Kumkikna Lamen Innkuan - Khen 12 (Azom6)

THUKHEN 12

Innkuan Nuntakna Tuktehna

THUHILHSIAPA’ INNKUAN

Thuhilhsiapa’ Innkuanin ahilhthu lakding.— Laisiangtho ahilhpain ama’ innkuan nuntakna tawh ahilhthu apulaak dingin Pasianin geel hi. Amihing hihna in akampau sangin huzaap zaw hi. Nisim nuntaknaah upna neihnain mihonlakah tetci pangzaw hi. Lungduaina, maanmaan nuntakna leh itna in, thuhilhna in abatloh lungsimah thu khenkip theizaw hi.1

Phatakin kisemkhia hileh, thuhilhsiapa in asabuai tungah akoih lessonte atate athuhilhna ah kilangkhia hi. Atate amaanlo thuhilhna apia hizenzenleh, ainnkuanpihte ukna leh khalna lak zolo a, Pasian’ tuute cingding akipat ma-in Pasianin tate phatakin hilhding kisam asakna asinphat akulding ahi hi.2

Atavuan Masa in atate hi.—Thuhilhsiapa tavuanin anai agamla ah omkawikawi ahihhangin amasa penin atate ahi hi. Innpua lama nasepte tawh akibuaisak masading hiloa, tate hilhding nelhsiahding hilo hi. Innsung nasepte athupilo zawin ngaihsun khadinga, ataktakin mimal leh khuatual khuasaknain inn panin akipan ahi hi. Pawlpi’ gualzawhna, numei pasalte lungnopnain atamzawin inn huzaapna panin kipan hi.

Khuatual nasep nadingin inn nasep awlmawhloh nangin paulap ding khat zong omlo hi. Khalam innkuan khuasaknain amasa ding ahi hi. Nitawpni thu akikhen ciangin leitungah apiankhiat sak Christ adinga atavuan lakna kisittel masa ding hi. Atate tunga abawlding leeiba pen midangte tunga abawlna tawh akidinsakding hilo hi.3

Thuhilhsiapa Huzaapna.—Thuhilhsiapa’ tate-in akinelhsiahpen tate ahi hi. Apa in amau tawh aomkhop hangin hun tomno sungbek om khawm kha hi. Tua hia, amaute’ gualnop nading azongtawm dingin kinuasia hi.4

Banghun cilo, nu leh pate tate tunga thumaanlohna kanin thu sia zaw omlo hi. Mihingte sia dingin akikoihte nelhsiahna in azahsawmin lian zaw hi. A innkuan sungah auk zawhloh uh ciangin, amaute in amaute’ limlahna tawh midang tampi lampial sak hi. Tavuan aneizaw amaute’ mawhna in midangte sangin lianzaw hi.5

Zi leh Tatein Upna Thukhenna ahoihpen.—Ih zia leh tong alaksiampen thu in pulpit biakna hilo, innkuan biakna ahi hi. Siapa’ zi leh tate in innkuan sung ahuhdingin akicial hia, apasal’ upna amaanna gen thei uh hi. Mihoihin innkuanpih adingin thupha ahi hi. Zi, tate, leh huhte in biakna adingin ahoihzaw ahi hi.

Sanggam, innsungah Christ lutpih un, pulpit ah zong paipih un, napaina peuh uhah tonpih un. Pasian’ nasepna ahoihna genpih hong kullo dinga, Christ ie sila nahihna vantung thupiakna angah nahi uh hi.6

Thuhilhsiate Ziin Huhnu maw, Dongkhak?—Thuhilhsia nasep akisaan ciangin, Pasian muk asuak hia, Pasian’ kammalte mite kiangah apiasawn uh ahi hi. Tua hia, Tuucing Lianpa tawh bangzahin kinaituak hiam? Pasian’ maiah bangzahin kiniamkhiat tuak hiam? Zi nuntakna in Laisiangtho tawh bangzahta in kiaihual tuak hiam? Atate in ama thu amanuh akul ahi hi.

