Kumkikna Lamen Innkuan - Khen Gukna (Azom)

KHUATA OMNA’ MEETNA

Innnuam Khat, Leitangkhat.—Ahihtheih laiteng tate-in khuaneu innah akhanding nu leh pate tavuan hi.1

Khuaneu ah leitang khat leh inn khat anei nu leh pate in kumpipa leh kumpinu ahi uh hi.2

Khuapi nusia-in khuata azuandingin ahong kisap ciangin gawtna sakei-in. Apaikhiate adingin thupha tampi in hong ngak hi.3

Nek leh Dawn kicin nadingin Pia-in.—Ihmite in khuapi panin paikhia in khuata azuan dingin Topa in hong gen phapha hi.Tualai-ah nek leh dawnding ciing tawm theiding hi. Mailamah kileei leh kizuakna nakpi-in kibuaipih ding hi. Hih hilhnate ih etkik ding ahi hi. Khuapi panin khuata-ah kikhinkhia un. Innte anai teltullo-in galte nawngkai sakna pan nasuakta ding uh hi.4

Khuapi Teengte Thuhilhna.—Na patauhnate nusia in khuata zuan lecin nang adingin hoihzaw ding hi. Tua munah khangnotein huzasap sia neilo ding hi. Khuata ah buaina leh kinawngkai sakna omlo ding hi, cih hilo hi. Ahizongin tua siatnate nakong khak lecin ahong tumding khangnote’ ze-etnate kipelh zoding hi. Amaute in nasep leh atuamtuam tawh kidal theiding uh hi. Innte ah om khawng theilo uha, khuapi khangno siate tawh kikhawl kha uh hi. Tua tawh kongzing pilna ngah uh hi. Khuata nuntakna in metna tampi hong pia hi. Lo lakah nasepna in pumpi leh lungsim cidamna pia hi. Huan bawl theih nading lo zong neiding uha, tua lai-ah kimanna anei nasep leh gualnopna zong ngahding uh hi. Singkung, pakkungte ciinna-in khensatna leh nopsakna piang sak hi. kimanna anei Pasian’ piansak ahoih nate lakah tualbialna-in lungsim sanglapin picing sak hi. Tua in Piangsakpa leh nakhempeuhte Topa’ hong musak hi.5

Khuata atengte Thupha tampi Kikamciam.— Hansanna, uukna leh thuakzawhna aneite adingin lei in seelsim thupha tampi nei hi. Lokho mi tampite in lo nasep pen zaneu huai sa uha, lo pan akaihkhop ding zahuh ngahlo uh hi. Tua lo ah amau ading leh a innkuanpihte adingin thupha aom lam theilo uh hi.6

Huan nasep in Lungsim manlang sakin Zia leh tong Siang sak hi.—Lei tawh nasemin huan bawl thu ngaihsuntheite in amaute maiah lamet hauhnate damdamin mu uh hi. Lokhawhna ah zuihding thukhunte ngaihsun lo-in khantoh ding haksa hi. Ankungte in kin ngaihsut ding zia nei uh hi. Kung nam tuamtuamin leitang tuamtuam leh khawhdan atuam zong kisam uh hi. Suankik dinga akicing kungnote in azungte uh tamlua loding, ahihkei leh ama munlo ah suanlohding, kungnote ahiang heuh ding leh tui buahding, zana daivotte panin dalding, leh sun a nisa katlohding, lopate bawhkhiat ding, natna paihkhiat ding, apet thei ganhingnote thahding, kungte gualh siamding leh punsuahding, cihte in sinding thu tampi hong hilh hibekloin, lokhopa zia leh tong mahmah zong khangto saka, nasepna zong khantohna pia hi. Kidawm taka huankhawhna, lungduaina, aneng atongin kina, nate’ thukhunte zuihna, hihte in sangkah na khat ahi hi. Nuntakna ie thusim tampite leh piansaknate ie ithuainate tawh kithuahna leh Pasian’ piansak nahoihte ziadam taka kepna leh khoinate in lungsim manlang saka, zia leh tong zong sanglap hi.7

