Kumkikkna Lamen Innkuan - Khen 15 (Azom2)

KAMPAU

Aw in Talent.—Aw-in Pasian piak talent hi. Midangte thapiak, hanthot, leh huh nading ahi hi. Nu leh pa in Pasian it in, Topa’ lampi zui in, thumaan in thukhenna mang uh hileh, akampaute un amaute’ aituam thuakna tawh pau lo ding hi. Acidam huai, asiangtho, zia leh tong alamto hiding hi. Innah ahia apualam aom ahizongin akampaute uh phatakin teelding uh hi. Tua hileh amansel nuntak naah tuaksuklo ding uh hi.1

Kammal khat Sialin Huzaap Nei.—Nu leh pa in apau uh kammal khatsialin atate tungah huzaapna nei a, asit nading ahihkeileh ahoih nading uh ahi hi. Leitung mite’ kampau bangin nu leh pa in si-le-sa kampau le uh, Pasianin leitungmite pau bangin hong zaksak dinga, Ama’ tate pau bangin hong zaksaklo ding hi.2

Ahun tawh kituakin kampaunain khangnote adingin khaici hoih hia, lampi maanah amakaih ding hi. Ahihhangin kamkhialin siatna ah atun ding hi.3

Innsunga kampaute vantungmite in za hi. Tua ahihmanin kitaina omngeiloa, napaute in vantung akahto namtui bang ahi hi.4

Nu leh pa in innkuan pen migit kampau tawh asiangtho anamtui in kemding uha, itna leh hehpihna tawh pau in, akip akho thukhun ah kinga ding hi. Natate tungah kip hilecin aitlo hongsa ding uh hi. Hihpen lamet ding hia, nakampaute ngoltol sak kei in. Thutanna leh hehpihna in khut kilen uha, lunghei neihding hilo hi.5

Sungtawng Hehpihna Pulaakna Kam.— Kampau tawh kisaiin asiangtho, amigi, leh thumaan hiding hi. “Kam in sungtawng hehpihna pulaakna ahi hi.” Hih adingin ahoihpen sangin inn ahi hi.6

Migitna kammalte in daitui bang hia, ziadam takin kha tungah zusuk hi. Christ thu Laisiangtho in agennaah, hehpihnain Ama’ mukah kibuaksuka, agim atawlte adingin ahunlapin pauthei hi. Topa in hongsawlna ah “Na khempeuh hehpihna tawh pau den un” tuahileh, “aza mite tungah hehpihna naseptheih nading ahih hi.”7

Innah Aw Sinna Neiding.—Innsungah aw kipat- tahna piakding ahi hi. Agenthu uh mite in atheih pahpah nadingin tate pau siangtakin thu agentheidingin nu leh pa in hilhding hi. Pasian azahtak siam nadingun Laisiangtho siangtakin simkhia thei ding uh hi. Innkuan biakna tauah akhukdin mimalte in akhut uh amaiah, tuphah tungah koihin Pasian kiangah thungenlo ding uh hi. Alute uh sangkhanto in, asiangtho hanna tawh hehpihna tokhom ah hong paiding uh hi.8

Siangtakin kampau in. Mite lungsim angah dingin awnem leh kamzol zangdinga, thuneihna leh kamkhauh zanglo ding hi. Awsuah mahmah zong tate pantahin. Kampau zongsatna hoih hilhin. Buaina atungsak thei kamhoihlote abeidongin sekin.9

Aw pattahna in sangnaupangte cidamna tawh akisai thu khat ahi hi. Khangnote in phatakin hudik dinga, akisamlopi in lai asim khiat uhciangin gawlgui salin hanciam akisamlo dingin hilhin. Kampau pen gilpi panin tha lakding ahi hi. Gawlpanin pauna in nadangtung lam panin aw akigingsak hia, gawlgui nasak hi. Ama’ kizat namun adingin thanem sak hi. Kampauna ah gilpi panin atamzaw tha akisal ding hia, nagawl pen aw luankhiat nabekin akizangding hi. Aw hoihtakin azatdanding akihilh hileh tu-a asisa tampite hinglaiding uh hi. Laisim khiatna leh kampauna ah gilpi sagolhte zatna hangin aw leh awmsung haksatna damtuam dinga, nuntakna zong sau tuam ding hi.10

Hansanna Thaman.—Lungkiat huai hanna leh kamkhauhte akipau ciangin ta kap hi. Ama’ khuak sungah dahna leh thutangpekna kikhencip hi. Tua hi a, nute in namaipuak uh vaksak un. Ahihtheihleh nui un. Tua hileh ta’ khuak leh lungtang sungah tua maitaina kileng dinga, limsuai siamte in laidal kang tungah amilim suaihbangin kilang ding hi. Note sungah Christ ie teenna naneih nadingun hanciam un. Tua hileh plastic abang ta’ khuak sungah Pasian lim kikhen kipding hi.11