Thuhilhsiate zi in apasal ahuh ahihkeileh apasal adingin thupha ahihkeileh apasal nasep nading masuan adongkhak hithei hi. Thuhilhsiapa in nisim anuntaknaah kimanna aneih nadingin azi tungah tampi kingam hi. Mi maimai dinmunah akiat suk nading zong azi mah tawh kisai hi. 7

Thuhilhsiate zi in apasal nasepnaah ahuhding hia, bangzahlianin huzaapna nei uh hiam, cih akidawm leh athei sitset ding uh ahi hi. Midangte sangin ki encik zaw a, ahuzaapna uh zong tampi kilamen zaw hi. Akizepna uh zong etteh takcing ding hi. Anuntakna uhleh akampaute uh zong etteh ding hia, sihna hilo, midangte anamtui sak ding ahi hi. Amaute in kiniamkhiat, ziadam leh dinmun akitawisangte neiding uha, akampauteun vantunglam azuansak hiding hi. Dotna lianpi in, “Kei ading leh mite adingin akizang beel ka koici hih ding hiam?” cih hiding hi. Lungsim phellang tawh hihna kisem theilo hi. Pasian in ihlungsim khempeuh, utna khempeuh, lo adang deihlo hi. Amaute huzaapna in ciantakin, khensatna tawh, khiallo takin, thumaan ading hiding, thumaan langpanlo ding hi. Jesu tawh akaihkhop kei uhleh athehthangte hiding hi. Asiangtholo zi in thuhilhsiapa in aneihtheih samsiatna ahi hi. 8

Pasian’ thu atangko dinga ateel thuhilhsiate alung kiasak dingin Satanin nasem den hi. Nawngkaisakna ahoihpen thu in innkuan huzaapna tungtawn pan ahi hi. Asiangtholo zite tungtawn ahi hi. Alungsim uh amahin ukzo hile-uh, kam leh sepna tawh kha gup nadingin na asem pasal lungsim pen zi tungtawnin lawngkha pen hi. Angsungthu agen, agualnuam nuam zite tungtawnin Satanin apasalte nasepna susia zo pen hi.9

Innkuan Ukna vai Thuhilhsiate’ Hilhna.— Pasian’ piak nasepteah nathumaan laitakin inn tavuan zong oma, kipelh theilo hi. Gospel lo in leitung ahi hi. Gospel khaici avawh nuam nahia, khaicite apo khiat nadingin Pasian kiangpanin guahtui angak nahi hi. Tua hileh gahte hong neiding uh hi. Nang zong lo neu khat hong kipia sawn hi. Nahuan sungah lopa leh lingkungte apo dingin na eknutsiat hi. Midangte huan sungah lopa bot in namanlah hi. Hih nasep in nasep neu bang hilo hi. Hun thupi ahi hi. Midangte tungah gospel natangko bangin innah zong kizek khia

in.10

Natate hoihtakin napattah zawh matengin pasal’ nasepna panin zi in kihemkhia in tate tawh omkhawm hen. Banghang hiam, cihleh pawlpi tungah polhtehna kipia theilo hi.

Apilngiallo thuhilhsia pawl khatte in khualzin kawikawi uha, athumanglo atate kengkawikawi hi. Atate in apulaak uktheihloh lungsimtein pulpit tunga athuhilhnate langpan uh hi.11

Midangte Tate Kinna.—Midangte puapaihin na innkuanpihte tawh hun abeiding hituanlo hi. Sanggamte tawh nainntek tanna nahawpsot leh banglo khat hong kileh kikding hi. Lungsim kibatpih innkuandangte tawh kituahin thupha apiading leh thuhilhna apiadingin hunla in. Pasian’ nasep nadingin kiap inla, nang ahong muak mite adingin thupha suak inla, tate a awlmawhdingin hopihin. Naupang dangte sangin natate manpha zaw hi, ci in ngaihsun kha kei in.12

Thuhilhsiapa’ Lammang Tapa ading Hilhna.— Napa in gospel nasem ahi hi. Nu leh pa alungkiasak dingin Satanin tate tungah naksep mahmah hi. Apian theihleh atate tungah ama siattatna leh pianpih zongsatna te tawh mancip nuam hi. Nanu leh napa’ lametnate asusia dingin Satan apawm nahi hiam? Satan khut sungah naki ap manin amaute in dahna mai tawh nang ahong en tawntung ding adeih nahi hiam? Amaute’ thu amanglo dingin pantah kha ung, ci-a utut in agamta nangtungah alungkiatna sungah amaute asengcip nuam nahi hiam?

