Kumkikna Lamen Innkuan - Khen Giatna

THUKHEN 8

Agualzo Innkuan

​

ASIANGTHO INNKUAN 

Kithuahna Sianthona.—Innkuan sunga asiangtho kithuahna pen kepding ahi hi. Kuamah dang ahong lut nading thu omlo hi. Zi leh pasal hipah ding hi. Nupa tungtangah zi in pasal tungah thusim neilo dinga, pasal in zong zi tungah thusim neilo ding hi. Zi ie lungtangin pasal ie thanemna khempeuh akivuina han hiding hi. Khat in thuaksiatlawh liangin khat leh khat zong kiciamnuih loding hi. Akilungkim lohnate zong midangte tungah ko selo ding uh hi. Mite lakah khat thu tawh kihai ciamnuih bawlnain bangmah siatna aom pah loh hangin kikaiawkna piang thei hi. Innkuan khempeuh in thusim kidalna neitek ding uh hi, ci in hong kilak ngei hi.1

Innkuan kithuahna pen vantung’ lim mun siangtho bangin ngaihsut ding hi; limlang bangin khat leh khat kimuhtheih nading ahi hi. Lawm leh gual leh meltheih ih nei zongin innkuan nuntakna ah tuate tawh kibuailo ding hi. Atuamdiak kinaina neihding hia, kimuanna, tawldam na, leh tangzanna kipia tuak ding hi.2

Leei, Bilte, leh Mitte Sianthosakding.—Tua innkuan kinainain leeite, bilte, mitte, leh pumpi hiang khempeuhte Pasianin asianthosak nadingin thungen ding hi. Siatna tawh kituah dinga, siatna kizawh sakding hituanlo hi. Gamtatna agim namtui dingin Christ in hong vaihawmsak khin hi. Innkuan kinainaah mitampite in Christ pahtawilo uha, Ama’ zia leh tong zong pulaak khial uh hi. Bangzahin lungduaina, thuakzawhna, mawhmaisakna, leh itna maan laklo uh hiam? Mi tampite in Christ ie deihna, nasepna, leh azia atong pulaak ding sangin amaute deihna leh deihlohnate apulaakna tawh lungsim palangte pusuah uh hi. Christ ie nuntakna in migitna leh itna tawh kidim hi. Ama’ Pasian’ zia leh tongah akhangto mah na hi hiam?3

Pumkhatna, Itna, leh Kilemna.—Nu leh pate in itding leh thuman dingin kamciam apiak uh Pasian hangin amaugel kikalah kithutuahlohna om sak kei uh hen. Atate in iplah dinga adeihsak uh nuntakna leh lungsim puakte pulaak uh hen.4

Nu leh pate in innkuan sungah kithutuahlohna alut khak loh nadingin kidawm ding uh hi. Tua in, Satan in ama’ zia leh tong ahong piaknop mana anasepna ahi hi. Christ ie nuntakna auk thukhunte tawh innkuan sungah kipumkhat dingin nu leh pate hanciam uh hileh kiseelna beiding a, itna leh kithutuahna hong omding hi. Nu leh pa leh tate in Khasiangtho silpiakte neiding uh hi.5

Kilemloh nading thu azong kei uhzongin nu leh pate in puakding vangik tampi neikhin uh hi. Kibatlohna athemnengte hun apiate in Satan asamte ahi uh hi. Tate in zong thuneu khat tawh kithutuahlohna pua pah hi. Nu leh pa leh tate in Pasian tungah athumaan lodingin siatna nasemte gamtang uh hi.6

Kiteen nuntakna ah zia-etnate ahong luttheih tei hangin, zi leh pasalin anuntakna uh Pasian itna sungah kemding uh hi. Pa in tate’ nu pen migitna, ziadamna, leh hehpihna tawh kilawmin maivil ding hi.7

Innkuan Kithutuahna Ie Thusim.—Innkuan leh pawlpi kithutuahlohna in Christ tawh kikhen khiatna ahi hi. Christ kiang zuatnain khat leh khat kinaina hi. Pawlpi leh innkuan kithutuahna ie thusimin kileptuahna, kizek siamna, leh haksatnaah agualzo Pasian’ vangliatnate tawh akisaikha zongin Christ tawh kipumkhatna ahi hi.

