Kumkikna Lamen Innkuan - Khen Sagihna

THUKHEN 7

Topa’ Gaam

 

TATE IN THUPHA

Innkuan ading Pasian’ Ngimna.—Adam tunga Evua zidingin apia Pa in numei pasal asiangtho kiteenna tawh pumkhat suakin suan leh khakte pahtawiin vantung innkuan suahna ngahsak nuam hi.1

Tate in Topa’ gaam ahi hi. Topa’ neihsate ihkepna tawh tavuan ihnei hi. Itna, upna, thungetna, leh kipakna tawh nu leh pate in a-innkuanpihte adingin nasem uh hen. Topa kiangah, “En un, keimah leh Topa in ahong piak tate” ci-in apding uh hi.2

Ta aneilo innin guaksuakna mun ahi hi. Tua innkuan pihte ie lungsimin angsung khuat thei uha, amau aituam nopsak nading bek khual uh hi. Amaute deih leh nopsak ding bek ngaihsun uh hi. Amau leh amau kihehpihin, midangte themzong awlmawh lo uh hi.3

Ta neilo Nupate Thuhilhna.—Lampi, mun, leh mihing kipawlna atuamtuamte panin akilang angsung khuatna thahlup ding hi. Ta naneihleh nang leh nang kingaihsutna panin kikaikhia in kinzawkding, hilhding, leh limlah ding anei nasuak hi. Innkuanah ta neilo-in mi nih bek aom ciangin, lungduai ding, thuakzawh ding, leh it ding kisin kullo hi. Tua hia, angsungkhuatna ahong lut loh nading kidal un. Na nuntaknaah nangmah kilaitakin, nangmahin midangte napiak ngeiloh awlmawhna deihin naom khading hi.4

Mi tampite in amau leh amau bek kimu uh ahihman in pumpi, lungsim leh kha ah natna tampi vei uh hi. Tate’ cidam thahatna, lungsim puak tuamtuamte, leh aom khong theilo thagumte hangin hih acimhuai nuntakna panin kisuakta thei ding hi.5

Tate kepna in Migit Kisinna hi.—Ka neulai hun panin migenthei khat kahihmanin taneute kahehpih thei hi. Kepdingin tate tampi zong kala khin hi. Mawltakin anungta taneute tawh kithuahnain kei adingin thupha hi.

Innkuan sungah tate kep nahangin thupha ngah nangin hehpihna, thuakzawhna, leh itna kisam hi. Maitai ding leh lungduaina akisamte adingin zia leh tong pawlkhat khiat ding kisam hi. Ta khat innsungah aomna hangin inn nuam sakin tang sak hi. Pasian kihtakna tawh akikhansuah ta in thupha ahi hi.6

Eite ahong beel tate tungah kinna leh ngaihna neihna in eite sunga ngawngkhauhna paaikhia hi. Lungsim hong nem sakin midangte apicing sak thei huzaapna hong guan hi.7

Enoch tunga Ta khat ie Huzaapna.—Ata masa asuah ciangin Enoch in asang nuntakna hong nei hi. Pasian tawh akinai dingin kaihna ngah hi. Pasian’ ta ahihna tawh apuakding tavuante theisiam ta hi. Ta in apa angaihna muhsakin, apa’ kepna amuan lelna hangin atapa masa tungah itna hong tho a, Pasianin atapa apiak khiatna tawh leitungmite a itna lamdang takin hong phawk thei hi. 8

Amanpha Muanna.—Tate pen amanpha muanna tawh nu leh pa tungah ki ap hi. Pasianin nikhat ni ciangin amaute kiang panin ngenkik ding hi. Amaute pattah nadingin hun atamzaw, kin ngaihsut zawkna, leh thunget zawkna ih neih kul hi. Amaan kipattahna zong atamzaw kisam hi.

