Kumkikna Lamen Innkuan - Khen 15

THUKHEN 15

Innkuan Nuntakna Avaksak Hehpihnate

THUSIAMNA LEH MIGITNA

Thusiamnain Nuntakna ie Natna Alang Paai.— “Khat leh khat migitna tawh nakingai un” cih thupiaknaah inntual lungnopna ngah nading thukhun kihel hi. Innkuan sialah Christian migitna omding hi. Hih in tawm amat hangin pianziate anemsak thu hia, hih omkeileh ngawngkhauhna leh gitlohnate piangding hi. Aki thusiamkim dingin kipattahna leh eite tunga ahong kibawlding ihdeih bangin mite tunga bawlna in nuntakna sunga natna alang dengkhia ding hi.1

Thusiamna Innpan Kipan.—Ihtate in migitna, thusiamna, leh itna azekkhia ding ihdeih leh ei maumahin lim ihlahding ahi hi.2

Nu leh pa in athuneute nangawnah thusiamna kilakding uh hi. Innkuan sungah migitna thukhun omding hi. Kamsia khat zong zangloin, thaangpaihna apiangsak kammalte kipaaikhia ding hi.3

Mikhempeuhin maitai, awkhum, thusiam ding hi. Hihte in vangliatna ahi hi. Naupangte zong maitaina leh lungnopna ah kikai uh hi. Amaute tungah migitna, thusiamna lak leuhcin, amautein tuabang lungsim paai mah khat leh khat tungah kilak ding uh hi.4

Na kampau sangin nathusiamna leh nakikhalna in natate tungah huzaapna alianzaw lakding hi.5

Tangpi Migitna in Inn Paradise Suaksak.— Migitakin tate hopihna leh ahoih pahtawinain tate thapiakna hia, amaute lungnuam sakin, innkuan sunga leengla tannate hawlkhia hi. Migit kimna leh kithuakna in inn Paradise suak saka, vantungmite nangawn innah hawhnuam sak hi. Kamsia pauna, kipumphatna, leh kitotnain amaute inn panin notkhia uh hi. Gitlohna, phunciakna, leh hehna in innkuante Jesu’ kiangpanin khak tan hi.6

Nisim thusiamna leh innkuan sungah aomding kingaihnate in apualam khuahun tawh kisailo hi.7

Awkhumte, ziadam omdan, leh amaan kingaihnate in gamtatna khempeuhah kilanga, kuhkalna, sianthona, cilnatein mizawng daipamte teenna innte anuampen mun suaksak hi. Piangsakpa in tuabang innte pakta hi.8

Apualam leitungah anuntak uhsangin ainnkuan sungah anungta nuamzaw mi honkhat om hi. Leenglate tungah kisialhna, apuatham thusiamna, leh kingaihna tawmzaw omdinga, meikhuk kimah itna taktak panin ahong pai thusiamna leh hehpihna tampi om ding hi.9

Thusiamna.—Innkuan sungah amaan nuntak sianthona sinding kisam hi. Hihin thumaan adingin tetci panna ahi hi. Kua kua tungah kilang uh hitaleh kamsiat pauna leh eng pauna in lungsim hoihlo panin apusuak ahi hi. Vantung panin apiang thumaanin azate niamsaklo a, gilo sak, ngoltol saklo hi. Thumaan in lungsim nemsak a, khangnote zahtak leh thusiamsak hi. Christian thusiamna pen Khasiangtho nasepna bek tawh kingah hi. Hihin puatham kingaihna hilo, lukun khuan khuan zong kisamlo hi. Hihbang thusiamnatein leitung mite’ dan hia, Christian thusiamna neilo uh hi. Amaan thusiamna in Christ ie gospel ihthuakkhak ciang bekin kingah hi. Adik thusiamnain mizawng mihau, alian aneu tungah akilak migitna ahi hi.10

Thusiamna ie alaigilin midangte adinga ngaihsutna ahi hi. Mi zavai tunga migitna in hehpihna leh thapiakna apia pilna ahi hi. Ngeina ah nu leh pa tunga zahtakna piangsaklo a, akiciatnate uh pahtaksakin, thanemnate thuakpihin, kitangsapnate panpih sak tuanlo hi. Tua ngeina in mite telsiamsak zawlo, hehpihsak tuanlo, cinghin mite huhsak tuanlo, mizawng mingaute zong kinsak tuanlo hi.11

Christian thusiamna in itna khau tawh innkuante akikhih, akinaisak, akhaukzawsak khamtau bang ahi hi.12

Kham Thukham Innkuan Thukham.—Innkuan leh midang tawh kizopna ading thukhamin Laisiangtho sungah om hi. Biakna adingin ahoihpen tuktehna hibeklo a, thusiam nadinga amanphapen thukhun zong ahi hi. Honpa ie Mualtung Thuhilhnaah khangno uhamte ading manpha hi. Innkuanah tuate simsim ding hia, nisim nuntaknaah lahkhiatding zong ahi hi. Kham thukham “Note tungah ahong kibawlding nadeih bangun mi tungah zong bawl un” cih hia, innkuan thukham zong nahisak ding uh hi. Christ ie lungsim a iplahte in innkuan sungah thusiamna lakding uha, thuneu nangawnah zong thupha piading uh hi. Mikhempeuh lungdam nading zongding uha, amau leh amau kimangngilhin, midangte a awlmawhding uh hi. Hihin Christian kung panin akhangkhia gah ahi hi.13