Pasianin Hilhding.—Eden huan sungah huan bawldan ding Adam leh Evua ahilh Pa in eite zong tuni in hong hilh ding hi. Lokhawhna ah, ankung, leh khaici avawhpa adingin pilna om hi. Leitangin seelsim hauhna nei hi. Khuapi ah atul athenin ateeng olno takin nuntak asawmte huante akhodingin Pasianin kisinsak nuam hi. Khuapi panin khuata azuante in mawhzolna tawmzaw nei uh hi.Pasian akihta nu leh pate tawh tate in Alianpen Pa ahi pilna khempeuh ie anak Pa kiangah thusin ding uh hi. Amaute-in vantunggam lutnang kilawmna hamphatna hun tampi

ngah zaw uh hi.8

Israel’ Leitang ading Pasian’ Ngimna.— Thumanlohna hangin Adam leh Evua in Eden huan mansuah uh hi. Tuahangin leitungah samsiatna hong tung hi. Ahihhangin Pasian’ mite in athu mang hile uh, aleitangte uh hoihna leh lei hoihna pia kik ding hi. Leitang khawh nading zong Pasian mahin agen sa hia, Ama’ thuhilhnate azuiding uh ahi hi. Pasian’ uk aleitangte uh khalam thumaaan adingin thuhilhna zong asuak ding ahi hi. Piansaknate thukham zuihna tawh leitangin aseelsim hauhnate piakhia dinga, khalam thukhamte zuihna in zong Pasian’ zia leh tong lahkhiatna apiang sakding ahi hi.9

Nisim Nuntaknaah Khalam Thuhilhnate.— Mihingte’ lungsim azol nadingin Pasianin ahoih piansak nate tawh hong umcih hi. Piansaknate’ hoihna leh Pasian’ hoihnate ihbulhtuah theihding Aman deih hi. Piansaknate hoih takin sin hilengh Pasian’ itna leh avang- liatna tampi ihmu theiding hi.10

Christ in athuhilhnate tawlngakni bek tawh kaizawnlo a, manlahni gukte tawh zong genkop hi. Leikalhna leh khaici vawhna, leh lokhawhna leh an-atna tawh mihing’ lungsim sunga Ama’ khalam hehpihna nasepnate lak hi. Tuabang mahin nisim nasepna leh kikholhnate tawh Ama’ thumaante amukhia dingin hong deih hi. Tua hileh ih nisim nasepte in Pasian amangngilh dingin eite tua nasepte ah hong khihcip lo in, Piangsakpa leh Honpa hong phawkmuh kinken hi. Pasian ihphawknain inn nasep leh lo nasepte lakah khamkhau bangin akizangkhak ding ahi hi. Pasian minthanna maitangin piansaknate ah akimu ding ahi hi. Vantung thumaante muthak zelin Ama siangthona limte eite sungah akhangkhang ding ahi hi.11

Akibang Thukhamin Mi leh Piansaknate Uk.-- Piansaknate panin Ama’ kammalte akizak theih nadingin Sialian Pa in piansaknate lakah thugen pih hi. Amaute’ lungsim nip-in thu asan theih uhciangin amuh uh nate ah kha thuhilhnate genpih hi. Tua thuhilhnate-in mihing’ lungsim ahuai hi. Nisim nasep maimai tawh hilo, nasepnate in lungsim laptoh sakin khua mu saka, amuh theihloh uh kha thute mu sak hi. Tuabang mahin eite in thu ih hilhding hi. Piansaknate panin tate in itna leh Pasian pilnate muh uh hen. Pasian angaihsutnate uhin vasa, singkung, leh pakte tawh kizom henla, amuh khempeuhte in akimu theilote alak khia suak hen. Nuntakna thupiangte zong Pasian’ thuhilhna suak hen.

Nuntakna leh piansaknate panin sinna aneih theih uhciangin eite ahong ukdinga akikoih nate leh nuntak thupiangte’ thukhamte mu sak in. Tua thukhamte in mihing phattuam nadinga akipia hia leh tuate zuihna in amaan lungnopna leh gualzawhna musak ahihna lakin.12

Lokhawhna panin Nisim Sinna.—Khantohna namcin panin sinna tampi akihilh mahbangin athupi pawl khat pen Honpa khaici Vawhpa Thugentehna in hong hilhbeh hi. Tua in uham khangmoite ading ahi hi.

