“Pasian in Akhatna Hi”

March 18                                                                                                                              Croatia

Nipi 11 (1st Qtr, 2017)

“Pasian in Akhatna Hi”

Agen: Naum - (awsuah-Nawm)

            Naum in kum 7 a phaak lai-in a upna hangtakin a lah ngam ding kisam hi. Yugoslavia gam ah Sanini (Saturday) ni simin sang kikah hi. Naum in akum a moilai hangin Sabbath ni simin sang kah loh ding khensat hi. Sabbath ni nih sang a kah loh ciangin Naum pen thu a sit dingin thusit ding pawlkhat seh uh hi.

            A sang khaan sungah Naum hong lut ciangin kumpi zum pi pan thusit dingaa a kiseh mi (5) te’n a dang sangnaupangte paikhiasak uh hi. Sang khaan sungah kum (7) a phapan Naum pen sang makaipa, sangsia (2) leh uniform a silh palik bu nih te mai ah hangsan takin ding hi. Tua palik bu khat pen thukante hi sawnsawn lai hi.

            “ Banghangin Sanini (Saturday) ni-in sang kah lo na hiam?” ci-in thusit kipan ta hi.

            “ Banghanghiam cih leh Topa Pasian ka um a, Ama’ thukham (4)na tawh kituak in Sabbath ni sang akah lo ka hi hi. Ahang in Sabbath ni simin biakinn ah ka kikhawm hi,” ci-in Naum in dawngkik hi.

            Palikbupa in sal gega in, “ Hih sangpan in hong kitawpsak ding hi. Pilna a sin thei nawn lo ding na hi hi,” ci-in taai guapguap hi.

            Naum in zong, “Kei biakinn ah kikhawm ding hi ing, banghanghiam cih leh ka nuntakna ah Pasian pen a khatna ahi hi,” ci-in dawng pah lian hi.

            Palikbupa in, “ Na biakinn uah bang hih na hi hiam?” ci-in thusit hi. “ Lai Siangtho ka sim uh a, la sa in, thu ka ngen uh hi,” ci-in lauhet lo in Naum in dawngkik hi.

            “ La khat hong sa sin aw leh,” ci-in thusit te’n la sa sak uh hi.

            Naum zong la khat a sak khit ciangin kumpi lam pan thuneite tawh kimuhkhak hunpha hangin Topa tungah lungdam kohna nei hi. Tua baan ah cidam nading, kumpi te aading leh thu maantak leh limtakin thusit pawl, Pasian in a makaih nadingin thu nget sak hi.

Thu a nget khit ciangin, “ Na pa in Sanini (Sabbath) ni sangkah loh dingin hong sawl hiam? ci-in thusit pawl in dong hi. Naum in thumaantakin, “ Hong sawl kei” ci-in dawng kik hi. “ Hong sawl mah hi,” ci-in dawngkik zenzen leh a pa thongkia ding hi. Tua thu piang ding apa in thei ahih manin a tapa Sanini in sangkah lo dingin sawl ngei lo takpi hi.

            Thusitmi  (5) teng tawmvei sung dai dide uh hi. Tua khit a sawt loin, “ Sang kah thei lai ding maw, kah thei nawn lo ding cih hong kitheisak ding hi,” ci-in thakhatthu in thusit (5)te in Naum tungah gen uh hi.

            Naum zong a thupiangteng a nu leh a pa gen dingin inn ah hong ciah pah hi. “Ka nu leh ka pa in bel ka khensat ding thu thei khin uh hi,” ci-in Naum in gen hi.

            Thusit (5) te tung pan bangmah theihsakna omlo ahihmanin Sanini (Sabbath) ni lo buang Naum zong sang hong kahkik hi. Tan (4) sang hong zawh ciangin Naum in a sangkah zom thei nawn lo hi, banghanghiam cihleh amah in Sanini (Sabbath) ni sang kah ngiat lodingin khensat hi. Tua ahih manin kum (15) a phaak ciangin lo ah hunbit in a pa tawh nasep ding hong kipan ta hi.

            Ahi zongin Topa Pasian in Naum aadingin geelna khat na nei gige hi. Ama’ teenna gam ah Seventh-day Adventist pawlpi in a phuh tan (8) sang om ngelngel ding hi cih upna khat nei gige hi.