Sikkual bem agolmahmah sungah sikkual neu tampi aomdingin ngaihsun in. Sikkualte in alaizang tawh kinai semsem le-uh kual khat leh kual khatzong kinai tektek hi. Christian nuntakna zong tuabang mah ahi hi. Christ tawh kinai tektek lengh khat leh khat ihkinai semsem hi. Pasian’ mite in kipawlkhawmin uitui takin ihsepkhawm ciangin Amah kipahtawi hi.8

Khat leh Khat Kihuh—Innkuan kipawlna in siangtho leh mihing kipawlna hia, mimalte-in amaute mun tekah atat ciat uhciangin khat leh khat akihuh uh hi. Setpi khat sunga aphel neuneute bangin atuamtekin sem napi, abupin nal takin kikhin thei hi.9

Innkuan sungah aom mimaltein amaute sepding ciat phawk uh hen. Tuahileh nopsakna, kibupsiamna, leh kipumkhatna piangsak ding hi. Khat in khat langpanin sem kei hen. Khat leh khat kihanthawt nadingin kipawlkhawmin nahoih sem uh hen. Migitna, thuakzawh na, leh lungduaina nei in, awnem takin pau in, aw sang saklo, buaina pelin, khat leh khat vangikte kipuak sak un. Midangte tawh kipawlin innkuan sung mimalte in

amaute panmun ciatah ding ding hi. Kum guk tungsiah mimalte in nuntakna ie vangik puaciat ding uh hi.10

Akituakliana Phelna.—Koi koi ah ka om zongin hehpihna sungah kakhangto ding hi. Kasep khempeuhah khalam tha kaneih kul hi. Innsungah kalungsim, ka kampau, ka tatnate kakikhal ding hi. Khalam kipattah nadingin hun kala ding hi. Thukhun amaan sungah pilna kazong ding hi. Midangte adingin etteh tham kacing ding hi. Asun azanin Pasian’ kammalte ka ngaihsunsun dinga, kanuntakna katheihsiam nadingin kazang ding hi. Khasiangtho’ ie namsau ahi Pasian’ kammalte in ngaihmuan takin kazat theih namsau ahi hi.11

NAUPANG’ SANG MASA

Sangkah nadinga Pasian’ Geelcil.—Eden Huan sunga pilna zonna in innkuan kilamna ahi hi. Adam in “Pasian’ Tapa” ahi hi (Luke 3:38). Sangpenpa tate in laihilhna nangah uh hi. Tua sang in innkuan sang ahi hi.

Mawhna sungah mite akiat khit uhciangin pilna ngah nadingin Pa tang dingin Tapa ding a, Amahin Pasian leh mi kizopna suak hi. Mihingte alian Siapa hong suak hi. Mihing numei pasalte in Ama adingin tangding ahi dingin koih hi. Innkuan in sang hia, nu leh pa in sia ahi uh hi.

Pupate hunlai-in pilna sang in innkuan ah kilam hi. Tua sangah zia leh tong khantoh nading tuppi in koih hi. Akipatcilin mihingte ading akigeel saknate mah kizomto lai hi. Pasian kiang panin apaikhiate in amau ading khuapite lam uha, ahonin teeng uh hi. Tuhun khuapite bangmahin hauhnuamsakna leh siatna tampi tawh khuapi sat uh hi. Pasian’ thukhunte alencipte in mualdawnte leh zanglote ah teeng uh hi. Leitang khoin, ganhing khawi in, suakta takin nasemin, Pasian lungngaihin nei uh hi. Pasian’ lampite atate hilh uh hi. Israel adingin Pasianin adeih sak pilna in hihbang ahi hi.1

Amaimai in innkuanin sang leh biakinn hia, nu leh pa in leitung vaiah laihilhsia leh biaknaah sia ahi uh hi.2

Akinai Innkuan Sang.—Topa in apilna tawh ageninah, innkuanin pilna piak nadingin alianpen khutzat ahi hi. Inn ah naupangte pilna akipan ding ahi hi. Innin sang ahi hi. Sia dingin nu leh pa hia, nuntak tawntung lam alakding hilhna kipia ding hi. Zahtakna, thumanna, Pasian phawkna, leh kikhalnate asinding ahi hi. Innsang in sia leh pha theih nadinga huzaapna ahi hi. Atangpi in, hihte in gamdaihna leh ziadamna ahihhangin ahoihlamin kizang hileh thumaan leh dikna ading vangliatna zong ahi hi. Amaan in naupang kipantahlo hileh, Satanin ama teel lampi tawh hilhding hi. Tua hia, innsangin bangzahta in thupi hiam?3

