Kumkikna Lamen Innkuan - Khen Giatna (Azom)

THUKHEN 8

Agualzo Innkuan (Azom)

INNKUAN KIKHOLHKHOPNA

Nu leh Pate in Tate tawh Kinai un.—Nu leh pa pawlkhatte in atate uh theisiam hetlo in zong kithuahpih lo uh hi. Tate leh nu leh pate kigamla uh hi. Tate thuaknate nu leh pa in theihpih in amaute sungah aom thute kaikhia zo uh hileh huzaapna hoih neizo ding uh hi.1

Nu leh pa in khat leh khat kihehpih theihna neiding uh hi. Amaugel in tate tawh kilawmta ding uh hi.2

Tate itna leh muanna angah nadinga gualzawhna in ahoihpen sinna ahi hi. Tua in amaute lammaanah paipih theiding hi. Innkuan sungah itna nitang tangsak ding hi.3

Thapiakna leh Phatna.—Khangnote in kithuahpih ding lawm ngai phadiak uha, amau kia om nuam salo uh hi. Amaute in itna leh awlmawhna deih uh hi. Nuam asaknate un zong anu lungnuam sakding in ngaihsun uh hi. Nuamna tawm leh dahna atuah uhciangin nu kiang ko pah uh hi. Nu adingin thupilo mah tase leh awlmawhlohna tawh amaute thuaknate natna in piangsak kei hen. Nu hehpihna leh phatna thupi hi. Mit-hem khat leh phatna ahihkei leh thapiakna in amaute sungah nitang bang hiding, anibup lungnuam sak ding hi.4

Nu leh Pa in Tate Thusim Pulaakna.—Tate in amaute lungsim tawnga thusimte, dahnate, kinawng

kaisaknate, leh zia-etnate nu leh pa kiangah genpih theiding a, thangah theiding uh hi.5

Amaute migitna tawh thuhilhin nalungsim tawh khih un. Hih in amaute haksat hun uh ahi hi. Amau’ tungah huzaapna pulaakna tawh nagimna uh dopih ding ahi hi. Athusimte uh ako dingin thuhilhin. Anuamna leh ahaksatna hoihtak kigen sakin. 6

Tate in nu leh pa tawh kinai zaw uh hileh siatna tampite panin suakta ding uh hi. Tate thu im selo in alungsim uh akihon nadingin kihanthawn ding hi. Haksatnate tuakin bang lampi zuiding cih alungbuai uhciangin nu le pa zuan uh hen. Avaite uh nu leh pa maiah pulaakin hilhna ngen uh hi. Pasian akihta nu le pate in amaute haksatnate theilo in om buang ding hiam? Nu le pa kanin tate lungsim kuan kua in theizaw sam ding hiam? Angeksen panin asuk ato a akem nu in tate lungsim puak thei lua a, makaihna piathei ding hi. Pa huhna tawh tate zia leh tongte khalin auk thei kuadang om ding hiam?7

“Hun Neilo.”—Pa in hun nei keng, ci hi. Kata kapattah nadingin hun kanei kei, midang tawh kithuah nading leh innkuan sung nopsak nading hun neilo thei uh hi. Tuabang nahihleh banghangin innkuan nei nahi hiam? Ahun neihte uh amau ading bekin zangin, tate adinga azang nuamlote amaute khut sung uhah aom tate pattah ding nasep akhin khia ahi hi. Ta anei nahileh, nu tawh kikopin, nasep na nei hi. Natate zia leh tong nalam sak ding ahi hi.8

Nu tampite in “Ka ta tawh hun tam ngah mahmah keng” ci thei uh hi. Tua ahihleh Christ adingin nikten puansilh adingin nahun khiam in. Kizep kipuah nung ngat lelin. An zong huan lo-in kuangte zong sawp kei lel in. Ahizongin na tate awlmawhlo-in om kei in. Buh leh buhvai bang kilamdang hiam? Nang leh natate kikalah bangmah koih kei in.9

Vangik tampite hangin nute in lungduatakin tate thuhilh manlo-in, itna leh hehpihna pia lo thei uh hi. Naupangte in amaute lunggulhna ahi hehnepna leh kilawmtatna nu leh pa kiang panin ngahlo uh hileh, angah theih nading mun zongtawm uh hileh pumpi kha leh lungsim na sak kha ding uh hi.10