Aginngaih Awsanna Omkeihen.—Inn sungah kithutuahlohna aomding phal kei un. Awnem takin pau un. Khauhpauna tawh na aw uh sangsak ngei kei un. Nalungsim uh khingsak un. Mawh kizonna leh zuauna hemkhia un. Otkhaina aomlo, kilemna aomna vantung siangtho atungdingin tate kigingsak nuam nahihna amaute genpih in. Ze-etna atuah hunun thuakun. Nang adingin thuneu nasak hangin amau adingin lian hi.12

Nute leh pate akikhel uhciangin innkuan ukna thukhunte zong akikhel kul hi. Angaihsutnate uh zong kikhel dinga, aleei uhzong kikhel ding hi.

Tuaciangin innsungah awsanna, hehpauna omlo ding hi. Azate adingin lungnop huai leh thupha hiding hi. Na aw panin amuhdah huaite lakhia in.13

Lungsim manlanna ukin ihkammalte ihsek dinga, tuabangin gualzawhna ihngah ding hi. Ih lungsim leh kammalte ih ukzawh keileh Satan’ silate ihsuak ding hi. Ama tungah atokai ihsuak hi. Amahin eite salin ahong man ahi hi. Azakdahhuai kammal, lungtomna, lung akiasak paunate in Satan biaknaah akikeng biak piakna ahi hi. Pasian adinga biakpiakna sangin tam amanzaw biakpiakna Satan apia ihhi hi. Banghang hiam, cihleh hihin innkuan sunga aom lungnopna leh kilemna leh cidamna susia hi. Tuabek thamlo in tawntung lungnopna nangawn ahong tansak thu ahi hi.14

Kampau in Khua Mialsak maw, Vak Sak.— Naupangte  leh khangnote in akampau uh phatakin auk dingin pattahding ahi hi. Banghang hiam, cih leh tuabang kampau nate in amaute inn sung bekah hilo amau tawh akithuahkha mite lakah zong khuamial ahihkeileh khuavak piang sak hi.15

Kampau talent ihzatsiamloh manin lungnoplohna piang den hi. Ngoltol takin apau dingin Pasian’ kammal in thu hong pia lo hi. Tuabanga pauna in innkuan sungah kithutuahlohna, leh lungnoplohna piangsak hi. Tuabanga apaute innkuanpih dangte in zahtakna kiam pah a, athuakna kemcing hileh mite ngaih leh belh asuakding ahi hi.16

Tate tungah Kamkhum; Zahtakna Kam Nu leh Pa tungah.—Nu leh pate in tate tungah kamkhum bek pau uh hen. Tate in zong nu leh pa tungah zahtakna kam pau uh hen. Innah hih thu phawkding ahi hi. Gamtat kilamnaah tate in zongsatna hoih neihna, Pasian’ thu amangding leh Pasian’ hilhna athuakdingin makaihna baihsak hi.17

Daikaina Khempeuh Pelun.—Pate, nute, pasalte leh zite, sanggam numei pasalte aw, adaikai kampau, gamtat leh ngaihsutnaah kipantah kha kei un. Kamkhauh pauna, ciamnuihna, thusiamlohnate in note pianzia dang khat hia, thumaan tawh siansuahna angahte adingin nuntak kailo hi. Adaikai kampaute, zualzanna, kimawh- sakna, kineusehnate tawh kibuahbansak nadingin inn in asiangtho lua mun ahi hi. Kamsiate daisak un. Asiangtholo ngaihsutnate paaikhia un. Ahang in Tetcipang Nihtein in nakhempeuh sittela, gamtatna tawiteh hi. “Na nasep ka thei hi” ci hi.18

Innkuan sungah athanghuai kampaunate kizanglo ding hi. Lungtang asiangtho ciangin pilna tawh kisai hauhna hong luangkhia ding hi.19

Innsungah hai pauna tawh hunbeisak kei un. Naupangte nangawn akilawm kampaute hangin hampha tuam uh hi. Nu leh pa kikalah thadahna leh hai pauna tawh kihona in tate lakah tuabangmahin hai pauna piang sak hi. Pilna, thupina, amaan kampau nate in tuabangmahin tate huzaap uh hi.20

Hehsa leh Lungtom Kampauna asiatna.— Natate tungah hehna tawh napau ciangin diklohna ah nagalpa ahuh nasuak hi. Tate in aneu lai panun thutang takin pau theihna ngahuh hen. Tate pattahna pen naungek hun panin kipanin, kamkhauh leh lungkiatsakna hilo, migitna leh lungduaina hizaw ding hi. Numei pasal picing asuahdongun thuhilhna napia ding uh hi.21