Khaici apona in khalam nuntak kipatna lim lak a, akung akhantohna in zia leh tong khantohna gen hi. Nu leh pa leh siate in hihte ahilhna uhah nasepna in nisim nuntakna ah zat pahpah ding ahi hi. Tate in aleitang uh kal uh henla, khaici vawh uh hen. Tuabangin na asepna uh tawh nu leh pa ahihkei leh siate in lungsim huan thu genpih ding uh hi. Tua lungsim huanah khaici ahoih leh asia kivawh thei ahihna hilh un. Khaici vawh nadingin leitang kibawl mahbangin thumaan khaici vawh nadingin lungtang zawh kalhvung ding ahi hi. Leigawtak lakah kuamahin khai tampi atding lamenlo ding hi. Thuakzawhna leh belna tawh leitang kalvung dinga, khaici vawhin, huan bawlding hi. Tuabangin khalam khaici zong kivawh ding hi.13

Zongsatna Hoihlo in Lopa hi.—Apiantheih laiteng, inn pen khuapi pualamah omding hi. Tua munah tate in huan bawl theiding uh hi. Amau tekin huan neisak inla, huan bawldan hilhin. Khaici vawh nadingin lei kalvung sak inla, lopa bawhkhiat ding athupina hilhin. Nuntakna ah liamna ahong pia thei zongsatnate alauhuaina zong hilhin. Lopate abawh khiat mahbangun zongsatna ahoihlote botkhia sak un. Hih thu hilh nadingin hun la ahih hangin hilh tham mahmah hi.14

Upnate Lahnading Innveeng.—Kim leh pamte in aneih uh thumaan mite in apom theih nadingin Pasianin amaute nasep pia hi. Upnate pulaak nadingin tate in sinna hoih aneihding uh kisam hi. Leitung inn pen vantung inn tawh tate in akopmeh theihding uh kisam hi. Hih lei a innkuanin vangtung innkuan ie lim hiding hi. Tua hileh akihhuai ze-etnate nan zawh nading tha neiding uh hi. Tate in amau leh amau hun akikhak uh ahihna hilhding hia, Jesu in pai-in Amah it a, a Thukham azuite ading abawl innpi sungah aom theih nading un akipil suah ding uh ahi hi. Hih nasepin nu leh pa tungah aki ap nasep lianpen ahi hi.15

Nu leh Pate: Khuata ah Inn nei un.—Amite tungah thu ahilhding vangliatna ahong kipiak laitengin nu leh pate in khuapi panin paikhia in khuata ah inn aneiding, tualai ah huan bawlin piansaknate laibu panin sianthona leh mawltaka nuntakna sin sak ding ahi hi. Piansaknate in Topa simtham nasemte hi uha, khalam thuman hilh nadingin eite ahong kipia ahi hi. Amaute in Topa itna eite hong gen uha, Alianpen Bawlsiampa’ pilna atangko ahi hi.

Pak hoihte ka iplah mahmah hi. Amaute in Eden Huan phawkna hia, amaute in Topa thupha ngah gamte hong kawkmuhin, thumaan hilengh eite ihlut nading gam ahi hi. Topa in damna apia pakte leh singkungte hong lak ahi hi.16

INN LAM LEH PUAHNA

Huih Nitang Lutsak, Tuinin Khakkhia.—Inn akilam ciangin mihon zatding ahia teen nading ahizongin, huih asungtum leh apuak ding leh nitang tampi ngah leh hoih hi. Biakinn leh sanginnte ah hih thute kikin ngaihsut lo hi. Huih lut leh pusuak hoihlohna hangin ihmut suahna leh lung-apna om thei a, thuhilhpa leh laihilhpa nasep bun theilo hi.

Mihing’ teen nadinga akibawl innpen tui avunlohna munah kilam ding hi. Inn lam nadingin mun keu kisam hi. Hih pen kiawlmawhlo hi. Damlohna, natna sia, leh sihnate pen akawt leh anom mun leh nattun natna oma, tui phatakin akikhiahkhiat lohna ah tampha diak hi.

Inn kilam ciangin huih alut nang leh nitang angah ding kisam hi. Khan simah huih leh nitang tampi ngah ding hi. Lupna khan diakdiak ah huih sungtum pusuak ding hi. Hihbanglo munpen lup nadingin hoihlo hi. Gam tampiteah lupna khante pen huihlum kilut saka, avot leh anel khuahun sangin akeu leh alum kisam hi.

Atawntungin akizang leengla khan zong tuabang mahin thupi hi. Lupna khan bangmahin huih leh nitang lut dinga, akizang munlo khante ah tuikhunel tam thei hi. Nitang angahlo khan sungah alumte, anelkhante in cidamna leh nuntakna adingin lauhuai thei mahmah hi.

