Zo Phualva Thupuak Vol 07, Issue 02

Cidam Khan Sau Na’ng: Mehteh Mehgah Nekna

 Nuntakna ong kipat cil akipan in mihingte lunggulh in moi in khan sau ding cih ahi hi. Tua bang in ih om theih nading in Pasian in 2 Khang Tangthu 7:17 ah ong gen in ah: “Ka mina kisam kamite, amau mahmah kiniamkhiat in, thungen in ka mai ong zong in a khialhna uh pan a kileh kik uh leh; vantung panin ka za ding a, a mawhnate uh maisak in, a leitang uh ka dam sak ding hi” hong ci hi. Paikhiatna 15:26 ah zong “Ka thugente limtakin na ngaih uh leh Egypt a tung natnate kong tungsak kei ding hi” na ci lai hi. Topa’ thugente tawm en suk ni.

Pian 1:29 ah “Leitung buppi a po khaici a neilopa namkim le a gah sunga khaici a nei singkung namkim khempeuh kong pia hi. Tuate in note an ding ahi hi” na ci hi. “Khaici a nei lopa” cih leh “gah sunga khaici” a cih ciangin singgah gennuam ahi hi. Tuiciin in a suksiat ma leitung dinmun a tutkikna inkhasim  gah nam khat ta agah nuntakna singkung(Mang 22:2) huan laizang ah po a, a tehte in minamte damna hi na ci hi.

Mihingte in amau gim thuakna pen amau le amau kikepkhialh man ahih lam ki theih mawh bawl zel uh hi. Amau te in annekna ah nuamsa in, a gongthahna uh pasian in nei kha zel uh hi. Mrs White genna ah mite in annek tuidawn, heksuk hektohna ah amau le amau kikem lo in om mawkmawk uh a, tua te in natna piangsak hi (MH p. 227) ah na gelh hi. A gelhbeh thu in, “Gongthahna kikephuaina in tul tampite siatna hong lak hi. Amaute in hih muntak ah hong kidek zawh uh leh adang Satan' ze-etna khempeuh ah zong zawh zawh nang thahatna nei ding uh hi. Ahi zong gongthahna silate in ahih leh, Christian zia-le-tong cingtaak nei zolo ding uh hi. Kum tul guk sung bang kizom a mite thupalsatna hangin dam lohna, pumpi gimthuakna, le sihna cihte hong piang hi. Hun bei kuan ah ih om mah bangin, gongthahna tawh kisai Satan' ze-etnate hong thahat semsem dinga, tuate ih zawh zawh nangin haksa semsem ding hi” ci hi. Testimonies for the Church Vol3, p. 492

Mihingte in Eden huan a a nek uh singgah leh mehteh mehgah hong nek uh ciangin bang hamphatna te ngah ding cih Scientists te in na gen beh lai hi. Reasearch tampi mah gam tuamtuam, sang tuamtuam te ah kibawl khin zo hi.

The New England Journal of Medicine in singgah, mehteh leh an-picing a tamneek a, gan  tawh kibawl na a tawm neek te adingin sihui khauh(harden) natna dal in damna ngah zo hi ci hi.  1999 kumin  The American Journal of Clinical Nutrition te in sa-nelo mimal 34,192 te California ah etcianna nei uh a, a vek un Seventh-day Adventists hi uh a, midang sa a ne te tawh tehna in amau cidam zaw, sikhang nei tawm zaw, zunkhum nei tawm zaw, thagui-natna nei tawm zaw ci hi. Tua muhkhiatna thu te leh phattuamna a om thu 10 ih en suk dikng hi.

1. Hunsawt kivei natna nam kiam sak

An lakah sa meh a meh te sangin sa-nelo te in hunsawt kivei natna namte anei mi tawmzaw hi. Sane 97 leh sa-nelo 97 te enkak uh a, sa-nelo te in hunsawt kivei natna, si-khang leh thau luatna cihte kiam ci hi.