Na tanu na tapate in Pasian’ innkuan sungah tanu tapa neute ahi hi. Vantung adingin nakepding, napattah ding, napil sakdingin hong ki-ap hi. Hih ahong kipia muan nasepna adingin Ama’ tungah nagenkhiat ding hong kingen ding hi.9

INNKUAN PHAZAH

Nute, Tate, leh Mihontunga Khialhna.—Nu leh pa tampite in tavuan la zo takpi ding hiam, cih kidottelna neilo-in ainn sungah anvak ding ta tampi piang sak uh hi. Hihin anu ading, tate leh mihonte tungah bawl khialhna lianpi ahi hi.

Nu leh pate in atate’ mailam thu ahoihdingin ngaihsutsak ding hi. Nuntak nadingin nasepna ah kuaikut liangin na asemding kithatang sawl loding hi.1

Innkuan akibehlap main, ta tampi neihna tawh Pasian’ min kipahtawi ding maw, Pasian kidaisak zaw ding, cih ngaihsun masak ding ahi hi. Akiteen kipat panin Pasian’ min thansak ding hidinga, kiteen sung tawntung zong tuamah hiding hi. 2

Nu Cidamna Thupi hi.—Nu leh pa tunga akinga tavuante ngaihsutna tawh tate neihtuak hiam, cih nasia takin ngaihsut ding ahi hi. Nu in tate akep nadingin tha akicing anei hiam? Pa in zong tate zia leh tongte Pasian’ deihna bangin asui zo ding hiam? Hih tate’ masuan ding bangzah kigeel sak hiam? Ki duh-itna bekmah ngaihsutin kineia, zi leh nu tungah vangikpi kisuan ta hi. Nu ie thagum leh khalam tha kingaihsun khalo hi. Cidamlo leh lungkiatna

tawh tate honkhat tawh ki-umcihin aetding zahin enzo lo hi. Akipattah dingzah kipantahlo a, Pasian adaisak ding leh amaute siatna amipihte tungah alawh dingin, leh Satan makaih dingin galkap honkhat akipiangsak asuak hi.3

Ngaihsut Zawkding Thu.—Pasian ngaihsutna tawh nungta in tate apantah dingin nu leh pate hong deih sak hi. Nu in ama’ thagum neihleh ahunte kaituahin vantungmite tawh aom khawmdingin ta neute hilh ding hi. Pasian itna leh zahtakna tawh nu in ama sepdingte picing takin semin, innkuan leh khuapihte adingin tate in thupha ahihna lak ding hi.

Innkuan sungah nu in hih thute asemdingin gim lua ahihleh pa inhih thute phatakin avaihawm ding ahi hi. Nu leh tate in kikhangkhan nadingin vangik lua sa-in tate zong tam lua uha panttahlohpi in tate ahong khankhiat ding zong pa in a thukhual ding ahi hi.4

Pilna leh kepna kicingtakin piakzawh ding tawh kituakin ta neih zong halsiam ding kisam hi. Kum khat khit ciangin kum khat tangekte nu ang-ah kikuahden ding, cih zong diklo hi. Lawm leh gual tawh kikholh hun ding om manlo ahihkei leh tawmsak a, bangkua sungah gentheihna vaitut hi. Tate zong akikep dingzah uh kikem manlo, pilna leh lungnopna angahzah ding uh nu leh pa in piak dinga Pasian’deihzah kipia manlo hi.5

Innkuan Liante Thuhilh.—Nakhensatding inah, “Khuamial vangliatna akhangkhan dingin innkuan alam ka hi hiam? Ahihkeileh Christ adingin tate alamto ka hi hiam? Pasian hong ngetna tawh kituakin tate ukding leh asuito ding ihhihkei leh polhteh taka pattah ding ta tampi neih sangin tawm neihding hoih zaw hi. Tate uk leh khal ding in aneu cil laipekun nu in pilvang takin Pasian kihtakna tawh dikna mungtup abandingin tha asan zawh keileh ta tam neihna-in mawhna hi. Pasianin ngaihsut theihna hongpia khin hi. Tua ngaihsutna zang in.6

