Kumkikna Lamen Innkuan - Khen Gukna

THUKHEN 6

Inn Thak

INNMUN DING

Innmun Teel Nading Thukhunte.—Inn ihteelna ah, Pasianin hong deih sak ngaihsutna masa in, inn leh innkuan mimalte aumcih khalam leh biakna huzaapnate ahi hi.1

Khalam khantohna ahong piading mihon ihteel masa ding hi. Ei batsap ah huhna ihngah theihding thupi hi. Satanin khalam khantoh ding dal leh nuntakna ahaksa theitheiin langpangin khaktan ding hi. Ze-etna atamna mun zong kituak thei a, khalam khantoh nadingin hoihlo cih theipipi in pumlut ding hilo hi. Semding in ahong kisap leh thungetna, galvilna tawh leh Christ ie hehpihna tawh siatna sung lutlo in ihding ding hi.2

Lungdamna thu-in ahong hilhnaah, nakhat peuh peuh ihsittel ding ahi hi. Amanpha pente, aom tawntung ding nate, piakkhiat dingin zong thasan ding hi. Innmun ah tavuan aneite tungah innmun teelding thu khempeuh kinga hi. Hih asang tupna panin lampial loding hi.

Innmun ihzonciangin, hih ngimnain hong makaih hen. Hauh nopnain hong uk kei hen. Kizep kipuahnopna lungsim, kim leh pam mite ngeina in hong uk kei hen. Mawl taka nuntak theih nading, siangthona, cidamna leh mannei taka nuntak theihding ngaihhsut ding ahi hi.

Mihingte’ khutma bek akimuhna ahi, siatna aphawng muhna leh gamlumnate ah teenglo ding hi. Tua munah buaina leh gamlumna in gimna leh gamdaih lohna hong pia hi. Pasian nasepna atam theithei amuh theihna ah pai in. Pianpih nate ie hoihna leh gamdaihna leh tawldamna ah kinga-in. Na mitangin adum dildial zangkuamte, singhonpote, mualte en hen. Khuapi’ leivui leh meikhute in adallohnaah vandumte ento inla, tha amalhsak huih siangtho dik in. 3

Entehding Inn Masa.—Nucil pacilte’ inn in eite adingin etteh ding lim hia, tua innte panin leitung luah dingin tate apaikhia ding uh ahi hi. Tua inn pen Pasian’ khut tawh kihoih saka, kumpi inn bangin te lialua lo hi. Kiphatsakna tawh mite in tam aman theithei, inn golpite lam uha, amaute khut tawh abawl uh inn hangin kisial uh hi. Pasianin Adam pen huan sungah koih hi. Hih huanin ama teenna ahi hi. Vandumte pen a innkhum hia, leilak pakpalhte leh ahing lopa-in sualphah ahi hi. Innkuante-in anasia mahmah zepna neia, Limsuai asempenpa khutma ahi hi. Nupa siangtho nihte kim ah atawntungin sinding thu om hi. Lungnopna amaan taktak pen kiphatsakna leh neihsa alunna mun hilo a, piansakte tungtawnin Pasian tawh kizopna hizaw hi. Mite in bawltawmnate tungah hun tam zang kei zaw henla, mawltaka nuntakna kisin zaw uh hileh Pasianin ahong piansakna ie angimna tawh ih kinaizaw ding hi. Kisialhna leh tupliatna in lungkimna ngah siang ngeilo a, apil taktakte bekmahin mihingte’ batsapna ah ahong kikoihsak nate-ah gualnopnain asangpen laptohna hong pia ding hi.4

Atapa adinga Pasian Teel Lei Inn.—Leitungmite gualzawhna sangin alianzaw pek gualzawhna aladingin Jesu lei ah hong kum hi. Pasian’ tanga ahong pai hia, leitung nuntakna ah ahoihpen ihngah theih nadingin lam ahong lak ahi hi. A Tapa adingin Pasianin bangci mun leh hun teel sak hiam? Atawngbu Galilee mual tungte ah athumaan, nasep azahtak, mawltakin anungta, nisimin haksatna tawh kituak den, piakkhiatna anei, acil thei, alungduai, nasepna tawh akipak thei, nu kiangah thu akisin theihna mun, akihong Laisiangthobu, gamdai zingtung leh khuamui kuan adum dildial zangkuam, siangtho takin lei nate sepna, piansakna leh Pasian hong khualna akisin theihna, mihingin Pasian tawh akizop theihna, hihbang munah Jesu’ nuntakna hong kipan hi.5

