Kumkikna Lamen Innkuan - Khen 16 (Azom2)

MIHON KITHUAHNA VAI AH NU LEH PA MAKAIHNA

Siat Huzaapna in Gualzo Phial.—Tate’ kimah siatna huzaapna in agualzo tawh kibang hi. Akhuakte uh kisiain, siatna sungah tumpih uh hi. Athuthu in khangnote lungsimin haitat in, aneu tung panun, azia leh atong uh akilam mapekin, leh athukhenna uh apicin mapekin, huzaapna hoihlo anei lawmte teel pah uh hi.1

Leitung khempeuha aom nu leh pate’ ka aw in aban hileh, tate’ deihna tawh lawm azonndingin kaphal keiding hi. Khasiangtho huzaapna sangin hihbang khangnote huzaapnain baihlamtakin huzaap zaw hi. Hehpihna leh thumaanah khantoh nadingin akhan-gualte tunga akilang Pasian’ kammalte in alungtang sungah kip ding hi.2

Ahihtheih laiteng, khangnote munhoih ah koihding hoih hi. Akithuahpih alawmte, akop-uh thukhunte, alamtohuh zongsatnate in leitunga akimanna ding uh leh tawntung nuntakna ading akiap dinguh khensat sak hi.3

Ciangtan Omlo Suahtakna Lauhuai.—Nu leh pa aw, na tanu na tapate uh phatakin nacing kei uh hi. Na theihlohpi un autbangun vaksuk vakto sak kei un. Hih khangno hun in ciangtan aneilo suaktakna in mi tul tampite siatna ahi hi. Mihing bangzah zankim in lamlakah avakdingin kiphal hiam? Nu leh pa in tate akithuahpih mite lungkimpih uh hi. Asialam ah ahuzaap thei lawmte kiteel khaden zaw hi.4

Khuamial belin khangnote in ahonin kikaikhawm uh hi. Laithaite kimawl theihding sin masa uha, kikhapna bawlin, zatepin zudawn uh hi. Biakna azui nu leh pa’ tate in zusai ah tuipipiang ante ne-in mawhzolna sungah kitah uh hi. Hihbang munte pen Pasian zahpihna leh thaanghuaina tawh kidim hi. Kisiatna thuaklo in kuamah hihmunah sawtvei om theilo uh hi. Tuabang kithuahna hangin sia leh pha amehkhawmte in thupalsat leh mithatte hong suak uh hi. Siat kipatna limlim kidal ding ahi hi. Nu leh pa aw, nakim napam uh atuamdiakin hoih sakun. Na tate uh lamlakah zanin akimawlding, leh agualnuam dingin alawmte uh tawh paikhia sak kei un. Khauhtakin kham lecin athumanna uh zongsangin apalsat nopna uh hong daiding hi.5

Tate Kithuahpihding Nu leh Pa in Teelsak.— Lungsim apanglen leh atatsia naupangte tawh kithuahna in khangnote sia sak ahihlam nu leh pa in phawkden hen. Tate’ adingin lawmhoih na zonsak zawh kei uh a, amuanhuailo khangnote tawh na kithuaksak uhleh, sangah ahizongin kicinlohna asin uh ahi hi. Tate in ze-etna anang dingin khauhlel uh, ci khading uh hi. Kua in theiding hiam? Mawhzolna dalna in mawhzolna zuihna sangin haksa zaw hi. Asawtlo in akithuahpihte’ lungsimin amaute zo in, azia atong uh suksiatsak ding uh hi.

Gamtat leh zongsatna atuamtek anei khangual mi tampite lakah alut uhciangin khangnote adingin lauhuaina tamsemsem hi. Hihbang khuahun sungah nu leh pa in aom hithiat uhsangin tate avilna azahnihin ahanciamding uh ahi hi. 6

Kikopin, thungetna tawh nu leh pa in atate uh ahoihin kemcing ding uh hi. Adangdang amangngilh uhzongin atate uh mawhna lampi ah khah khialo ding uh hi. Nu le pa tampite in atate uh autut abawldingin phal uha, lawmsia teelin nuamsa sak hi. Tuabang nu leh patein thukhenna ni ciangin vantung alut sak nuamlo uh hia, innsungah atate uh akhihlote ahi uh hi. 7

Nitakhun Koiah Zanguh?—Zanin tanu tapate mang le uh sittel pahding ahi hi. Bangci lawm tawh kithuah uh, cih kanpah ding uha, kua innah om uh hiam, cih zong zongkhia ding uh hi. Tate pawlkhat in nu leh pa khem uha, akhialhna uh akilatloh nadingin peel uh hi.8