Nute pate aw, Topa adingin tate pattah nading pilna na neih keileh banghangin sinlo nahi hiam? Satan’ nasem dingin ta tampi piangsak na hi hiam? Hihhangin Pasian alungdam mah diam? Innkuan lian leh naneih sum leh paaite tambei ding hi. Nu khut sung dimin tate na koih ciangin asuah hun panun nu-in sepdingte sem manlo in amanlah ciangin, bang piangding, cih ngaihsunlo na hiam? Tate khatsim in nu kiang panin tha suk uha, hih thu aphawklo nu leh pate in, tate apantah zo dingin nu leh pate bang hunpha napia ding hiam? Tawntung nuntakna mitsuanin hih thu angaihsun dingin Topa in hongsam hi.7

Innkuan Sumlut pan Ngaihsutna.—Tate adingin pate in bang piakding nei uh hiam, ngaihsut ding ahi hi. Midangte adingin vangik ahidingin tate neihding hilo hi. Innkuan apanpih zawh nadingin bang sumbawlna nei uh hiam? Sum ngahna aneih kei uhleh kinna, ann leh puan kisamin tate leitungah piansakna in thu palsatna ahi hi.8

Sumbawl asiam kilkellote, leitungah aomdingin kilawmna aneilote in innsung pen tate tawh kidim sak uh hi. Sumbawl siamte in avaan zoding uh ahizongin ta neihbeh lo uh hi. Amau leh amau akikem akivak zolote in ta nei kei uh hen.9

Pawlpi ah buaina Lian kilutpih.—Mi tampite in atangval lai nangawnun amau leh amau kivak zolo a, zi nei in tate aneih sawm napi-in, innkuan vak nading bangmah neilo uh hi. Asukzaw in, innkuan ki-ukdan zong theilo hi. Hih innkuan pen kikhalna omlo, polhtehna tawh kiciamteh hi. Amau leh amau ki-uklo, lungduai lo, kipumphat uh hi. Tuabangte in lungdamna thu asaan uhciangin ahau zaw innkuante in huhna apiak ding kilamen uh hi. Amaute kilametna angahloh uh ciangin pawlpi gensia in pawlpi in ama khuavak tawh kituakin nungta lo hi, ci uh hi. Hih thu ah kua in thuaksia ding hiam? Pasian’ nasepna sukkang liangin innkuan atam mizawngte huh ding hiam? Hilo hi. Nu leh pate in thuaksia ding uh hi. Sabbath thumaan asan ma sangin thuaksia zaw tuanlo ding uh hi.10

Missionary Nasepna Bangci Kikhaktan Thei?— Gamdangah missionary kikhah ciangin sum acil zat thei, innkuan atamlo, hun tom sunga nasep tampi asem manding, ainn leh akhut uh tate tampi tawh akidim saklo, ahihtheih laiteng alungsim uh Pasian nasepna panin lam apialsak nate panin suahtakna angahte kiteel masa hi. Zi zong apasal pangah dingin ahihtheihbang sepna tawh apanpih ding ahi hi. Pasian adingin tanu tapa tampi ahong ciahpih dingin Pasianin numei zong zang thei hi. Tuabangin na asem theiding mitampite innah tate tawh kikuahcip uh hi.

Eite in missianary cih min tawh kituakin mission na asem taktak dingte kisam hi. Angsung ngaihsutnate nawlkhinin Pasian’ nasepna thu masa a akoihte, Pasian’ sawlna peuhah apai dingte, thumaan athehthang dingte Topa in deih hi. Pasian akihta leh a it zite, apasal nasepna ah ahuh theite Topa sam hi. Innkuan tampite in nasem dingin akuankhiat uh hangin kipumpiak zolo uh hi. A lungsim uh ka a, anasepna phual ah zong omlo thei uha, a inn nai uha kikoih leh a ut zong om uh hi.11

AZAWNGKHAL TATE KEPNA

Tagahte.—Upna sungah asi pa tampite in Pasian’ tawntung kamciamna sungah tawlnga khin uha, anungah anutsiat tate Pasianin kep sakding hi, cih ngaihmuanna nei uh hi. Hih adah tagahte Topa in bangci huhding hiam? Van panin lamdang takin mana moh zu sak lo hi. An apuakdingin va-akte sawllo hi. Ahihhangin Pasianin lamdang takin mihingte lungsimah nasem hi. Christiante sung panin angsung khuatnate paihkhiat sakin, citna kongkhakte honsak hi. Christian akici amite in lainatna tawh adah leh agenthei tagahte ahuh hiam, ci in ze-et hi.

