Kumkikna Lamen Innkuan - Khen 15 (Azom3)

LEENGLADONA

Vantungmi zong Leenglain Kido Khathei.— Leenglado vai Laisiangthoin ciangen hi. Leengladona pen tavuan bangbek hiloin, hehpihna zekkhiatna leh thupha saanna ahi hi. Leengladonaah Abraham kigen masa hi.

Hih thusiamna Pasianin Laisiangtho sungah ciamteh tham nasa hi. Kum tultampi khit ciangin Paulin “Leengla doding mangngilh kei-un: pawlkhattein vantungmite zinin nado kha uh hi” ci hi.

Abraham leh Lot te’ hamphatna eizong hong kipia hi. Pasian’ tate ihzindona tawh eizong vantungmite ihteenna ah azindo ih hi hi. Tuni in zong, vantungmite in mihing bangin hong pai a, zin in kido hi. Pasian’ khuavak nuaiah anungta ihhihleh ihmuh theihloh vantungmite ei tawh akithuahden hia, amautein thupha hong nutsiat hi.1

Akikinlo Hunpha leh Hamphatnate.—Pawlpi sungah makai dinmun alendingin kilawmna aneite lakah zindo siamna zong Khasiangtho ciamtehna khat nahi hi. Pawlpibup tungah “khat leh khat tungah phun seloin leengla nado un. Hih kha letsong angah khempeuhte khat leh khat na kisepsakun, Pasian’ sumkemte bangin Pasian’ hehpihna napulak uh hi.”

Hih thuhilhna lamdang takin kikinlo hi. Christian akicite lak nangawnah leengladona kitamzat hetlo hi. Eite lakah ihkilahding zahin leengladona ahi thupha ngahna leh hamphatna ihlakzo kei hi. Mi tawh kikhawlkhopna tawm mahmah a, midang nih leh thum adingin zumlo leh kisialloin zindo ding kingaihsunlo uh hi.2

Paulapding kicinglo.—Pasian’ mitein leenglate innah ciahpih ding paulap azong mihonkhat kamu hi. “Bangmah kahuankholh lohpi, huanding kaneihlohpi, mundangah paizaw uhhen” ci uh hi. Tua munah zin ado nuamlote adingin paulap dang zong omkhalai ding hi. Leenglate lungsim nasak mahmah hi. Hih leenglado nuamlo sanggam numei pasalte hangin lungnuamlosa-in ciahkhia uh hi. Sanggamnu aw, mohlum aneilo nahihleh Laisiangtho sunga mite tatdanin ta in. Navengte kiangah pai-in “lawmte aw, mohlum thum hong leeitawi un, khualzin kalawmte hong tung uha, amaute kapiakding omlo hi,” vaci in.

Leengla nial nading Laisiangtho sungah ettehding omlo hi. Zarepta a meigongnu kiangah Elijah ahong paiciangin amahin aneih bangbang Pasian’ kamsangpa nahawm hi. Amahin nalamdang bawla, a annek ding leenglapa hawmin a innah giaksaka, zindonu mahmah zongin anvakna ngah hi. Amah leh ata’ nuntakna kikepsak hi. Pasian’ minthan nadingin maitai takin kizekkhia hileh ettehding tampi lakah hihthu om hi.

Mi pawlkhattein, kaci uh dam kei, ci-in paulap zong uh hi. Tha nei hileng, semnuam ing, ci uh hi. Hihbang mitein amau leh amau kiumcihin , amaute thuaksiatnate ngaihsunin, amaute haksatna, gentheihna, leh ze-etnate gen uha, tua-in amaute adingin tulai thumaan suak hi. Midang ngaihsun zolo, amau bekmah kingaihsun uh hi. Midang zong nangmah bangin hehpih leh huh kisam uh hi. Cidamlo-a agim nang adingin damna om hi. Puan neilote puan pia in, inn neilote na innah hong kipuak leh agilkialte an pia in. “Tua hileh nakhuavakin zingtung bang hiding, nawhsatakin nacidam ding hi.” Thuhoihbawlna-in cidamna piangsak hi. Nasepna ah akihelte in Pasian ako dingin hong kisam hi. Thungetnate kasangding hi, ci-in kamciam hong pia hi. Guahzukloh hunin agil uh vah dinga, akangngeilo tui kiangah tui akibuak huan abang ding uh hi.3

Angsunggen atang omtein Thupha Mansuah.— “Kei leh ka innkuan” ci-a angsung bek athei mite tungah Topa lungnuamlo hi. Hihbang lungsim aneite in Christ ie nuntaknaah akilangkhia asiangtho thukhun tawh kikhelna angah ding uh kisam hi. Amau leh amau akikhakkhumte, leengla ado nuamlote in thupha tampi amansuah uh hi.4