Kham thukhamin thusiamna thukham ahi hi. Tuate pen Christ ie nuntaknaah asiangpenin kilang hi. Honpa’ nisim nuntaknaah awnem leh hoihna khuavakte tangkhia hi. Ama’ omna peuhah akhum luang hi. Atate sungah zong tuabang mahin kilangkhia ding hi. Christ tawh ateengkhawmte’ kimah Pasian’ umcihna om hi. Amaute puanpakin Topa huansung pana paknamtuite tawh kinilh ding hi. Amaute maitangah zong Ama’ khuavak tangdinga, alampi uh agim atawl khete atuk lohnadingin khuavakin tanding hi.14

Tatdanding Thukhun.—Tatdan ding thukhun akigelh khempeuh lakpanin ahoihpen Honpa thuhilhna pan hong paia, Khasiangtho panpihna tawh Sawltak Paul in khangno khanghamte phawkdingin na atsak hi:

“Note kong it mah bangin, khat leh khat nakiit un.” “Ki-itna in thuakzo a, migi hi;

Itna in haza lo hi; Itna in kisiallo a, Kiphatlo hi.

Akilawmlopi in gamta lo hi, Ama’ ading bek zonglo-a,

Hehsakloin, siatna zong kemcinglo hi; Adiklo gamtatna ah

kipaklo hi, Thumaan thutakah kipak hi;

Nakhempeuh thuakzoa, nakhempeuh um hi, Nakhempeuh

lamen hi, nakhempeuh thuakzo hi. Itna in guallel ngeilo hi.”15

Laisiangtho in thusiam ding hongsawl hi. Alahtel nadingin: angsung akhuatlo lungsim, amigi hehpihna, mite lungsim azotheite in thusiamna anei ahi hi. Hihte in Christ ie zia leh tong agen uh ahi hi. Leitunga aom migitna leh lungnemna, Ama’ min atheilo mite lakah aomte nangawn, Ama kiangpan ahi hi. Hih zia leh tongte atate nuntakna ah akilakdingin deih hi. Eite sungah Ama’ hoihna akimuhding pen Pasian’ deihna ah hi hi.16

Christian biakna in mite mipi tatsak hi. Christ in Amah abawlsiate nangawn tungah thusiam hi. Ama’ nungzuite in tua lungsim mah pulaak ding uh hi. Paul zong thukhente maiah akipuakciangin, thu ngaihsun hi. Aggrippa kumpipa maiah pauzol takin athugenna in thusiamna lahna mah ahi hi. Laisiangtho in leitungdan mihon thusiamna tha pialo hi. Lungsim migitna taktak panin aluangkhia thusiamna bek agen ahi hi.17

Leitungin atheih thusiamna aneidingin ahong kisam hiloa, thupha angahte innpiah aciahpihdinguh thusiamna bek hong kingen hi.18

Adik Thusiamnain Itna’ Hansuahna.—Puatham kizeksiamna ah kilamtohnain lungkiatna, kimawhsakna, leh akilawmlo kampaunate daisak zolo hi. Kizopnaah mimal mungtup ahihlaiteng thusiamna maan omtheilo hi. Itna in lungtang sungah ateengding ahi hi. Athutang Christian’ gamtatna ie lungsim tawng pen a Topa aitna panin hong luang ding hi. Christ a itna zungpi panin sanggamte adingin angsunggenloin ahong luang khia ding hi.19

Ahizongin, iplahding, leh lamtohdingte lakah Pasian’ maiah asiangtho lungtang, lungdamna leh kilemna tawh athamalh lungsim bek om hi.

Thumaan leh itna ki-aihualna om hizen leh kampau leh gamtatnaah hong tangkhia ding hi. Tua hileh hoihna ie kha in lungtang sungah teeng ding hi. Ki-itna aneite sungah itna in puansilh kizepnaah hehpihna, etlawmna, leh hoihnate neisak hi. Itna in maipuak tangsaka, aw zong khum sak hi. Ami pumpi sanglap in siangtho sak hi. Pasian tawh kinaina ah paipih hi, banghang hiam, cihleh hih in Pasian’ lungsim puak ahi hi.20

Amaan thusiamna in omdan thukhunte zuihna tawh akisin hilo hi. Puansilk tawh kilawmna pen atawntungin etcik ding ahi hi. Thukhun vaiah, mihon deihna tawh kituakin ihkizep leh ngeina zuih ding hia, thukhun khiap kul ding hi. Amaan thusiamna in kuamah thu tawh akituak dingin thukhun khiap kul lo hi. Misang miniam kideidanna omlo hi. Ei leh ei kizahtakna hong hilha, mihing pen mihing bangin zahtak kulsakin, unau sanggam khat hihna hong phawksak hi.21

