KHUADO PAWI LEH PASIAN’ THU

Mun khempeuh a om kongit Zomi, sanggam u leh nau, nu leh pa akua mapeuh aw, kumsim a ih neih, ih Khuado pawi hong tungkik ding hi ta hi. Nite, khate, khuahunte hong kikheelkheel a, Khuado pawi hong tun zel mah bangiin, ih ngaklah mahmah ih Topa Jesu hong kumkik hun ding zong ih upcil lai sanggiin hong naizawtham ta hi. Tua ahih maniin, tukum Khuado pawi, nuamtak a ih bawlkawmin, ih Pasian thu zuihna tawh kisai a, ih phutkhak, ih tuahkhak dingg thute lungngaikhawm dih ni. Ih Zo ngeina Khuado pawi a thupina ih mangngilh loh nadinggiin, ih manthansak khak loh nanggiin, anuai a “Khuado pawi leh Pasian’ thu” enkak khawm ciat ni. A telsiam dinggiin Topa’n thupha hong pia ta hen.
Ih pu ih pate in, nakhat pepeuh asep uh ciangiin, ngimna leh deihna nei lopi-iin, sem ngei lo uh hi. Mai lam nuntak nading ahi zongiin, sihkhit ciang ading ahi zongiin, ngimna leh tupna na nei tawntung uh hi. Ih Zo ngeina pawite abawl/ khaam uh ciangiin zong, leitunga a nungta lai teng bek hi loiin, asisa pu leh pi, nu leh pa, sanggam u leh naute mah kho/ sam/ko hamtang uh hi. Tua mah banginn, “Khuado pawi” hun ciangiin zong, “Khuazing pasian, Khuavak Pasian” leh asisa it leh ngaih teng tawh ankuang umkhopna leh hong bawlsia thei, dawihang, kauhangte nawhkhiatna huniin kizang hi. Anlak khitlim a, kibawl pawi hi a, nek leh dawn kicingiin, nuam kisa mahmah hi.
Hih ih Zo ngeina Khuado pawi leh “Pasian’ thu” a ki mematna a tomiin en leng:
1. Khuado pawi in, “Anlak pawi” hi a, Khalam thu ah, “Rapture” kici, Topa Jesu hong paikik ni (Second Coming)cianga, asi, ahing mi Siangthote lak tohna “Kha anlak pawi” tawh a kibang ahi hi. (Feast of Harvest).
2. Hih Khuado pawi ah, asi leh ahingte a kihelkhop mah bangin, Kha anlak pawi ah zong, thu-um asisate leh ahinglaite kikhel a, sih theihna pumpi pan, sih theih nawn lohna pumpi silhin, (mortal to immortal) lungdam pawikhaam ni ahi hi.
3. Khuado pawi in, asisate leh ahinglaite ki pawlkhawm a, an-gui, an-gah hong pia, hong siam Pasian tungah lungdam kohkhopna ahih mah bangin, Khalam thu ah zong, vantung gam ah, asisa leh ahinglai thu-um kikhelte, kum kum tulkhat sung, (Kum 1000 maanna) lungdam kohna pawi tawh a kibang ahi hi.
4. Khuado pawi in, hong bawlsia thei, dawi gilo, kau gilote nawhkhiatna pawi ahih mah bangin, Khalam thu ah zong, ih galpa ahi, Dawimangpa leh apawlte’n khumcipna thuak a, taw neilo kuam (Bottomless Pit) sungah kum tul khat (kum 1000) sung, kikhiatna tawh a kibang ahi hi.
5. Khuado pawi abawl/khaamte thupha ngah ahih bangmahiin, Khalam thu ah hih Kha anlak pawi pen, “amasa thawhkikna”hi a, nihna sihna in, neukha beek sukha lo ding ahih maniin, thupha ngah taktak mi ahi uh hi.(Lai siangtho etkak dingte: Jer. 8:20, Matt. 13:30,39, Mk. 4:35b, I Thess. 4:13-17, Rev. 14:15; 20:2,3,4,5,6).
6. Hih Khuado pawi in, innsung, huangsung a om, dawi leh kaute nawhkhiat, hawlkhiatna pawi hi a, “Inn siansuahna pawi”ahi hi. Tua mah bangiin, Khalam thu ah zong, gumpa Topa Jesu hong paikik ni cianga dingiin, a kigingkholsa ih hih theih nadingiin, ih sunga om, mawhnate ahi, hoihlo ngaihsutna, numei tawh mawhna, mi’sum gukna, mi thahna, mi’ zi tungah mawhna, huaihamna, gitlohna, mi khemna, kihhuai deihna, eenna, mi gensiatna, ki phatsakna, mawktatnate a kipan duhhop huaiham, angsung khualnate, nawhkhia hawlkhia a, ih Topa Jesu dawn dingin, a kiging kholsa a ih om ding hong phawk sak hi. Mk. 7:21-23.
7. Tua banah, hih Khuado pawi pen, Kumcin pawi hilo, “Kumkhen pawi,” zong kici ahih mah bangin, khua hun khat leh khat kikhenna ahi hi. Tuk hun bei-in, Phalbi hun hong tung ding hita hi. Tua mah bangiin Khalam thu ah, ni khat ni ciangiin, hih ih tenna leitung hun bei ta dinga, thu-um mite in, nuntak tawntungna mun luah ta ding, hih leitung mangpha khak ta ding, sihna natna, anduh gilkiall dangtakkna a om nawn lohna munthak aluah ding ih hihna zong hong phawk sak hi. Tua dingiin haksa pipi, nei lo pipi-iin, “Khuado pawi” ahahbawl mahmah ihhi hi. Khuado pawi simin, hih thute aphawktel thei tek dingiin, Topa’n thupha hong pia ta hen. Rev. 2 

Rev. Dr. Cin Sian Pau,

Zo Phualva Thupuak - Volume 01, Issue 15 by DavidLian on Scribd