hi. Midikte thaman akipiakna leitung kampau in gensiang zolo hi. Mittang tawh amute bekin theiding uh hi. Leimi’ khuakin Pasian paradis minthanna genbei zolo ding hi.

Laisiangtho sungah gupna ngahmite luahding gaam pen gam kici hi. Nuntakna tui ah vantung Tuucingpa in atuuhonte makaih hi. Nuntakna singkungin khasialin gaha, atehtein zong gamte adingin damna pia hi. Atawntungin aluang luituite zong siang mahmah hi. Tuate kiangah Topa hotkhiatte pai nading lampi kibawla, singkung hiangpite in lim pia uh hi. Zangkuam kiphahte in zong mual tambangin hoih mahmaha, Pasian’ mual siangthote in mualdawnte nungngat hi. Tua nuntakna luitui luang geiah zangtam gamdaihna kiphaha, lamsau khualzin Pasian’ mite in inn neiding uh hi.6

Leitung khualzin mite adingin inn zong om hi. Midikte ading puan zong oma, minthanna lukhu leh gualzawhna nisuhteh zong om hi. Lungsim abuaisak Pasian’ piakkhiatnate Pasian ahong piak leithakah kitelgen ding hi. Thuthuk hehpihna zong hong kiphalhkhia ding hi. Ciangtan anei mihingte khuakin abat zawhloh kamciamte zong kicing tak leh ki aihual takin kimu ding hi. Ciangtanna aneilo itna in ahong piak ihthuaknate in zia-etna taktak ahi hi. Ama hong kinna ihtheih ciangin nakhempeuhin eite adingin ahoihpen dingin semkhawm uha, akigentheilo, minthanna tawh akidim kipakna ihnei ding hi.

Innlam aciah ihhi hi. Eite hong ita, anuntakna ahong piapa in eite omnading khuapi hong lamsak hi. Jerusalem khuathakin ihtawlngakna mun ahi hi. Pasian khuapi sungah dahna omnawnlo ding hi. Khuisatna omlo dinga, lametna beina leh ngaihte akivuina kiza nawnlo ding hi. Asawtlo-in lunggihna puanpite kisuahkhiain, mopuan kisilhta ding hi. Ih Kumpipa za kipia tading hi. Christ sungah kiselin anungtate, upna galsimna ahoih aneite, Honpa minthanna vang tawh Pasian gamsungah tang hi.7

Hotkhiat Ngahmite Hamphatna.—Vantungin munhoih ahi hi. Tua laiah omin a ithuai Jesu ka en nuam hi. Amahin anuntakna kei hong piaa, Ama’ minthanna kei hongpia hi. Ahongtung ding leithak ie vangliatna kam tawh genbei theiding hiam? Pasian’ khuapi mite alungnuamsak nuntakna luituite kadawn nuam hi.

Topa in leitung dangte zong hong lak hi. Len nading kha hongpia in, atang alian mun khatah vantungmi in hong paipih hi. Tua mun-a lopate-in nungta in dum-a, vasate in zong alenkawm-un lasa uh hi. Tualaiah ateeng mite in aliatna atuamtuam ahi hi. Mipi suah uha, kumpi meel puain, ithuai uh hi. Amaute in Jesu lim sun uh hi. Suahtakna leh lungnopna tualaiah om hi. Banghangin amaute in leitungmite sangin ithuai zaw uh hiam, ciin amaute kadong hi. “Pasian’ thukhamte beltakin kazui uha, leitungte bangin thumanglo khat zong ka om kei uh hi” hongci hi. Kei hongcing vantungmi kiangah, tua mun ah aomsuakdingin phalna kangen hi. Leitung khuamial sungah ciahkik ding kangaihsun theikei hi. Vantungmi in, “Naciah kik ding hi, nathumaan leh nang, leh 144,000te in, leitung dangte hawhkawi kawi theihna nangah ding uh hi. Pasian’ bawl nate namu ding uh hi,” hong ci hi.8

Akigawm Vantung leh Leitung Innkuan.—Tua laiah gupna ngah mite in “amaute akitheihbangin amau inzong atheiding uh hi.” Mihingte sungah Pasianin aguan itna leh hehpihnate tualaiah maantakin kizang leh kizek khia ding hi. Misiangthote tawh kizopna in vantungmite tawh kithuhualin, khang tawntunga adiktein amaute’ puante tuuno sisanah sawpsiang uh hi. Tua thusim tawh kikhihna angah hotkhiat mitein “leitung leh vantung innkuan akigawm ciangin” lungnopna angah ding uh hi.9

Hotkhiat ngah gammitein vantung thukham losiah thukham dang theilo uh hi. Akigawm innkuan, mi khempeuh, lungdamkohna leh phatna puanpak tawh akituamtein lungnuam ding uh hi. Zingsol ie tate in lasa khawm ding uha, Pasian’ tate in kipakna tawh awng ding uh hi. Pasian leh Christ inzong kipum khatin “mawhna om nawnlo dinga, sihna zong om nawnlo ding hi” ci in awng ding uh hi.10

Christ ie thawhkikna-ah vantung lungdamna-in eite’ leitungah alamdang Jesu’ awging, “Ka Pa leh note Pa leh Ka Pasian leh note Pasian kiangah kakahto hi” in hong thawn suk hi. Leitung innkuan len vantung innkuanin khat ahi hi. Eite adingin Topa van kahto a, eite adingin anungta hi. “Tua hia, Pasian kiangah Ama tungtawnin apai khempeuh gupzawh nading thu aneizo hi, atawn tungin nungta ahihmanin eite adingin palaina ahong sepsak hi.”11

Azekai hangin Akamciam Kician.—Honpa’ hong kumkik ding sawtvei ihngak khin hi. Ahizongin akamciam taktai hi. Asawt lo-in ciamna gam ah ihlut ding hi. Tualaiah Jesu-in eite Pasian tokhom panin ahong luang nuntakna luituite ah hong makaih dinga, khuamial leitung adinga akipiakkhiatna hong genpih ding hi. Ih gamtatnate apicinsak nadingin eite hihlaiah hong puak hi. Ahong kipia kik Eden huan ciangtan aomlo khuamuhna tawh ih en ding hi. Honpa khephungah eite lutungah ahong suansak minthanna lukhute ih khia dinga, kham tawh kibawl tumtheihte sai in, tokhom tungah atu Mipa phatna awging tawh vantung ihthawn sak ding hi.12

Ih leitung innte ah aom ahoih nate in asiang luituite leh adum dildial zangkuamte, huih hangin ahuang ngel ngel singkungte, nuntakna tui luangte, nibangin atang kham khuapi leh puankang silhin phatna la asate leh vantung innpi hong phawksak hen. Leitungah aom nahoihte limsuai siamte nangawnin asuaih theihloh, leimitein agenbei theihlohtein atunglam hong phawk sak hi. “Mit in amuh ngeiloh, bilin azak ngeiloh, mite lungsim sungah zong alut ngeilo, Amah aitte adingin Pasian’ bawl kholh” nate ahi hi.13