Topa’ nasepna huh nadingin innkuante in nakpi takin thungen ni. Mite mawhsak nopna, mumal meel neilo a pauzalzalnate ihzawh ding ahi hi. Innah thusiamin amigi dingin sin ni. Kinna leh mite ading ngaihsutna ah zongsatna lamto ni.22

Lungduailo kampaunain khat leh khat kam kithuhna tawh innkuan adingin natna piangsak hi. Thumaan kisakna tawh kithuhna in nungzuih hi. Tuabangin na ngawng adingin hakkolpi hong thuahsaka, napau bangin nangtungah ahong tung kik ding hi. Na kha adingin an ala na hi hi.23

Kamkhauh in nabil tungtawnin lungtang saisuka, nasunga ahoihlopen lungsim thosakin, numei leh pasalte Pasian’ thukham apalsat dingin kaikhia hi. Kammal in khaici hia, singkung bangin kisuan hi.24

Thuakna pana Kampau in Samsiatna.—Innkuan tampite sungah mimalte in kamthanghuai, phamawh saklohna, kitomna, kamkhuah pauna akhauhsemsem in kizangto a, akilawm hetlo kammalte kihel ta hi. Pasian khil bang hilo, Satan khil bangin kampauna piangkhia hi. Meikuang banga mi akangthei kampaunain Pasian leh vantungmite maiah samsiatna suak hi.25

Tate’ Muanna Bangci-in Pa-in Mansuah.— Sanggam aw, thuakzawhna aomlo nakampaute in natate nasak hi. Akum uh atam tektek ciangin siat genna nuam hongsa uh hi. Mawhna zonna in na nuntakna susia a, nazi natate tungah tusawn lai hi. Natate in nangtungah muanna hong pialo, amaute mawhna lah nusia nuamlo hi, banghang hiam, cihleh khatakin nataiding lau uh hi. Na kampaute in singkung lopa asusia gial tawh kibang hi. Hihin asuksiatna kineu seh theilo hi. Na kampau khauhte apelh nadingun natate-in hongkhem uh hi. Mawhsakna apelh nadingun thumaan leh danpiakna hemkhia ding uh hi. Akhauh, avot thupiakna in apha bawllo hi.26

Kiciamna Cianpiak.—Innah kamhoih apau dingin kamciamna lai bawlding hoih hi. Tua hileh itna in kampau ukding hi. Nu leh pate aw, pau pakpak kei un. Tate in khialhna abawl leh puahpha un. Na kampau uh nem sakin migi sak un. Na tai sialun lungduaina leh thuakzawhna aneidinga thuhilhna apia nahi uh hi. Ahoihlo napuahna ah itna ultung sak in.27

Sabuai Kimah Kihona.—Innkuan tampite in a an uh lungkimlohna leh patauhna tawh ne uh hi. Amaute in alawmte gamtatnate satzanin kuang tawh lui uh hi. Akikuppih dingin gensiatna hun kihong hi. Uhamte bek hilo, naupangte hizaw hi. Hihin Pasian pahtawilo hi.28

Inn sungah mawhsakna leh siagenna lungsim ading mun pia kei un. Innkuan sung kilemna in hihbang tawh nitsak dingin siangtho lua hi. Ankuang um kawmin siagenna kikhutkhakin, mawhsakna leh kidaisakna kithuk theizel hi. Tuni Jesu ahong paiding hileh, Christian akici mitampite in mawhsakna leh gitlohna lungsim iplah lai uh ahihlam muding hi. Vantung inn azuandingin amautein kilawmna nei nailo uh hi.29

Innkuan kisuktuahna ah tate’ lungsim paknamtui buah bangin anamtui dingin geel ding ahi hi.30

Siagenna leh Gensiatna.—Misanete in mihing alau aling laimah balin asa nein leh asi adawn uh bangin mite lungsim tawngte genkhialhsakin, avang uh susiatsakin, agamtatnate uh semzansakna in bang kilamdang tuan hiam? Naupangte leh khangnote in Pasianin agen “Sihna leh nuntakna in leei ie vangliatna ah om hi” acih thu sin uh hen.31

Siagenna leh gensiatna in kipumkhatna asuksiat nadinga Satan khutzat khat ahi hi. Lawm leh gual kikhensakin, ih up thumaante amaimialsak vaihawmna ahi hi.32

Kimuanlohna Khaici Vawhna-in Galpa Huh.— Kammal akha theithei pauna in mihing pianpih ahi hi. Hih pianzia azuite in Satan ahong lut nadinga lungsim konghonna leh mite khialhna leh mawhna aphawkbaih dinga hanciamna ahi hi. Mite’ thanemnate sittelin, Pasian tawh akizopna ahoihpen amaute’ hanciamnate uh muanlahna khaici tuhsakna in Pasian tawh nasepna hilo hi. Muanlahna khaici tuhna in Pasian maipha ngah ihkisakman hia, amaipha ngah takpi lah ihhi kei hi.33

