Kimawlna Mawkmawk Hilo - Khen Nihna (May 27, 2017)

Sim Ding Hi Lo, Geen Ding!

May 27                                                                 Nigeria Gam

Kimawlna Mawkmawk Hilo - Khen Nihna (Agen: Nudubuisi)

Bawhlung kipawlna ah teentaan sia dingin hong sap uh ciangin vantung ah a kidem ding bangin ka ngaihsun khaphial mawk hi. Bawhlung kimawl ka uuk mahmah aa, veeng leh paam phaakna zong ka lawp mahmah hi. Ahi zongin hih pawl ah teentaansia ka sep dingpen ka pataau simsim hi. Khuasung pan bawhlung kimawlte lakah a giphalo nih leh thum om cih ka zaa aa, tuate in ka thu hong man loh dinguh ka pataau hi.

“Bawhlung Bek Akimawl Hi Kei Ung”
Thu tawm ka nget khit ciangin makaih ding ka hanciam hi. Bawhlung suih kisin ciangin biakpiakna tomno leh thungetna tawh ka kipatpih hi. Ka pawl vuah a lang bang Adventist suak naailo ahih manin Kiginni (Friday) nitaak pan Sabbathni nitum dong kimawl lo dingin ka geen hi. Pawl (team) dangte in Sabbath ni kimawl dingin hun a geel uh ciangin, “Sanini pen Topa Pasian’ ni ahi hi. Tua ni-in bawhlung ka suui kei uh hi,” ci-in ka gen hi. Babcock University thu a za ngeilo mi tampi takin ko bawhlung sui pawlte hangin Sabbath thu theita uh hi. Ko aadingin bawhlung tualpi pen Pasian hong itna ka lahkhiatna uh mun ahi hi.
Ka kithuahpihte uh a tamzaw tham pen thumang uh a, Topa Jesu thu ka gen ciangin hong saang thei uh hi. A migilo simpiante hong migi seemseem ta hi. Khat leh khat kithuakpih in kithutuak uh hi. A tamzaw tham in a kihhuai kampaute zang nawnlo uhaa, uniform a lei zolo a om leh zong kileisak uh hi.
Ka pawl vuah, a kimawl dingin pasalno khat hong kihel a, Pasian’ hong sawl hi dingin ka um hi. Ama’ min peen Jamiyu ahi hi. Hih pasalno ka muhzia thu nih om a, Kisinna hun ah khat vei zong pelh ngeilo hi. Tua baan-ah kuamah hopih ngei selo hi. Bawhlung tawh kisai hanciam aa, a sin laai ding zong tampi mah omlaai hi.
Ni khat, Jamiyuka sam aa, a innkuan vaai thudam tawh ka dong hi. Amah zong a taangthu damtakin hong pulaak hi.

Nuntaak Nading Phuutna
“Zandeuh in ka pa si aa, ka pianpih ka sanggam teng ka nuu in taaipih hi,” ci-in hong gen ciangin ka um zokei aa, “Nang bek hong nusia tazen maw?” ci-in ka dongphaa hi. Hong lusin in a khituui hong luang hi. Jamiyu pen kumpi saang pan a tawp loh phamawh aa, a lawmte khat tawh a omkhawm uh ahi hi. Nisim in nuntaak nading phuutden loh phamawh hi.
Jamiyu nopsak khatbek peen bawhlung suih ahi hi. Kei aadingin tua ciangzong kicingta hi. Bawhlung suih a siam nadingin ka pantah a, an leh puansilh zong ka vaihawmsak hi.
Puansawpna ah nasep a ngah ciangin a saang kahkik zawh nading sum a khol nadingin sumkholna (bank) sazian bawlna ah ka huh hi.
Jamiyu tungah amah ka itna leh Topa Jesu in zong amah a itna ka geenpih hi. “Adventist khangnote Pasian’ nasepna ah Topa Jesu’ thu na sin nuam hiam?” ci-in ka sap leh lawptakin ka sapna hong saang hi.
Jamiyu in Topa Jesu’ nungzuih ding ngaihsun ta hi. Hih bangin pasalno tungah Topa Jesu’ itna ka geen theih peen ka lungdam lua hi.

Khangto Seemseem
Ka bawhlung suihpihte in hong zahtaakna hangin Topa Jesu’ thu taangkona ah ka kimuanna khang seemseem hi. Khangnote Pasian nasepna ah kipawl ding ka khensat hi. Tua hileh khuasung aa om khangnote ka vaphaa thei ding hi. Hih khangnote in Sabbath ni kikhopna leh Pasian nasepna ah hong kipawl nuam uh hi. Ka lawp mahmah uh aa, ahi zongin, buaina lianpi khat ka nei uh hi.
Khangnote kikhop theih nadingin huang sungah inn lian ka neikei uh hi. Khenneu tuamtuam in ka kikhen uh a, a mimal in khangto hanhan ka hih manun ka inndeite vuah ka ta nawnkei uh hi.
Tu kuata Sabbath sawm leh thumna sumpi pawlkhat tawh khangnote kikhopna phualpi khat kilam ding hi. Tua ciangin ka veengte kiang uh leh saangpi huangsung aa saangnaupang Adventist a suak naailote a tam seemseem ka vaphaa thei ding uh hi.
Hehpihna tawh hih a kilam ding phualpi aadingin hong huh un. Tua baanah Topa Jesu hong itna leh hong paikik baih nading lungdamnathu ka genkhiatna uah Topa Pasian in ciimna leh thuakzawhna hong piak nadingin thu hong nget sak un. Lungdam lua!

@@@@@@@@@@@@+++++++++@@@@@@@@@@@@