Kimawlna leh Nasepna ah Tate tawh.—Na hun awngte uh tate tawh zangkhawm un. Akimawlna uhleh anasepna uhah kithuah un. Amaute muanna thalawhun. Amaute tawh kilawmtatna lamto un.11

Nitak sialin nu leh pate in innkuan hun nei uh hen. Kin leh buainate leh nisim nasepte nawlkhin un.12

Kivangkhualsakte leh Akithuneisakte Hilhna.— Thu piaziahziahin ama’ thubek thu asa siate leh nu leh pate in tate tawh kithuahah leh mipilte tawh kithuahna ah lah kicingtak tuanlote adingin alauhuai thu aom hi. Amau leh amau kivangkhual sakin leh thu kineisakin, tate leh sangnaupangte hehpih nameel lahtheilote in mite lungsim zawtkha lo hi. Naupangte akim uhah kaikhawm zo uh hileh, sepna leh kimawlna ah itna pulaak thei uh hileh, naupang lakah naupang bangin om thei le-uh naupangte lungnuam sakdinga, amaute itna leh muanna ngahding hi. Asawtlo-in naupangte in zahtakin, nu leh pa, leh siate thuneihna zong hong zahtak thei pah ding uhhi.13

Lawmsiate in Innkuan Kidempihte.—Satan leh alawmhonte in tate lungsim ahoi dingin nasia takin hanciam uh hi. Tua hia, tate pen ziadam tak leh Christian migitna tawh bawl ding ahi hi. Nu leh pa in tate tawh kithuahsiam uh henla, amaute lunggulhna leh lungsim puakte theisiam uh hileh ciangtan omlo tate muanna ngahding uh hi. Inn ie nopna natate kimah vial un. Tua hileh akhangno pihte kikhawlhna lunggulh loding hi. Leitung siatnate hangin tate tungah kikhallna piak kul hi. Nu leh pate in zong tate alungtang uh tawh henkhawm uh henla, tate hoih nading lunggulh ahihna uh musak hen.14

Nu leh Pate in Tate tawh Kikhawl Hen.—Nu le pa leh tate kikal ah vangkhualna leh anoplo kizopna om kei hen. Nu leh pate in tate tawh kikhawl uh henla, amaute deih leh duhte theihpih in, amaute thuakna thaukpih theiin, amaute lungsungah aom bangbang phawk pih thei uh hen.

Na itna uh natate in mu hen. Amaute alungnop nadingin nahih theih tawpin bawl un. Tuabang hile uhcin, nakhalnate thei thei ding uh hi. Itna leh hehpihna tawh tate uk un. “Vantungmite in vantung ah aom Ka Pa mai vil tawntung uh hi” acih phawk un. Pasian in apiak nasep om bangin vantungmite in natate uh encik hileh na hihtheih bangun amau tawh kipawl un.

Inn kuan maan ie itna leh ciimna tawh akilamto uh ahih manin tate in lamlakah lawm leh pawl zongin mangthang loding uh hi. Siatna in amaute kaihuai lo ding hi. Innsungah aom lungsimin amaute zia leh tong suihsak dinga, inn panin paikhia in leitungah amaute mun aluah uh ciangin zongsatna hoih leh thukhun hoihte tawh ze-etnate panin kidal ding uh hi.15

ITNA TAWH NGAIHMUANG

Itna’ Nasep ie Vang.—Itna nasepna in alamdang vang hi. Ahangin, hihin Pasian’ nasepna hi. “Hehna veng sak” “migia athuakzo” itna, “mawhna tampi aseel zo” citna ihsin ciangin damna ahongpia Pasian’ khongpiak vang ihmu hi. Tua itna hangin nuntakna kikhel dinga, leitung in vantung ciapkholhna leh kibatna hiding hi.