Innkuan pen pilna piakna sang hileh na naupangte inn nasep, khuatual nasep, leh Pawlpi nasep semthei dinga kiginna apia nahi hi.4

Athupi Khatna in Innpilna.—Adahhuai leh mun khempeuha mikhempeuhin hi asak ahi, tuni innpilna leh inn a khangno pattahna ki-awlmawh nawnlo hi.5

Innkuan alamte leh acingte tunga akipia nasep kanin athupi nasep om nawnlo hi. Nu leh pa akipia nasep zahin athupi leh mailam thu akonlawhzaw thu omnawnlo hi.

Tuni tate leh khangnote tawh mailam khuatual nuntakzia ding kikhensat ding hi. Khangnote leh tate in zong inn pilna tungah kingam lai uh hi. Inn kisinna ahoih kisam ahihna pen tuni natna sia, gentheihna, leh mihing asamsiat palsatnate tawh kiteh thei hi. Inn nuntakna siangtho in maan hileh, inn panin leitung na asem dingin apaikhia naupangtein atavuan uh leh lauhuainate adingin kiging hile-uh, leitungah kikhelna alian kimu ding hi.6

Adang Khempeuh Thupipen Nawnlo.—Leitungah apiang tate khempeuhin Jesu Christ ie neihsa hia, thu leh limlahna tawh Pasian a itding leh athu mang ding uh ahi hi. Nu leh pa tampite in Pasian’ piak pilna piakding nasep kinlo uh hi. Thu theihna akipat huna kipanin Jesu ait leh thu amangdingin tate pilna piak leh pattah ding ahi hi. Nu leh pate in kuhkal takin, akipatcil panin etcik ding uh a, innkuan vai adangdang khempeuh nawlkhinin, thu atheithei tate’ lungsim sungah Pasian’ deihna guanin, hilhin pantah ding uh hi.7

Nu leh pate in nisim nasep kinneihte, lei ngeina leh tawndante, leh kizep kipuahnate tate uksaklo ding uh hi. Aneu tungpanun tate kin ngaihsutlo uha kum ahong tam uhtawh kituakin pilna pia zolo uh hi.8

Tuni leitungah siatna tampi aomna ahangpen, nu leh pate in leitung vai duh leh dah tuamtuam tawh ahun uhbei saka, athupipen ahi lungduai tak leh migi takin To- pa’ lampi ah tate thuhilh ding hun ngahlo uh hi. Mu thei hilengh, nu leh pate in ahuzaap ding zahun huzaap manlo uha, tate tampite in lampial uh hi. Nu leh pate aw, na tate pilna napiak dinguh sangin athupi zaw nasep dang omlo hi, Pasian’ thu manding leh Topa muanding thupi ahihna na theisak kei uh hi.

Tua nasepna panin bang thaman nangah ding uh hiam? Natate uh nakiang uhah ompahin na thuhilhnate azui pahpah dingin akhutte uh lenin lam natonpih ding uh hi. Tua hileh na nasep uh tuazahta in haksalo ahihlam naphawk khia ding uh hi.9

Innsang Laihilhna Pasian’ Khutzat.—Abrahamin Pasian lampi atawndingin atate lampi ahilh mahbangin nu leh pate in zong tate ahilhdingin Pasian’ khutzah hiding uh hi. Laisiangtho nakantel ding uh hia. Topa’ lampi in banghiam, cih theiin tate ahilhding nahi uh hi. Micah in: “Topa in kei bang hong ngen hiam? Thumaan asem ding, hehpihna ait ding, Pasian’ lampi ah kiniamkhiat takin lam apai ding ahi hi” (Micah 6:8). Laihilhsia nasuah nadingun nomau mahmahin thu nasin ding uh ahi hi. Pasian’ kammalte panin khuavakte kaikhawmin, hilhna leh limlahna tawh tua khuavakte tate nahilh ding uh hi.10