Na nu leh napa’ lungsim sungah lametna tho sakinla, tu tadihin ze-etna anangzo ding tha neilo nahihmanin Satanin ama’ cihbangin nagamtatnate hangin kisial hi. Nu leh pa alungdam sakdingin zong thu nagen theizela, nagalpa do zolo nahihmanin naguallel zel hi. Tua in nanu leh napa bangzahin lungtang nasak hiam, cih natheihpih zo kei hi. “Hih zo kei ning” naci ziau zela, hih theikei ning, nacihte zong khatveivei nahih zawh ding thu nahi zel hi. Nagalpa nado zo thei hi, nang’tha tawh kizolo ding hi. Pasianin tua tha hong pia ding hi. Ama’ thu muang hilecin, “hih thei kei ning” naci ngeikei ding hi.

Na ziakai luat ma-in Topa’ min tawh kong thum hi. Pasian tawh na asemkop nu leh pa ta nahihmanin, lungsim hoihtak apaaiding hinapicin nalampialna in nanu napa daisak a, amaute’ nasep nalangpan hi. Lam apial lo hilecin zong nanu lungsim sukzansak nakhop ding tam hi. Napa lungsim dahna tawh akaikhia ding gamtatna azom laiding mah nahi hiam? Vantungbup in dahna tawh ahong etsuk gualnopnain ala nahi hiam? Galte lakah dingin thu pia suk, piaktoh dinga naom pen nanopsakna mah ahi hiam?

Tuni hun aomlai in, Topa kiangah kileh in. Nagamtatna khempeuhin ahoih ahihkeileh asia zaw ding hiden hi. Satan lamah apang nahihleh dahna thamanin nang hong sulzuih ding hi. Pasian’ gam sungah asiangtho anamtuite bek lut theiding uh hi. “Tuni Ama’ aw nazak uhleh nalungsim uh khauhsak kei un.” Topa kiangah kihei un. Tua hileh natot lampi in manthannaah hong nusialo ding hi.13

Thuhilhsiate in Tate Migitna leh Thusiamna tawh Bawlding.—Tate abawlna ah thuhilhsiapa migitna, thusiamna kilang hen. Amahin atate pen mineu maimai in ngaihsun ngei kei hen. Amaute in Topa tawh kinaimahmah thei uh hi. Thu kihilhin, kiuk hileh Ama adingin na asem thei uh ahi hi. Kamkhauhna leh cilgilna, sittelna tawh tate hopihna in Christ dah sak hi. Amaute hamphatna kiphawk sak meello a, Pasian adingin amaute nuntakna in guallelhna hi, ci in kingaihsun khial thei hi.14

Pawlpi in tuuhuang sunga tuunote kinbawl uh hen. Thumaan tawh amaute khihin, itna tawh amaute zawhthawh nadingin hanciam uh hen. Thuhilhsiate leh pawlpimite in nu leh pa hanciamnate panpihin tate lampi maanah tonpih uh hen. Topa in khangnote sam hi. Ama’ nasepna ah apangdingin deih hi.15

Pasian Biaknaah Tawntung Thuhilhna.—Tate ukna ding thuhilhsiapa in pawlpimite hanthawn hen. Ama’ tate nuntakna tawh lamlak hen.16

Thuhilhsiapa’ innkuan sungah nisim Pasian adding leh nuntak nadingin kipumkhatna tawh thuhilhna om ta hen.

Thuhilhsiapa leh azi in thumaan takin ainnkuan tavuante semin, ukin, makaihin, thuhilhin, hile uh amaute in pawlpi sungah nasem dingin kilawmna hong neiding uh hi. Pasian’ nasemding mi hong kibehlap ding hi. Innkuan mimalte in vantung innkuan mimalte hong hiding uha, hoihna adingin huzaapna lianpi hong neiding uh hi.17