Akikholo Lo Lopa in Dep.—Nu leh pate in atate kithuahpih ding, agualnop nading teel tawmsak uh hi. Lamet bangmahin hong piang hi. Lo kho lo-in nusia lengh ling leh lopa in ankungte ponelh uh hi. Ait huai pak kimu khalo-in, sawlbawkte in liahin gukung lopate po hi. Kin leh ngaihsut kullo in lopa hong khang khia a, kimanna anei kungte ahoih kungte in lokhawh kisam hi. Khangnote zong tuamah bang ahi hi. Zongsatna ahoih kinei-in, thukhun hoihte kizang ding hileh hanciam kisam hi. Zongsatnate kipuahpha in, hanciamna leh kuhkalna tawh nasep zawhding ahi hi.9

Nu leh Pa’ Khensatna amuangdingin Tate Zongsangsak.—Nu leh pa aw, namit nauta bangin natate’ thukhun leh zongsatnate kepcing sak un. Agamtat natheihcianlohte tawh tate kithuaksak kei un. Gimna hong pia kei-in teh, ci-a natheih matengin kinaisak kei in. Nathuakna leh nathukhenna amuanna uhah zong sanglapsakin. Amaute’ theihna sangin natheihna in kicianzaw ahihna theisak inla, nakhensatnate kinawl khinsak kei in.10

Migitna leh Kipna tawh Khalin.—Nu leh pa in tate lunggulhnate zuih mawkmawk ding hiloa, Pasianin lam asialsaksa ah apaiding uh ahi hi. Migitna tawh amaute khal inla, kipna leh khensatna tawh adeihna uh nial in. Adeihkhialhnate uh itna, thungetna, kuhkalna tawh puaksak inla vantunglam manawhsak in. Amau’ deihna ah tuitaih bangin akitai dingin phal kei in. Lamsak lampam sik ding uha, lam maan panin pial khia ding hi. Lauhuainate atheilote zahin lauhuaina aneizaw omlo a, thuhilhna leh taina sangtheilo uh hi.11

Apaubang huzaapnate panin tate kemkhia in. Khangnotein khalam vangneihna, sianthona, leh itbaang nate sangin angsungkhuatna, ninnoina, leh thumanlohna ciamteh baihzaw uh hi. Khatvei phunna, kiphatsakna, mawkna, leh siantholohna kiphal hileh nuntakna zahin siatna’ khap kipding hi.12

Innkuan sungah kipattahna kicianlo lua ahihmanin tate in thuhilhna langpan uh hi. Keimahin nu khat kahia, tate adeihna bangin zuihna sangin nu leh pa’ kepcing nate cidam huai zaw hi, ci in kagen thei hi.13

Zuilo-in Mi’ Inn Hawhsaklo.—Nu leh pa pawlkhatte in tate suahtakna tam pia lua a, khialhna bawl uh hi. Amaute muang lua in amawhna uhzong muhsak zolo hi. Acing nu leh pa zuihna aomlopi in tate khual gamlapi ah hawhsak uh hi. Hih in huzaapna khial pia hi. Amau leh amau kimuang baihlua uha, kiphallohna khat omleh, tate piakding hamphatna zangkhial hi, ci in nu leh pa mawhsak uh hi. Nu leh pa zinkhia ngeilo in, tate pen paisuk paito sak, zong kici hi.

Nu in khalna aneiding ciangin amaanlohna uh alahding lau in, atawpna ah amau leh amau kinasak uh hi. Nu leh pa’ vilna aneilo leengla naupangte khialhna akipuahkik nadingin a kha in sawt hi.14

Pilna Kihello Thuhilhna.—Natate innah khum in. “Natate in midang lakah kiheldan theilo ding hi” ci uh hi. Tate a awlmawhlua hituanlo hi. Tanglai mite bangmahin Topa’ thupha piakdingin tate apaipih nuam hituanlo uh hi. Tuabang ahong cih uh ciangin: “Tate in Topa’ gaam hi, amaute kamuanna alahding uh kamu nuam hi. Leitung huzaapna ah ahoi lodingin kapantah nuam hi. Ze-etna athuak uhciangin “ut keng” aci theiding kadeih hi” ci in na lawm leh na innvengte gen in, vantung kulhpi sungah katate kamu nuam hi,” ci in.15

Tate’ maiah Ze-etna Lian Om.—Haksatnate sehsiamin, zeetnate lamen in, lauhuainate akiging theidingin tate pilna pia-in pantah in. Amau leh amau aki uk leh akikhal dingin hilhding hia, haksatnate picing takin kantan zo ding uh hi. Lauhuaina sungah nawhsa takin lut lo-in, akisamlopi in ze-etna sungah kitah lo-in, siatna huzaapna leh asia lawm leh gual peel ding uh hi. Alauhuai lawm leh gual apelh zawh kei lehzong tuate anawkkhia zo ding zia leh tong leh amaan thukhunte neiding uh hi. Mawhbaangloin Pasian’ tha tawh gualzo thei uh hi. Khangnote’ khalam vangliatna pilna kipia in, Pasian muang thei uh hileh, alianpen ze-etna maingat zoding uh hi.16