Sinna 2: Tua Khasiangtho: 

Muhlohna Pan Mapang

  

Nipini (Sabbath) Nitak lam Jan. 7
Sim Dingte:

Ezek. 37:5, 9; Pian. 1:2; Job 26:13; Paikhiat 31:1-5; John 16:13, 14; Gal. 5:16-23.
Kamngah: "Amah in Keima minthanna hong langhsak ding hi. Banghang hiam na ci uh leh, Keima a la in note kiangah hong gen ding hi." (John 16:14, NKJV).

Laisiangtho sung ah Khasiangtho pen Pa leh Tapa zah in aki ngaihven khalo bangh hi. Ahi zongin Laisiangtho vai thupi- diakte ah om den ahih lam hong lak hi. Akipat cil hun, leitung piansak hun in, mapang a, anung lam pan hidiak hi. Kamsangte humuapna vai ah mapang in, Pasian kammal gelhkhiatna ah apangpi ahihi. Mary in Khazih apaai vai ah amah in
asemkhia pipen ahihi.
Laisiangtho‟ ciaptehna ah amah kibulphuh lo ahih manin ama thu kitawm theih mahmah hi. Amah pen muh khakna ah omlo a anasep lam pan lah to thum Pasian lak a Tapa Zeisu' nasep picing sak in Pasian‟ vangpiakna tawh midang ading a mapang ahihi. Hih thute pen mawhnei mihingte‟n tawntung sihna pan hotkhiat angah nading vai ahihi.
Laisiangtho‟ teci panna ah Khasiangtho in nunnem tak leh ut takpina tawh muhlohna pan a ahuh apanpih, tha apia, amapanpih den ahihi.
Piansakna vai ah ahi a, hotkhiatna vai ah ahi zongin, sepna-bawlna masuan vaite ah athupi mahmah Ama mapannate kawmkal ah ki ultung sak hetlo hi.
*Jan. 14, Nipini adingin tu kal sinnate hong kiging in maw.

Nimasani (Sunday) Jan. 8
Khasiangtho’ Kidaithahzia

John 3:2-8 leh Ezek. 37:5, 9 sim in. Bang hang in alamdang Khasiangtho’ nasepzia pen huih tawh genteh huai mahmah khat suak hiam?
___________________________________________________________________________________________________________________________
Khasiangtho‟ gamtatzia huih tawh agenteh ciangin Zeisu in Khasiangtho kidaithahzia hong gen ahihi. Huih nunzia pen lamdang suah nakhat nei hi. Huih koi pan hong pai a, koi ciang pai ding, cih kigen lian thei lo hi. Koi pan cih thei khol lo a, hong nung vat cih athei kha ngeilo om kei ni maw?
Ahi zongin huih nunzia pen ih theihna ciang khat om sam hi. Tua bang dan mah in Khasiangtho zong a utna ah kilangh pak zel thei hi. Kua kepcing theih hilo hi. Koi ah bang ci in bang hih cih ki thei thei hi. Huih bang mah in Khasiangtho pen muh theih loh hi na pi nasia mahmah thei hi. Huih aom lam bel kithei in ih muh loh hang in atatzia kimu thei hi. Huih nung hiauhiau pan asemkeek mang thei zahdong in nasia mahmah thei hi. Khasiangtho pen hih bang a ih genteh ciang in ama gamtatzia pen asisate nuntak kik sak vai tawh zong kizomh hi. Hih vai pen asang pen thu ah Pasian bek i septheih vai tawh hong kizomh hi.
Koici pian theih cih pen alamdang thu ahihi. Pasian leh Khasiangtho tungtawn a sepziate in leitung vai leh kha lam vaite ah ei ngaihsut theihna kheng hi.
Khasiangtho nasep kithei theilo cihna hi lo hi. Ahi zong in, tua vaite ah kidawm tak a ngaihsutna leh genna hawmnate in kiniamkhiatna tawh ahih ding kilawm hi. Kiniamkhiatna in Pasian thupitna theisiam a, piansakte' ciangtanh neihna phawk in Pasian hong hehpihna lo tawh a hihtheih-lohna thu tel hi.
E.G. White in kilawm kituak taka agenna ah: “Laisiangtho sung a nalamdangte pen nialhuaina asuah gen loh Pasian humuapna ahih lam alaktel diakte hi zawlai hi. Pasian vai kihel lo a, ei‟ teltheih ciang bek hi mawk leh Laisiangtho pen akhial theilo Pasian thu cih theih hong hithei nawnlo ding hi” E.G. White, Pilsinna, Ed. p. 170.
Ei nuntaakna a sukha thei muh theihloh vangliatnate bangte khawng hiam? Tua te in hih leitung ah muh theih loh vangliatna aom lam bang hong hilh hiam?
_____________________________________________________________