Pasian’ itna aneite in alungsim uh hong henla, a innte uhah tagahte ciahpih uh hen.

Nu leh pa kepna leh Christian bangkuate makaihna akisam tagah naupangte leh khangnote kepna ah Topa adingin kimanna anei nasepna mun lianpi om hi. Tuate tampi in siatna gaam luah uha, haina ah khangkhia in, siatna leh palsatna ah kimakaih uh hi. Lamet aneilo tagahte in zia leh tong hoih pattahna angah nadingun munhoih ah koih kula, Pasian’ tate asuah kul uh hi.1

Pawlpi Tavuan.—Pa neilo nu neilo naupang tam pite Pawlpi sungah hong kikaituah uh hi. Christ in anungzuite kiangah agen bangin, “Hih lamlak naupangte kaikhawm unla, Kei adingin pantah un. Note in thaman nangah ding uh hi. Hih thu ah angsungkhuatna tampi ka mu hi. Inn aneilote tate inn ciahpihna tawh metna omding akiciat keileh pawlkhatte in nungngat uh hi. Tuabangte kihonkhia maw, mangthang maw, cih mite in wlmawhlo uh hi. Amaute in amaute sepding hilo hi, ci uh hi. Cain in agen mah bangin, “Ka sanggam akempa ka hiam?” aci ih hiam? Amaute in tagahte akepna uh tahangin anuamlo athuak dinguh utlo uh hi. Amaute kilamdanna hangin tuabang naupangte leitungte’ khut sungah kidenna hi. Christian ka hi, acite sangin amaute in na pomsiam zawlai uh hi. Pasianin thu asittelni ciangin hotkhiatna piadinga nasep akipiate thu zong kisit ding hi. Meetna aom keileh amaute in paulap zongin tua nasep nate panin kihemkhia uh hi. Hihbangin thupha abawl dingin hunhoih akipiate tawh kisai in Jesu in: “Hibang mite tungah nabawllohna uh tawh Keimah tungah nong bawl kei uh hi.” Isaiah 58:5-11 simin.2

Ta Neilo Nupate Hilhna.—Sungsuak ta aneilote in midangte’ ta it leh akem theidingin pilna zong uh hen. Topa’ nasem dingin gamdangah hong kisawllo ding hi. Anuntakna uh tawh kituakin khuatualah Pasian’ nasem dingin kisam thei hi. Ngaihsutna aneilo ganhingte ihkin ngaihsut zahin, Pasian’ piak talentte neite in, vantung ngahding om a, hell khuk pelhding anei mihingte tungah zang uh hen. Pasian zia leh tong tawh kisun dingin akisui thei hih naupangte kinbawl zaw uh hi. Na kim uhah innneilo tagahte khual un. Na mihingpihte tungah nalungsim uh nakhakcip uhsangin hih tagah naupangte Topa thuhilhna tawh kituakin khanpih zaw un. Nasep nop nak uhleh Topa’ nasep tampi om hi. Hihbang huhna ah sepna in pawlpi pungsakin kha nuntakna hau sak hi. Inn neilo, pa neilote hotkhiatna in mikim nasep ahi hi.3

Ta aneiloh hangin sum leh paai aneite in itna, kinna, ngaihna  leh huhna akisam hih naupangte leitung nate tawh kihuh hileh tuni alungnopna sangin lungnuam zaw lai ding uh hi. Pa ie hehpihna angahlo ahihkeileh nu ie itna nem asang khalo, hunbei kuana leitung’ huzaapna siate athuak naupangte’ nu leh pa tangin din ding pen eite nasep ahi hi. Itna, hehpihna leh kina apia theidingin kisin in. Vantungah Pa kanei hi, aci mite in note om nading mun bawldingin ka pai hi, cih kamciam angahte in, lawm neilote’ lawm suakin, pa aneilo tagahte adingin pa hi in, meigongte adingin huhpa suaka, mihingte’ phattuamna apia na telentte uh hih leitungah zang un.4