Eite kimah thuhoih bawlding hunpha ih lakding vantungmitein hong ngak hi. Thupha pia hilengh amaute inzong eite thupha ahong pia kik ding hiam, cih ngak uh hi. Pasian mahmahin pawlkhatte azawng, ahau, agenthei in koih hi. Tuahangin mi khempeuhin ihzia ihtong ihkhantoh sak nading ahi hi. Amaute kize-et in, kisittelin, amaute lungtang sungah aom lunggulhna panin akikhan khiat theih nadingin mizawngte Pasian deihna tawh kituakin azawng dingin kiphal hi.5

Leengladona lungsim mite’ sungah asih ciangin, lungtangin angsungkhualna tawh thazawm hi.6

Kuate tungah Leengladona Kipiading?—Eite’ leengladona pen leitung ngeina tawh aki ukding hilo hi. Jesu Christ leh Ama’ thuhilhna tawh kisemding hi. Israel mite in amaute pawikhamnate ah mizawng, leengla, leh biakinn sungah siampite ahuh Levite leh biakna siate leh missionaryte hel uh hi. Hihbang mite pen leengla in ngaihsun uh hi. Biakna pawite ah mihon kikaihtuahte zindo uha, cinate zong kintakin kem uh hi. Hihbang mite hihbang hunte ah zin ihdoding ahi hi. Missionary asem zato siamahte leh siate, agim atawl nute ahihkeileh inn leh lo meel aneilo kum tamin athanemte leh zonkhalna tawh kidim alungkia tampite zindo in, eite’ hanthotna leh lungnopsakna in amaute nuamsak ding hi.

Christ in, “Nitak-an nahuan ciangin nalawm nagual, nasanggamte, nameeltheihte, mihaute, ahong thukkik zo dingte sam kei in. Pawi nakham ciangin mizawngte, aliam abaaite, mittawte sam lecin thupha nangah zaw ding hi, banghanghiam, cihleh amaute in hong thuk zolo uh hi. Midikte athawhkikni ciangin nangmah hong kithuk ding hi.”

Hihbang leenglate zindona vangik sa kei in. Zindona dingin sumtampi beina tawh zindo kisamlo hi. Kisialh nading thu omlo hi. Lungsim takpi tawh amaute sam inla, meikiangah khawl nading mun pia in, sabuai kiangah tutphah pia in, thunget hunin hun nahawpna thuphate in vantung lim pua hilo hiam! Eite hehpihna in mimal huang sung nawkin luangkhia dinga, innkuan huang sung tum ding hi. Midangte thupha apiadingin a inn uh ahongtein thupha ngahding uh hi. Mihon tawh kithuaha huzaapna in alamdang vangliatna ahi hi. Ut peuh lehang ihneihsate zangin amaute ihhuh zo hi.7

Ze-etthuak Khangnote ading Bukna.—Ze-et athuak khangnote adingin inn in bukna mun hiding hi. Tampite in lamkabom ah ding uh hi. Amuh uh thu in amaute ahuzaap in, thukhensat saka, tua in tu leh anungcianga nuntakna suak hi. Siatna in amaute sam hi. Siatna munin etlawm in ut huai hi. Apai khempeuh zong muak uh hi. Akim uhah khangno bekbek hia, inn neilo, huhding neilo, thapia ding omlo, siatna sungah kivei uh hi. Eite’ innkong biang nawkin siatna lim ah tuak uh hi.

Hih khangnote in hehpihna tawh ihkhutvan ding deih uh hi. Awdam tawh zawtin, kinna tawm piakna tawh amaute tunga ze-etna khuamial akinil khia thei ahi hi. Vantung panin ahong pai hehpihna taktakin lungtang kongkhakte hon nading vangliatna nei hi. Tua hileh Christbang kamzol, thumawl leh itna tawh ihlawn ding lunggulh uh hi. Khangnote tungah kinna lak hilengh, innah ciahpihin, maitaina tawh kim umin, huhna tawh huzaapin omlengh, asangna lam akahdingin hong kihei ding uh hi.8

Innkuan Siangtaka Omna Kemcing.—Leengla ahong pai ngei bangun ahongpai ciangin, nu ie hun leh vai khempeuh aladingin phalding hilo hi. Tate’ tu tawm leh mailam kha nuntak nadingin kin masa ding hi. Anlim mehlim tawh sabuai zepna-in hun kizanglo ding hi. Sum tampi beia, kuamahin vaita’ang zolo hi. Asiatzawkna pen ih limlahna ahi hi. Innkuante’ siangtaka anuntakna uh kepcing masak ding kisam hi. Nasum in adaihloh nuntakna dinmunsang anei bangin mite lak kei in. Na kizepna ahia na ankuangluina ah nahihlohpi ahibangin kilak kei in.