Ninihni (Monday) Jan. 9
Piansak Lai in Khasiangtho

Hih simhlei a Pasian nasep thupi masa pen in piansakna ahihi. Laisiangtho in kician takin Pasian leh (Pian. 1:1) Zeisu Khazih (Col. 1:16, 17) pen van leh lei leh aom khempeuh, apiangsak, abawlPa hi, na ci hi (John 1:1- 3). Tua ban ah Laisiangtho in piansakna vai ah Khasiangtho zong akihel lam hong pulaak hi.
Pian. 1:2; Job. 26:13; 33:4; Late 33:6; 104:29, 30 sim in. Piansak vai ah Khasiangtho’ pan’mun bangh hiam? Nuntakna, piansakna vaite tawh Khasiangtho koici kizop hiam?
_______________________________________________________________________________________________________________________________________________________________________________________________________________________________________________________
Piansakna thu Pian. 11:2 ah piansak hun in Pasian Khasiangtho akihel lam na pulaak hi. Job 26:13, 33:4, late 104:29, 30 leh Late 33:6 te in alamdang piansakna thu ah Khasiangtho‟ kihel lam hong genbeh hi. Laisiangtho in leitung piansakna vai ah Pa Pasian leh Tapa Pasian Zeisu Khazih hong limhgen a, (Isa. 64:8; Col. 1: 16, 17 en in), Khasiangtho zong akilanghtangglo zawdeuh in na kihel hi.
Piansakna thu ah a mapangpi in hong kilangh lo hi. Bang mah dang om nailo leitung ah alen‟ kawikawina tawh ana kihel lam hong kigen hi. Hebrew laimal in “merahepeth” hi a, “leng, kikhin kawikawi” ci in Pian. 1:2 ah Thuhilhk. 32:11 a tawh akibang kammal na zangh in, muvanlai in ano leh abu tung ah leng kawikawi cihna kammal mah na zangh hi. Khasiangtho in aki piangsak thak nuntakna, muvanlai bang mah in kiimvel kawikawi na ci
hi. Late 104:30 genna ah piansakna pen Khasiangtho tungtawn bek a piang thei hi a, hih hun sung in amah apangpi khat ahihna hong ngaihsun thei sak hi.
Khasiangtho in hih leitung piansakna vai ah mapang bek hi lo in eite hong kipianthak sak kikna vai ah zong apangpi mah hi a, eite lungtang thak leh ngaihsutna thak hong guan hi. Hih nasep tegel kikoici zop hiam? 

