Kumkikna Lamen Innkuan - Khen 16 (Azom3)

ZUMKHAKNI LEH PAWINITE

 Zumkhakni Zatdan Makaihna.—Ih zumkhakni zatdan pen leitungmite zatdan ihzuihding hilo hi. Ahizongin hun mawkbeisak ding hilo hi. Banghang hiam, cihleh tate lungkimlo ding uh hi. Hihbang nite ah tate in asia lawm leh gual tawh akituahkhakding lauhuai hi. Leitung gualnopna tawh akisiat uhsangin nu leh pa te in alauhuai gualnopna sangin atangding khat aguanding uh ahi hi. Amaute adingin ahoih leh alungnop nadinguh ngaihsutsak nahihna theisak in.1

Leitungmite leh pawlpite in zumkhakni azatna tungtawnin thadahnite-in cidam nading leh lungnop nadingin kisam hi, ci in angaihsut uh hangin siatna tampi kimu thei hi.2

Khangnote leh naupangte adingin anuam theithei dingin zumkhakni kabawl a, hun geldan zong kakhel uh hi. Kangimna ah thu-umlote gualnopna panin kihepkhiat theih nading ahi hi.3

Vantungmiin “amang ni” in aciamteh diam?— Nikhat gualnopna ni abei ciangin, gualnopna zongte adingin lungkimna bang om hiam? Christian nasemte adingin, ahoihzaw, asangzaw, leh asiangtho zaw dingin kua kapanpih hiam, cih dotna om hi. Vantungmite’ ciamtehna simkik uh hileh bang mu ding uh hiam? “Ni mang ni” ciding hi. Amau’ kha adingin manthan ni, Christ ie nasep nadingin nikhat mang hi, banghang hiam, cihleh nahoih khat zong kizolo hi. Tua thadah vui ni, hai pau ni, naupang numei leh pasalte gualnopni bekin kizang hi. Hihbang hun kipiak tham hetlo hi. Tua zumkhakni in ahaksa nasep semzaw le-uh hoihzaw ding hi. Zumkhakni ahoih in zanglo uh hi. Thukhen ni ciangin tawntung adingin akizangkhial ni asuak hi.4

Suahni, Pasian Phatnading.—Judah mite ngeina ah, naupangte suahni in Pasian tungah piakhiatna kinei hi. Tuin nu leh pate in tate tungah letsong piakding hanciam uh hi. Tate pahtawi hun in kizanga, mihing’ tungah zahtakna aomzahin kibawl hi. Hihvaiah Satanin ama’ deihna vaihawm hi. Lungsim hei in mihing tungah letsong piasak hi. Atuamdiak maipha angahdingin kilawmna anei bangin tate in ngaihsun uh hi.

Suahni-in tate thu kihilh ding hi. Pasian’ tungah lungdam ding hun leh kum khat nuntakna ahong kepsakna lungdam ding ahi hi. Nuntak nading, cidamna, an, leh puansilh adingin kihilhna ahi hi. Hehpihna ahong piapa tungah ihlungdamna phawk kikin, tua ahong piak nate phawkna tawh lungdam kohding ahi hi. Pasian’ tungah suahni sumpi ihpiakte vantungah kiciamteh hi.5

Kumkhat Ciamtehna Enkik.—Abeisa kum sunga nuntakna sittel kik sak in. Vantung ciamtehna ihmaingat zoding hiam, cih ngaihsun in. Thu thukpi ngaihsun sak inla, kizepna, kampau, nasepte in Pasian alungdam sak hiam, cih enkiksak in. Anuntakna uh Jesu tawh akibang sakzaw uh hiam? Pasian muhna ah aetlawm hiam? Pasian theihna leh Ama lampi, leh Ama’ thukhunte hilh in.6

Pasian’ Kipatna Hi Sak.—Ka innkuanpih leh ka lawmte kiangah, kuamahin suahni letsong leh Chritmas letsong ahong kipiakloh nading kagen hi. Topa’ sumpi sungah akiguan pahding ahihkei lehzong mission nasepna in kizang ding hi.7

Lungdamkohna Zatdan.—Lungdamkoh hun hong naita hi. Ahiden bangmahin ei leh ei tung bekah lungdam akikote ih hiding hiam? Ahihkeileh Pasian’ tungah lungdam ako ihhiding hiam? Lungdamkoh hun pen ei leh midangte ihmeet ihpun saknading ahihzawk nadingin eite lakah azawngkhalte phawk ni.

