Kumkikna Lamen Innkuan - Khen 12 (Azom5)

THUKHEN 12

Innkuan Nuntakna Tuktehna

THU-UMLO LAWM’ TUNGAH LUNGSIMPUAK

Christian Ziin Thu-umlo Pasal Madiam?— Innkuan sungah buai akisa nu pawlkhat in thuhilhding utin laihong khak uh hi. Tuate lakah khatin adangte adingin hong dong diak hi. Pa leh apasalin thu-um hilo hi. Tua hia, tate pattahnaah hatsatna tampi pia hi. Apasal in azi bawlsia, Pasian zahpih, kampau ngoltol hi. Atate zong anu’ thu amanglo dingin hilh hi. Atate tawh thungen dingin akikaihkhop uhciangin apasal hongpaiin inn gamlum saka, Pasian samsiatin Laisiangtho zong phitsan hi. Azi in lungkia in nuntakna in vangikpi khat hi, ci hi. Bang hoihna bawl theiding hiam? Innah aom manin atate adingin bang metna om bek hiam? Pasian adingin na khat peuh peuh zong sem nuam hi. Apasalin atate nu’ thu amanglo ding leh azahtak lodingin hilhden ahihmanin a innkuanpihte nusia leh hoih zaw in teh, ci in ngaihsun hi.

Hih thu adingin kagen nopah, nute aw, zonkhalna hangin, kha nuntakna aliamna leh meimate hangin, pasal’ lungtomna leh gitlohna hangin, natate uh nusia kei unla, nathuak ding zia-etna napua phot unla, Pasian aneilo pa leh pasal uh tu in Satan ukna nuaiah aom hiphot ahihmanin thuak phot un.1

Kikhalna Limlak suakun.—Zia-etna naneihlam ka thei hi. Ahong kaihuailo, ahawlkhia lungsim aomlam zong ka thei hi. Napasal maiah nisim in thuakzawhna leh kikhalna lim nalahding kisam kasa hi. Alungkim nadingin nahanciam theihzah sitlo in hanciam in. Ahizongin thumaan thukhunte khaksuah kei in.

Pasian’ nasep nadingin Christ in abupin—lungtang, lungsim, kha, leh tha hong kal hi. Ahong ngette napiak ciangin nagamtatna tawh Ama’ tangding natang ding hi. Khasiangtho in nasungah nasem ahihlam na pasal musak in. Kidawmin, ngaihsut siam inla, lungduai in, thuak in. Amah maiah thumaan ading thunial kei in. Zi nahihna tawh sepdingte sem inla, alungsim kilawng hiam, cih en in. Napasal na itna kiamsak kei in. Ahihthei laiteng, lungkim sakin. Nabiakna hangin kigamla kei un. Theihna tawh Pasian thu mang inla, koikoi ah napasal lungkim sak in.

Jesu na itna leh namuanna mite musak in. Thumaan ie iplah huai melhoih napasal, thu um leh thu-umlo nalawmte musak in. Ahihhangin nahoih nasepna asusia zel napatauhna, nakhasiatnate lak kei in.

Napasal bil sungah mawhsakna leh langpanna kammal kiza sak ngei kei in. Khatvei vei kongkawcik nanawk zel a, hitaleh nagentheihna genkha kei in. Gamdaihna in kamsiamna hizaw hi. Pau pakpakna in lungnoplohna khangsak hi. Maitai inla lungnuamin. Na inn sungah khuavak atam theithei lutpih inla, khuamialte panin kikalhcip un. Dikna Tapa ie nitangte nalungsungah kitaansak in. Tua hileh Christian nuntakna ie namtuite innsungah kizel ding hi. Thumaan ateenlohna kibatlohnate kiphunsanna om nawnlo ding hi.2

Vangik apua Zi Maitaidingin Kihilh.— Napasalin Jesu’ kiangpanin amaitang heikhia ahihmanin nasep nih anei nasuak hi. Pasian’ thuzuihna ah nangkia nahihmanin dahna lianpi nanei mahding hi. Maantakin na upna leh thumanna naneihna tawh napasal lungsim nangah kik thei ding hiam? Na it natate Jesu’ kiang zuatpih in. Kam mawl takin Ama’ thumaante genpih in. Christ ie itna apulaak la zong sakpih in. Tate Christ kiang paipihin, Jesu in naupangte it hi.