Nithumni (Tuesday) Jan. 10
Khasiangtho leh Biakbuuk

"Amaute lak a ka om theih nangin munsiangtho (biakbuuk) hong bawl sak uh hen" (Pai. 25:8 KJV).
Piansakna vai khit ciangin, Laisiangtho sung ah hotkhiatna vai Pasian geelna pen athupi pen ahihi. Apuuk leitung adingin hotkhiatna geelna om kei leh piansakna vai ahoih aphatna om thei lo hi. Mawhneite ihi a, Piangsakpa bek hi lo in tanhkhiapa ih kitanggsamh hi. Tua bang tanhkhiapa ahi Zeisu Khazih ineih ih lungdamh mahmah ding ahihi. Amah lo tawh bang mah hong pia thei lo hih leitung ah lamet ding bangmah ih nei kei hi.
Laisiangtho lui sung ah biakbuuk a nasepnate in, mawhnate Pasian in hong maisakna leh tanhkhiapa Zeisu' nasep masuante lim a hong lakkhol ahihi. Hih mun pan in hotkhiatna geelzia tangglai israelte' tung ah hong kilangh ahihi (Heb. 4:2 en in). Biakbuuk nasepnate in Zeisu leh ih mawhnate maisak nang a, Ama hong sepnate hong lah ban ah Moses tung a Pasian' lahna bang a asem abawl thei dingin mite tung ah hihtheih, bawltheihna apia pen Khasiangtho ahih lam zongh hong lak hi.
Pai. 31:1-5 sim in. Biakbuuk lamhna tungtang ah Khasiangtho hong koici kihel hiam? Pasian omna mun ding a abawl alamte tung ah Khasiangtho in panpihna bangci piak hiam?
____________________________________________________________________________________________________________________________
Mihingte leh Pasian kikal kilemkikna bawlna leh a siangtho Pasian in mimawhte tawh akimuhna mun ahi biakbuuk lamhna vai ah Khasiangtho akihel lam Laisiangtho in hong hilh hi. Leitung ah vantung a om, ataktak biakbuuk bang, alam dingin Moses tung a ageelna thu apulaak pen Pasian ahi hi (Pai. 25:9, 40).
Biakbuuk pen Pasian in hotkhiatna vai ageelna hong lahna, hong muh hong theihsakna ahihi. Hih lamh ding a asawl mun siangtho biakbuuk tungtawn in Pasian pen amaute tawh a omkhawm theihna hong piang ding hi. Hoihtak leh etlawm tak a a kilamh theih nang a kisamh sepsiamna, bawlsiamna, apia pen Khasiangtho‟ nasep ahihi. Ama panpihna lo tawh Israelte in etlawm tak leh picing tak in bawl theilo ding uh hi.
Khasiangtho vangliatna in bel hih biakbuuk, munsiangtho lamhna vai ah mihingte panpihna akisamh hi lo hi. Tua bang a asem thei dingin mite siamna aguan ahihi. Pasian kumpi gam keek in Pasian vangliatna akilat nading in midangte in asiamnate uh azangh thei dingin midangte koi mun ah koici huh in, koici panpih thei ding nahi hiam? 