Uhamte adingin alum, anuam khante kisam hi. Kumte tawh kituakin thate kiamsuk a, cidam huailo huzaapnate adal dingin thagum hatna kicing nawnlo hi. Tua ahihmanin huih siangtho leh nitang tampi kisam hi.1

Leiniamna Mun Peelin.—Cidamna leh lungnop nadingin inn alamding nahihleh zangkuam mawkkaite batphaklohna, nuntakna apia vantung’ huihkhi nitangte aluanna munah lam in. Hoih mahmah taphial leh khuavakin alet zawhloh kalaka sahte tawlet ah khai se kei in. Tawlette nitang aliahding singkung zong naipo sak kei-in la, inn mahmah zong nitang kapsak in. Puankhaite, sualphah puanpite ameel akia sak ahizongin na atate’ biang asan lihleh nadingin innsungah nizang lut sakin.2

Inn Akim-um Huang.— Huang kima sawlpangte leh singkungtein innhuang hoihsak mahmah leh lungnop huaisak hi. Hoihtakin akikep keileh cidamna ading phattuamna piangsak lo hi. Inn nehlua in sawlbawk leh singkungte posakna in cidamna susia hi. Huih asungtum apusuak ding kham hi. Nitang zong dal uh hi. Tuahangin guahzuk hunin inn votsak hi.3

Innkuan sungah Pianpih Hoihna ie Phatna.— Pasianin ahoih nate it hi. Amahin leitung leh vantung ahoih in zem hi. Amah lungnopna pia hi. Abawlnate in atate alungnopsaklam Aman mu hi. Innkim ah piansak ahoihnate tawh kikim um pen Topa’ deihna hi.

Khuataah ateeng mi atamzawte-in azawn uhhangin, a innkim ah lopa aseel leitang nei zo uha, ni aliapsak ding singkung pawlkhat nei-in, apak namtui sawlbawk leh singkung pawl khat nei uh hi. Akibawltawm nate sangin lungnopna pia zaw hi. Hihte in lungsim nip saka, huzaap siangtho a, piansaknate itna tha hatsakin, innkuanpihte khat leh khat kinai sakin Pasian tawh zong kinai sak hi.4

Innpuahna leh Zepnate Siangsakin.—Bawltawm zongsatnate in thupha tampi tak leh lungnopna tampi hong khahsuah sak hi. Kimanna anei in hong nungta sak lo zo hi. Sum tampi tawh innzepnate in sum mawk zatna bek hilo, inn sungah kinding, sepding, leh buaina tampi hong tumpih hi.

Na innsung siangtakin zem in. Hoih takin akikem zo ding, akihah theiding, leh sum tam beiselo in akilaih thei dingin zem in. Nang ie thuakna tawh, itna leh lungkim theihna naneih nakleh omna mun nuam suak lelding hi.5

Kineih lahkhiatna ah lungnopna omlo hi. Mawl takin akikemcing inn in lungnopna piang sak zaw hi.6

Kidemna Lungsim Pelin.—Pupa ngeinate zuihna ah nuntakna in dahna leh gimna piangsaka, akisamlopi in vangik piangsak hi. Deihna behlap nadingin nisimin lungsim buai saka, kizep kipuah nopna leh kiphatsakna piangsak hi.

Amanphazaw nate ah kihei thei lecin, akitangsam lopi abei sum, kinna, leh nasepnate in Pasian’ na tampi semzo ding hi. Hau taka khuasakna, cidamna leh thatang tampi bei a kipiakkhiatnate mite in thupi sa –in pahtawi uh hi. Tuabang mite mahin adahhuai khat leh khat kidemna nei uha, puansilh nikten hileh inn leh lo vaiah atampen thei azangzo ding kituh uh hi. “Inn” akici kammal khum lalthang sak uha, te liangin a inn uh zem uh hi. Asunga aom mite ahihleh hih ngeina teng azop zawh nadingun kihing tom uh hi.7

Tuabang mi tampite in a inn uhah lungnopna neilo uh hi. Apuatham nate azop zawh nadingin hanciam uh hi. Tha tampi leh sum tampi zangin mite’ pahtawi leh phatna thalawhin hanciam uh hi. Amautein kiphatsakna, kiliatsakna, mittang nopsakna, leh innsung nopsakna zong uh hi. Tuabang tawh inn vanzat khat khit khat lei lei uha, tha leh ngal, lungduainate suplawh uh hi. Ahun uh leh asum thate uh Pasian adingin piakhia zaw leuh hoih zaw ngel ding hi. Athupi khollo thu maimaite tawisangin amanpha Pasian’ hehpihna nuaisiah uh hi. Lungnop nadingin na akaihkhopna uh tawh lungnopna taktak khaksuah uh hi. Aneih uh nate in lungkimna apiakzawhloh lamuh kithei uh hi. Leenglate, leh khual mite phat leh pahtawi ding lunggulhna tawh kilung nuamsak tawm uh hi. Puakding ahaksa vangik amau leh amau kisuan tawm uh hi.8