Mizawngte ihhuh theihnading lampi azakhat bangin kibawl thei hi. Asiam hilengh eite tungah nahoih ahong bawlzawh uhbangin ihpiak letsongte angahding uh ahi hi. Ihngah sangin piakkhiatna in thupha omzaw hi, cih phawkin. Sanggamtein apahtawi nopte uh bek awlmawh a, zahtakna angnahnopnate bek uh phawkin, amau’ huh zong akisam uh hipeuhmah lo hi. Ngeina leh tatdanin bang hong gen hiam? Nangmah ahong pia kik zo dingte pia in. Hihin piakkhiatna tawh kisai Laisiangtho’ thukhun hilo hi. Ei leh ei ihkilungkim sak nadingin apiakhia ihhi hi. Laisiangtho in, “Mihaute apiakhiate in, zawnlawh ding uh hi” ci hi.

Ahun hong tungta a, ihpiakkhiatna’ thukhun hong kisittel ta ding hi. Pasian’ mizawngte adingin ihseptheih bangin piakhia ni. Eite tungtawnin Pasian’ thupha amaute ngah sak ni. Ihhuh zawhding meigongte, tagahte, azawng innkuante ngaihsun ni. Ihsep ihbawl nate pen mi muhnaah lahkhiatnop manin sem kei ni. Pasian’ neihsate mizawngte tungah aluankhiatna hawkguam bang nahi-in.

Hihin eite’ tavuan khempeuh kawikimlo hi. Na Lawmpa tungah piakhiatna nei in; Ama’ neihsate phawksak in. Ama’ hongpiak thuphate tungah lungdam ko in. Pasian tungah lungdam ko in. Sanggamte aw, Lungdamkoh ni-in an mawltakin ne in. Nang’ duhgawl nalungkimsak nadingin nazat nasum napaai tawh Pasian’ tungah lungdam sumpi pia in.8

Mindeihman leh duhgawl lungkimsak nadingin Lungdamkohni zangnawn kei ni. Pasianin eite kum khat ahong keptoh manin Ama tokhom maiah lungdamin azuanding ihhi hi. Annek pawi abawlding nahileh agilkialte ading hisak in.9

Lungdam Kohni.--Topa tungah lungdamkoh ding ahang ihnei hi. Pasian’ tungah lungdamin kipak ni. Amahin eite hehpihna tampi hong pia hi. Lungdamkohni ihcihin ahong kawkmuh bangin ihsepkhiat ding ahi hi. Nalungsim paklen sak kei in. Lungdamna ko in. Ih awte in phatna sanglap ta hen!10

Banghang Topa tungah Pawini Bawllo?—Topa tungah zumkhakni ihtang ngei hiam? Ahong bawlnate ihkhuak sungah ihphawk hiam? Abeisa huna ahongpiak thuphate phawkkik ding hoih hilo hiam? Tuabangin phawk kikna tawh Pasian amangngilh loding ih hi hi.

Leitungin zumkhakni tampi nei hi. Tuanite ah mite in kimawlna, sakol tungtuanna, sum kikhapna, zatepna, leh zukhamna in ihzang hi.

Pasian’ mite in ahong piak thuphate hangin Topa tungah lungdamkohna anei zelzel ding hilo ih hi hiam?11

Zumkhakni Mission nasep nangin Hunpia.— Pawl sungah aom mihingtein khangnote kaituahin mihingte tangsapna ahuhding, numei pasalte’ gupkhiatna ading a ahanciamding uh kadeih hi. Hih nasep nadingin kuamahin ahunbup pia zolo hi. Anuntak nadingin sum athalawh uh kul hi. Hihbang zumkhaknite ah neihsa ihpiakding aomkei leh zong Christian nasep nadingin leh nahoih sep nadingin ihkipiakkhiat ding ahi hi.12

Zumkhakhun naneih ciangin natate adingin ni nuam khat bawlsak in. Mizawng micimawhte zong nuamsak in. Lungdamna kolo in nahun beisak kei in. Jesu’ tungah lungdam sumpi pia in.13