Zo Phualva Thupuak - Vol 07, Issue 03

        EUROCLYDON HUIHPI ( KHA SIANGTHO KI MAKAIH SAKNA)

Thuciam Thak sung a Sawltakte 27 leh 28 pen, Paul in Pasian thu a tangko na hangin hong kiman a, tua thubuai teng siang sak ding in Rome khuapi a om Ceaser kumpipa va mu ding in a zinkhiatna thu a hi hi. Italy tembaw tawh hong kithawi khia uh a, tua tembaw tung ah Paul leh thongkia midangte leh galkap pawlkhat leh a makai pa, tembaw nasemte leh a makaipa te in a zui uh hi. A paikhiat zawh uh a sawt lo in huih in a tembaw uh mut a hih man in a sawm lohna lamah a tembaw uh ki hei hei hi. Sawtveipi sung a tembaw a kihei khit ciangin Krete a kici khuamual khat hong tung uh hi. 

Credit: https://thesilentpreacher.com

Paul in Pasian hopihna hong ngah in, galkap mangpa kiang ah, “ Kret khuamual ah khawl ding hi hangh, eite mainawt in ih pai suak leh siatna lianpi kituak ding hi. Ih sum neih teng leh tembawte sumh bek tham lo in, eite nuntakna zong ih taan kha ding hi” ci hi. Galkap mangpa in zong Tembaw captain leh tembaw neipa tua thute hong gen hi. A hih hangin, amaute in, “ Hua pa in bang thei ding a hi hiam? Kote kum tampi hih nasep ka sem khin uh a, tembaw tung a suak, tui sung a a nungta bang ka hi uh hi.” ci in Paul in a ngaihsut piakte a zui nuam kei uh hi. 

Ute naute aw, eite zong hih ih tuanna leitung tembaw pi tawh ih khualzinna ah Pasian Khasiangtho makaihna sang in, eite tuahkhak leh sinkhak thute, ih theihnate leh ih siamnate zang in, ih nisim nuntakna ah ih deihtelna tawh ih nungta thei hi. Ih tuahkhak thute thupi mahmah a, ih sinkhiatna te zong thupi sem hi. A hih hangin Pasian’ tate in tua ih tuahkhak thute leh ih sinkhiat thute thupi sakin eite in deihtelna ih neih sim in, na semkhial thei zaw hi hangh. Lot in zong leitung mit tawh et a a hoih leh etlawm a muhna tungtawn in deihtelna bawl in, gam hoih asak zaanggam na tel a, a hih hangin a deihtelna in a innkuanpihte khempeuh tawh siatna na tuak uh hi. Abraham in ahih leh Pasian makaihna bang bangin pai in, a mit tawh a muhtheih tung kinga lo in, a upna in kalsuan a hih man in Topa in nakpi takin thupha na pia hi. 

Pasian hong makaihna leh hong ompihna te ankhing bang in a tawngtung in ki-heng theilo hi. Israelte zong Jericho kulhpi a lak sawm lai un Pasian in khatvei beek a zat ngei nai loh leh Israeltate in zong khatvei beek zong a theih ngeiloh uh nasep zia (Method) zangh in Topa in Jericho pen gualzawh pih hi. A hih hangin tua Jericho a lak pihna ah azat nasepzia (Method) pen Pasian in mundang khat beek ah na zangh kik nawn lo hi. Amaute theihna leh a tuahthu te tung kinga in, Pasian tung ah kinga lo ding cih Topa in thei a hih manin Pasian in tua nasepziate (Method) na zang kik sak lo hi. Israelte San tuipi a kan ding ciangin Moses in a khut a tunglam lamto a, baih tak in tua San tuipi na kan thei uh hi. 

A hih hangin Jordan lui a kan ding ciangin San tuipi a kan lai ua a zat ngei nate zat tak nawnlo hi. Sepzia thak khat a hi, siampi te in thukham singkuang pua in Jodan luitui a sik mateng in tua tui pen na kang lo hi. Israeltate Manna a lui a khing pen an in heng thei nawnlo in, nisim in a thak Pasian in apiak bangin Pasian tawh kipawlna zong a thak ih kisam den hi. Pasian’ tate in nisim in Pasian ih dong ding a, tua pan in Pasian in eite hong theihsakna bangbang in ih nuntak theih na ding in, ih ngeina zialui ih ankhingte hong heng den sak nawn lo hi. Tua in Pasian in nisim in eite Ama’ tung ah ih kingak ding a deihna bulpi a hi hi.

Paul in, Pasian’ theihsakna pan a ngah thute pen mite in na sang nuamlo uh hi. Sawltakte 27:12 ih sim ciangin, “Tua tembaw khawlna phalbi sung a om nadingin kituak lo a hih manin tua lai panin paikhia a, Phoenix tungin tua lai ah phalbi sung omding lamen in atamzaw thukimna tawh ka paisuak uh hi.” Hih mun ah Pasian Kha Siangtho makaihna leh theihsakna tawh kalsuan sangin mi a tamzaw te thu pen a maan leh a dikzaw in ngaihsun uh a hih man in paikhia uh hi. Pawlpi in zong ih thu kikupna ah Pasian Kha Siangtho theihsakna ngah thei dingin Pasian tawh kipawl leh holim ding kisam mahmah hi. Ih innkuan leh mimal nuntakna ah zong mi a tam zaw te in a gen man in, a dik leh maan zaw sa in thu khensat suk ziau pen lauhuai mah mah hi. 