Hihthu manphate mawltakin ihhilhzongin naupang neute in telthei uh hi. Naupang lungsim in nem a, na ciapteh baih sa hi. Uham khinte zong migitna leh mawl takin nungtain, Honpa’ itna ngumngek ihmuan ciangin naupang ihbang hi. Tuaciangin naupangte lungsim kilawngkha taa, itna ie damsakna nasep ih hilh ding hi.1

Leimite muhna panin, sum in liatna ahi hi. Christian’ muhna panin, itna in liatna hi. Khuakpilna leh khalam thahatna in hih thukhun mah ah hi. Itna siangtho in apha bawla, ahoih losiah bawl thei hi. Itna in kikhenkakna, gentheihna dalin, lungnopna maan pia hi. Neihsa hauhna in siatna leh suksiatna ading huzaap nei a, zawhthawhthu in nasak hi. Ahihhangin thumaan leh hoihna in asiangtho itna ie neihsate ahi hi.2

Singkung Bang Itna Khawi.—Innin asiangtho pen leh asangpen kingaihna ie alaigil ahi hi. Tawldamna, kithuhualna, kingaihna, leh nisimin lungnopna lunggulh dena, innkuan mimalte lungtang sungah ateeng kinken ding ahi hi. Singkung bang ahi itna phungvuh dending ahi hi. Tua hikei leh siding hi. Ahoih thukhun khempeuh iplahding hia, ih khanuntakna sungah pungsak ding hi. Satanin lungsungah hong guan enna, hazatna, gensiatna, kampau siatna, lungtomna, telkhialhna, angsunggenna, engawhna, leh amawknate zunglot ding hi. Hih siatnate ihsungah kemsuak hilengh, gahsiate nei in mi tampi nin sak ding hi. Banghangin mi tampite in hih gukungte thatlo in khoi khang mawk uh hiam? Hih gukungte in gah manpha ahi ki-itna that in, kha nuntakna susia hi.3

Na Neulai Phawkin.—Tate neulai leh nangma neulai hunte mangngilh kei in. Khauhtakin amaute bawl kei in. Khatvei gamtatna tawh khancin sak nuam kei inla, apicing dingin lamenpah kei in. Tuabang nahihleh amaute tawh nakizom thei keiding hi. Natna apia thei ahoihlonate azangdingin leh midangte nuntakna gu atulhdingin nahawlkhia mang ding hi. Na lauhuaina naphawk ciangin naziakai ta ding hi.

Nu leh pate in aneulai hun uh mangngilh kei hen. It le hehpihding na ut hunte phawk un. Mawhsakna tawh ahong kiciamnuih ciangin na lungnoplohna thei in. Nu leh pate in amaute thuakna panin khangno suahkik hen. Tate’ deihna atheihpih zodingin no suah kik un.

Tate in migitna, hanthotna kammalte kisam hi. Nute ie itna leh migitna kammalte in lungsim sungah nitang bang hia, haksatnate amangngilh zo zahdingin lungnuam sak hi.4

Nu leh pate aw, natate itna pia un. Aneulai un it un, akhangno ciangin zong it un. Lung palau sak kei un. Maitaina pia un.5

Tate Maitaina Munah Kemun.—Haksatna atuak tanote phatakin lungkimsak un. Naungek leh uham kikala aom tate in angahding uh awlmawhna ngah uh hi. Naupangte in innkuan khat ie mimalte ahihna angah dingin nute in makaih ding hi. Nu in tate’ lametna leh buainate paupih hen. Tate pen leenglate sangin kinzawin makaihna tawh amaitai bangkua sungah kem ding hi.6

Gualzawhna angahdingin tate huh in. Itna tawh kim um un. Tua hileh alungkhauhna uh nemzo ding hi.7

Tate in An sangin Itna akisapzawk ciangin.— Nu tampite in atate mangngilh zahdongin apuante uh zemin, akisam lopi tate puanding khui uh hi. Tate gimin kinding akisap laitakin ki-awlmawhlo a, ahihkeileh nek ding khat kipia mawk hi. Amaute in an akisam hilo, lungsim natna angah uh ahi hi. Amaute kisapin anu koi a khemna ahi hi. Hih itna neuneute nute in apulaak zelding uh hia, tate aneulai diakdiak in kisam phadiak hi. Tuabang tawh nu in atate leh aitna leh lungnopna tawh khih khawm hi. Amahin Pasianin eite ading ahih bangmahin amahin amaute ading ahi hi.8