Mawhna zonna, pau pakpakna, migitna akihello awtol taka kampaunate atawp dingin Pasianin thu umte hongsam hi. Nu leh pate aw, natate tungah nakampaute un migi in awkhum henla, tua hileh tate Christ kiangah anaihpih dingin vantungmite in zong hong huh ding uh hi. Inn biakinn ah kipuahphatna taktak kisam hi. Tumahin kipan in. Phunciakna leh kitainate beisakin. Tuabang kamhoihlote in vantungmite hawlkhia a, Satan adingin siatna kong ahonsak ahi hi.34

Nu le Pa Thuak leh Khal Na’ng Thum.—Nu leh pa aw, lungkiatna nei in, nahehna tawh innkuan bup mawhna tawh gu nasawh uh hi. Nomau mahin athuapin kivil kicing un. Nakam uh tawh namawhna uh kikhel unla, awkhum leh kamhoih tawh pau ding khensat un. “Kalungkiatna tawh katate lungnopna kasumual keiding hi” ci un. Nang leh nang nakikhalna tawh nathahat zaw ding hi. Natheihna sazangte linglawng baih lualo in, thukhun hoih tawh nakikhauhsak ding hi. Thumaan takin nisim nasepte theihna tawh asemkhia nahihna in nangmah hong hatsak ding hi. Na hanciamna amu vantungmite in hong pakta dinga hong huhding uh hi.35 Nu leh pate aw, awnem takin tate hopih un. Mawhsakna thuakzolo in, tangtel sihtan nabang hi.

Natate zong nangmah bangding uh hi. Nathuakzawhloh ding gamtatna suangphah kei in. Kimawhsakna nathuakzawh keileh, natate in zong thuakzolo ding hi. Nangmah sangin amaute thanem zaw lai uh hi. Na awkhum leh awdamte innkuan sungah nitang bangin kizelsak in. Na kikhalna, nangaihsutsiamna, leh nakonlawh zawhnate azah zakhatin hong gahkik ding hi.36

Gamdaih Hun.—Bittakin akiapte tung nangawnah ze-etna hong tungding hi. Alungduaipente lungduainate nasia takin kisittel ding hi. Pasal ahihkeileh zi in nawhsa takin dawnkikpah dingin kampau kha ding hi. Kampaute in gamdai hen. Gamdaihna in ngaihmuanna hi. Kam tawh taiin akingahlo mawhna thuhilh zong gamdaihna in akhauhpen thuhilhna pia thei hi.37

Naupangte leh khangnote in athuakna uh panin kikham zoloin apaukhiat uhciangin gamdaihna in ahoihpen lampi hithei hi. Taina leh mawhsakna sangin hoih zaw hi. Kisikkikna hong paikuan ta hi. Gamdaihna in kham tawh kibang hi, acihbangin daihna in pauna sangin kikhelna piangsak zaw hi.38

Midangte lungduai lo-in, lungkia in, phun thei uh hi. Ahangin, kei-lungsim kiuk lo hi. Tua hun ciangin Zion la pawlkhat sa in. Jesu in lettama saiah anasep hun laite-in, mipawl khatin na umcih theizel uha, alungduaina asin uhciangin, Psalm Late sak kipan hi. Amaute in bangbawl uh, cih aphawk ma-un, Ama’ lasak sakpih uha, huzaapna tawh Khasiangtho in ompih hi.39

Kampaunaah ki-ukna Galsim.—Ki-uk kikhalna tawh gamtat lamtohna ah lim alakdingin nu leh pate Pasianin anaipen tuuhon innkuan sungah khuavak thehthang sak hi. Bangmah amanlo thutang genna tawh hun beisak kei un. Nuntakna sunga thusimte Pasianin encik hi. Ki-uk kikhalna ah atawntung gal simna om hi. Gamdaihna leh thungetna tawh kamsia apaulo dingin hanciam kisam hi. Tuabang hanciamnate leitung mite in pakta khollo kha ding hi. Na gen sawm kamkhauhte dawkkikna zong kuamah kiangpanin phatna ngahlo khamah ding hi. Leitungin mulo khading hi. Kampau kiukna ah agualzote zong simmawh khading uh hi.

Vantung’ laibu sungah agualzo in kiciamteh hi. Galsimna leh gamdai taka gualzawhna thusimte amu Pa in “ahehhakte in athahatte sangin hoihzaw a, alungsim aukzote in khuapi azozopa sangin hoih zaw hi” ci hi.40

Nahanmang ding, nakitom leh nataingawp ding nanial zawhleh Topa in nalampiding hong lakzo hi. Christ ie ngeina bangin kampau talent azangdingin Pasianin hong huhding hi. Lungduaina, hehnepna, leh itna lungsimte inn ah aciahpih dingin Topa in hong zang hi.41