Pasianin khuavak ahong piakna ah nu leh pate in innah innvuanzi, cidamna siavuan, nurse, leh sia hiding uha, atate uh amau tung leh Pasian tungah lamto ding uh hi. Pumpi’ tunga Pasian nasepnate alangdo zongsatna hoihlote angah loh nadingun pantah ding hi. Pumpi thatangte akemcingin hilh ding uh hi.11

Tate pattahna ah nu in mun thupi pen alading ahi hi. Pa tungah athupizaw tavuante kinga a, nu in atawntunga kithuahna tawh tate’ neu lai panin lawm teelsakin lamlak ding hi. Sianthona, ngeina hoihte avom theih nadingun makaih ding hi. Nasep akuhkal ding, amau leh amau akimuang theiding, Pasian maiah nungta, sem leh agamtang khia dingin nu in hilhding hi.12

U sanggam numeite in anau zawte tungah huzap lianpi nei thei hi. Aneu zawte in uham zawte lim ettehin, kam a genkikna sangin, ute tatzia zilna tawh kipantah thei hi. Upenin nu ahuhdingin Pasianin tavuan hong pia hi, acih theihding kisam hi. Nu ie vangikte puak pih ding ahi hi.13

Nu leh pate in innah om mun ding uh hi. Pasian hong itna leh thumanna hilhna leh limlahna tawh tate hilhding hi. Apil ding, mi tawh akikhawl theiding, apawlhuai theiding, belna alamtheiding, acil theiding, leh ama’ deihna anial theidingin hilh in. Innsungah itna, hehpihna, leh hanthotna tawh nu leh pate in tate leitung zeetna panin ngaihmuanna, leh tawlngakna pia ding hi.14

Pawlpi Sang ading Kiginna.—Innsang ah Pawlpi Sang akah theidingin tate kiging ding uh hi. Innsia ahi nu leh pa in hih thu mitsuan kinken ding hi. Aneih uh thahatnate asiangtho leh asang Pasian nasep nadingin zangding uh hi. Belna leh thumaan taka inn sangah kihilhna in ahoihpen kiginna ahi hi.15

Pasian’ Hilhnate Thupisak pending.—Ahong makaihding Laisiangtho tuktehna om hi. Lampial loin asiangtho asang nuntakna ah nu leh pa leh tate kalsuan ding uh hi. Pasian’ thugente thupi pen hi. Pasian mai-ah nu leh pa in akammalte phalhkhia henla, thukan lungsim, leh diktakin angen “Pasian in bang gen hiam?” te in thu muta hen.16

Thumaan aitdingin tate hilh in. Banghanghiam cih leh thumaan bekin nuntakna siangtho sak hi. Asiangtho nasepnaah akiheldingin kilawmna pia hi. Pasian’ innkuan pihte suak sakin, Vantung Kumpipa tate suak sak hi.17

Ahongtungding Buaina adingin Kigingin.—Satan in amihonte makaih hi. Mimalin hih lauhuai buainapi adingin ihkiging nai hiam? Tua hun haksa adingin ihtate ihkithawi sak hiam? Ih galpa dinmun leh agalkuandante thei in ei leh innkuanpihte ih kiging sak nai hiam?

Khensatna ahoih apiadingin tate akiging nai uh hiam? Thukhun leh tavuan ah akinlo alinglo dingin ihpantah nai hiam? Hun ie limte asim theiding leh ei leh ih tate ahong tungding gimna lianpi aphutan dingin akiging ta uh hiam? Pasian ihbelh leh ihmuan hisak ni.18

AKIPENGTHEILO NASEP

Midangin Apuaktheihloh Nu leh Pa Tavuan.-- Nu leh pa aw, kuamahin ahong puasak theihloh tavuan napua uh hi. Nahin laiteng Ama’ lampi azuiding nahi hi. Pasian’ kammal akimakaihsak, zia leh tong aphuahphat sakding tavuan nei nu leh pate in atate pai nading lampi nalimlahna uhtawh ngaihmuang sak un.1

Nu leh pate in tate’ cidamna, pumpi kilamdan, zia leh tong lamtoh ding tavuan nei hi. Hih nasep anusia dingin kuamah kiciallo hi. Nu leh pa hihna tawh Pasian tawh kipawlin acidamhuai thukhunte tawh pilna pia un.2