Thuhoih Deihna Lungkimsak.—Tate it nahihna thei sak in. Amau adingin na nasepte musak hi. Amaute lungnop ding nakinna theisak in. Amaute hoih nading bekmah asawm na hi hi. Thuhoih ahihnakleh khatveivei adeih maimai nate zong lungkim sak un.9

Tate ukna ah na siphut zang kei in. Thuneihna leh ngaihna tonkhawm sak in. Ahoih ait huai te iplahin lamto inla, Jesu nalahna tawh ahoihzaw na deih sakin. Amaute anasak ding khempeuh nanial ciangin, amaute hoih nading nadeihsakna leh na itna lakin. It leh lungnuamsak nuam nahihna amuan uhciangin itna in dongkhaknate lakhia ding hi. Hihin mi tawh kisai in Honpa’ thukhun khat ahi hi. Hih zong pawlpi sungah kizang ding hi.10

Itna Pulaakin.—Innkuan tampite sungah kingaihna kipulaak mello hi. Zawlgau aveibang liangin kilahding ahihloh hangin asiangtho anamtui ki itna vangnei takin kilak ding hi. Tampite in kampau leh tatna ah kikhauh sakin Satan lampang zia leh tong lak uh hi. Zi leh pasal, nu leh pa leh tate, leh sanggam numei pasal kikal ah itna ngumngek lahding hanciam un. Awtol zang kei un. Itlohna khuahek khat zong pulaak kei un. Maitai leh awnem takin kiho ding pen innkuan tavuan ahi hi.11

Lungsim nemna, kingaihna, leh thusiamna aneuneu, kampau, leh thukhualna tawh akipulaak itna lak un.12

Nu leh pa azahtakdingin tate ahoihpenin pattahna in pa in nu tungah zahtak alahna leh nu in pa tungah zahtak alahna ahi hi. Nu leh pa tungah itna amuhna uh tawh tate in thukham 5na zuihdingin kimakaih hi. “Tate, Topa sungah nu leh pa zahtak un; Tua in thumaan ahi hi.”13

Jesu’ Itna Nu leh Pa tungah Kilangding.—Nu in tate muanna angahciangin leh athumang dingin leh ait dingin ahilh ciangin, Christian nuntakna ah sinna masa apia ahi hi. Nu leh pate it in amuan mahbangun aHonpa uh it in athu mangding hi. Nu leh pate in alahkhiat uh athumaan kinna leh amaan kipattahna in tate maiah amite adingin Jesu’ itna kilang sak hi.14

LUNGTANG HUAN ADING HUNZANG

Huanbawl Nu leh Pa.—Topa in asiangtho athupi nasep nu leh pate ap hi. Lungsim huan belcing takin akhoding uh hi. Tuahileh Pasian tawh nasem khawmte hiding uh hi. Tate lungtang huan phatakin cingin, kho ding uh hi. Amaute in khaici hoih vawhin adeih huailo lopate botkhiading uh hi. Ameelhem zia leh tongte, lungsim picin lohnate, satkhiat ding hia, tuate kikoih leh, a etlawm gamtatte melhemsak ding hi.1

Nu leh pate aw, na inn in nasep masak ding huan ahi hi. Innhuan sunga amanpha kungte ihkin masak ding hi. Khate acing dingin Topa’ tavuan piak anei na hi hi. Phatakin hih nasep ie apianzia, agahte, leh athamante lungngai un.2

Pasianin nasepding leikhawk khat na kongmaiah hongpia zo a, tua puahding nangma tavuan ahi hi.3

Huan Kepding.—Tuni leitungah khangnote in amaute lungsim phuut bangin azuiding pianzia nei uh hi. Akhangno lai-un angongtat uhleh nu leh pate in tawlkhat khitteh hong hoihkik ding hi, kum 16 leh 18 aphak uhciangin khua hong phawkdinga azongsat hoihlohnate nusia-in, numei pasal kician hong suak ding uh hi, ci uh hi. Khial hi. Tate lungsim huanah khaici hoihlo avawh dingin Satan hun kipia suak hi. Thukhun khialte tawh khangto-a, thuaksia khin uh hi. Apiangding khempeuh apiankhit ciangin lungsim leitang puahna in phat tuamna pia nawnlo hi.