Siate’ Zite in Ta-in akemtheiding hiam?—Ta ngeksente siate zite in la-in akem theiding hiam, cih dotna kidong thei zel hi. Inn panin paikhia in Pasian nasep aseptheih keileh ta kepding ka tavuan hi, cih thuakna aneihleh, ta kepna in nasep hoih sepna ahi hi. Ahih theih leh Sabbath atang nu leh pate’ nutsiat tate hileh hoih masa pen ding hi. Inn neilote adingin inn akawmte tungah Topa in thupha pia ding hi. Siapa zi in midangte pilna piakna ah tavuan anei ahihleh Pasian adinga aneih Pasian’ naseptheihna vangliatnate zom ta hen. Amahin apasal ahuh takpi hidinga, ama’ theihnate behlapin, thu tangkona huhta hen. Akiniamkhiat aki ap nupite, Christ ie hehpihna tawh akipahtawite adingin lampi kihong hi. Alungkiate leh tangsapna aneite kiangah hawhin thapiakding kisam hi. Alukunte amaute tawh thunget pihna leh Jesu kawkmuhna tawh tha kipia thei hi. Tuabang kizektheihna aneite in nau neute kepna tawh hun abeisakding hoih masapen lo hi. Amaute’ ut thutawmin akhut uh khih kei uh hen.5

Tagahte leh Lawmneilote adingin Inn Hon.— Nahihtheih laiteng, inn neilote adingin inn bawl un. Hih nasep masot nadingin mikhempeuh kiging hen. Topa in Peter kiangah agenin: “Ka tuute anvak in.” Hih thupiak in eite a ahi hi. Ih innte ihhonna tawh tagahte huhna atangtung ahi hi. Nang hangin Jesu zahla sak kei in.

Hih naupangte la-in Pasian kiangah biakpiakna bangin ap in. Topa thupha amau adingin nget sakin. Christ ie deihna tawh kizui in, azia atong uh suih sak un. Hih muanna ihmite in adeih theiding uh hiam?6

Pasian’ Mite Sitna Khat.—Inn neilote ading inn ihhonna tawh Pasianin eite hong ze-et hi, cih tuma kum pawlkhat lai in Topa in honglak hi. Thumaan thu aup nahangun naupang tampite in tagah suakding uh hi, cih zong hong kilak hi. Langpanna leh bawlsiatna hangin thu-umte-in inn leh lo suplawh ding hi, ci hi. Inn aneite in inn neilote adingin akong uh tanzau takin honsak ding hi. Hih thu tawh Pasianin thu-um akicite hong sittel ding hi, ci in asawtlo lai in hong lak hi. Christ mahmahin eite tangin zawnna hong thuakna tawh ihzawnnate hauhna ihngah nading ahi hi. Amahin akipiakkhiatna tawh ei inn neilo, leengla khualzinte in ahoihzaw gam, vantung inn ihngah nading ahi hi.7

TATE ADING NU LEH PA GAAM

Pianpih Thukham.—Nu leh pate’ lungsim pumpi pianziate tate tungah kipia sawn hi. Hihthupen kuamahin ngaihsutna kicing pia lo uh hi. Pumpi thukham leh nu le pate zongsatna akibat loh ciangin aneih uh sungnung natnate in tate tungah kidawk kik ding hi.

