“Tatiana Tang Thu” (Agen: Tatiana)

Nipi 2na (1st Qtr, 2017)

January 14, 2017                                                                `                                                 Ireland

“Tatiana Tang Thu” (Agen: Tatiana)

            “Tatiana pen Moldova gam ah piangin kum 19 a phaak ciangin Ireland gam ah hong lal a, nau a paai zawh kha giat pha ta hi. Ama’ taang thu ngai dih ni”.

            Nisuahna lam Orthodox innkuan sungpan ka khangkhia hi. Ka nu leh ka pa’n biakinn ah hong kikhoppih in Pasian’ thu hong hilh uh hi. Pasian in thu ka nget ciangin hong dawng ding ahihna ka thei hi.

            Naupang khat ka hihna tawh pawlkhat in Sabbath tawh kisai laibute hong pia uh hi. Ahi zongin Orthodox Upna tawh akituak lo peuhmah Pasian kiangpan hilo hi cih upna nei ka hih manun tua laibute ka haltum uh hi.

            Ahi zongin Pasian in hong zol ahihlam ka thei a, Lai Siangtho ka sim nuam hi. Topa tawh kinaaizawk ding ka hanciam kawmkawm in laibu pawlkhat ka muh ciangin a siangtho laibu ahi dingin ngaihsun kahih manin ka keem hi.

            Kum 19 ka phaak ciangin pasal ka nei hi. Ireland gam ah nuntak khuasakna nuamzaw ding hi cih upna tawh tua gam ah pai ding ka geel uh hi. Kum 19 bek phaa pan kahih manin khualzinna a haksat zia ding ka telsiam kei hi. Czech (Kizek) gam ah ka zin masak khit uh ciangin France (Piantit) gam ah ka zin leuleu uh hi. Piantit gam Paris khuapi sungah kha guk sung ka taam uh a, tua hun sung in ka nau hong suak hi. Lamdung ah teeng in neek ding an ka ngentawm uh a, zan ciang in mi inn beel in giak ka hih man un nuntak khuasakna bel haksa sim tham hi.

            Tua khit ciangin zaan khat, England gam a pai meileeng tungah ka tuang sim uh a, ahizongin England gam tawh akinai penna Piantit gam ah hong kituaksak ngiau mawk hi. Giahphual khatah tua zan ka taam uh hi. Tua lai-ah buk theih nadingaa a gol ip lian khat ka mu uh hi. Taanluan thau a pua meileng khat tungah ka tuangsim leuleu uh hi. Ka ippi sungah nai (11) sung ka bu uh hi. Ka khua ul kai ziahziah si, ka naubu sungah aa ka tangeek lah hong liing kelkel lailai, ka tangeek a sih ding patau mahmah sawnsawn!

           England gam tung dekdek ta’ cih ka theih uh ciangin sa lah sasi, hong mat ka ippi sungpan un boksa in ka paikhia uh hi. Ka passport uh leh sum tawmcik khat lo buang a dang bangmah ka nei kei uh hi. Doner khuapi ka tun uh ciangin Red Cross ah hong kipii a, ka puante uh zong a thak tawh hong laih sak uh hi.

            A sawt loin manlong mawtaw letmat lei in Scotland ka zin khit uh ciangin Ireland gam sak lamah ka zin leuleu uh hi. Gamgi tawh akinai khuapineu khat ka tun uh ciangin zanthapaai lo lai leh meh ciinna huante ka kantan uh a, ni hongsuah ciangin Ireland gamsung ka tung taktakta uh hi.

            Tua lai panin Ireland ii khuapi (Myodaw) a hi, Dubilin ah meileng tawh ka pai uh a, tun phet in Gambeel suahna lai ka ngen pah uh hi. Limerick khuapi ah hong kipaisak a, ka tapa uh Christian (Khalitian) pen tua kal sungin hong suak hi.

            Limerick (Laamlik) khuapi ah Ireland gammi suahna laipi ka ngak kawmun kum khat leh a lang ka taam uh hi. Tua hun sungin Dublin (Dubilin) khuapi ah ka lal ding uh hong thei lawm pawlkhat ka nei uh hi. Ka zin khiat ma-un Dublin khuapi aa a om khin a lawmte uh min leh phong numbatte hong pia uh hi.

