Amah kia peuh anuinui theite, kuamah tawh kiho lopi aa apaupau theite, niiklehpuan deihlo aa guaktang peuh aa avaakvaak te, ahih kei leh pauthei vetlo aa khutviik tawh kilakaa aki hopihte mihai ih ci kha hi. Atatak in tuabang mite pen ahai ahi kei uh aa apiang khial, apoi hizaw uh aa ahai ahi kei uhhi. Laisiangtho in mihai acihte eite mihai cihte tawh kibang lo hi. Laisiangtho' gen mihai ihhih khak loh ding leitung vantungah thupi pen hi.
Ahai mihaupa 'haina atomin ensukleeng bang mun ah mihaupa hai hiam? A hauhna ah maw?: Luka 12 sungaa mipa pen anhau ahihlam kimu hi. A an hauhna pen haina hilo hi. Lokhawh dan thei/siam ahih manin an ahau hizaw aa apil hizaw hi. Ih paunaak in "kazaw'n in honghaisak" naci bek aa kahauh in hong hai sak cilo hi. Tua hi aa hih mipa mihai angahna pen ahauh mah hilo hi.
A kikhualna ah maw?: Hihpa in an hau lua ahih manin a ansaalte phelsawm aa agol zaw ansaalte lamh ding geelna nei hi. Kikhual mahmah hi. A anneih teng koihna kician nei mello in a inntual khawngah sung venvan mawk leh sia ding, thelthang ding cih thei ahih manin ansaal golzaw lamh ding gelna neihi. Tua manin ahai hilo in apil hizaw hi. Ih paunaak mah in "sakhi in zong atatna'ng kuamkua khual" anacih bangin ih nuntaak sungin kikhual ding ahi hi. Gelkholh ding mah ahi hi. Tua hi aa hi mipa' haina pen akikhualna hilo hi.
Nuntaakna ei' khutsung aa om ihsakkhakna pen haina taktak ahi hi: Mihaupa in anuntaakna nopzat in,"nene in, dawndawn in, gualnuam in ka kiciding hi" cihciangbek angaihsutna panin mihai zaa ngah lian hi. Anuntaakna pen ama' khutsungaa om sakha hi. Leitung hauhna le kikhualna aneih nate tawh mihai zaa ngahlo napi tomno sung khat nopsakna ding bek angaihsutna hangin mihai kici hi.
Hihte khempeuh sa'ngin amasa zaw ding khat om aa, tua pen Pasian' gam le ama' dikna zon masak ding ahi hi. (Mate 6:33) Hihpen hauhna taktak leh kikhualna taktak ahi hi. Pasian theisa aa hau ihhihkei leh ih hauh hangin "mihaipa" mah ih hi hi. Pasian theisa aa kikhual ih hihkei leh nih kikhual hangin "mihaipa" mah ihhi veve hi. Nuntaakna ei'khut sungah omlo ahih manin hauhna taktak leh kikhualna taktak ih zon masak ding athupi pen ahi hi.
Upa Go Lam Kim
Zo Phualva Thupuak - Volume 01, Issue 14 by DavidLian on Scribd
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.