Leengla Nihte Kisaikak.—Innkuan pawlkhatah kinaksep lua hi. Tawl-om nadingin sianthona leh inn zeksiamna kithupi ngaihsut lua zawin, nuntakna pen akitatsatlo inn hahna leh puahna in kizanga innkuanpihte gimsak mahmah hi. Azahtak kai inn pawlkhatte ah tutphahte leh inn sung vanzatte akigualhdante ngentel lua ahihmanin polhteh ding pen themzong khiam theilo uh hi. Tuabang kiciatna angah nadingun innkuan mimalte in innah tawlngak ding nangawn ngaihsun theilo uh hi.

Ka it lawmte’ inn kahawh ciangin innsungah munphiah leh ninkuang in tawlngak hun neilo hi. A hong hawh lawmte tawh gualnuamtakin tut leh kiho ding hunpen nin khat, laidal neng, leh mommai khat omkha leh ci-in zongthapaih in nopna khat zong omlo hi. Hihbang innte ah khatvei sunsun ahong hawh leengla do ding sangin inn sung sianthoding thupi sak zawkna in agimhuai thu khat ahi hi.

Hih inn tawh akilehbulh in inn khatah ka hawh uh hi. Kum 1876 khuakhal sung ahi hi. Hih inn ah nai tawm khatvei sung katut uhpen kimanna aneilo nasepna tawh kibeisak lo a, hundangah sepdingin akikhin thei hia, hun ngah sunsun teng nuamtak leh mannei takin leh tawldam takin kazang uh hi. A khante zong huih leh khuavak kicing takin lut a, man tampi tawh akizemte sangin man neizaw hi. Leengla khante zong akituak lianin kizemlo ahihmanin etna dingin mitbang kham lo hi. Ahizongin inn vanzatte iplah huaitakin kicing hi.

Tutphahte zong anam akibat kimloh uh hangin tawldam huai in nuam mahmah hi. Innkuan sunga mimalte nopsak nadinga adeihdan uh tawh kituakin akikoih ahi hi. Kingakna aniam tutphah aom bangin asangto anung atang zong om a, aneute ihmut theih nadingin agolna anuam bek hi. Tua tutphahte in, “Hong sin in, hong tawlnga in” hongci tawh kibang hi. Akiangah sabuai tungah tadensa leh laibu honkhat akiphalh ziahziah ka mu hi. Ahizongin akikoihdante kician ahihmanin amute in akisiat ding lau in lawn ngamloh phialin om hi.

Hih innneite in sum tampi tak bei in a inn uh zem thei lua ding uh hi. Hinapi in innsung anuamding thupi sa zaw uh hi. Lahding leh kisialh ding thupi salo uh hi Taangzat dingin hoihlua cihzong van khatmah omlo hi. Tawlet puankhaite zong sualphahte ameelkik ding lau selo in honsa in koih uh hi. Pasian hong mawkpiak huih leh nizangte leh huang sunga anamtui pak palhte gimnam hong lut hi. Innkuan pihte in a inn uh akeemlo uh hilo hi. Maitai uha, leengla do siam uh hi. Leenglate nopsak ding ngaihsut in nei uh hi. Leenglate-in nuamsa kei kha leh cih buaipih zong neilo uh hi. Hih inn in tawldamna innmun taktak ahi hi.9

Inn Zepnading Thukhun.—Akigensa aciling inn zepdante in piansaknate omzia tawh ki thuhual theilo hi. Pasianin gamlakpakte apo nasa mun tekmahah gamgi ciangtanin pak kik saklo hi. Tua paaktangte thehthangin mun khemepuh ameelhoih nadingin ama paaklim leh ameel tuamtuam tawh zem kawikawi hi. Gamlak a singkungte zong ngeina khat bek zuilo uh hi. Leilup tawh kituakin atom asangin zangkuam, mualtung, gun kiangte ah po in mit tawldam sak hi. Piansaknate huan sungah singkung, sawlbawk, leh paak kungte it huaitakin kilom khawm uh hi. Neu lai leh akumcing khinte in akibangin lungkimna ngah uh hi.