Tate in zongsatna ahoihlo aneidingin nu leh pate in awi-am uh hi. Tua awi-amna ie meima pawnte kimu tawntung ding hi. Nu leh pa tungah tua mawhna kinga hi. Tate-in Christian ka hi, acihteei uhhangin hehpihna in lungtang sungah na asep kei-a, kipuahphatna nasia takin aom keileh, abeisa zongsatnate hing paisuak ding hi. Nu leh pa’ phal zia leh tong mahin nungzuih ding hi.4

Sia leh pha khenkhia lo-in anungta dingin khangnote phal ngei ding hilo hi. Mailam hunah hoihna-in siatna tuhkhia ding hi, cih tawh kihehnep ding hilo hi. Hoihna sangin siatna in khangzaw pungzaw hi. Kum tampi khit ciangin asin uh siatnate kiphiat siang ding hi, cihzong apiangthei phial zongin kua-in siatna sinngam ding hiam? Nuntak hun tom hi. Tate lungtang sungah asiangtho, ahoih khaici vawhna in anungciangin lopate bawhkhiat sangin baihlam zaw hi. Tanote lungsimah akipsa huzaapna phiatkhiat ding baihlo hi. Huzaapna aneiding ihhih leh zong ahoih, amaan piak ding hia, alungsim akikhel theihlai-in piak ding ahi hi.5

Khaici Vawh leh Lopa Bawhna.—Ta aneu laitakin Pasian’ hehpihna guah azuk nadingin alungtang leitang phatakin kalhkhapding ahi hi. Tuaciangin phatakin thumaan khaici kivawh leh huan kikho theiding hi. Hanciamna khempeuh thaman apia Pasianin akivawh khaici sungah nuntakna aguang dingin leh atehnote mengkhia-in, asawnte kai-in, umte atawi thei sakding hi.

Nu leh pate awlmawhloh nahangin, Satanin tate lungsungah ama khaicite navawh hi. Anlak ciangin zum leh dahna kipua ding hi. Tuni-in leitungah hoihna kial tung hi. Tuazong, nu leh pate in atate uh akiangah akaihkhoploh man ahi hi. Kinneilo, asiattat alawmte tawh akhenkhiat loh man uh ahi hi. Tua hangin tate in sihna khaici atuhdingin leitungah khang khia uh hi.6

Thuhilh nasep ahi gukung leh lopa bawhkhiat ding thupi hi. Bot lo-in khoi khang lengh thumaan leh kha nuntakna liahcip ding hi.7

Huan kho keileng, manneilo lopate khangkhia dinga, thahding haksa ding hi. Khaici manpha akhan theih nadingin leitang hah in lopa zawh kul hi. Kunghoih akhan nadingin, khaici phatakin vawh kul hi. Tua hileh anlak ding lametna kinei theiding hi. Tua lo-in ling leh sanah kila ding hi. Satanin ama khaici vawhdingin ngak gige hi. Phal hileng ama’ zia leh tong bang an hongla sak nuam hi.8

Tate vil tawntung ding kisam hi. Tua hikei leh Satanin alungsim uhleh a utna zangin zeksawm hi. Amaute ngaihmuan nadingin nu leh pa in vilding hi. Itna leh Pasian kihtakna tawh tua lungsim huan bawlin lungsim maan, zongsatna hoih, leh itna leh Pasian kihtakna khaicite tuh ding uh hi.9

Pianpih Lungsim Hoihte Pulaal ding.—Nu leh pa leh siate in Jesu in atawntunga apiaknop pilnate hahkat takin zong ding uh hi. Tate akhantoh laitak hun leh huzaap akipia thei mihing lungsim tawh na akisem ahi hi. Amaute hun tawh kituakin pianpih hoihnate kilamto ding hi. Huan sungah pak leh kungte tawh akipulaak khia ding ahi hi.10

PASIAN’ MAKAIHNA KAMCIAM

Lawm Pasian’ Phawkna Nuam.—A hehpih thei Honpain itna, hehpihna tawh na thungetna aza ding leh na kisapna apiadingin om kinken hi. Nute kisapnate Aman hong theihpih, cihmawh hunin Lawmhoih ahi hi. Pasian akihta, athumaan nute ahuhdingin Pasian’ tawntung khutin panpih hi. Leitungah aom laiin, anu zong zawnkhalna leh patauhna leh kinnate in luai a, tuabanga abuai Christian nute zong hehpih hi. Dawilut tanu anei nupinu’ lunggimna atangzangsak dingin tai tampi khual azinpa Christ in nute thungetna za-in atate thupha apiaksak ding hi.