Ciamna Gam Khuata Inn.—Zongsatna hoih aki pattah theihna gampalakah kisekna hong nei hi. Khuapi bangin mi kiphu nena lo, cidamna apia thei akisusia lo piansaknate thupha kawmah mite nateeng uh hi.6

Hihbangmun in John ie Zia Huzaap.—Tuiphum John in Christ ie matai kamsang hia, anu apa kiang panin kipattahna ngah hi. Anuntakna atamzaw pen gam lakah zang hi. John in khuapi sung nopsakna leh gualnopnate sangin gamlakah khauhtakin kisek ding teel zaw hi. Hih munah kim leh pamin mawltaka nuntak theihna leh ama deihna nial zawhna thapia hi. Leitung’ deihnain nawngkai saklo-in piansak nate, pulaakna, leh Pasian khualna panin thu nasin hi. Aneu hun panin asep ding mitsuan den hi. Na semdingin muanna ngah hi. Gamdaih na-in khuapi akim um kimuan lahna, leh siangtho lohnate panin suahtakna pia hi. Zeetna atalsik dingin amah leh amah kimuanglo hi. Mawhna tawh kimuh kinkenna pel hi. Mawhna ie mawhsaknate akhia theidingin kilamen hi.7

Adang Mithupite zong Khuata Innpan.— Tuabang mahin adang mi thupite zong khuata panin khangkhia uh hi. Abraham, Jacob, leh Joseph, Moses, David, leh Elishate tangthu simin. Tua nunga akhangkhia mi thupite, muan leh suanpipite thu zong simin.

Kuatengin khuata panin hong khangkhia uh hiam? Nopsakna tam theihlo uh hi. Akhangno lai un gualnuam manlo uh hi. Atampite-in haksatna leh zawnkhalnate phu kha uh hi. Aneu panun nasep siam uha, huih lakah nasepna panin tha leh ngal lam hi. Aneih uhtawh nuntak siam uha, haksatnate do zia ding sinin, dongtuaknate kantan uh hi. Tua bangin hansanna leh kuhkalna ngah uh hi. Thatang leh kisekna muanding sin uh hi. Misiate tawh kipawlna panin kidal uha, pianpih nopsakna leh lawm hoihte tawh lungkim uh hi. Anek leh dawn zong mawl mahmah a, zongsatnate zong kikhal uh hi. Thukhun tawh ki-uk uha, asiangtho, athumaan, leh athahat dingin khang khia uh hi. Nasem dingin akisap ciangin pumpi thatang, lungsim thahatna, lungnopna, ngim leh sawm siamna, leh siatna nialnaah lungkhauh uha leitung ahoihlamin ahuzaap zo vangliatna nei uh hi.8

INNKUAN LEH KHUAPI

Khuapi Nuntak Lauhuainate.—Khuapi nuntakna in nopna taktak omlo, puatham nuntakna ahi hi. Sum deihna, lunglawp nading leh zualzan gualnopna, kisialh ding gilkialna, kiliatsakna leh kihauhsakna ahi hi. Mihon lomte in nuntakna ie ngimna taktak panin kihemkhia uh hi. Amaute in asiat nadingun kong ahongte uh ahi hi. Khangnote adingin akinial lahding vangliatna nei uh hi. Khuapi khangno leh naupangte akaihuai khemna kawi leh alauhuai mahmah thu khat in zualzan gualnopna ahi hi. Pawini zumkkhakte tam mahmah hi; kimawlna, sakol kidemna in tultampi kaikhawmin, lunglawpna leh zualzan gualnopnate in leitung nisim nasepte panin kaikhia uh hi. Thuhoih lahoihah zatdingin akikholtuak asumte uh gual nopna dingin zanguh hi.1

Cidamna Lampanin En lecin.—Khuapi kim leh pamin cidamna adingin lauhaui hi. Natna tawh atawntungin kisawhkha a, huih siangtholo, an sianglo, mi tam lua, mial, cidamna ading ahoihlo innte in siatna vive lak uh hi.