Ci tuamtuamte’ thukhun zong innkuan sungah kiciahpih thei hi. Meel tuamtuamte akihualin kigual theidinga, inn vanzatte zong akilawm akituakin kigual theiding hi. Innsunga vanzat khempeuhte in lim kibangkhin, akibawlna avan kibang, za kizutdan kibang, kulsello a, namtuamtuam ahihna tawh kiaigualna om zaw ding hi.

Ahizongin inn in om hia hua ahia, aom ziau lel zongin, tampi aman ahia, tawm aman ahizongin, Pasian’ deihna tawh akituah keileh lungnopna hongpia tuanlo ding hi. Innkuan sungah lungkimna omding hi.10

Inn ahoihna pen mun, khuavak atanna pen mun, om nadinga anopna pen mun, leh anuampen vanzatte in nisima azangte adingin akizang vante ahi hi. Tua in mi ahup inn hiding, mite phattuamna pia in ei zong phattuamna ahong pia hiding hi.11

Tate’ Damnang leh Nopsaknang Geel un.— Tate’ lungkim leh nopsak nading pen sum tampi aman kim leh paamte leh atam man inn vanzatte hilo hi. Akisampi penin nu leh pa in itna leh kinna apiakding bek ahi hi.12

Zuakpang li, atam man vanzatte, sualphah asan, a etlawm limlangte in hehpihna leh itna om kei leh “inn” piang saklo uh hi. Athupi “inn” kammal in innkuan sungah nopsakna akimu ngeilo kham banga ate innpite tawh kisailo hi.

Tuabang innsungah tawldamna leh tate’ nopsak nading thupipen in kingaihsut masa lo hi. Nu in atate kinlo a, ama hunte pen innsung a-etlawm ding leh veengkimte in miban hongsakna phatna angah nading bek kin in nei hi. Alungsim uh kikhalna omlo a, zongsatna hoihlo nei in, lungkimna nei theilo a, tawlnga theilo hi. Innkuan ki uknate nuamsalo-in innkuan panin agamla theithei ah kikhin khia uh hi. Kikhalna omlo takin leitungah paikhia uha, innkuan huzaapna leh kithu hilhnate tawh kigamla uh hi.13

Nu pawlkhatte thugen kazakbang gen kei un: “Hih leengna khan ah na om nading thu omlo hi. Tua tutphah tungah tu kei in. Na tutding deih keng.” A khandang khatah na lut uhciangin, “Hong gamlum kei un” ci zel hi. Anhuan buk alut ciangin, anhuannu in, “na gamlum uh tawh hih panin taikhia in, hong nawngkai sak teh” ci hi. Pilna koi panin vasin ding uh hiam? Lampi ah.14

Migi leh Itna-in Hauhna sang Hoihzaw.— Innkuan sungah kin leh vangik tampi kilut pih hi. Pianpih mawltaka nuntakna, kilemna, leh lungnopna tawmkhat bek om hi. Innkuanpihte thugen sangin apualam mite thugenna in innkuan sungah huzaapna lian zaw hi. Kisialhna leh leitung awlzawlnate tawmin, leh ziadamna leh ki itna leh Christian migitnate inn sungah tamzaw ding hi. Mitampite in inn pen anuam dinga bawlding kisam uh hi. Lungdam theihna leh migitna tawh ki etnate in hauhna leh hauhnopsakna sangin thupi zaw a, lungkimna leh mawltaka nuntak theihna in itna om peuhleh innkuan nuamsak zaw hi.

Jesu, eite Gumpa in, kumpite neih vangliatna tawh leitungah nungta hi. Hinapi, alungsim nip in kiniamkhiat hi. Innkuan adingin Amahin khuavak hi. Banghanghiam, cihleh Amah apaina peuhah maitaina, lametna, leh hanna pua hi. Lungsim ie lunggulhna tawmcik tawh lungkim theiin, ngahdinga ahaksa na ahi innhoihte ngah nadingin kitom keilengh hoih zaw hi. Ahangin Pasianin, ngun leh suang manphate sangin aziadam, acingkam lungsim thupi sazaw hi. Mawltaka nuntak theihna hehpihna, ziadamna, ngaihna maan neihnate in akiniamkhiat innte paradis inn suaksak hi. Anuamlote maitai takin thuakna in kilemna leh lungkimna panin taikhiatna sangin hoih zaw hi.15

(Thukhen 6na zo ta hang ei, zom lai ni maw!)