Pumpi, lungsim, leh khalam hanciamna tawh Christ tawh kipawlna piang thei hi. Hih zong nu leh pate tawh kisai hi. Ta aneih sial un thupha ngah ahihkei leh samsia ngah khat zawzaw-in kilang ding hi.1

Tupna picing tektek leh lungsim leh khalam letsong sang kah semsem hi. Nu leh pate pumpi thahatna khang to zaw leh atate nuntak akilamdan hoih tektek hi. Ahoih ngah nadingin hanciamnate in khua leh tui leh mailam khangthakte adingin huzaapna hoihsak semsem ding hi.2

Nu leh Pa Tampite Dahhuaitakin Hai.—Pasian’ neihsa Ama’ lim leh meelin akibawl naupangte ie kha leh pumpite ah tavuan aneite in hih khangmite zualzanna tawh kha leh pumpi cidamnate in siatna sungah alutloh nadingin huangkai in dal lo ding ih hiam? Hih palsatnate’ bul ihsut ciangin anu leh apate ie thutheihlohna hang ahihlam kimu hi. Amaute’ haina hangin nuntakna leh cidamna nangawn kisup lawh hi. Nu leh pate aw, Pasianin tate pilna dinga hilhding tavuan ahong piakte thuhilhna leh limlahna tawh napidinlohna thaman hangin Pasian’ maiah dingin nadawn uh kul ding hi. Hih apiang thute in na tate’ tung bekah akimu ding hilo hi. Akhang khempeuh uhah kimu ding hi. Lo sungah lingkungno khat aposak nahangin tuabang lingkung kivuahdinga lingkung aki-at bangin, haina panin apiang mawhnate hangin apiang siatna thaman zong at ding ahi hi.3

Kidamlohna hanga Siatna in Khawllo.—Hautaka nuamtatna leh zu dawnna in sihui sia sak leh halkang hi. Tuapanin natna namcin piangsak hi. Ahihhangin hih siatna himahah dinkhawllo hi. Nu leh pate in atate tungah gaamin nutsiat hi. Thukham bangin, akideklohna leh asiatnate atu atate tungah pia sawn hi. Ama’ akaang sihui leh sihui siatna natnate zong pia sawn hi. Thu palsat dinga kiphaltawmna leh midangte nuntakna susiatnate samsiatna gaam bangin pa panin tate tungah akhang khangin kikhak suk suk hi. Leitungah gentheihna leh khuisatnate kiluah suksuka, mihingin mawhna sungah kikia kik kik hi.

Tu khangmite in ngaihsutna tawm zong neilohin numei pasalte in kidek kidam selo-in azudawnna panin atu atate akhangkhangin gaam in natna, khuak thanemna, leh khalam polhtehna kiban khaksuk hi.4

Lungduai leh Theihthuah Akisapna ahang.— Pate leh nute’n amau’ gamtatnate atate tung panin mu thei uh hi. Tanu tapate tungah amaute kicinlohnate hong kidawk kik amuh ciangun lungsim niamkhiatna tawh thu asinding uh hi. Tate pianpih siatnate, thanemnate nencip in apuah zawh nadingun nu leh pate in lungduaina, kuhkalna, leh itna azahnih in aneih ding uh ahi hi.5

Naupang khatin nu leh pa kiang panin aluahsuk tatsiatna khat apulaak ciangin nu leh pate in hih akidawk kik amaute siatna hangin atate hansan in kitom gawp ding uh ahiam? Hipeuhmah lo hi. Nu leh pate in amau leh amau kiencik uh hen. Ngoltolna leh paukhauhnate vil uh hen. Tua thanemna lian mah tate tungah hong kidawk kik ding hi.6

Lamkhial naupang neute tungah ziadamin, Christ ie migitnate pulaak un. Amaute in hih pangtatnate anu leh apa kiang panin gaam banga aluahsuk uh ahihlam ciamteh in. Nangma zia leh tongte aluah suk natate tungah thuakzawhna nei in.7

Khialhna abawldinga zongsatnate, nu leh pa kiang panin akingah suk zia leh tongte in Jesu Christ ie vangliatna bek tawh kizo thei hi, cih nu leh pa in na pummuan ding uh ahi hi.8

Lungduai un, nu leh pate aw. Abeisa huna na hainate uh hangin azah nihin nahanciam uh kul ding hi. Amah namuan nakleh Pasian in nangmah tha hong guan ding hi. Piltakin leh ziadam takin natate vai van un.9