Khuapi sungah mihonte-in inndawlte sungah akihencip dingin Pasianin deih lo hi. Nu leh pa masa pente Amahin amuhnop huai, azak nophuai nate ie laizangah koiha, tuabang mahin eite zong tuni in hong deih sak hi. Pasian ngimna acil pen tawh ih kinai takciangin pumpi, kha leh lungsim cidam nadingin ahoih zaw ding ahi hi.

Mawhna’ Zungkua.—Khuapite in ze-etna namcin tawh kidim hi. Hih ninnoina panin ih khangnote akihep khiat theih nadingin ngimin ihsep ding ahi hi.3

Naupangte leh khangnote phatakin ihdal ding ahi hi. Khuapi sungah akimu mawhna zungkua panin amaute akihemkhia ding uh ahi hi.4

Gamlumna, Buaina.—Mite’ buaina leh gamlumna aomna khuapi ah ateengdingin Pasian deihna hilo hi. Atate hih siatna panin kipelh sak nuam hi. Khuapi vai khempeuhin gamlumna, manlahna, leh kinna tawh pang len uh hi.5

Nasepna Buai.—Ukna leh nasep kipawlnate tawh lungsona omin, khuapi nuntak pen haksa semsem hi. Ih maiah hun haksazaw omlai hi. Innkuan tampitakte ading in khuapite panin paikhiat ding hong phamawh ding hi.6

Atungbaihding Siatna.—Khuapite tui taih bangin akitaihkhiat ding hun naita hi. Hih ahong tungding thukhennate theihsak khit ding ahi hi.7

Milim biakna ah aki-ap khin phial khuapi tul tampite tunga asawtlo-in ahong tungding suksiatnate Pasian’ mite in theihkholh huai zensi!8

Leitung Deihna leh Hauhnopna ading.—Hih hangin nu leh pate in atate pen amaan thukhun tawh a umcih ding hi. Innmun ding akiteel ciangin atate zia leh tong khantoh nading hoih maw, hoihlo, lawm hoih lawmpha ngah ding maw? Lungsim siantho nadingin mihonte’ lungsimpuakte ngaihsunlo-in leitung lunggulh na bek ngaihsun uh hi.  Canaan mite in Moloch pasian tungah atate meihal biakna apiak amawhsak nu leh pate in bang hih nahi uh hiam? Na tate ie gamtatna in hong ki-it saklo leh ithuai lo in akhankhiat ciangin leh amau khensatna tawh biakna awlmawhlo-in leh Pasian neilo in aom uhciangin, na upna namawhsak uh hi. Banghang hiam, cihleh na upna in amaute gum zolo hi. Na vawh bangin a at uh hi. Leitung na itna hangin nuntakna akikhel sak hehpihna na awlmawh kei hi. Ze-etna atamna ah na innkuanpihte inn na tuanpih hi. Pasian’ thukham singkuang, na minthanna leh na kidalna, kisam nasa kei hi. Tua ahihmanin na tate ahonkhia ding nalamdang Pasianin bawllo hi.9

Khuapite in Metna Khatzong Pialo.—Khuapi ah nateen manin inn za khat ah inn khat mah zongin pumpi, lungsim leh kha phattuamna ngahlo ding hi. Upna, lametna, itna, lungnopnate in mualte, lote, leh singkungte aomna khuata gamnawl ah kingah thei zaw hi. Khuapi muhna leh gamlumnate panin natate paikhiat pih in. Gamlumna, mawtaw gingte tawh akigamlatna ah na lungsimte uh dam zaw ding hi. Tua munte ah natate lungsim ah Pasian’ kammalte naguang thei zaw ding hi.10

Khuata pan Khuapiah AlalteHilh.—Nu leh pa tampite in khuata innte panin khuapi ah kituah uh hi. Ahoihzaw, adeih huai zaw dingin ngaihsun uh hi. Hih kituah nahangin atate in atuamtuam leh atampi ze-etnate tawh kituak uh hi. Pasalnote in nasep ngahlo uha, lamlakah pilna ngahin, siatna khat panin siatna khatah kalsuan uh hi. Ahoih leh asiangtho akici nakhempeuh mansuah uh hi. Nu leh pate in a innkuanpihte tawh a khuata innah omsuak le-uh bangzahin hoih zaw zen ding hiam? Khuata ah pumpi leh lungsim thahat nading huzaap hoih om hi. Lo akho theidingin tate pantah hen. Mawhna omlo leh nasep tawlna tawh nuamtakin ihmu zaw uh hi.