            “ Yugoslavian Union pan ka sanggamte khat uh hong hawh in Adventist tan (8) sang a sawt loin kihong ding hi cih thu hong gen ciangin ka lawp mahmah uh hi,” ci-in Naum in lawptakin gen hi.

            Sangnaupang 45 tawh 1969 kum in Marusevek ah tua sang kihong hi. “ Hih tan (10) sang a ki hon ding pen kei aadingin thulamdangpi khat hi. Pasian’ hong vaihawm sak hi,” ci-in Naum in awng liang in gen hi. “ Ko pen khang masa hi ung. Ellen G White gelh, Pilna thu’ (Education) bu pen sangsiate in hong sin pih a, a hoih pen pilna ka ngah uh hi,” ci thuah lai hi.

            Ka sang uh pen kumpi ciaptehna ngah lo ahihmanin gam kumpi in Laivuanpi ciangin vuanding hong piak nam (17) te a om loh a phamawh ahi hi.

            “ Hih Laivuanpi pen baih hetlo hi, ahi zongin kum (4) a cin ciangin kumpi sang ah a kah sangnaupangte’ sangin mattam ka ngah zaw uh hi. Ka gam uh Yugoslavia ah a hoihpen sang in hong kiciamteh hi,” ci-in lawp takin Naum in gen hi.

            Hih tan (10) sang pan a on ciangin Piantit leh Latin kampau asinna, Lagreb khuapi ah a kiphut pilna sangpi (University) ah pilna hong zom hi. Tua sangpi (University) pan hong zawh ciangin nasep nam (2) ngah hi. Nasep khat pen kumpi lampan hi a, amun saang zaa kipia in ngah theih hamphatnate zong om hi. Adang nasep pen Marusavek Adventist sangpi ah sangsia sep ding ahihi.

            Kumpi thuneite tawh a kimuhna ah Naum in, “Adventist khat ka hihlam hong thei uh teh Sanini (Sabbath) ni simin biakinn ah kikhawm ding hi ing. Banghangin hih zaa ah a seem dingin hong sam na hi uh hiam?” ci-in dong hi.

            “ Kongsapna uh ahangpen, gam thu ah mi citak tawm lua ahih manin nang sang a, a citak naseem kisam hi ung,” ci-in kumpi thuneite in dawng kik uh hi.

            “ Lungdam mahmah hi.  Ahi zongin, Marusevek Adventist sangpi ah sangsia sep ding saang khin ing,” ci-in Naum in zong lungkia hetlo in dawng kik hi.

            Kum tampi sungmah Naum in Marusevek Adventist sangpi ah sangnaupangte Piantit leh Latin pau hilh bek loin tawntung nuntakna thu zong hilhbeh lai hi.

            “ Pasian leh Gupkhiatna - Hih thunih te ka sangnaupangte sin ding ka lunggulh masak bel ahi hi. Tua khit ciangin thu tuamtuam theihna, nuntakna pen a thupi ngaihsut ding uh zong ka deihsak hi. Nuntakna ah lung bang aa, a nungta ding hilo hi. Hunte manpha mahmah hi,” ci-in Naum in veitakin gen hi.

            Tuni-in, sangnaupang atamzaw pen Adventist ahi nailote, leh milimbia innkuan pan hong kah uh ahih manin Naum in Marusevek Adventist sangpi pen Pasian’ thumaan taangkona phualpi bangin ngaihsun hi.

            “ Ih Adventist sangpi a kiphut ding leh a khantohtoh nading ahang thuhoih mahmah khat om hi. Teci pan ngam nading thusinna hih sangpi ah om hi,” ci-in Naum in khuamuhna tawh gen hi. Leitung akoi lai mun ah Adventist ahi nai lo snagnaupang (200) te nitaksim, nisim, Sabbath sim in Topa Pasian thu sin uh hiam”.

            Tu kuata Sabbath (13)na sumpi tawh a pualam phaak zawh nadingin Croatia gam aa om Marusevek Adventist sangpi aading nong huh uh lungdam mahmah hi. Pasian in a zah tampi thupha tawh hong thuhsak ta hen! Amen.

***************