Khat bek aneih atapa vuidingin han lam amanawh meigongnu’ tapa ahingsak kik Pa-in tuni-a nute’ dahna theihpih hi. Lazarus’ hanah kapin, akivuisa Lazarus, Mary leh Marthate apiakik Pa; Mary Magdalene’ mawhna amaisak Pa; singkhuam tungah akikhai laitakin anu aphawk Pa; akap numeite kiangah pai in Honpa’ thawh- kikna gendinga asawl Pa; numeite lawmhoihpen Pa in numeite buainate ahuh dingin kigingsa in om hi.1

Christian nute’ nasep tawh akizakim nasep omlo hi. Topa’ thuhilhna tawh kituakin nute in tate pantah ding hi. Apuak vangikte zong puaklah dingzahin giksa thei zel uh hi. Cihmawh hunin pilna, hanna, lametna, maitaina leh tha angah nadingin, leh avangikte Ama khe phungah khia in Ama kiang panin tha angah ding in Lawmpa hoih theihna-in anuam mahmah ahi hi. Nute in Jesu kiangah pai thithe thei uh hileh a, muang mahmah uh hileh tawldamin avante uh zangzaw dinga, kha tawldamna ngahding uh hi.2

Vantung Pasianin na Thungetna Za.—Pasian’ huhna lo tawh natate nadeih bangin napantah thei kei ding hi. Mawhna sungah akia Adam pianzia in ukna deih hi. Thumaan adingin lungsim kiginna neih kul hi. Tua hileh kha ah zungkha in tha guan ding hi.3

Tate pattahding Pasian’ deihna nu leh pate in azuih uhciangin atungpanin huhna angah ding uh hi. Amaute in meetna tampi ngah uh hi. Ahilhna panun asinbeh uh hi. Topa’ lampi azuih manun tate-in gualzawhna ngahding uh hi. Pianpih leh suahpih thanemnate ah gualzawhna angahzo dingin tha ngahding uh hi.4

Nu leh pate aw, natate adingin tatsat lo-in asem mah nahi uh hiam? Vantung Pasianin nathungetna, nasepna, leh navilna hong ciapteh sak hi. Na thungetnate uh hong zaksak hi. Lungduaina leh migitna tawh Topa adingin tate pantah un. Pasianin nang tawh kikopin nasepnate gualzawhna hong ngahsak ding hi.5

Gupna thumaante asiangin agendingin, leh tate maiah Christ, mimal’ Honpa-in nalah uhciangun nakiang uhah vantungmite om ding uh hi. Leitungbup ie lametna ahi Bethlehem khuaah asuak Naungek thu nagen uh ciangin tate in uukna lungsim aneidingin Pasianin nu le pate tungah hehpihna apiading hi.6

Ngenun, Nangahding uh.—Hih athupi nasep adingin nu leh pate in Pasian’ huhna ngending uha, ngah ding uh hi. Nu leh pa’ zia leh tong, zongsatna, leh kizeknate in dinmun asanloh hangin, aneu lai un akipia sinnate in alungnophuai zia leh tong khantohna apia zo kei phialzongin lungman nading omlo hi. Pianpih zia leh tong leh si-le-sa panin akingah zongsatnate nangawn Pasianin hong khelsak thei hi. Banghang hiam, cihleh Jesu biakna in sanglap hi. “Piangthak” acihin, kikhelna, Jesu sungah suahthakna ahi hi.7