Maitai den in. Christ in asawl Hehnem Khasiangtho naneihlam mangngilh ngeikei in. Nangkia nading ngei kei hi. Nang ahonghopih aw ngai lecin, nalungsim kongkhak hon hilecin, “Hong lutin, To Jesu, Nang tawh an ne in, keizong Nang tawh nane ding hi” cile cin vantung Leenglapa hong lutding hi. Hih Pasian nangtawh aomkhop nakleh tawldamna leh tawlngakna natungah aomding hi.3

Christian Thukhunte Lenkip.—Pasian akibiak lohna inn in ahawl aomlo tuipi sunga tembaw tawh kibang hi. Tuihualte in hongsatin, hong tum dinga, atunga atuangte adingin lauhuai hi. Nanuntakna leh natate nuntakna Christ adingin thupi seh in. Pasian’ tokhom maiah nang leh napasalin amaute namu ding hi. NaChristian thukhunte thanem sak kei in. Hatsak semsem in. Napasal ahehsak ahizongin, bangzahin ahong langpan zongin, thumaan leh manmanin kipdin in. Alungtang satak aneihleh hong zahtak ding hi.4

Pasian’ Ngetnate Masasak.—Amonu keimah hong kilak hi. Pasian ait khat ahihhangin alinglawng, sila bangin kiman a, lungkia in patau hi. Amah sangin akum atawmzaw Pasian aneilo khangno khat ie thu aman thapaih ding haksa nasa hi. Tua numei in pasal aneih hangin ama’ mimal hihna akhahsuah ding hituanlo hi. Leitung thuneihna sangin Pasianin amah aneihna lianzaw hi. Christ in Ama’ sisan tawh aleisa ahi hi. Tua numei in amah leh amah zong kineilo hi. Pasian pummuan theilo in, aupna, atheihna azawhthawhbawl agilo Satanin aut hunhun in azat theih khangno khat ie nuaisuk nuaitohin om hi. Hehmun mahmah ahihmanin akhuak sazangte kisia in, amah zong kisatnim khin hi. Pasian’ nasepna kikhiamin hihbangin athuak ding pen Pasian’ deihna mah ahiding hiam?

Hilo hi. Apasal neihna in Satan khemna ahi hi. Ahizongin ahun hoihte zangin apasal pen migitakin bawlin alungsim sianthona nawngkaisak loin alungnop theihtheih nadingin apasal abawlding ahi hi. Apasal in langbawl kinken hileh ama adingin hih leitungin vantung ahita hi. Ahizongin azi kikhopte paisakloin, agilo apasal alungkim sak bekdinga abawlna in gulpi lungsim hia, Pasian’ deihna hilo hi.5

“Midang khatin agenin, zi kanei zota a, kongpai thei kei hi” aci hi. Hihpa mawhna in akiteenna hilo a, asiangzaw, ahoihzaw ngaihsutnate alakkhiatsakna in mawhna ahi hi. Zi leh innkuan khat in pasalte lungsim Christ kiangpan kaihkhiatsakin lungdamna thu ie sapna nialngeilo ding hi.6

Avekin Namansuahsangin Aphelkhat Honin.— Sanggam K aw, lungkiatna tampi nanei hi. Ahihhangin kinin, kipin, innkuan sungah nasep pha asemdingin khensatna nanei ding hi. Ahihtheih laiteng amaute napaina ah keeng in. Vantunglam nakhualzinna ah amaute natonpih theih nadingin nahanciamna nakhiam ngei kei ding hi. Ahihhangin anu leh tate in nang nung zui nuamlo-in, nabiakna nasepna leh innkuan tavuan panin nangmah ahong nawlkhin uhleh, nangkia nahizongin namasuan nazomding hi. Pasian kihtaknaah nungta in. Khalam khantohna nangah nadingin kikhop hunte ngahding nahanciam ding hi. Ahangin, ahong paiding hunte ah tha nakisam hi. Lot ie neihsa khempeuh meiin kangtum hi. Supna athuakding nahihleh, lungkiat nading omlo hi. Na innkuanpihte khatpeuh ahonkhiazo ding nahihleh, nakhempeuh nasupkhit sangin hoihzaw hi.7