"Nih Phasak Ni" (April 01, 2017)

Gen Masak Pen Ding!

            Tu Kuata Sabbath sawm leh thumna sumpi tawh

1. Gabon gam Franceville khuapi ah tan (12) sang inn thak khat ki lam ding hi.

2. Nigeria gam Ogun State ah a kiphut khin sa Babcock University ah atuamtuam aa kizang ding phualpi khat kilam ding hi.

############################

Sim ding hi peuhmah lo, Gen Ding!

April  01                                                                                                                               Gabon Gam

“Nih Phasak Ni ”

Agen: Pr. Medou Eyi

            Tu kuata Sabbath sawm leh thumna sumpi tawh Gabon gam aa Pasian’ na kasepna uh hong kihuh ding ahih manin ka lawp mahmah uh hi.

            Ka  min pen Pastor Georges Medou Eyi hi a, kei pen ka gam uh khuapi ahi, Libreville khuapi ah a kiphut Gabon Mission ah president ka hi hi. Mission huang suangah zum innpi khat, taan (4) saanginn khat, taan (12) saanginn khat, cina kibawlna inn khat leh biakinn khat om hi.

            Tu kuata Sabbath sawm leh thumna sumpi tawh Mission zumpi omna Libreville pan tai (310) a gamlaatna Franceville khuapi sungah taan (12) saanginnpi thak khat kilam beh ding hi. Hih sanginnpi thukin takin lam ding kisam hi, banghanghiam cih leh ka gam uh ah ka Mission saangte uh tungtawn in Adventist thumaan ka taangko theihna uh lampi khat ahi hi.

            Awn khat, sang sagih leh theennga a phaa Gabon gammite kiang ah taan (4) saang khat leh tan (12) saang khat bek pan nasepna tawh vaphaak ding pen haksa mahmah hi. Sanginnpi thak kilam khin zo leh Adventist ahilo saangnaupangte leh a nu leh a pate kiangah Adventist thumaan a taangzai zaw in kipuak zo ding hi. Tua baanah mailam hun ah zong Gabon gam ah Adventistte thu hong kitelmuh seemseem ding hi.

Adventist Ahi Naai Lo Saangnaupangte Vaphaakna      

            Libreville khuapi ah a om ka tan (12) saangpi uh pen Mission saang kician mahmah khat ahi hi. Saangnaupang 100 lak ah 70 bang pen Adventist hilo bek loin pawlkhatte bangin dawi bia lai uh hi. Saang zong neu in saanghuang zong toi lua ahihmanin inndeite kibawlbeh thei lo hi. Saangnaupang 120 bek saang hong kah thei uh hi.

            Ka taan (4) saang uhpen lian aa, saangnaupang (300) bang hongkah thei uh hi. Tua pen Topa’ thupha hi a, ahizongin tan (4) a on tak uh ciangin saangnaupang 180 in Sabbath ni aa lai a kivuan sakna saang dangte ah a kah lohuh phamawh hi.

            Saangnaupang tampi takin Topa Jesu khut sungah a nuntakna uh aap uh a, Topa’ Sabbath ni siangtho sak uh hi. Saangnaupang tampi takin, “Adventist thumaan ka zuih suak theih nadingun sangkah zom theih nadingin saang nei lo napi uhcin banghangin Adventist hong suak laizang kahi uh hiam? . Adventist pilna ka sinna uh tungtawn in Adventist kong suak uh hi. Mailam ah ko bangci kalsuan ding kahi uh hiam?” ci-in hong dong uh hi. Ih theih ciat mahbangin khanghaamte sangin khangnote in Thumaan saangthei pahzaw uha, ahizongin vaphaak kik ding pen haksa mahmah hi. Tua thu in lungtang na sak mahmah hi.

            Hih Adventist ahilo sangnaupang te, ih taan (4) saang pan a paikhiat uh khasiathuai mahmah hi. Tua baan ah, Libreville khuapi sungah a teeng Adventist ahilo innkuanpih tampi takin ih sinsak pilna hoihsa mahmah uh hi. A tate uh saang ah hong khak uh ciangin, “Nong pattahsak dingun ka tate uh kong aap uh hi. Banghanghiam cih leh no pen Tapidaw na hi uh a, gammi hoih a suak dingin ka tate uh hong hilh, hong pattahsak ding nahih manun ka lung uh muang mahmah hi,” hong ci uh hi.

            Ih hilh Lungdamnathu hong sin khit ciangin ih saang pan mundang ah saang va kah uh cihmawk pen ngaihsun phadih ni. A tate uh bek hilo in a nuu leh a paate uh nangawn va phaak theih nading hun phaa a ngah kim laai, hih hun hoih hunphaa ka taan uh hi.

Veeng leh Paam Vaphaakna

            Taan (12) saangpi ah a pualam phaak dingin nasiatakin geelna ka nei uha, saangnaupangte zong tua nasep ding geelna ah ka kihelsak uh hi. Hih khangno saangnaupangte mah Khrist aadingin veeng leh paam kiangah a va phaa dingin ka muan ka suanpi uh ahi hi. Amaute in cina kibawlna ah a hong kilak cinate hoihtakin na bawl uh a, a lung zuangte, a haksate, a lunggim mite hoihtakin hehneem uh hi. Amaute’n mite aadingin thu ngetsak in, Topa Jesu in amaute a itna zong genpih uha, an leh puansilh te zong pia uh hi. Ka pawlpite uh khangto hi, banghanghiam cihleh sangnaupang khangnote mite lakah va kihel in akisapnate uh va huh uh hi.

Mailam Aadingin A Thahaat Pawlpi Phuhna

            Gabon gam ah Adventist pawlpi mi 3,041 om a, 100 lak ah 79 te pen saangnaupangte ahi hi. Libreville khuapi sungah a teengte lobuang khangno khempeuh in teel theih ding omvet loin, haksatna tampi om in Sabbath ni lai kivuan himah taleh Adventist saang ahi lo saang dangte ah a kah loh phamawh hi.

            Tan (4) saang panin saang dang ah a va kah uh ciangin a upna uh hong kiam zaw tham ahih lam ka thei uh hi. Sabbath ni saang a kah loh uh ciangin a innkuanpihte uh tawh kikhop pih aa, kha lam ah va pattah ding kisam mahmah hi.

Man Akituat Thei Lo Tawsawnna

            Gabon gam ah tan (12) saangpi nihte in mankituat theilo tawsawnna ahi nasepna hong huh ding hi. Akilam ding saangpi thak ah saangnaupang 450 kah thei ding uh hi. Ka ngiimna bulpi uh ahih leh bawdaa inn lam dinga, Gabon gam munkhempeuh panin hong pai ding saangnaupang 900 bang saang hong kah theih ding ngiimna ahi hi. Hih saangnaupangte a inn vuah a ciah uh ciangin Adventist thumaante keng thei bek lo in nuntaakpih thei ding uh hi.

            Hehpihna tawh Sabbath sawm leh thumna sumpi phaltakin hong pia un. Tuahileh Gabon gam ah a teeng mite kiangah ih Topa Jesu’ hong itna thu a theih nading leh Topa Jesu it uha, Ama’ hong pai kik ciangin akigingsa aa a om theih nadingun, ka na hilh thei ding uh hi.

**************