Laisiangtho’ hong hilhna tawh kituakin tate ihhilh ding hi. Topa sam lecin hong dawng ding hi. Topa in hiah ka om hi, bang hong hih sakding ka hi hiam, hong ci ding hi. Van leh lei kizom ahihmanin mi khempeuhin asepding uh akhin theiding uh ahi hi. Pasianin tate it hi. Ama na asemdingin apantah dingin hong deih hi.8

Khasiangthoin Makaihding.—Nu in Khasiangtho makaihna akisap lam theiding hi. Amah mahin zong Pasian’ deihna tawh kituakin kiapna thuak khading hi. Tuaciangin Christ ie hehpihna tungtawnin pil, migi, leh itna tawh akidim sia hithei ding hi.9

Khasiangtho ukna angah nu leh pate in akipia hehpihna leh thagum tawh innkuan sia ahidingin Christ in vaihawm khin hi. Inn a pilna leh ki-ukna in huzaapna apiadingin zepna leh suihna ngahding hi.10

Pasian’ Vangin Mihing Hanciamna tawh Kikop ding.— Mihing’ hanciamna omlo in Pasian hanciamna in amawkna ahi hi. Pasian aum amuang nu leh pate tungah Pasianin tate pattahna naksep mahmah ding hi. Tate’ pilna piak nadingin thungen leh kintakin asem nu leh pate tungah Pasian in koppih ding hi. Tate’ gupna angah nading leh amau’ gupna ngah nadingin apanpih ding hi. Amaute’ sungah a ut ding leh Ama’ deihna bang asem zo dingin Pasianin na asem ding hi.11

Vantunggam lut nading akicing zia leh tong neih nadingin mihing hanciamna bek tawh pianglo ding hi. Pasian’ huhna bek tawh anasia zawhna kinei zo bek hi.12

Pasian’ thahatna tawh nu leh pa’ nasepte napua ding uh hi. Tuaciangin akuhkal khensatna tawh Pasian’ deih bangin tate pilna napiading uh hi. Tua hileh, Pasianin asangna panin hunpia in hong ensuk ding hi. Nahih theihbang ahih nahihlam Amahin thei hi. Amahin natha hong guanbeh ding hi. Nu leh pa in asep zawhlohte zong Amah mahin hong sepsak ding hi. Pilna, lungduaina, leh ahoih makaihna tawh Pasian akihta nu ie hanciamna tawh kituakin hong sem ding hi. Nu leh pate aw, Amahin note inn sunga asit nasepte asemdingin note ahongsawl ahikei hi. Leitung’ siatna panin tate hotkhiat sawm nahih uhleh thadahin aihmu nasemte nahih ding uh hong deih saklo hi.13

Ze-etna Naphut uhciangin Jesu Luai un.—Nu leh pate aw, na lampi uhah atang Pasian’ khuavakte kaikhawm un. Christ in khuavak ahihbangin note zong khuavakah lampai un. Tate hotkhiat ding nasep nakipat ciangin leh asiangtho lampi atawnsuak dingin nakep uhciangin, ahehhuai ze-etna hong paiding hi. Ahihhangin khahsuah kei un. Jesu luai un. “Ka tha hong luai hen. Tua hileh amah tawh Keimahin kilemna kabawl dinga amah inzong Kei tawh kilemna abawl ding hi.” Haksatna aom ding hi. Dongtuahna zong na phuding uh hi. Jesu’ mit suan gige un. Kisap hunin ‘Topa bang hihding ka hiam? ci un.’14

Galsimna haksa tektek leh nu leh pate in Pasian’ huhna kisam semsem dinga, gualzawhna zong kician zawkan ding hi.15

Tuaciangin Upna tawh Semun.—Lungduai leh it takin, Christ ie hehpihna akemcing nu leh pate in Pasian piak nasepte semding uh hi. Nasepnaah athumaan dingin Pasianin lamen hi. Tate tungah Pasianin hehpihna apiak nadingin thu ngen tawntung un. Cimtak, lungtom, in lungkia ngei kei uh hen. Pasian’ tung leh tate tungah kingam un. Nu leh pate in lungduai takin leh itna tawh tate huhin asangpen sianthona, mipitanna abandingin hanciam uh hileh gualzawhna angah ding uh hi.16

Khen Giatna Zo Ta Hang Ei. Zom Lai Ni Maw Lawm!