Eite mahmah in Pasian hopih in, kiholim in, a hong makaih theih ding a ih om ding kisam pha mahmah hi. Paul’ ngaihsutpiakna te a manloh man un haksatna lianpi na tuak uh a, Kret tuikhulh a paikhiat san lai tak un, saklam pan in Eurakuilo huihpi hong nung a, tua in tembaw pen a ut na lam lam ah hual kawikawi mawk hi. Tembaw hong tum ding hita, tembaw sunga vante zong tembaw a zang zaw deuh ding lametna tawh tuipi sung ah paikhia uh hi. Ni tampi sung aksi nangawn muthei loin huihpi in nuaigawp a, a nuntak khuasuah ding uh zong lamen ngamlo in mang bang mahmah uh hi.

Pasian hong makaih banglo in ih kalsuan ciangin ih nuntakna ah a kisam lo haksatna leh mangbatna te hong tung a hi hi. Tua ciangin Paul zong hong dingkhia in, “Pute aw, Kret khuamual ah kong thugente na ngai le uh cin hih bang buaina kituak lo ding hi. A hihhangin tu-in zong lungmuang tak in om un, eite lak ah kuamah ih si kei ding hi, tembaw leh vante a hih leh kisia mang ding hi. Pasian a ka hi a, A na kasep Pasian in a vantungmi khat ka kiang ah hong ding in, ka kiang ah, ‘Paul aw lungkham kei in, Caesar kumpi pa mai ah na ding ding hi. Ka thu ngai in, nang tawh hong omkhwmte khempeuh na khut sung ah kong pia khin hi, khat zong si lo ding uh hi’ hong ci hi , tua ahih man in lungmuang takin om un, Pasian ka um a, hong hilh thu bangbang in ka nungta ding hi” a ci hi. 

Tua a kipan in tembaw captain leh tembaw neite in Paul, Pasian mi’ thu pen hong mang ta uh hi. Ni 14 sung bang an ne nawnlo in nuntak ding zong kilamen nawn lo uh hi. Tua ciangin Paul in, an ne unla, lungnuam tak in om un, cidam in eite tuipi gei ih tung ding hi “ a ci hi. Tua bangin an hong ne in kilungnuam sak uh a, khuamual a tun madeuh uh a tembawpi kisia hi mah leh, a si amang omlo in mi 276 te pen Pasian’ mi Paul hangin khuamual cidam takin na tung uh hi. Eite zong ih khualzinna tuipi leh khemna tuihual lakah Pasian’ mi Pasian tawh a kiho thei mi kisam mahmah hi hang. Ih pilna leh siamna te, ih tuahsa thute tung kinga mawk mawk lo in, Pasian tawh kipawlna pan hong suak Ama’ thu, thutheihna a maan ih kisam mahmah hi. 

Hih thu ah ih phawkden ding thu in, Pasian theihsakna leh makaihna nuai ah haksatna in hong taisan tuan lo hi. A hih hangin Pasian makaihna nuai ah ih thuak haksatna pen in Pasian thupi sak in Pasian min kipahtawi sak zaw hi. Paul leh Luka te zong Bethunia gam ah Pasian nasem dingin a lut sawm lai un, Kha Siangtho in na phal lo hi. Macedonia gam lam ah pai zaw dingin Pasian in theihsakna( thu hilhna) na pia hi. Tua Pasian theihsakna mah zui in Macedonia gam lam ah pai uh a, Macedonia gam Ephesus khua ah matna tuak in thong sung ah na khum uh hi. Tua bang in Pasian thu mangin a pai uh pen haksatna lianpi mah tuak ve ve uh hi. A hih hangin tua haksatna in Pasian min kiphatsak in, Pasian pen na thupi sak hi. Thong cingpa leh a innkuanpihte in gupkhiatna ngah lawh uh hi.

Tua a hih manin Pasian makaihna bang in a kalsuante zong haksatna ih tuak thei veve hi. A hih hangin tua haksatnate in Pasian min phatsak in, a min thangsak zaw ding hi. Ei Pasian tate nuntakna ah haksatna ih tuah ciangin ih mawhna hang hi khin lo a, Pasian hong danpiakna hang zong hi kim lo hi.

Ute naute aw, eite pilna leh siamna, hun beisa a ih tuakkhak thute pen thupi mah mah hi. Pasian thupha zong a hi hi. A hih hangin Pasian hong makaihna ah kinga lo in, tua bang eite pilna siamna tung ah ih kingak luat khak ding lauhuai mahmah hi. Ei mihingte deihna leh nopsakna teleh muhnop saknate in eite hong makaih zaw hiam? Tua bang ih hih leh a tawpna ah eite ih mangthang ding hi. Pasian makaih theih in eite ih om theih leh ih pilna leh siamnate pen Pasian minthanna ding in eite in ih zangh thei ding hi. A hih hangin Pasian makaihna ih ngah kei leh hih pilna leh siamnate in eite kiphatsakna leh angsungkhualna ah hong tun pihding a, Pasian a langdote hong suak sak ding hi. 

Tua a hih manin, na nuntakna ah bang in nang hong makaih hiam? Kua pen nang hong makai ding in zang na hi hiam? Na pilna siamna leh sum leh pai , hauhna leh taksa deihnate in nang hong makaih den a hi hiam? A hih kei leh Pasian Kha Siangtho in hong makaih zaw? Eurakuilo huihpi bangin khemna leh haksatna huihpi te in hong nuai ciangin Pasian hong makaih theih ding in om in, Pasian aw ngak in ngai gige zaw in.. Topan thupha hong pia ta hen..Amen.

?  PL Thlenga Chhakchhuak