Adahhuai ah, nu leh pa tampitein Pasian piak tate pilna piakding nusia-in midangte suan uh hi. Atate uh adingin midangte in pilna piak sakding deih uha, tua vangik panin amau leh amau kizang sak uh hi.3

Tate lampialna hangin akap atau mitampite-in amahmah kimawhsak ding bek omlai hi. Nu leh pa leh akemdinga Pasian’ nasep piakna angahtein Laisiangtho simta uh hen. Akimangngilh bawl atavuante tawm kik in sem uh hen. Tate pattahding nasep anusiate in kisik kikin Pasian makaihna zui ta hen. Agamtat nate kipuah kik a, makaihna leh thuhilh nadingin Laisiangtho zui-uh hen.4

Pawlpi bekin hihtavuan Lazo loding.—Tate leh khangnote in alungsim uh Christ pia hileh. . . Dikna ah mite akaihuai dingin kiap uh hi. Hih naseppen nu leh pate in pawlpi khut sung bekah ap kei hen.5

Siate Bek Kiap Theilo hi.—Natate kha nuntakna hihzahta in sepding anei siate tavuan nahihsak hi. Nang zong nu leh pa leh thuhilhpa nahihna tawh natavuan koi ah koih nahi hiam? Na tanu leh na tapate in nangmah ie thuhilhna leh limlahna hoihlo tawh kisia uh hi. Hih nathanemna ngaihsun lo-in siate in nang hilhna tawh kilehngatin natate lungsim, vang, leh biakna neihlona koi ci pattah ding uh hiam? Siate in pawlpi ading thumaanna, itna tawh kitaina, lungduai taka kisekna, leh nasia takin thungetnate leh kha ngahkik nadingin ahihtheih zah uh asep khit uhciangin, agualloh uhciangin , nu leh pate in siate mawhsak lai uh hi. Banghanghiam cih leh natate uh kikhel zolo uh hi. Natate kinloh nahang ahhi hi. Hih nasep pen nu leh pa tungah om hi. Pasianin ahong piak nasepte tawmin kiapna tawh semloin omding nahi uh hiam? Masotto in kiniamkhiatna tawh semin. Lungduai leh tawlnga lo-in Pasianin ahong piak dinmun abat nadingun nang leh natate domto loding na hi hiam?6

Nu leh pa tampite in amaute tavuan uh midangte suan theiding uh hiam? Mi tampite in siate in tua tavuan la-in atate uh akikhel nading leh Pasian’ ciaptehna amaute tungah akipiakdong asemding uh ahi hiam?7

Sabbath Schoolte zong Aptheih hikei.—Mailam tate nuntana ah apaipih ding theihna pen anu apate hilh leh theihsak ding ahi hi. Nu leh pa pawlkhatte in amau mahin atate khalam pattahna piakding deihlo uh hi. Pasian’ tungah aneih dinguh tavuante Sabbath School panin theihna akipiak sakding lamen uh hi. Tuabang nu leh pate in atheihdingun Pasianin anu apate mahin pilna pia in, ukin, pantahin, akep tawntungding uh deih sak hi. Ahangin amaute in tu leh atawntunga dingin azia atong uh alamto uh ahi hi.8

Nadeih lampiah natate apai nadingin kipattahna pen Sabbath School siate tungah nga kei un. Sabbath School in alian thupha ahi hi. Tate napattahna ah lamkhat panin hong huhding hi. Ahihhangin nangmun luah theilo hi. Nu leh pa tungah Pasianin tate Jesu kiangah paipih ding, thungetdan ahilhding leh Pasian’ kammal aum dingin nu leh pa bek tavuan pia hi.

Tate pilna napiakna ah Laisiangtho thumaan’ hilhnate hemkhia-in, nakinloh natate ahilhdingin Sabbath School siate leh biakna siate kiap mawk theilo hi. Nisim in laimaite phenin beltakin nasim zahdingin Laisiangtho in tuazahin siangtho lua, cih hilo hi. Pasian’ kammal sunga thudikte pen nisim nuntakna ah natuahkhak thuneu nonote tawh kimu sakin. Maantakin thei lecin, tua thumaantein na nisim nuntakna hong taangsak dinga, thumannopna lungsim leh gamtat laptoh nadinga akizang thukhunte hong mukhia sak ding hi.9

Zop Lai Ding!