2. Zun/Sikhum do hatzaw

Mi 40.000 valte ahi sa tawh kisai a pelhmi, sa-nelo leh sane te tungah kum tampi sung entcianna kinei hi. Muhkhiatna ah zunkhum pen sa tawh kisai a pelhmi sangin sane te sungah a zah 4 in piang baihzaw a, sa-nelo napi nawi pana kibawl te a ane te sungah a zah nih in piang baihzaw ci hi. Hih etcianna a huampi in sa nelo pong pong te sungah zunkhum pen do hatzaw cih kimu hi.

3. Pumpi gihna ong dalpih

Thukanciante in sa tawh kisai a pelhmi leh sa-nelo te leh pumpi gihna tawh kisai gencian ding mu lian nailo uh hi. Himah leh, sa ne lo himhim te ih et ciangin a tangpi in BMI(pumpi gihna le ih sanna tehkak) ah hoihzaw hamtang hi.

4. Lungtang natna kiamsak

Mehteh mehgah a dim ante pen anti-oxidant(sazang sia sak thei dalna)tam mahmah a, lungtang natna kiamsak hi. Leitung bupah numei pasal anteh hing mehteh mehgah nete lakah lungtang natna hanga sihna pen tawm mahmah hi cih kimu hi. England a kikankhiatna numei pasal gawm 40,000 lak pan sa-nelo te in lungtang natna pen 32% in tawm ngah zaw ci uh hi. Tua bek hilo, sikhang zong tawmzaw  hi.

5. Cancer zong tawm zaw

Antioxidants in lungtang natna dal ih gen banah cancer zong dal hi. Adventist Health Study 2 in cancer vei 69,000 val te etcianna nei hi. Nisim in sa a ne den te sangin nawi, ngasa leh mehteh mehgah a ne te sungah cancer tawmzaw tham ci hi. Sa kihel lo ante in numeite ngah theih cancerte dal hi.

6. Thyroid hatsak

An dangte tawh tehkak leng mehteh mehgah te in thyroid(khan tang) ading hormone kisam te thapia mahmah hi. Sa ne lo te sungah hih thyroid natna pen tawm mahmah ci hi.

7. Mit natna kiamsak

Mehteh mehgahte in na kawng ading hoih hi cih za ngei niteh, tua bek hilo mit ading zong hoih hi. Mehteh mehgah a ne te in mit thazawm in khuamuh haksa cih tawm mahmah hi.

8. Guh le tang natnate bawlna ding

Zato ah Guh le tang natna(ေလးဖက္နာ) ading zatui pen kinawlkhin theilo hi. 2010 a muhkhiatna ah guh le tang natna pen mehteh mehgah te hang in phatuam mahmah ci hi. Hih muhkhiatna in tuma lama akigen guh le tang natna adal ahi mehteh mehgah nek ding, mangbuh pana kibawl ante nek ding hi cih kipsak behlai hi.

 9. Kal cidamsak

Ih annek kileekkim leh hun sawt pi akivei kal(kidney) natna zong tampi phatuam zo hi. Mehteh mehgah akihel ante ah phosphate ih cih a alnam leh ih zel(laa) pana pusuak glucose(cikhum) te nasep huh a, ih pumpi sunga kisam acid(a thuk) te encik hi. Tua ahih manin hun sawtpi a dam theilo kal natna pen bawltawm zatui ih zat sangin sa dat lah akihel mehteh mehgah ne den zo leng pha mahmah hi.

10. Khan Sausak hiam?

Ei teng laka leitung nusia ki-om nailo a, ih tuah ngei ding thu hi ahi hi.  Cidamna lam kanciannate ah mehteh mehgah nekna in khan sausak cih pen laktel hi. Sa kihello mehteh mehgah a limneekte in ih pumpi cidamna ding a nasem van tuamtuamte tha hatzaw tham a, khan sauzaw cih kilang hi.

Ih zaksa thu namsawmte sin in zui zoleng eima pumpi ading ahi hi. Kha lam cidam I hih theihna dingin taksa ih cidam masak kisam hi.   

Ref: Adventist Affirm Vol 15, No 2; http://www.globalhealingcenter.com/

Zo Phualva Thupuak - Vol 07, Issue 02 on Scribd