Kumkikna Lamen Innkuan - Khen 15 (Azom1)

MAITAINA

Christian Dikin Maitai.—Nisim patauhna leh lungkhamna in nalungsim azinsak leh namitkhu akiasak dingin phal kei in. Naphal leh hehna nanei ding hi. Nuntakna in ihbawl hia, ihzon na ihmu ding hi. Dahna leh buaina ihzon leh, haksatna neuno khat agolpi ihuah leh, ihlungsim abuaisak ding leh mi tawh kihona abuaisak thu tampi ihngah ding hi. Thuhoih azongte in lungnop leh maitaina khop ihngah ding hi. Ihnuihmai leh ei kiangah hong kilehkik ding hi. Kamkhum takin ihpau leh kamkhum tawh hong kipaupih kik ding hi.

Christiantein maigumin adahmai uhciangin lawm hoihlim laklo, biakna lim lakkhial uh hi. Khatveivei mite in angaihsutnaah, maitaina in Christian vang hilo hi, acih pen khial hi. Vantungin kipakna vive hia, vantunga kipakna ihlungsungah akhol hilengh, kampau leh nikten puansilhah kilangding hi. Ihdahmai sangin maitaina in vantung Pa maiah lungdamhuai zaw hi.

Dahna leh buaina ihpunsak sangin maitaina neihna in Christiante ie tavuan hizaw hi. Mite in amaigum nahangun cidamna leh lungnopna suplawh uh hi. Amaute kimkotah thukim pihding thu omlo a, amaute maipuakin gum den hi. Kammal sangin kilang zaw hi. Hihbang dahna maigumna in cidamna susia hi. Angawi hatlo saka, anhoih ngahna buai sak hi. Dahna leh patauhna in siatna khat zong phopkik theiloa, natna piangsak zaw hi. Maitaina leh lametna in nuntakna lampi vaksak a, “amute adingin nuntakna hia, pumpi taksa adingin damna hi.”1

Langpanna Thuakciang Maitai.—Dahmai, lungkiatmai, leh phunciakmai kanei ngei hiam? Ka upna in hong kham hi. Christian nasepna leh Christian zia leh tongah dahna pulaak ding pen ngaihsut khialhna ahi hi. Biakna maan kisapna pen maigumna, lungkiatna, leh dahnate in lak hi. Christian taktakin Jesu sun nuam hi, ahangin Christian hihna in Christ tawh kibatna hi. Christian hihnadingin Christ ihtel mahmah kisam hi. Christ ie zongsatnate, leh Ama’ thukhunte eite sungah ahong phulkhiat ciangin Christ tawh ihkibang ding hi.

Lungsim phellang nasep, leitung iplah laina, gualnop nopna, amaizum leh ameidawi sila te in gamlapi panin Jesu’ nungzuihna ahi hi. Alungnuam, kiphaltakin Jesu’ na asemte in biakna khuavak ngah uh hi. Christ naitakin azuite in dahmai ngeilo hi. Christ sungah khuavak oma, lungnopna, kipakna om tawntung hi. Eite in Christ atam theithei leh leitung atawm theithei, Christ atam theithei, kei-deihna atawm theithei ihkisam hi.2

Khuavak’ Tate bangin Nungta.—Dahmai in lungtom ding, cihpen Pasian’ deihna hilo hi. Tangzang dingin phengphi ding, cih zong hituanlo hi. Satanin mihingte pen a uangtat dingin hong tawsawn den hi. Khuavak tate ihhihbangin Pasianin maitaina, lungnopna, alamdingin hong deih hi. Ama’ min aphatden dingin khuamial panin khuavakah hong samkhia hi.3

Naupangte’ Ngaihna Ngahding.—Nu leh pa aw, nuihmai un. Siate aw, nuihmai un. Nalungsim tawngah dahna aomleh namaitang lak khia sak kei un. Nalungsim sunga itna leh lungdamna tawh namaipuak taangsakin. Vangkhualin sikbangin kilingloin omlo zaw in, naupangte deihtheih dingin leh it dingin om un. Amaute’ lungsim biakna thumaan tawh min lecin amaute ngaihna nangah ding uh hi.4

Anuihmai Pua inla, Awkhum Nei in.—Nu leh pate aw, maitai un. Mite simmawh leh etneu dingin om kei un. Vantung na Pa uh tungah kiap in, thumangin, lungdam thei un. Ahong kihehsakna panin nathuaknate apulak khiading nahikei hi. Mite lungsim azo itna in tuithuk tawh kibang hi. Tate pattahna ah luangkhia tawntung in. Amaute in Pasian tuuhon laka tuunote ahi hi. Na taneute Christ kiangah hong paipih in. Nu leh pate in tate amaitai dingin pilna pia uh hileh taina aw tawh thuhilh ngeilo ding uh hi. Anuihmai apua dingin kipantah in. Na aw zong akhum pen dingin gingsak in. Taneute kiangah Pasian vantungmite om kinken a, nakamkhauh leh naphengphitnate in amaute bilah zakkhumlo hi.5

Nu in adiakdiakin maitaina leh lungnopna leh alungkim thei lungsim nei dending hi. Hihvaiah hanciamnate in akicing takin thaman hong kipia kik dinga, pumpi damna, kha picinna nangah ding uh hi. Amaitai lungsim in innkuan sungah lungnopna piangsak a, acidamna uh zong sangtakin khangto sak hi.6

Khuamial Hemkhiain, Nasep Zangsakin.— Nate lungnopna khuavak panin en un. Iplahna nei lecin, khuamialte nalemkhia thei hi. Lungnopna tawh na kha tuamin. Midangte adingin hehpih theihna kisin in. Tua in biakna kizekkhiatna ah nopsakna khangsak dinga, tavuan alian aneute lungzang takin sem ding hi.7

Ciamnuihhilo Maitaina: Christian Hehpihna.— Christian vang zong ihneih laitakin, nikteen puansilhah maitai in ih om theiveve ding hi. Ciamnuihna ahilo maitaina in Christiante neih hehpihna ahi hi.8