Nu leh pate’ awlmawhlohna hangin khuapi sunga naupangte-in nuntakdan sia in, akha uh ninsak hi. Hihte in thadahna ie gah ahi hi. Khutdawh ngetna inn, thong inn, leh gui-awkna khuamte in nu leh pate belcinlohna adah huai thu tangko ta uh hen.11

Na khut sungah ahong ki-ap khate nasup sangin na leitung tupnate suplawh zaw in. Amautein ze-etna nawkding, maingat dingin hilhin. Sia dingin ahuzaap thei khempeuh, zongsat hoihlo khempeuh, kkhihna khaute sattat ding, na tavuan ahi hi. Nang leh na innkuante Pasian tawh nakizopna akhaktan thei na khempeuh hemkhia lecin suaktakna tawh na kiapna picing ding hi.

Khuapi mihon lakah nateen sangin, natate ze-etna panin dal inla, kimanna aneidingin pantah in. Sodom’ siatna kamsang Ezekielin gen hi: “Kiphatsakna, ann khamna, thadahna, ama sung leh atanute sungah oma, mizawng leh mi tasamte panpih hetlo hi.” Sodom kisiatna panin asuakta dingte in khuapi liante siatna tungah atungding Pasian’ thukhenna tawh kipelhta hen.12 Lot in Sodomah apemlai-in amah leh a innkuanpihte Sodom’ mawhna tawh kipelhding khensat hi. Ahihhang in guallel hi. Akimkot a huzaapsiate-in aupna leh atate huzaap hi. Sodom khuapi tawh kipaaikanta hi. Tuapanin apiang thu in eite maiah omta hi. Mitampite in tuabang mawhna mah bawl lai uh hi.13

Sodom leh Gomorrah tawh nakigamlat theih na dingin sin inla teelin. Khuapite panin kihemkhia in. Gamdaihna khua-neu ah teengin. Nahauh zawh keileh zong phamawh lo hi. Huzaap ahoihna munah teengin.14

Ihmite khuapi ah akituah loh nadingin Topa in thu hong hilh hi. Nute pate tungah kageninah, Natate uh nakiang panin paikhia sak kei un.15

Khuapi panin Kihepkhiat Hun.—Ka thupuak in, na innkuanpihte khuapi panin paikhiat pihin.16

Pasianin lampi ahong honsak hun atun ciangin khuapi panin kihem khia un. Tate khuata ah paikhiat pih un. Sumneihna tawh kituakin teen nading nu leh pa-in leiding uh hi. Inn zong neu khading hi. Inn tawh kizom in leitang om dinga an kicing theiding hi.17

Leitungah ateeng mite tungah samsiatna lianpi atun ma-in tua gimna adingin akithawi dingin Israel ahi amite Topa in hongsam hi. Nu leh pate tungah hih hilhkholhna kipia hi: na inn sungah Pasian’ thukham awlmawhlo, siatna hilhin asiat tat mite kiang panin natate kaikhawm un. Amanlang theithei in khuapite panin paikhia un.18

Pasianin Amite Huhding hi.—Nu leh pate in khuata ah innneu khat leh khawhding lo lian neiding hi. Tua lo-ah sa tangdingin singgah kungte suanin mehteh mehgah cingding hi. Sa in nuntakna sisan nin sak sia saka, sihuai sung khempeuh zel hi. Tuabang khuata ah tate in khuapi sungah huzaap siate tawh kiumcihlo ding hi. Khuapi panin apusuak zodingin Pasianin amite huhding hi.19

(ZOP LAI DING)