Migitna tawh leengla ado ding nahiphial zongin natanote’ thuhilh dingin Pasianin ahongkoihlam mangngilh kei in. Amaute in nangmah hong encik uh hi, nagamtat namithek nangawn tawh lamkhialh pih kei in. Naleenglate adingin nisimin nainnkuanpihte adingin nahihbangin om lel in. Maitai, thukhual leh thusiam in. Tuabangin pilna pia sianu hiin, limlahna tawh nasephoih asem nahi hi. Nekding dawnding leh silhding bekah nalungsim omlo ahihna zong tetci napang ding uh hi.9

Kilemna leh Tawlngakna Khuahun Kemin.— Innkuan sunga midangte tawh kizopnaah Christ ie ziadamna leh siangtaka anuntakna tawh kiuk hilengh innkuan sungah lungnuam zaw in, kimanna zong ihnei zaw ding hi. Mi lahnopna leh leenglate phatding deihna tawh ihdian sangin maitaina, hehpihna, leh itna tawh ihkima mite lungnopsakna in hoihzaw hi. Christ ie deihna tawh kituakin anungta nuam ihhihlam leenglate musakin. Nuntakna aniam hangin, eite sungah lungkimna leh lungdam theihna aomte midang musak in. Christian innkuan taktakte khuahun pen kilemna leh tawldamna ahi hi. Tuabang limlahnain thuhoih pianglo ngeilo hi.10

Sumbei Saziante Vantungah Kikem.—Ama’ adingin sumbeite Christ in vantungah sazian kem hi. Ama’ nasep nadingin akisam khempeuh hong pia hi. Christ hangin leengla adote, amau ading leh leenglate adingin ahoihpen na asemte thupha atuamdiak angahdingin kilawmna neia, vantungah kiciamteh hi.

Christ in leitungah anuntak laimahin leengladona athupina hong hilh hi. Tuipi kiangah gilkial mihonte in Amah aumcih laitakin gilkialsa in inn ciahsaklo hi. Anungzuite kiangah “Nekding pia un” ci hi (Matte 14:16). Na abawltawmsiam vangliatna tawh amaute tangsapna ahi an napia hi. Ahizongin apiak an pen mawl leh siang mahmah hi. Avalthau alim atui omselo hi. Athupiakna tawh vantunga anlimpen nangawn apiathei pa in tuipi kima ateeng ngabengte’ tangsapna napia hi.

Tuni in mite in azongsatnate uh siangin mawlin, pianna thukham tawh kituakin nungta uh hileh leitung mihingte’ kisapna khempeuh apia zoding zahin an tamding hi. Ngaihsutna leh sunmang duhnate tawm henla, Pasian lampiah nasepding hamphatna ngah zaw hile uh. . . .

Zawngkhalna tawh leenglado ding kinungngatsan loding hi. Ihneihbang apiakhia ding ihhi hi. Nuntakna dingin akitom zong kioma, tangsapnate lei nading sumlut neilo zong kiom hi. Hita leh amaute in Jesu pen amisiangthote tungtawnin itin, thu-um leh thu-umlote tungah zindo nuam uh hi. Innkuan ankuang tawh zin nado uh hi. Leengladona angahte inzong innkuan thungetna panin Pasian lawnna ngah uh hi. Khatvei zin tunna in kha gupna piangsakin sihna panin hinna apiang sak thei ahi hi. Hih nasep nadingin Topa in “Kong thuk kik ding hi” hongci hi.11

Hunhoih Hamphatnaah Khanglo.—Khanglo un, sanggamnu sanggampa aw, nahoih semdingin lau kei un. Nacimtak kei uhleh, ahun ciangin khaici ih at ding hi. Tavuan gending ngak kei un. Namitte uh hongin, nakimah kua om hiam, cih en un. Acimawh, agenthei, leh atangsamte tawh kimeeltheih un. Amaute kiang panin kibu kei un. Amaute tangsapna panin kikhaktan kei un. Kua in James in agen, asiangtho biakna nei, angsung thugenna tawh akininsaklo, leh asialote lak hiam? Gupkhiatna ngimna lianpi nasepna ah aneihzah sitlo in ahuhnuamte kuate hiam?12