Itna in Et, Pau, leh Tatna tawh Kipulaak.—Nu leh patein tate pen maitaina, thusiamna, leh itna tawh kim-um ding hi. Itna aomna innah et, pau, leh tatna in itna laka vantungmite atawlngak nopna mun ahi hi. Nu leh pate aw, note sungah itna, maitaina, leh lungnopna nitangte lut sak unla, tua tawh innkuan sungah kizeel sak un. Amigi, athaukzo, tha apia lungsimte natate tungah zong lak hile uhcin innsungah khuavak tangsak ding hi. Tuabangin innsung khuahun nabawlna uhtawh huih leh nitangin singkung lopa ading ahihbangin tate adingin zong cidamna, lungsim leh pumpi thahatna hisak in.22

Mipi omdan, maitai kihona, leh itna tatnate in nu leh pa leh tate lungtangte naikhau bang ngaihna tawh khihkhawm dinga, lei zawh ahilo kham kizepna bangin innsung nopci sak ding hi.23

Lungsim Tuamtek kigawmding.—Lungsim kibanglote akithuah dingin Pasianin geel hi. Tuabang ahihciangin innkuan mimalte in khat thuaknate kithupi ngaihsut sak dinga, khat hamphatna zong kiphawksak ding hi. Kitelna leh kithuak kimna sin leh neihding ahi hi. Tua hileh kiettheihlohnate hong nipdinga, gitlohna zong hong migi ding hi. Kithuhualna hong piangding a, khatsial meet nadingin kigawmtuahna omding hi.24

Thusiamlohna Bangmah tawh Kithoihdamlo.— Christ ie nungzui kici napiin kamkhauh, gilo, thusiamlo, leh kizep asiam tuanlote in Jesu’ thu asin nailo uh ahi hi. Mi’ mawhna zongin, thuakzawhna aneilote in Christian hilo uh hi. Christian hihna in Christ tawh kibatna ahi hi. Christian akicite in migitna leh thusiamna neilo uha, ahoihnauh zong kisiat gen hi. Amaute thumaanna patauh ding ahikei zongin, amaute thutanna kisittello ding hi. Ahihangin thutanna leh diknain thusiamlohna leh gitlohna adingin thoihna hilo hi. Christian khatin hehpihna leh dikna, thusiamna leh lainatnate neikop hi.25 Sanggam leh sanggam kikalah thusiamna leh ziadamna tawh kinlohna, innkuan sungah migitna leh thapiakna, nu leh pa leh tate kilakah kiawlmawhlohna in Christ tawh kibatlohna lak hi. Ahihhangin hih aneuneute zang hilengh, hong liantektek ding hi. Paknamtui bangin Pasian kiangah kahto ding hi.26

Tampiin Ngaihsuttheihna Lunggulh.—Mi tampiin lawm kikal kihehpihna lunggulh uh hi. Ei leh ei kimangngilhin, thu neunote ah lungdamna pulaak nading hun, khat leh khat kihansuahin, dahna panin kihehnemin, itna ihkilah ding ahi hi. Hih thusiam ngaihsutnate in innkuan sungah akipatciangin, innpua lamah kihawm sawma, lungnopna piang sak hi. Hih thuneu neu te awlmawhlohna in dahna leh thangpaihna piangsak hi.27

Mite Kizopna panin Leitung tawh kizom.—Mite kizopna tungtawnin Christian biakna in leitungah kizel hi. Christ ie itna anei numei pasaltein alungtang sungah Pasian’ satsuahna ngahin, paina khuamial ah khuavak tangsak uh hi.28

Hih thuneu tul tampite maitaina leh kamkhum tawh ihkin ngaihsut ciangin eite tungah hong lengkik ding hi. Ngaihsutna aneilo Christiante in midangte a kinlohna uh pen Christ tawh akipumkhat lohna uh hang ahi hi. Christ tawh kipumkhat khin napi in midangte tungah gilo in, amaute hamphatna phawksaklo cihbang omtheilo hi.29

Jesu adingin tetci pangte suakkhin lengh hoih hi. Christ ie sianthosakna tawh mi tawh kizopna vangliatna khauhsakin Honpa kiangah mite ihpaipih ding hi. Eite angsungdeihna khuatin om ihhihloh lam mite ihmusak dinga, ihngak thupha leh hamphatnate ihhawm khia ding hi. Biakna in ahehpih aneilo leh mite atukteh pahpah dingin hongbawllo hi, cih ihlakding hi. Mite phattuam nadingin Christ aneikhinte hanciamni. Leitung maitangah Christian hihna in maigumna leh lungnop lohna hilo ahihlam tangko ni.30

Innsungah ziadamin, migi hilengh, tua lungsim pen inn panin ihpuakhia ding hi. Thuakzawhna, lungduaina, migitna, leh innsungah ngaihmuanna lak hilengh, leitung adingin khuavak ihhi zo ding hi.31