            Ireland gam passport ka ngah khit uh ciangin tomcik sung mahmah Moldova ah ka ciah kik pak uh hi. A khatvei na vanleng ka tuanna ahih manin lam tawntung ka kap hi. “Topa aw Lai Siangtho bu khat ka neih ciangin asungaa om thu bangin gamta ning. Hehpihna tawh hong keem tapeuh in,” ci in thu ka ngen hi.

            Moldova gam ka tun kik ciangin Lai Siangtho bukhat ka lei pah hi. Ka biakna laibute leh Moldovan ante zong ka keng hi.

            Dubilin khuapi ka tun kik ciangin ka lawmte’ hong piak phong nambatte tawh an hong ne dingin ka sam uh hi. Tua bangin ka hopih uh ciangin ka omna uh a mun akibang ahihlam leh akizom innte ah a om ka hihlam uh ka theita uh hi.

            Ka leenglate uh hong pai ma a zaan nitaak in ka Laisiangtho bu tawi in tutsa in, “Topa Pasian aw, hih Lai Siangtho bu a khatveina ka simna ahi hi. Hehpihna tawh Na thumaan hong lak in la, ka sep ding akisam thu hong lak in,” ci in thu ka ngen hi.

            A zing ciangin ka leenglate uh hong tun ciangin sabuai tuamna tawh ka khuh uh Sabuai tungah zusan leh Moldovan pan ka lei uh samehte ka lui uh hi. An ne dingin ankuang hong uum uh ciangin, “Lungdam mahmah hi. Ahi zongin ko zu dawn kei ung,” hong ci uh hi. Ka kilat a, a tumdang pawlpi pan hi ngeelngeel ding hi cih ka ngaihsun hi. Ahi zongin, “Ka Thu (Kammal) bangin na khempeuh hih ning ci-in Pasian’ tungah kakiciamna ka phawk kik hi.

            “Banghangin zu dawn lo nahi uh hiam?” ci a ka dot leh “Lai Siangtho in cidamna tawh kituak lo ci ahih man hi” ci-in hong dawng uh hi.

            “Lai Siangtho amun nong lak thei ding uh hiam? ci-in ka dot leh, “Hong lak thei mah e” ci-in zu tawh kisai Lai Siangtho a mun hong lak uh hi.

            “OK (Hi mah ei leh)” ka cih kawm in niinbung ah zuthawlte ka paai hi. Tua khit ciangin, “An leh samehte beek ne vo leh” ka cih leh, “Lungdam mahmah hi. Ahi zongin ko voksa ne kei ung,” hong ci leuleu uh hi.

            “Banghangin maw?” ci a ka dot leh ka Lai Siangtho sung pan a mun hong lak uh hi.

            “Bang pawlpi pan nai vua?” ci-in ka dong peetmah ta hi. “Seventh-day Adventist pawlpi pan hi ung” hong ci uh a, tua pawlpi khatvei zong ka za ngei kei hi.

            “Saturday(Sanini) sim in biakinn ah kikhawm ung” hong ci sawnsawn uh hi. “Banghang in maw?” ci-in ka dot leuleu leh ka Lai Siangtho bu sungpan mah in amau hong lak leuleu uh hi.

            “Na biakinn vuah, kong kikhawm thei ding hiam?” ci-in ka dong hi. Lai Siangtho hong lah bangbang zui dingin Topa Pasian tawh ka kiciam khin hi.

            Sabbath ni hong tun ciangin Adventist biakinn ah ka kikhawm a, tua ni aa kipan Orthodox pawlpi ah ka kikhawm nawn kei hi. Ka lunggulh thumaan mu ta ing. Adventist pawlpi ah lam hong lak a, hong khaa Topa Pasian tungah ka lungdam mahmah hi.

            Tuni in, Tatiana leh a tate pen Dubilin khuapi aa om a ki saap hall (inn khaan lianpi) sungah a kikhawm Adventist pawlpimite hita uh hi.

            Amaute’n a sawt lo a, amau kikhop theih nadingin biakinn thak khat lunggulh mahmah uh hi. Na Sabbath (13) na sumpi uh tawh nong huh manun lungdam mahmah ung!