Nilini (Wednesday) Jan. 11
Zeisu Khazih Pahtawina Vai ah Khasiangtho

Laisiangtho lui hun in, Laisiangtho thak hun zah a anasep akilat loh hangin, Khasiangtho pen mapang pha mahmah hi. Aki kamciam Messiah ahi Zeisu hong pai ciangin, Khasiangtho nasep hong nasia sem a, thu um mite tung ah silpiakte pia hi. Laisiangtho in Khasiangtho pen lampi tampi ah, ih khalam nuntakna vaite leh pawlpi vaite tawh kisai maban nei ahihna, hong gen ban ah a masuan thupipen in Zeisu Khazih minthansakna ahihi.
John 16:13, 14 leh John 15:26 sim in. Zeisu in Khasiangtho nasep bang hi ci hiam? Khasiangtho nasep dangdangte hih nasep pipen tawh koici kizop hiam?
____________________________________________________________________________________________________________________________
Khasiangtho in ama thu gen lo in, Zeisu thu gen hi ci in Zeisu in hong gen hi. Ama nasep pen Zeisu hong tatkhiatna nasep tawisan‟na hi pipen hi. Zeisu thu genpi in nei a, amah anung ah kikangkoih hi. “Khasiangtho thupuak pen, kei hong en un, ka thu ngai un, kei kiang hong pai un, kei hong thei un” cihte hilo a; “amah en un, avangliatna thei un, athu ngai un, athu mang un, ama kiang zuan in nungta un, amah thei in ama piakkhongg ahi lungdamna leh lungmuanna hong ciamm un” cih ahihi. Khasiangtho in bawmmta, palai, a sepna tungtawn in eite leh Khazih hong kituahkha sak in aki khawlkhawm suak ding a hong makaih ahihi- J. I Packer, Keep in Step With the Spirit: Finding Fullness in Our Walk with God, revised and enlarged edition (Grand Rapids: Baker Books, 2005), pp. 57, 58.
Hih thu thupi mahmah hi. Topa Zeisu Khazih leh Ama nasepna tawh akituak lo Khasiangtho nasepna akici thute Khasiangtho diktak pan hi thei lo ding hi. Ih kha nuntakna vai ah Khasiangtho athupi‟ mahmah hangin ih ngaihsutna ah leh hotkhiatna pen Zeisu Khazih tungtawn bek ahihna vai ih lah khialh khak loh ding ahihi. Zeisu aki sangkhaina mun peuh ah khasiangtho in na sem hi. Tua hang in eite Chrisitian ih kici a, Khazih nungzuite cihna hi in (Sawl. 11:26 tawh saikaak in), “Pneumians,” Khasiangtho nungzui ih hi kei hi (Graham A. Cole, He Who Gives Life: The Doctrine of the Holy Spirit (Wheaton, Ill.: Crossways Books, 2007), p. 284 en in).
Sihna pan atho kik ih Topa bang hang in ih tawisang ding thupi mahmah hiam? Eite ading a Zeisu hong sepsakna ngaihsun in. Ama tung ah aleibacip ihihi. Ih lungdamh koici lah thei ding ihi hiam? (Gentehna in, 2 Thesso. 1:11, 12 en in).

Ningani (Thursday) Jan. 12
Khasiangtho leh Khazih

Zeisu mi bang a hong pianna pen Khasiangtho nasep ahihi (Luke 1:34, 35). Zeisu amasuan vai ah sathau anilhpa zong ahihi. (Luke 3:21, 22). Tua sathau nilhna in Zeisu pen Messiah ahihna lak in a nasep masuan ah vangliatna pia a, a nungzuite Khasiangtho piathei sak hi. Khasiangtho in ze-etnate ah Zeisu thuakzo sak in makaih a (Mark 1:12; Matt. 4:1; Luke 4:1, 2:14) “ze-etna thuakte kiang ah Zeisu vahuh thei sak hi” (Heb. 2:18, NKJV; tawh 4:15, 16 saikaak in). Khasiangtho in gupkhiatna nasepna dingin vangliatna tawh ompih a (Heb. 9:14) Zeisu thawhkikna piang thei sak hi (1 Pet. 3:18). Hih vaite khempeuh ah Khasiangtho in muhlohna pan Zeisu huh in kilangh tak in piiding sak hi.
Luke 24:44-49; Gal. 5:16-23; leh Eph. 4:23, 24 sim in. Hih munte ah Khasiangtho’ nasep ih muh theih bangh om hiam? Khasiangtho in Zeisu koici vangg piak hiam?
__________________________________________________________________________________________________________________________________________________________________________________________
Khasiangtho in anuai a thute bangin Zeisu vangg pia hi:
1. Laisiangtho sung ah Ama thu muantaak suantaak cing takin hilh hi. Ih theih ding a kisamhlai leh makaih-khialhna cihte omlo hi. Upmuanna tak leh kipumpiakna tawh sim leng Ama kammal ah om kim hi.
2. Mihingte Zeisu Khazih' hotkhiatna sung ah makaih hi. Khasiangtho in mihingte‟ lungtangg leh ngaihsutnate ah damtak in na sem hi. Khalam thute atel nang un telsiamna pia a, Zeisu Khazih muang in, makai leh tanhkhiapa in sangnuam sak hi.
3. Eite sung ah Khazih' zialehtongg hong om hong neithei sak hi. Ih nuntakna ah Khazih bang diknate hong pia hi (Gal. 5:22, 23). Khazih sisan hangin mawhna tung ah gualzawhna ngah in (Mang. 12:11 saikaak) Khasiangtho in Pasian thupiak thukhamte sung ah hong kalsuan thei sak hi.
4. Khazih tawh kisunn in angsung khual lo, leh itna tawh midangte khualna hong neithei sak hi. Topa nasepna ah masuan tuam tek hong nei thei sak in Khazih‟ deihhuaina midangte hong hawmsawn thei sak hi.
Khazih zialehtongg banga ih nuntakna in Pa Pasian’ vangliatna koici kilat sak hiam?
______________________________________________________________

