Kimawlna Mawkmawk Hilo - Khen khatna (May 20, 2017)

Sim Ding Hi Lo, Geen Ding!

May 20                                                                Nigeria Gam

Kimawlna Mawkmawk Hilo Khen khatna (Agen: Nudubuisi)

           Topa Pasian’ ni sagihni Sabbath ni, a siangtho sak dingin hong kipantah hi. Ahi zongin na a seem thei dingin ka kum hong cing ta aa, nasep zongin ka paina khempeuh ah a makaite in Sani ni in zong nasep peelmawh dingin hong gen uh hi. “Topa aw, Sabbathni sim in Nang thubek ngaihsut in ka nei nuam hi. Hehpihna tawh Nangma’ na ka sep theih nadingin nasep hong musak in,” ci-in khukdin in thu ka ngen hi.

“Tumahmahin Paikhia In!”
Ka thunget zawh nipi kaal (2) khit ciangin leitangh nei pa in ka vanteng tawh kithawi aa a paikhia dingin hong sawl ngiaumawk hi.  Innsaap kong piakkhit zawh nadingin nipi kaal khat beek hong omsak laai nadingin ka thuum hangin a tua ni zaan mah in hong paikhiasak veve hi. Ka puak ding vante ka laak kawmkawm in leitangh nei pa in ka vante hong lotmang sak hi.
Tua zaan in a pualam ah kalum aa, bang hih ding cih ka ngaihsunsun hi. “Topa aw, nasep a thak leh om nading mun thak kisam ing;” ci-in thu ka ngen hi.  A zingciang pen Sabbath ni hi a, ka lawmte tawh kimu in ka vai kikum thei ding cih ka ngaihsun ciangin ka lung hong nuamtuam hi.
Sabbath zingsang, biakinn ka tun ciangin ka lawmte khat kiangah thupiangteng ka geen hi. “Kei kiangah hong om in. Lawm dang khat zong kei kiangah hong om pak hi. Inndei dang khat om laai hi;” ci-in om nading hong vaihawmsak pah hi.
Nidang in Babcock saangpi (University) thu ka thei ngeikei hi, ahi zongin ka lawmpa pen tua lai ah pilna sin saangnaupang khat ahi hi. Ka lawmpa in mawtaw ka hawl theihlam a theih ciangin kei vaai, a pa kiangah hong geensak dingin hong kamciam hi. “Tua university (saangpi) ah nasep khat na ngah nadingin hong huh thei kha ding uh hi,” ci-in lungkimhuai takin hong gen hi.

Thungetna Bangin Ngah
A sawt loin Babcock University (saangpi) in a mawtaw hawl dingin hong sam hi. Ka lungdam lua hi. Topa Pasian in ka om nading mun hoih hong vaihawmsak bek loin, ka sep nop peenpeen ahi Amaa’ na ka sep theih nading hunphaa hong piabeh hi. Topa Pasian in na tampitak hong pia ahih manin ken zong bangkhat teeiteei ka piakik nuam hi.
Babcock University ah ka lal ciangin huang sungah a om saangnaupang tampitakte pen Tapidaw ahih naailoh lam uh ka tel hi. Pasian’ nasepna nam khat beek tawh amaute kiang ka pha nuam aa, ka sep theih ding nasep Topa Pasian in hong lah nadingin thu ka ngen hi.
Ni khat, ka hawl mawtawpi nuai ah thallupsa in mawtaw ka puahphat laaitakin ka lutang naai ah taihkhedap thuah mi khat hong din lam ka thei hi.
“Sylvanus aw, kei nong thei laai hiam?” cih dotna aw ka zaa hi. Kei zong ka mawtaw puah khawl in ka et toh leh a tha lian leh a tha saang tangvaal khat nahi aa, kua hiam cih ka tel vatkei hi. Kei zong, “Khial mahmah ing. Hong thei nawnkei mawk veng e,” ka ci hi.
“Tumaa kum (3) laai in ka degree (buaih) ngah nadingin a pualam ah ka pai loh phamawh aa, nang tungah huhna kong nget ciangin lungdam takin nong paipih hi,” ci-in hong limgeen hi. Tua ciangin huhna hong ngen tangvaal ahih lam ka phawkkik pan hi.
“Panpihna Ka Kisam Hi”
“Nong panpih laai ding lunggulh in hong pai hi veng aw,” ci-in nuui kawmin hong geen hi. “Bawhlung kidemna ah a dem dingin hih saangpi pan pawlkhat ih nei hi. Hih pen kimawlna bek hi loin Pasian’ thu ih geenkhiat theihna hizaw hi. Hih kimawlna pen ih Adventist khangnote in ih huangsung leh ih kiim ih paam ah Tapidaw a suak naailo saangnaupangte ih vaphaak theih nading Pasian’ nasepna ahi hi. Teentaan sia khat ih kisam hi. Nong huh zo ding hiam?” ci-in hong dong hi.
           Theih ding: Mai Sabbath ciangin a zom ngaaikik ni maw!

@@@@@@@@@@+++++++++@@@@@@@@@@@