Kiginni (Friday) Jan. 13
Ngaihsut Beh Ding:

Topa tawh ih tonkhopna ah Khasiangtho nasep pen thupi takpi hi. Asep ih muh lian theih loh hangin eite leh midangte nuntakna ah asepna hong kilangh toto hi. Zeisu na upmuanna tungtawn in na nuntakna hong kikhel leh Khasiangtho nasepna tungtawn a kikhel ahihi. “Huih imuh theihloh hang in, agamtatna kimu in kithei hi. Tua bang mah in mihingte tung ah Khasiangtho nasepna pen tua hotkhiatna vang tawh aki sukhate' omzia in hong kilangh sak hi. Pasian Khasiangtho ih lungtang ah hong ten ciangin nuntakna hong puahpha hi. Mawhna tawh kipawl ngaihsutnatekipaikhia in siahuai gamtatnate pell in; itna, iniamkhiatna, leh lungmuanna in hehna, thangpaihna, leh kilemlohnate‟ mun luah hi. Dahnate lungdamna hong suak ding a, van khuavak ih maitangg ah hong kilangh ding hi.” - E.G. White, Khangcin Lunggulh, DA p. 173.
Hihte pen kamciam hoih mahmah te hi a, mi tampite in a taktunna lak khin uh hi. Ahi zongin Khasiangtho‟ nasep pen thakhat thu a piang pah bel hi lo hi. Ei zong ahoih adik kisuak pah tuan samlo hi. Upna tawh kipumpiakna icih pen nuntak sungteng a hanciamna, kipiakna, leh ih khialhnate ah kisiikna cih te ahihi. Khasiangtho in ih nuntakna ah na sem in, Khazih sung ah mi thak hong suaksak ding hi. Ahi zongin hih pen khantawnn vai hong suak hi. Ih khialhnate leh ih thanemnate in ih kipumpiak zawk nang thu hong phulkhia sak a, dawite‟n ih Christian nuntakna ah hong lungkiat sak khak zawhloh ding ahihi. Ih mawhnate in hong too ciang in, mawh neitetangg a Zeisu hong sihna iphawk den ding ahihi. Eite mawhnei ihih hang keek mah a, Ama hehpihna kitanggsamh in, eite ading a Zeisu‟ hong sihna in tua hehpihna hong pia ahihi.

Kikup Dingte:
1. Khasiangtho nasepzia etteh a, muh-khaklohna pan a asem thei dingin hong koici hilh thei ding hiam? Mite’ theihloh, muhloh, leh ngaihsut khak beek loh kawmkal a, Topa’ nasepna ah mapanna bangte khawng hiam?
2. Khasiangtho in Zeisu koici bang in tawisang a, mite mitsuatpi suaksak hiam? Nang ki pisakpen lo in Zeisu koici tawi’sang thei ding nahi hiam? Bang cia tua cih ding haksa mahmah theizel hiam? Mihingte kihihsak nopna koici do’ zo thei ding ihi hiam? 
&&&&&&&&&&&&&&OOOOOOOO0000000000&&&&&&&&&